Rod Blong Winim Ol Problem We Oli Kasem Plante Mared

BAEBOL i no talem se bambae i isi long man mo woman blong mekem mared blong tufala i stap gud. God i pulum aposol Pol blong raetem se ol man mo woman we oli mared, bambae “oli gat trabol long laef blong olgeta.” (1 Korin 7:28) Be man mo woman we i mared, tufala i save mekem plante samting blong ol trabol ya oli no kam plante tumas, mo blong mekem se glad blong tufala i kam bigwan moa. Bambae yumi tokbaot sikis problem we oli kasem plante man mo woman we oli mared, mo bambae yumi luk se Baebol i save givhan long yumi taem yumi folem ol rul blong hem.

1

PROBLEM:

“Mitufala i no moa fren gud olsem fastaem.”

RUL BLONG BAEBOL:

“Yufala i mas jusumaot ol samting we oli impoten moa.”—FILIPAE 1:10, NW.

Mared blong yu i wan long ol samting long laef blong yu we i impoten moa. I stret we yu tingbaot man no woman blong yu fastaem long ol narafala samting. Taswe i gud yu lukluk long program blong yu, maet hemia nao wan risen we yutufala i no moa fren gud tugeta. Yu no mas letem ol samting we yu stap mekem evri dei oli blokem yu blong spenem taem wetem woman (man) blong yu, nao i olsem se yu yu gat laef blong yu mo woman (man) blong yu i gat laef blong hem. I tru se samtaem, wok blong yu mo sam narafala samting oli save mekem se yu mas stap longwe long woman (man) blong yu blong smoltaem. Be i gat plante narafala samting we yu save bos  long olgeta. Yu save bos long taem we yu spenem blong mekem ol samting we yu laekem, mo yu save bos long taem we yu spenem wetem ol fren blong yu.

Be sam man mo woman we oli mared, oli agri blong wok moa no oli mekem plante moa samting we oli laekem. Hemia from we oli no wantem spenem taem wetem woman no man blong olgeta. Sipos man mo woman tufala i mekem olsem, tufala i stap minim nomo blong no moa fren gud, tufala i stap ronwe long ol problem blong tufala. Sipos yu mo woman (man) blong yu i mekem olsem, yutufala i mas luksave ol samting we oli stamba blong ol problem blong yutufala mo stretem olgeta. Yu mas spenem taem wetem woman (man) blong yu, ale bambae yutufala i fren gud tugeta mo “kam olsem wan bodi nomo.”—Jenesis 2:24.

Samting we samfala oli mekem blong folem rul ya: Andrew * mo Tanji, tufala i mared 10 yia. Tufala i blong Ostrelia. Andrew i talem se: “Wan samting we mi lanem, hemia se taem mi mi wok tumas mo mi spenem tumas taem wetem ol fren blong mi, samting ya i spolem mared blong mi. Taswe, mi mo woman blong mi, mitufala i putum wan taem we mitufala i toktok tugeta mo talemaot tingting blong mitufala.”

Dave mo Jane tufala i stap long Yunaeted Stet, mo tufala i mared 22 yia finis. Evri sapa, tufala i storian tugeta haf aoa mo tufala i talemaot tingting blong tufala. Jane i talem se: “Mitufala i tinghevi long plan ya, mekem se mitufala i no letem wan samting i blokem mitufala long plan ya.”

2

PROBLEM:

“Mi no moa kasem samting we mi wantem long mared blong mitufala.”

RUL BLONG BAEBOL:

“I nogud man i stap lukaot rod we i save givhan long hem nomo. Yumi mas lukaot rod we i save givhan long ol narafala man tu we oli stap raonabaot long yumi.”—1 KORIN 10:24.

Man no woman we i stap tingbaot samting we hem i save kasem long mared blong hem, hem bambae i no save glad, nating se hem i mared bakegen mo bakegen. Mared i wok gud taem man i tingbaot samting we hem i givim long woman blong hem, mo woman i tingbaot samting we hem i givim long man blong hem. Taem tufala tugeta i gat tingting olsem, mared blong tufala i wok gud moa i bitim we tufala i tingbaot samting we tufala i save kasem long mared blong tufala. Jisas i talem se: “Man we i stap givim presen i go, hem i save harem gud moa, i winim man we i stap kasem presen blong hem.”—Ol Wok 20:35.

