Namba Fo Stamba Rod

Jusum Gud Ol Fren Blong Yu

?BAEBOL I TIJIM WANEM? “Sipos man i go joen long ol waes man, bambae hem i save kam waes.”—Ol Proveb 13:20.

?WANEM I SAVE TRAEM YUMI? Ol fren blong yumi oli save mekem yumi harem gud moa, no oli save spolem fasin blong yumi blong harem gud. Ol tingting mo ol storian blong olgeta oli save gat paoa long tingting we yumi gat long saed blong laef.—1 Korin 15:33.

Yu save tingbaot ol 12 man ya we Baebol i talem se oli go blong lukluk kantri ya Kenan. Baebol i talem se taem oli kambak, ten long olgeta oli “talem se, ‘!Kantri ya, graon blong hem i nogud ya!’” Nating se i olsem, tu long olgeta i talem ol gudfala tok long saed blong kantri ya Kenan. Tufala i talem se kantri ya “i gud we i gud.” Be nogud tingting we ol ten narafala man ya oli gat long saed blong graon ya, i kasem olgeta man. Baebol i talem se: “Olgeta man oli stap krae bigwan” mo “oli stap tok agens” long ol man blong God.—Namba 13:30–14:9.

Long sem fasin, tede plante man oli stap “toktok smol agens long narafala, oli stap komplen long saed blong laef blong olgeta.” (Jud 16, NW) Yes, i no isi blong stap harem gud taem yumi stap joen wetem ol fren we oli neva glad long wan samting.

?YU SAVE MEKEM WANEM? I gud yu traem tingbaot ol storian blong yu wetem ol fren blong yu. ?Olsem wanem? ?Ol fren blong yu oli tok flas from olting we oli gat? ?Oli komplen oltaem from ol samting we oli no gat? ?Mo yu, yu wanem kaen fren? ?Yu yu traem blong pulum ol fren blong yu blong oli wantem gat ol samting olsem we yu yu gat? ?No yu yu pulum olgeta blong harem gud long wanem samting we oli gat finis?

I gud yu tingbaot Deved, bifo we hem i kam king, mo pikinini blong King Sol, hemia Jonatan. Deved i stap haed long draeples. King Sol i fraet se Deved bambae i kam king long ples blong hem, ale, hem i lukaot Deved blong kilim hem i ded. Be Jonatan i defren. Nating se hem i gat raet blong kam nekis king, hem i kam wan gudfala fren blong Deved. Jonatan i luksave se God i jusumaot Deved blong i kam nekis king, mo Jonatan i glad blong halpem fren ya blong hem, Deved.—1 Samuel 19:1, 2; 20:30-33; 23:14-18.

Yes, yu yu mas gat ol fren olsem. Oli mas ol fren we oli traehad blong harem gud, mo we oli wantem tumas blong halpem yu, blong yu tu yu harem gud. (Ol Proveb 17:17) Be, blong yu save gat ol gudfala fren olsem, yu tu yu mas soemaot sem fasin ya.—Filipae 2:3, 4.

[Tok blong pija long pej 7]

?Olsem wanem? ?Ol fren blong yu oli mekem yu yu harem gud moa, no oli spolem fasin blong yu blong harem gud?