?Jisas i Joen Long Politik?

OL MAN we oli raetem stori blong Jisas, oli tokbaot samting we ol man oli mekem blong traem pulum Jisas blong joen long politik. Smoltaem afta we Jisas i baptaes, Setan i talem se bambae hem i givim paoa long Jisas blong i rulum wol. Biaen, ol man oli wantem putumap hem i king. Long wan narafala taem bakegen, ol man oli traem pulum hem blong i sapotem wan pati blong politik. ?Jisas i mekem wanem?

?Hem i rulum wol? Ol buk blong Baebol we oli tokbaot stori blong Jisas, oli talem se Setan i soemaot “olgeta kantri long wol” long Jisas. Hem i talem se bambae hem i givim olgeta long Jisas. Yu traem tingbaot sipos Jisas i rulum wol. Hem i save mekem plante gudfala samting blong givhan long ol man we oli harem nogud. Be Jisas i talem no long Setan. Wan man we i ting se gavman i save givhan long ol man, bambae i no save talem no olsem we Jisas i mekem.—Matiu 4:8-11.

?Hem i king? Long taem blong Jisas, plante man oli wantem wan king we i save winim hadtaem we oli kasem long saed blong mane mo politik. Ol man oli glad long ol samting we Jisas i mekem, nao oli wantem se hem i kam king blong olgeta. ?Wanem tingting blong Jisas? Jon i talem se: “Jisas i save we ol man ya oli wantem kam tekem hem blong fosem hem, blong i kam King blong olgeta. Nao hem i aot long olgeta, i go wokbaot long hil, hem wan.” (Jon 6:10-15) I klia nomo we Jisas i no wantem joen long politik.

?Hem i sapotem wan pati blong politik? Sam dei bifo we Jisas i ded, ol man blong ol Farisi oli kam luk Jisas. Olgeta ya oli no wantem stap aninit long gavman blong Rom. Oli kam wetem ol man we oli joen long pati blong gavman blong Rom. Oli wantem fosem Jisas blong hem i sapotem wan pati. Oli askem long hem sipos i stret we ol man Jiu oli pem takis long gavman blong Rom.

Mak i raetemdaon ansa blong Jisas, i talem se: “‘?Weswe yufala i stap traem mi? Yufala i tekem wan mane i kam, blong mi mi luk.’ Nao oli tekem wan mane i kam, mo hem i askem long olgeta se, ‘?Fes ya i fes blong hu? ?Mo nem ya i nem blong hu?’ Olgeta oli talem se, ‘Fes blong Sisa ya, mo nem blong hem tu.’ Nao Jisas i talem long olgeta  se, ‘Samting we i blong Sisa, yufala i givimbak long Sisa. Mo samting we i blong God, yufala i givimbak long God.’” (Mak 12:13-17) Wan buk (Church and State—The Story of Two Kingdoms) i tokbaot from wanem Jisas i ansa olsemia. Buk ya i talem se Jisas i no wantem kam wan bigman blong gavman. Mo Jisas i soemaot klia se i gat ol loa blong gavman we yumi mas folem, mo i gat ol loa blong God we yumi mas folem.

Jisas i sore long ol puaman. Hem i harem nogud we sam man oli gat kruked fasin mo oli mekem i no stret long ol narafala. Baebol i talem se Jisas i sore tumas long ol man we oli trabol mo oli harem nogud. (Mak 6:33, 34) Nating se i olsem, Jisas i no traem finisim ol nogud fasin long taem ya. Mo nating se samfala oli traehad blong pulum hem blong i joen long politik, be hem i no wantem.

Ol stori ya oli soemaot klia se Jisas i no joen nating long politik. ?Be olsem wanem long ol Kristin tede? ?I stret blong olgeta i joen long politik?