 Samting we samfala oli mekem blong folem rul ya: Maria mo Martin tufala i stap long Meksiko, mo tufala i mared 39 yia finis. Be samtaem tufala i kasem trabol long mared blong tufala. Tufala i tingbaot wan taem olsem, mo Maria i talem se: “Wan taem we mitufala i rao bigwan, mi sakem sam tok long Martin we oli no soemaot respek nating. Biaen hem i kros we i kros. Mi traem eksplenem long hem se mi no minim blong talem ol tok ya, be hemia from we mi kros nomo. Nating se i olsem, hem i no wantem save.” Martin i talem se: “Long taem ya we mitufala i rao, mi mi ting se mitufala i no moa save stap tugeta, mo i blong nating nomo we mi stap traehad blong mekem mared blong mitufala i wok gud.”

Martin i wantem se woman blong hem i respektem hem, mo Maria i wantem se Martin i kasem save long hem. Tufala i no kasem samting we tufala i wantem.

?Tufala i mekem wanem blong winim problem ya? Martin i talem se: “Mi mi wet kasem taem we kros blong mi i godaon, mo mitufala i mekem desisen blong folem waes advaes we i stap long Baebol, hemia blong gat respek mo kaen fasin. Long ol yia we oli pas, mitufala i lanem se nomata hamas problem we mitufala i kasem, be mitufala i save winim olgeta sipos mitufala i prea long God blong i givhan long mitufala mo sipos mitufala i folem advaes we i stap long Baebol.”—Aesea 48:17, 18; Efesas 4:31, 32.

3

PROBLEM:

“Woman (man) blong mi i no mekem ol wok blong hem long famle.”

RUL BLONG BAEBOL:

“Bambae yumi evriwan i mas talemaot olgeta fasin blong yumi long fes blong God.”—ROM 14:12.

I tru se mared bambae i no wok gud sipos wan long yutufala nomo i stap traehad blong mekem wok blong hem long famle. Be bambae i mowas sipos yutufala tugeta i no traehad nating blong mekem wok blong yutufala, ale yutufala i blemem yutufala.

Sipos yu tingting oltaem long samting we woman (man) blong yu i no mekem, bambae yu no save glad samtaem. Samting ya i tru tumas sipos yu no mekem wok blong yu from we woman (man) blong yu i no mekem wok blong hem. Be sipos yu traehad blong gat fasin blong wan gudfala waef no hasban, ating bambae mared blong yu i kam moa gud. (1 Pita 3:1-3) Mo bigfala samting we yu soemaot, hemia se yu ona long plan we God i stanemap long saed blong mared, mo fasin blong yu bambae i mekem hem i glad we i glad.—1 Pita 2:19.

Samting we samfala oli mekem blong folem rul ya: Kim mo man blong hem, tufala i stap long Koria mo tufala i mared 38 yia finis. Kim i talem se: “Samtaem man blong mi i kros long mi nao hem i no moa toktok long mi, be mi mi no save from wanem hem i kros. Taem hem i mekem olsem, mi harem se hem i no moa lavem mi olsem fastaem. Ale samtaem mi stap tingting se, ‘?From wanem hem i wantem se mi kasem save long hem be hem i no traem kasem save long mi?’”

Kim i save tingting tumas se i no stret we trabol ya i kasem hem, mo i save tingting long samting we man blong hem i no stap mekem. Be Kim i no mekem olsem. Hem i talem se: “Bitim we mi holem kros blong mi, mi luk se i moa gud we mi nao mi go luk man blong mi fastaem blong traem mekem pis wetem hem. Biaen kros blong mitufala i godaon mo mitufala i toktok gud tugeta blong stretem problem blong mitufala.”—Jemes 3:18.

4

 PROBLEM:

“Woman blong mi i no putum hem i stap daon long mi.”

RUL BLONG BAEBOL:

“Kraes, hem i hed blong man.”—1 KORIN 11:3.

