Job i Leftemap Nem Blong Jeova

“Mi mi presem nem blong yu.”—JOB 1:21.

1. ?Hu i raetem buk blong Job mo sam man oli ting se hem i raetem wetaem?

MOSES i gat samwe 40 yia blong hem taem hem i ronwe long Ijip mo i go stap long Midian. (Wok 7:23) Taem hem i stap long ples ya, ating long taem ya nao hem i harem nius blong ol trabol we Job i kasem long kantri ya Uj, we i no longwe tumas. Plante yia biaen, Moses mo ol man Isrel oli stap wokbaot long draeples blong 40 yia, mo long en blong ol yia ya, oli pas klosap long kantri ya, Uj. Ating long taem ya nao Moses i harem nius blong ol samting we oli hapen long Job jes bifo we Job i ded. Kastom stori blong ol man Jiu i talem se Moses i raetem buk blong Job afta we Job i ded.

2. ?Long wanem rod buk blong Job i mekem bilif blong ol man blong Jeova tede i kam strong moa?

² Buk blong Job i mekem bilif blong ol man blong God tede i kam strong moa. ?Long wanem rod? Stori ya i givhan long yumi blong kasem save long sam samting we oli impoten tumas mo we oli gat bigfala mining, we oli hapen long heven. Mo tu, stori ya i soemaot klia se i gat wan impoten kwestin we i stanap long saed blong hae rul blong God long heven mo wol. Mo tu, stori blong Job i mekem yumi kasem save moa se i minim wanem blong holemstrong long God. Mo i givhan long yumi blong kasem save from wanem samtaem Jeova i letem ol man blong hem oli harem nogud. Buk ya i soemaot Devel Setan tu olsem Stamba man blong agensem Jeova, mo enemi blong ol man. Mo i soemaot tu se ol sinman olsem Job, oli save stap tru long Jeova nating sipos oli kasem ol traem we oli strong bitim mak. I gud yumi lukluk long sam samting we buk blong Job i tokbaot.

Setan i Traem Job

3. ?Wanem sam samting we yumi save long saed blong Job? ?From wanem Setan i traem hem?

³ Job i wan rijman we i gat haenem, mo hem i wan hed blong famle we i tijim ol gudfala fasin long famle blong hem. I klia se ol man oli tinghae long hem from we hem i wan man we i givhan long olgeta we oli gat nid. Mo samting we i impoten tumas, hemia se Job i fraetgud long God, hem i no wantem mekem wan samting we i save mekem God i harem nogud. Baebol i talem se Job i “stap mekem wosip long God, mo oltaem i stap bilif strong long hem we tingting blong hem i no foldaon nating. Hem i wan gudfala man, mo oltaem i stap lukaot gud blong i no mekem wan samting we i nogud.” Setan i no traem Job from we Job i gat plante sas samting mo haenem, nogat. Setan i wantem traem Job from we Job i fasgud long God.—Job 1:1; 29:7-16; 31:1.

4. ?Fasin blong holemstrong i minim wanem?

⁴ Fashaf blong buk blong Job i tokbaot taem we ol enjel oli hivap wanples long heven mo oli kam stanap long fes blong Jeova. Setan tu i stap long taem ya, mo hem i tok agensem Job. (Ridim Job 1:6-11.) Setan i tokbaot ol sas samting we Job i gat, be hem i agensem moa fasin blong Job blong holemstrong long God. Tok ya “holemstrong” i givim tingting se man i mekem samting we i stret oltaem, i no gat poen agens long hem. Baebol i yusum tok ya blong soemaot wan man we i wosipim Jeova wetem ful hat blong hem.

5. ?Setan i talem wanem long saed blong Job?

⁵ Setan i talem se Job i no wosipim God from we i wantem holemstrong long Hem, be from we hem i wantem kasem ol samting nomo we God i givim. Setan i talem bakegen se Job bambae i gohed blong holemstrong long Jeova nomo, sipos Jeova i gohed blong blesem hem mo lukaotgud long hem. Blong ansa long ol tok ya blong Setan, Jeova i letem hem i traem man ya we i stap tru long hem. Ale long wan dei nomo, Job i kasem nius se ol man oli stilim mo kilim i ded ol anamol blong hem, oli kilim i ded ol man blong wok blong hem, mo ol ten pikinini blong hem oli ded. (Job 1:13-19) ?Olsem wanem? ?Traem ya i mekem se Job i no moa holemstrong long God? Baebol i tokbaot tok we Job i talem, i se: ‘Jeova nomo i givim ol samting ya long mi, mo naoia Jeova i tekemaot olgeta bakegen. Mi mi presem nem blong Jeova.’—Job 1:21.

6. (a) ?Taem ol enjel oli kam wanples bakegen, wanem samting i hapen? (b) ?Taem Setan i tok agensem fasin blong Job blong holemstrong long Jeova, hem i agensem hu moa?

 ⁶ Biaen, ol enjel oli kam wanples bakegen long fored blong Jeova. Mo bakegen, Setan i tok agensem Job i se: “Olgeta samting we man i gat bambae hem i givim blong sevem sol blong hem. Be naoia plis yu letem ol samting oli jenis. Yu pusum han blong yu i tajem bun mo mit blong hem, nao yu luk sipos hem bambae i no tok nogud long nem blong yu, stret long fes blong yu.” Makemgud se long vas ya, Setan i tok agensem ol narafala man tu. Taem Setan i talem se “olgeta samting we man i gat bambae hem i givim blong sevem sol blong hem,” hem i no jes tok agensem fasin blong Job blong holemstrong long God, be i tok agensem eni “man” we i wosipim Jeova. Biaen, God i letem Setan blong i kilim Job wetem wan strong sik we i mekem hem i harem nogud tumas. (Job 2:1-8, NW) Be ol traem blong Job oli no finis long ples ya.

