?Wanem Ya Tabu Spirit?

WAN dei, Jisas i askem long ol disaepol blong hem se: “Yufala ol papa. ?I gat wan long yufala we taem pikinini blong hem i askem fis long hem, be hem i girap i givim snek long hem? ?No i gat wan long yufala we taem pikinini blong hem i askem eg long hem, be hem i girap i givim skopion long hem?” (Luk 11:11, 12) Ol pikinini long Galili oli laekem blong kakae eg mo fis, taswe oli askem strong long papa blong olgeta blong i givim kakae ya long olgeta.

Jisas i talem se yumi mas askem tabu spirit long God bakegen mo bakegen, olsem wan pikinini we i askem kakae bakegen mo bakegen taem hem i hanggri. (Luk 11:9, 13) Taem yumi kasem save long tabu spirit se hem i olsem wanem, hemia bambae i givhan long yumi blong kasem save from wanem i impoten tumas we yumi gat tabu spirit long laef blong yumi. Taswe, fastaem bambae yumi luk wanem we Baebol i tijim long saed blong tabu spirit.

“Paoa Blong God Ya We i Hae We i Hae”

Baebol i soemaot klia se tabu spirit hem i paoa we God i yusum blong mekem samting we hem i wantem i kamtru. Taem enjel Gabriel i talem long Meri se bambae hem i bonem wan pikinini boe nating se hem i no stap wetem man yet, enjel ya i talem long Meri se: “Tabu Spirit bambae i kam long yu, mo paoa blong God ya we i hae we i hae, bambae i kavremap yu olsem wan sado. Nao from samting ya, pikinini ya blong yu bambae i tabu, i blong God, mo ol man bambae oli save singaot hem, se Pikinini blong God.” (Luk 1:35) Ol toktok ya blong Gabriel oli soemaot se tabu spirit i joen wetem “paoa blong God ya we i hae we i hae.”

Semfala tingting ya i kamaot long sam narafala haf blong Baebol. Profet Maeka i talem se: “Oltaem Hae God i stap givim paoa long mi. Oltaem hem i stap mekem spirit blong hem i kam bigwan long mi.” (Maeka 3:8) Jisas i promes long ol disaepol blong hem se: “Taem tabu spirit i kam kasem yufala, bambae yufala i gat paoa.” (Ol Wok 1:8) Mo aposol Pol tu i tokbaot “paoa blong Tabu Spirit.”—Rom 15:13, 19.

?Ale, yumi lanem wanem long ol vas ya? Yumi lanem se tabu spirit mo paoa blong God, klosap tufala i sem samting nomo. Jeova i stap soemaot paoa blong hem tru long tabu spirit. Blong talem stret, tabu spirit i paoa blong God we i stap wok. !Mo tru, paoa ya i bigwan tumas! Yumi no naf blong kasem save long bigfala paoa we God i yusum blong wokem olgeta samting long heven mo wol. Long ol toktok we profet Aesea i talemaot, Jeova i pulum yumi blong tingting long samting ya, i se: “!Yufala i traem luk antap long skae! Ol sta ya we yufala i stap luk, hem nomo i wokem olgeta. Oltaem hem i stap lidim olgeta i kam, olsem  we komanda i lidim ol soldia blong hem. Hem i savegud hamas sta i stap, mo i stap singaot olgeta wanwan long nem blong olgeta. Mo from we paoa blong hem i strong we i strong, neva wan sta i mestem ples blong hem.”—Aesea 40:26.

Long vas ya, Baebol i soemaot se olgeta samting long heven mo wol oli stap long stret ples blong olgeta mo oli wok gud tugeta from we “paoa blong [Hae God] i strong we i strong.” I klia se paoa ya we God i yusum blong mekem samting, i bigwan tumas, mo laef blong yumi i dipen long paoa ya.—Lukluk bokis ya “Wok We Tabu Spirit i Mekem.”

Jeova i save yusum tabu spirit blong mekem ol bigbigfala wok, olsem taem hem i wokem olgeta samting long heven mo wol. Be hem i save yusum tabu spirit blong givhan long ol man tu. Long Baebol i gat plante stori we oli soemaot olsem wanem tabu spirit i givim paoa long ol man blong God long wol.