Man we i harem se woman blong hem i no stap daon long hem i mas tingting gud fastaem long fasin blong hem wan. ?Hem i stap soemaot se hem i glad blong stap daon long Jisas Kraes we i hed blong hem? Man we i mared i save soemaot se hem i stap daon long Jisas taem hem i folem fasin blong Jisas.

Aposol Pol i raetem se: “Yufala ol man we i mared, yufala i mas lavem ol woman blong yufala, olsem we Kraes i lavem jos ya. Taswe hem i letem laef blong hem, blong sevem jos ya.” (Efesas 5:25) Jisas i no “mekem i strong tumas” long ol man blong hem. (Mak 10:42-44) Hem i talemaot klia long olgeta wanem samting we oli mas mekem mo hem i stretem olgeta taem oli mestem. Be neva hem i mekem i strong tumas long olgeta. Hem i kaen long olgeta mo hem i no askem olgeta blong mekem samting we oli no naf blong mekem. (Matiu 11:29, 30; Mak 6:30, 31; 14:37, 38) Oltaem Jisas i tingbaot ol man blong hem fastaem long samting we hem nomo i wantem.—Matiu 20:25-28.

Man we i mared i mas tingbaot samting ya se, ‘?Wanem i gat paoa long tingting blong mi long saed blong wok blong hed blong famle mo long saed blong ol woman? ?Ol kastom blong ples blong mi oli gat moa paoa long tingting blong mi i bitim ol advaes mo ol eksampol long Baebol?’ Ale, ?wanem tingting blong yu long saed blong woman we i no agri long tingting blong man blong hem, mo wetem respek hem i talemaot klia samting ya long man blong hem? Baebol i soemaot se Sera, woman blong Ebraham, i wan gudfala eksampol blong wan woman we i stap daon long man blong hem. (1 Pita 3:1, 6) Taem Sera i luk se hem i mas talemaot tingting blong hem long man blong hem, hem i mekem. Wan taem we Sera i mekem olsem, hemia taem Ebraham i no luksave sam samting we klosap oli spolem famle blong hem.—Jenesis 16:5; 21:9-12.

Ebraham i no mekem se Sera i fraet blong toktok long hem. Ebraham i no mekem i strong tumas long woman blong hem. Man we i folem ol advaes blong Baebol hem i gat fasin olsem tu. Hem i no mekem i strong long woman blong hem mo i no fosem woman blong hem blong i agri long evri tingting we hem i gat. Be hem i mekem wok blong hed blong famle long fasin we i kaen mo i gat sore. Ale fasin blong hem bambae i pulum woman blong hem blong gat respek long hem.

Samting we samfala oli mekem blong folem rul ya: James i stap long Inglan wetem woman blong hem. Tufala i mared eit yia finis. Hem i talem se: “Mi mi stap traehad blong kam gud moa long fasin blong toktok wetem woman blong mi bifo we mi mekem ol bigfala desisen. Mi stap traem blong no tingbaot mi wan nomo. Mi wantem se mi tingbaot samting we hem i nidim fastaem long samting we mi mi nidim.”

George i stap long Yunaeted Stet mo hem i mared 59 yia. Hem i talem se: “Mi no wantem se woman blong mi i harem se hem i no gat raet blong talemaot tingting blong hem. Hem i gat hed mo hem i fren blong mi we i save givhan long mi. Taswe mi traehad blong mekem se hem i harem gud blong talemaot tingting blong hem.”—Ol Proveb 31:10.

5

 PROBLEM:

“Man blong mi i no mekem wok blong lidim famle.”

RUL BLONG BAEBOL:

“Woman we i waes, oltaem hem i stap lukaot gud long hom blong hem, be woman we i no gat hed i stap spolem hom blong hem nomo long krangke fasin blong hem.”—OL PROVEB 14:1.

