Namba Tri Stamba Rod

Oltaem Yu Mas Talem Tangkiu

?BAEBOL I TIJIM WANEM? “Long olgeta samting we oli stap kamtru long yufala, yufala i mas talem tangkiu long God.”—1 Tesalonaeka 5:18.

?WANEM I SAVE TRAEM YUMI? Yumi laef long medel blong ol man we oli flas mo oli no stap talem tangkiu. Mo yumi save stat blong tekem ol fasin blong olgeta. (2 Timoti 3:1, 2) Mo tu, maet yumi wantem mekem plante moa samting long laef, antap long ol samting we yumi stap bisi long olgeta. Yumi save tingting tumas long ol trabol we yumi gat no yumi ronem ol samting we yumi nomo i wantem, nao yumi no moa gat taem blong harem gud long wanem samting we yumi gat finis. Mo yumi no gat taem blong talem tangkiu from ol samting we ol narafala oli mekem blong givhan long yumi.

?YU SAVE MEKEM WANEM? Yu save makemaot wan taem blong tingting dip long ol gudfala samting we yu stap harem gud long olgeta naoia. I tru, maet yu harem se ol trabol oli hevi tumas long yu. Be yu save tingbaot King Deved. Plante taem, hem i harem nogud long tingting blong hem from ol trabol we hem i stap kasem. Nating se i olsem, hem i prea long God se: “Mi stap tingbaot olgeta wok ya we yu yu mekem, mo mi stap tingting long olgeta samting ya we yu yu mekem long mi.” (Ol Sam 143:3-5) Nomata se Deved i kasem ol trabol, oltaem hem i talem tangkiu long God from ol gudfala samting we hem i givim, mo hem i stap harem gud nomo.

I gud yu traem tingbaot ol samting we ol narafala oli mekem blong givhan long yu, mo yu talem tangkiu long olgeta from ol hadwok we oli mekem. Jisas i soemaot wan nambawan eksampol long saed ya. Taem wan long ol fren blong Jisas, hemia Meri, i kafsaedem senta we praes blong hem i antap tumas i go long hed mo leg blong Jisas, samfala oli stap askem se: “?From wanem woman ya i spolem senta ya olsem?” * Ol man ya oli tok olsem from we oli ting se i moagud blong salem senta ya mo givim mane blong hem long ol puaman. Jisas i ansa long olgeta se: “!Yufala i livim woman ya! ?From wanem yufala i stap spolem hem?” Biaen Jisas i talem se: “Woman ya i mekem wan samting we hem i naf blong mekem.” (Mak 14:3-8; Jon 12:3) Jisas i no lukluk long samting we Meri i no mekem, be hem i talem tangkiu from samting we Meri i mekem.

Samfala oli lusum sam famle blong olgeta, sam fren, no sam narafala blesing we oli gat, nao oli jes luksave afta we oli lusum olgeta, se oli bin harem gud tumas long olgeta. !Yu save blokem fasin ya blong harem nogud olsem, sipos yu tingbaot ol gudfala samting we yu stap harem gud long olgeta naoia! I gud yu traem tingbaot, no maet yu raetemdaon, ol samting we i stret blong yu talem tangkiu from.

From we “evri samting we oli gud” oli kamaot long God, i gud yumi prea i go long God blong talem tangkiu long hem. (Jemes 1:17) Sipos yumi mekem olsem oltaem, samting ya i save halpem yumi blong glad oltaem long samting we yumi kasem, mo blong harem gud nomo.—Filipae 4:6, 7.

[Futnot]

[Tok blong pija long pej 6]

?Yu yu talem tangkiu long narafala we i mekem samting blong givhan long yu?