2 God i No Stap Tingbaot Ol Man—?Hemia i Tru?

?Yu yu harem tok ya finis?: “Sipos God i tingbaot ol man, bambae hem i no save letem rabis fasin i stap long wol, mo hem i no save letem ol man oli safa. Mo nating sipos sam man oli talem se God i stap tingbaot ol man long wol, be mi no ting se hem i wari long mi.”

?Baebol i tijim wanem?: Jehova God i no stamba blong ol rabis fasin. (Jemes 1:13) I tru se God i naf blong finisim ol rabis fasin enitaem nomo. Be i gat wan kwestin we hem i mas letem ol man oli faenem ansa blong hem fastaem. Setan nao i bin stanemap kwestin ya taem hem i tok agensem God, se God i no gat raet blong rulum ol man. Ale, God i mas letem taem i pas blong ol man oli luksave hu i gat raet blong rulum ol man. Biaen, God bambae i mekem i gud long ol man. Bambae hem i finisim ol trabol we ol man oli mekem from we oli no wantem se God i rulum olgeta.—Jenesis 3:1-6; Aesea 65:17. *

God i tingbaot olgeta man long wol, be hem i tingbaot ol man wanwan tu, mo hem i lavem olgeta tumas. Matiu 10:29-31 i soemaot we God i save gud yumi. Hem i save sam samting long saed blong yumi, we yumi no save samting ya nating: “Ol smosmol pijin ya we man i stap salem sikisti vatu long tu, be sipos Papa blong yufala i no letem, i no gat wan long olgeta we i save foldaon long graon. Yufala i luk. Ol hea blong hed blong yufala, be hem i kaontem evriwan. From samting ya, yufala i no fraet. Long fes blong hem, yufala i gud moa, i winim plante smolfala pijin ya.”

?Trutok ya i save givhan long yu olsem wanem?: Taem wan man i mekem i strong long yumi mo i no kea, yumi no wantem kam klosap long hem. Giaman tingting ya se God i no stap tingbaot ol man, i mekem we plante man oli no wantem kam klosap long God, no maet oli kam long hem nomo taem oli kasem bigfala trabol. Taem yu save se Jehova God i tingbaot yu, samting ya i save pulum yu blong yu wantem save hem moa, mo yu wantem kam fren blong hem.

Yu traem tingbaot. Taem yu prea long God, ?samtaem yu gat tingting ya se maet hem i no stap lesin long yu, no maet hem i no save ansa long yu? Baebol i talem klia long yumi se God i “stap harem ol prea” blong yumi. Mo hem i rere oltaem blong lesin long ol man we oli prea long hem long fulhat blong olgeta.—Ol Sam 65:2.

God i talem long yu se yu ‘mas putum ol trabol blong yu long han blong hem, from we oltaem hem i stap tingbaot yu.’ (1 Pita 5:7) Long taem we yu harem nogud bitim mak, yu save trastem God se hem i stap tingbaot yu, from we Baebol i talem se: “[Hae God] i stap klosap long ol man we tingting blong olgeta i kam nogud, i stap sevem ol man we tingting blong olgeta i foldaon olgeta.”—Ol Sam 34:18.

[Futnot]

[Tok blong makem poen long pej 5]

Sipos God i no stap tingbaot yumi, ?from wanem hem i wantem we yumi prea long hem?