Sipos man blong yu i slo blong mekem ol desisen no blong mekem ol wok blong lidim famle, yu save jusum blong mekem wan long trifala samting ya. (1) Oltaem yu save mekem ol slak fasin blong hem oli kam long klia ples no (2) yu save mekem wok blong hem olsem hed blong famle no (3) yu save talem ol gudfala toktok long hem we oli kamaot long hat blong yu, from we yu luksave samting we hem i traehad blong mekem. Sipos yu jusum faswan mo sekenwan, bambae yu spolem hom blong yu long ol krangke fasin blong yu. Be sipos yu jusum namba tri, bambae yu lukaot gud long mared blong yu mo yu mekem se mared blong yu i stap gud.

Plante man oli wantem se woman blong olgeta i lavem olgeta. Be samting we oli ting se i moa impoten, hemia se woman blong olgeta i gat respek long olgeta. Taswe, fasin blong yu i mas mekem se man blong yu i harem se yu respektem hem. Yu save soemaot se yu luksave samting we hem i stap traehad blong mekem blong lidim famle mo yu save wok gud wetem hem. Sipos yu mekem olsem, ating bambae hem i traehad blong kam gud moa long wok blong hem long famle. I tru se samtaem bambae yu no agri wetem man blong yu long sam samting. Yutufala i mas toktok gud tugeta long saed blong ol samting ya. (Ol Proveb 18:13) Taem yutufala i mekem olsem, yu mas tingting gud long ol tok we yu talem mo fasin blong yu blong toktok, from we samting ya i save mekem mared blong yu i kam strong moa no i save spolem mared blong yu. (Ol Proveb 21:9; 27:15) Yu mas talemaot tingting blong yu long fasin we i gat respek, ale bambae man blong yu i mekem samting we yu wantem, hemia se bambae hem i mekem gud wok blong hem blong lidim famle.

Samting we samfala oli mekem blong folem rul ya: Michele i stap long Yunaeted Stet mo hem i mared 30 yia. Hem i talem se: “Mama blong mi nomo i lukaot long mi mo tufala sista blong mi, i no gat man i givhan long hem. Hem i wan woman we i strong mo i no dipen long narafala blong givhan long hem. Mi mi gat fasin olsem hem. Taswe, oltaem mi mas traehad blong kam gud moa long fasin ya blong stap daon long man blong mi. Wan samting we mi lanem, hemia se mi mas toktok wetem man blong mi, i bitim we mi nomo mi mekem ol desisen.”

Rachel i stap long Ostrelia mo hem i mared long Mark, 21 yia finis. Laef blong hem taem hem i smol i gat paoa long hem tu. Hem i talem se: “Neva mama blong mi i stap daon long papa blong mi. Oltaem tufala i raorao mo tufala i no gat respek long tufala nating. Long ol yia jes afta we mi mared, mi gat fasin olsem mama blong mi. Be sloslo mi luksave se, taem mi folem ol advaes blong Baebol long saed blong respek, samting ya i givhan bigwan. Naoia mi mo Mark mitufala i harem gud long mared blong mitufala, we mitufala i glad moa.”

6

PROBLEM:

“Mi taed finis long ol slak fasin blong woman (man) blong mi.”

RUL BLONG BAEBOL:

“Yufala i mas givgivhan long yufala, mo taem wan long yufala i gat sam poen agens long narawan, tufala ya i mas fofogivim tufala.”—KOLOSI 3:13.

Taem yutufala i stap fren, ating tingting blong yu i stap long ol gudfala fasin we woman (man) blong yu i  gat, mekem se yu no tingting tumas long ol slak fasin blong hem. ?Olsem wanem? ?Yu save mekem sem samting naoia? Ating i stret we yu harem nogud from sam samting we woman (man) blong yu i mekem. Be yu traem tingbaot kwestin ya, ‘?Bambae mi mi tingbaot moa ol gudfala fasin blong woman (man) blong mi no ol nogud fasin blong hem?’

Jisas i talem wan pijatok we i soemaot klia se yumi no mas tingting tumas long ol slak fasin blong narafala. Hem i talem se: “?From wanem yu stap tokbaot smol doti ya we i stap long ae blong brata blong yu, be yu no save luk bigfala wud ya we i stap long ae blong yu?” (Matiu 7:3) Maet wan smol doti i wan gras nomo. Be bigfala wud we Jisas i tokbaot, hemia i olsem longfala wud we man i yusum blong wokem ruf blong haos. ?Jisas i wantem tijim yumi long wanem? “Fastaem yu mas tekemaot bigfala wud ya we i stap long ae blong yu, nao bambae yu save luklukgud blong tekemaot smol doti ya we i stap long ae blong brata blong yu.”—Matiu 7:5.

