Fasin Blong Man Wetem Woman Ansa Blong Ten Kwestin

1 ?Adam mo Iv tufala i mekem sin long garen blong Iden taem tufala i slip wanples?

▪ Ansa: Plante man oli ting se frut long garen blong Iden, we God i blokem se i tabu, i blong minim fasin blong Adam mo Iv blong slip wanples. Be hemia i no wanem we Baebol i tijim.

Yu traem tingbaot samting ya. Bifo we God i mekem Iv, God i talem long Adam se i no mas kakae frut blong ‘tri ya we frut blong hem i save mekem Adam i save ol fasin we i gud, mo ol fasin we i nogud.’ (Jenesis 2:15-18) Adam i stap hem wan nomo. Taswe, God i no stap tokbaot fasin blong man wetem woman. Biaen, God i talem klia long Adam mo Iv se tufala i mas ‘gat plante pikinini blong tufala, blong olgeta we bambae oli kamaot biaen long tufala, bambae oli save go stap long olgeta ples long wol.’ (Jenesis 1:28) ?Olsem wanem? ?Yu ting se God bambae i talem long fas man mo woman se tufala i mas “gat plante pikinini,” nao biaen i kilim tufala i ded from we tufala i slip wanples? Tufala i mas slip wanples blong tufala i gat plante pikinini olsem we God i talem.—1 Jon 4:8.

Yumi save tingbaot tu se ol olfala hanraet blong Baebol, i soemaot we Iv i no stap wetem man blong hem taem “hem i tekem sam frut blong tri ya, i kakae.” Biaen nomo, hem i “givim long man blong hem, mo man blong hem tu i kakae.”—Jenesis 3:6.

God i no tok long Adam mo Iv taem tufala i slip wanples. (Jenesis 4:1, 2) Yes, frut ya we Adam mo Iv tufala i kakae i no minim fasin blong tufala blong slip wanples. Be frut ya i prapa frut blong wan tri.

2 ?Baebol i talem se i tabu blong man mo woman i harem gud blong slip wanples?

▪ Ansa: Fas buk blong Baebol i soemaot se God i mekem tu man nomo, “wan we i man mo wan we i woman.” God i talem se ol wok we hem i mekem oli “gud we i gud tumas.” (Jenesis 1:27, 31) Biaen, God i pulum wan man blong i raetem long Baebol, ol tok we i go long man we i mared se: “Oltaem yu mas lavem woman blong yu, mo oltaem yu mas harem gud blong stap wetem hem. . . . Yu mas letem hem nomo i mekem yu yu harem gud oltaem.” (Ol Proveb 5:18, 19) I klia nomo we Baebol i no talem se i tabu blong man mo woman i harem gud blong slip wanples.

 God i mekem bodi blong man mo woman long wan fasin we tufala i save mekem pikinini. Mo taem tufala we i mared, tufala i slip wanples, tufala i save soemaot we tufala i lavem tufala, mo tufala tugeta i harem gud long tufala. Tufala i harem gud long tingting mo long filing blong tufala.

3 ?Baebol i agri long man mo woman we tufala i stap wanples, be tufala i no mared folem loa?

▪ Ansa: Baebol i talem klia se “God bambae i jajem boe mo gel we tufala i slip wanples.” (Hibrus 13:4) Grik tok ya por·neiʹa we oli tanem i kam “boe mo gel we tufala i slip wanples,” i minim olgeta doti fasin blong man mo woman we tufala i no mared. * Taswe, long tingting blong God, i nogud blong man mo woman we tufala i no mared, tufala i stap wanples, nating se tufala i stap plan blong mared.

Nating sipos wan man mo wan woman tufala i lavem tufala tumas, God i talem se tufala i mas mared, bifo we tufala i harem gud blong slip wanples. God nao i mekem yumi long fasin we yumi save lavem narafala. Stamba fasin blong God hemia blong lavem man. Yes, taem God i talem se man mo woman we i mared, tufala nomo i save harem gud blong slip wanples, hemia i no blong nating. I gat gudfala risen from wanem hem i talem olsem. Bambae yumi luk risen ya long haf we i kam biaen.