 “Paoa Blong Spirit Blong Hem i Fulap Long Mi”

Wok we Jisas i mekem taem hem i stap long wol, i soemaot long nambawan fasin olsem wanem tabu spirit blong God i save givim paoa long ol man blong hem. Jisas i talem long ol man Nasaret se: “Paoa blong spirit blong [Hae God] i kam fulap long mi.” (Luk 4:18) ?“Paoa blong Tabu Spirit,” i givhan long Jisas blong mekem wanem? (Luk 4:14) Hem i hilim ol man we oli gat ol defdefren sik, i mekem ol bigbigfala wef blong solwota oli kam kwaet, hem i mekem se smol bred mo smol fis i kam naf blong givim kakae long plante taosen man, mo hem i mekem ol dedman oli laef bakegen. Aposol Pita i tokbaot Jisas se: ‘God i soemaot i klia long ol man we hem nomo i sanem Jisas i kam, i givim paoa long hem blong i wokem ol merikel, mo ol saen, mo ol samting blong sapraes.’—Ol Wok 2:22.

Tede tabu spirit i no givim paoa long ol man blong mekem ol merikel olsem. Be hem i save givhan long yumi long ol narafala rod we oli nambawan. Olsem Jisas i talem long promes we hem i mekem long ol disaepol, Jeova i glad blong givim tabu spirit long ol man we oli wosipim hem. (Luk 11:13) From samting ya nao, aposol Pol i talem se: “Mi mi naf blong mekem evri samting from we hem i stap givim paoa long mi.” (Filipae 4:13, NW) ?Olsem wanem? ?Tabu spirit i save givhan bigwan olsem long yu? Nekis haf bambae i ansa long kwestin ya.

[Bokis/Foto blong pija long pej 5]

?From Wanem Tabu Spirit i No Wan Man?

Baebol i yusum wota olsem wan pijatok blong eksplenem tabu spirit. Taem God i mekem promes blong blesem ol man blong hem long fiuja, hem i se: “Kantri ya we i tosta tumas, mi bambae mi givim wota long hem. Long ples ya we i drae tumas, bambae mi mekem ol reva oli ron bigwan long hem. Bambae mi mekem Spirit blong mi i kam fulap long ol pikinini blong yufala. Bambae mi blesem olgeta we bambae oli stap kamaot biaen long yufala.”—Aesea 44:3.

Taem God i givim spirit blong hem long ol man blong hem, “tabu spirit i fulap” long olgeta no “tabu spirit i kam fulap” long olgeta. Baebol i tokbaot Jisas, Jon Baptaes, Pita, Pol, Banabas, mo ol disaepol we oli stap long dei blong lafet blong Pentekos 33 K.T., se tabu spirit i fulap long olgeta no i kam fulap long olgeta.—Luk 1:15; 4:1; Ol Wok 4:8; 9:17; 11:22, 24; 13:9.

Tingbaot samting ya: ?Sipos tabu spirit i wan man, olsem wanem plante defdefren man oli save “kam fulap” long hem? ?Wan grup blong man i save “kam fulap” long wan man bakegen? ?Samting ya i narakaen, no? Baebol i tokbaot se ol man oli kam fulap long waestok, gudfala tingting no fasin nogud, be neva hem i talem se wan man i kam fulap long wan narafala man.—Proveb 14:33; Matiu 12:35; Ol Wok 13:10.

Grik tok ya pneu’ma we oli tanem i kam “spirit,” i givim tingting blong wan paoa we man i no save luk. Wan diksonari we man ya Vine i raetem, (Expository Dictionary of New Testament Words) i talem long saed blong tok ya pneu’ma, se “plante taem i minim win . . . no win we man i pulum; mo plante taem i blong tokbaot spirit tu, we i olsem win, man i no save luk mo tajem, mo i gat bigfala paoa.”

Yes i klia se, tabu spirit i no wan man. *

[Futnot]

[Foto Credit Line]

Photodisc/SuperStock