Long stat blong pijatok ya, Jisas i talem wan woning. Hem i se: “Bambae yufala i no jajem narafala man, i nogud God i jajem yufala. Fasin we yufala i folem blong jajem man, hemia sem fasin nomo we God bambae i folem blong jajem yufala.” (Matiu 7:1, 2) Sipos yu wantem se God i no jajem yu from ol slak fasin blong yu we oli olsem wud long ae blong yu, i gud we yu no jajem woman (man) blong yu from ol slak fasin blong hem.—Matiu 6:14, 15.

Samting we samfala oli mekem blong folem rul ya: Jenny i stap long Inglan mo hem i mared long Simon blong 9 yia finis. Hem i talem se: “Mi luk se bigfala samting we i mekem mi mi kros long man blong mi, hemia se hem i no plan fastaem blong mekem ol samting, hem i mekem samting long las minit nomo. Samting ya i fani lelebet from we taem mitufala i stap fren, mi mi laekem tumas fasin ya blong hem we i mekem desisen hareap. Be naoia mi luksave se mi tu mi gat sam slak fasin blong mi. Mi mi gat fasin ya we mi wantem bos long evri samting. Mi mo Simon mitufala i stap traehad blong no tingting tumas long ol slak fasin blong mitufala.”

Curt i mared long Michele we yumi talem toktok blong hem finis. Curt i talem se: “Sipos yu stap tingting oltaem long ol slak fasin blong man no woman blong yu, bambae ol slak fasin ya oli kam bigwan moa long tingting blong yu. Mi mi luk se i moa gud blong putum tingting blong mi i stap long ol fasin blong Michele we oli pulum mi blong lavem hem fastaem olgeta.”

Rod Blong Winim Ol Trabol Long Mared

Ol samting ya we yumi tokbaot finis oli soemaot se ol man mo woman we oli mared oli kasem ol trabol, be ol trabol ya oli no bigwan tumas blong winim. ?Yumi save winim ol trabol ya olsem wanem? Yumi mas mekem fasin blong yumi blong lavem God i kam bigwan moa mo yumi mas glad blong folem ol advaes we i stap long Tok blong hem, Baebol.

Alex mo Itohan tufala i stap long Naejeria mo tufala i mared bitim 20 yia finis. Tufala i save finis rod blong winim ol trabol long mared. Alex i talem se: “Mi mi faenemaot se, taem man mo woman we i mared tufala i folem ol rul blong Baebol, tufala i save winim klosap evri trabol we tufala i kasem long mared blong tufala.” Woman blong Alex i talem se: “Mitufala i luk se i impoten tumas blong prea tugeta oltaem mo blong folem advaes blong Baebol long saed blong fasin blong lavem narafala mo gat longfala tingting. Naoia mitufala i no gat plante problem olsem taem mitufala i jes mared.”

Yes ol advaes long Tok blong God oli wok gud mo oli save givhan long famle blong yu. ?Yu yu wantem lanem moa long saed ya? Sipos yes, yu save askem long ol Witnes blong Jehova blong storian wetem yu long buk ya ?Wanem Samting We Baebol i Rili Tijim? long japta 14. *

[Ol futnot]

[Tok blong pija long pej 4]

?Mitufala i stap spenem taem tugeta?

[Tok blong pija long pej 5]

?Mi mi tingbaot moa samting we mi givim long woman (man) blong mi i bitim we mi traem kasem samting long hem?

[Tok blong pija long pej 6]

?Mi nao mi go luk woman (man) blong mi fastaem blong traem mekem pis wetem hem?

[Tok blong pija long pej 7]

?Mi mi tingting long samting we woman blong mi i wantem bifo we mi mekem wan desisen?

[Tok blong pija long pej 9]

?Mi mi tingbaot moa ol gudfala fasin blong woman (man) blong mi?