4 ?I stret blong man i mared long plante woman wantaem?

▪ Ansa: Long taem bifo, God i letem ol man oli mared long plante woman wantaem. (Jenesis 4:19; 16:1-4; 29:18–30:24) Be fasin ya we man i mared long plante woman wantaem, i no kamaot long God. Hem i givim wan woman nomo long Adam.

God i givim tok long Jisas blong i talemaot bakegen stamba tingting blong Hem, hemia se man i mas mared long wan woman nomo. (Jon 8:28) Jisas i talem se: “God we i mekem olgeta samting, fastaem, hem i mekem tu man nomo, wan we i man, wetem wan we i woman. Nao hem i talem se, ‘From samting ya, bambae man i mas aot long papa mo mama blong hem, i mas go joen wetem woman blong hem. Nao tufala bambae i kam olsem wan bodi nomo.’”—Matiu 19:4, 5.

Biaen, God i pulum wan disaepol blong Jisas blong raetem se: “I stret nomo blong man i gat woman blong hem, mo woman i gat man  blong hem.” (1 Korin 7:2) Mo Baebol i talem se sipos man we i mared, hem i wantem kasem wok long Kristin kongregesen, “hem i mas gat wan woman blong hem nomo.”—1 Timoti 3:2, 12.

5 ?I rong blong man mo woman we i mared, tufala i yusum sam samting blong blokem pikinini?

▪ Ansa: Jisas i no talem long ol man blong hem se oli mas gat pikinini. Ol man blong hem tu oli no talem se ol Kristin oli mas gat pikinini. I no gat wan ples long Baebol we i talem se i nogud blong yusum sam samting blong blokem pikinini.

Taswe, ol man mo woman we i mared, oli save jusum sipos oli wantem gat pikinini no nogat. Maet oli mekem desisen se bambae oli gat hamas pikinini, mo wetaem bambae oli gat ol pikinini ya. Man mo woman we i mared, tufala i mas mekem prapa desisen blong tufala se bambae tufala i yusum sam samting blong blokem pikinini, no nogat. Ol narafala oli no mas tingting nogud long tufala from desisen we tufala i mekem. * Be tufala i no mas jusum ol samting we oli save kilim pikinini we i stat blong gru long bel blong mama.—Rom 14:4, 10-13.

6 ?I rong blong kilim pikinini long bel?

▪ Ansa: Long tingting blong God, laef i tabu. Nating se pikinini i jes stat blong gru long bel blong mama, be hem i wan man finis. (Ol Sam 139:16) God i talem se bambae hem i jajem man we i kilim pikinini long bel. Yes, God i luk se man we i kilim pikinini long bel, hem i sem mak olsem man we i kilim wan narafala man i ded.—Eksodas 20:13; 21:22, 23, King James Version.

?Be olsem wanem sipos i gat wan problem taem mama i stap bonem pikinini, nao wan long tufala nomo i save laef? Long taem olsem, papa mo mama blong pikinini ya, tufala i mas jusum se mama no pikinini bambae i laef. *

7 ?Baebol i talem se man mo woman we i mared, tufala i save divos?

▪ Ansa: Yes, Baebol i talem se man mo woman we i mared tufala i save divos. Be Jisas i talem se i gat wan risen nomo we i stret blong tufala i save divos, hemia sipos wan long tufala i slip wetem narafala man no woman. Jisas i talem se: “Mi mi talem long yufala, sipos wan man i mekem divos long woman blong hem, we woman ya i no bin slip wetem narafala man, nao man ya i go mared long narafala woman, man ya i mekem sin.”—Matiu 19:9.

God i no laekem nating taem man i divos long woman blong hem from we hem nomo i wantem. Bambae God i jajem olgeta we oli lego man no woman blong olgeta, speseli sipos oli mekem olsem from we oli wantem stap wetem narafala man no woman.—Malakae 2:13-16; Mak 10:9.

  8 ?God i glad long man we i slip wetem man, mo woman we i slip wetem woman?

▪ Ansa: Baebol i tok agens long ol doti fasin blong man mo woman we tufala i no mared. Hemia i minim tu ol doti fasin we man i mekem wetem man mo we woman i mekem wetem woman. (Rom 1:26, 27; Galesia 5:19-21) Baebol i soemaot klia se God i no laekem ol fasin ya. Be yumi save se ‘God i lavem tumas ol man long wol, nao hem i givim stret Pikinini blong hem, wan nomo we hem i gat, blong olgeta man we oli bilif long Pikinini ya bambae oli no save lus, oli gat laef we i no save finis.’—Jon 3:16.

I tru, ol Kristin oli no laekem fasin ya we man i slip wetem man mo woman i slip wetem woman. Be ol tru Kristin oli soemaot kaen fasin long olgeta man. (Matiu 7:12) God i wantem se yumi “ona long olgeta man.” Taswe, ol tru Kristin oli no mas spolem man we i slip wetem man mo woman we i slip wetem woman.—1 Pita 2:17.

9 ?Olsem wanem long fasin blong yusum mobaelfon mo Intenet blong mekem nogud wetem narafala?

▪ Ansa: Taem sam man oli toktok wetem narafala long mobaelfon, oli tokbaot ol doti fasin blong man wetem woman, no oli lesin long man mo woman we tufala i stap slip wanples (phone sex). Sam man oli yusum mobaelfon blong sanem ol mesej blong talem ol rabis tok long narafala, mo blong sanem ol rabis pija blong man wetem woman long narafala (sexting). Samfala oli yusum Intenet blong tokbaot fasin blong man wetem woman mo blong sanem ol rabis pija (cybersex).

Baebol i no tokbaot ol fasin ya stret. Be Baebol i talem se: “From we yufala i tabu, mo yufala i man blong God, i no stret nating blong yufala i stap tokbaot ol rabis fasin. Fasin we man i ronem woman, mo ol fasin nogud blong man wetem woman mo ol narafala krangke fasin olsem, mo fasin blong man we i wantem evri samting, bambae yufala i no tokbaot. Mo i no stret blong yufala i yusum ol rabis tok we i save mekem man i sem, mo ol tok we i save mekem man i harem nogud, mo ol tok plei we i nogud.” (Efesas 5:3, 4) Ol fasin ya blong yusum mobaelfon mo Intenet blong mekem nogud wetem narafala, i pulum ol man mo woman blong oli tingting long ol nogud fasin, mo i pulum olgeta blong oli mekem nogud fasin wetem narafala man no woman. Ol fasin ya oli no givhan long ol man mo woman blong oli bos long filing blong olgeta. Defren olgeta hemia i pulum olgeta blong mekem enikaen fasin we olgeta nomo oli wantem.

10 ?I stret blong man no woman i pleplei wetem tabu haf blong bodi blong hem?

▪ Ansa: Taem man no woman i pleplei wetem tabu haf blong bodi blong hem, hemia i mekem se hem i gat sem filing olsem man mo woman we i slip wanples. Baebol i no tokbaot fasin ya stret. Be Baebol i talem long ol Kristin se: “Yufala i mas kilimaot ol fasin ya blong yufala, we oli blong wol ya nomo. Hemia ol fasin olsem. Ol man oli stap mekem nogud wetem woman, ol woman oli stap mekem nogud wetem man, mo olgeta oli stap mekem ol samting blong sem. Ol man oli stap wantem woman tumas, [mo] ol woman oli stap wantem man tumas.”—Kolosi 3:5.

Fasin ya we man no woman i pleplei wetem tabu haf blong bodi blong hem, i mekem se hem i stap tingting long ol nogud fasin. Hem i stap tingbaot blong mekem hem wan nomo i harem gud. Baebol i promes se God i save givim “paoa ya we i bigwan tumas” long olgeta we oli traehad blong lego nogud fasin ya.—2 Korin 4:7; Filipae 4:13, NW.

[Ol futnot]