Samting We Yumi Lanem Long Fasin Blong Job

7. ?Olsem wanem waef blong Job mo trifala man we oli kam blong luk hem, oli mekem traem blong Job i kam hevi moa?

⁷ Taem ol traem ya oli stat, waef blong Job tu i harem nogud. I sua se hem i mas harem nogud bitim mak taem ol pikinini blong hem oli ded mo ol sas samting blong tufala oli lus. Hem i mas harem nogud blong luk we wan rabis sik i mekem hasban blong hem i safa bitim mak. Hem i singaot i go long Job i se: “!Ei! ?From wanem tingting blong yu i stap strong yet long God olsem? !I moa gud yu tok nogud long hem blong yu yu ded!” Biaen, tri man oli kamtru blong leftemap tingting blong Job, hemia Elifas, Bildad, mo Jofara. Be ol toktok blong trifala ya oli soemaot se tingting blong trifala i no stret, mo oli kam blong ‘mekem Job i harem nogud nomo.’ Olsem nao, Bildad i talem se ol pikinini blong Job oli mekem sin, mo i stret nomo we God i panisim olgeta. Elifas i givim tingting ya se Job i stap harem nogud from ol sin we hem i bin mekem. !Hem i talem tu se God i no save harem gud long ol fasin blong man we i holemstrong long Hem! (Job 2:9, 11; 4:8; 8:4; 16:2; 22:2, 3) Ol toktok olsem oli mekem se traem blong Job i kam hevi moa, be hem i holemstrong long God. I tru se hem i rong taem hem i talem se ‘hem i stret bitim God.’ (Job 32:2, NW) Be Job i stap tru long God long olgeta traem ya.

8. ?Elihu i soem wanem gudfala eksampol long ol man blong givim advaes tede?

⁸ Biaen, Baebol i tokbaot Elihu, we hem tu i kam blong visitim Job. Fastaem, Elihu i lesin long ol tok we Job mo trifala fren blong hem oli talem. Nating se Elihu i yang moa long olgeta evriwan, be hem i soem se hem i gat bigfala waes. Hem i toktok long Job wetem respek. Elihu i talem ol gudfala tok long Job from we hem i mekem i stret oltaem. Be hem i talem tu se Job i tingting tumas blong traem pruvum se hem i no gat rong. Biaen, Elihu i mekem Job i sua se taem man i gohed oltaem blong mekem wok blong God, hemia i no blong nating nomo. (Ridim Job 36:1, 11.) !Hemia wan gudfala eksampol blong olgeta we oli wantem givim advaes tede! Elihu i gat longfala tingting, hem i lesin gud, hem i talem ol gudfala toktok blong leftemap tingting taem i stret blong talem, mo hem i givim ol advaes we oli mekem bilif i strong.—Job 32:6; 33:32.

9. ?Olsem wanem Jeova i givhan long Job?

⁹ !Ale, wan nambawan samting i hapen we i mekem Job i sek! !Jeova i toktok long hem! Baebol i talem se: “Nao i gat wan bigfala win i blu, mo Hae God i  kamtru long win ya, i tok long Job.” Wetem kaen fasin, Jeova i yusum plante kwestin blong givim advaes long Job, blong hem i stretem tingting blong hem. Job i agri blong letem Jeova i stretem hem, i se: “Mi mi stap toktok krangke nomo. . . . Naoia mi tanem tingting blong mi, mi lego ol fasin ya finis, mo mi stap sidaon long asis blong graon, mo long asis faea.” Afta we Jeova i toktok long Job, Hem i tok strong long ol trifala giaman fren blong Job from we trifala i talem ol samting we “i no tru nating.” Jeova i talem se Job i mas prea from trifala. “Nao taem Job i prea finis from trifala ya, Hae God i mekem hem i kam rijman bakegen, we i givim jenis long hem long olgeta samting we hem i gat fastaem, be i dabolem evriwan.”—Job 38:1; 40:4; 42:6-10.

?Lav We Yumi Gat Long Jeova i Dip Olsem Wanem?

10. ?From wanem Jeova i no jes tanem baksaed long Setan, no i kilim hem i ded?

¹⁰ Jeova i God ya we i Wokem heven mo wol, hem i Hae King we i rul antap long olgeta samting we hem i wokem. ?Ale, from wanem hem i no jes tanem baksaed long ol giaman tok blong Setan? God i save se sipos hem i jes tanem baksaed long Setan, no i kilim hem i ded, hemia bambae i no save stretem kwestin ya we Setan i stanemap. Setan i talem se Job, we i wan gudfala man blong wok blong Jeova, bambae i no moa fasgud long God sipos hem i lusum olgeta sas samting blong hem. Job i gohed blong holemstrong long God, nating se i kasem traem. Biaen, Setan i talem se eni man bambae i lego God sipos hem i harem nogud tumas long bodi blong hem. Job i safa bigwan, be hem i gohed yet blong holemstrong long God. Taswe nating se Job i wan sinman nomo, be hem i pruvum se Setan i wan man blong giaman. ?Olsem wanem long ol narafala man we oli wosipim God?

11. ?Olsem wanem Jisas i soemaot klia se Setan i wan man blong giaman?

¹¹ Blong talem stret, wanwan man blong wok blong God we i gohed blong holemstrong long Hem nomata wanem samting we Setan i mekem, i soemaot long prapa laef blong hem se ol tok blong enemi ya Setan, we i no sore nating from rong blong hem, oli giaman. Jisas i kam long wol mo i soemaot klia se Setan i wan man blong giaman. Jisas i stretgud olgeta olsem faswan bubu blong yumi, Adam. Taem Jisas i fasgud long God gogo kasem ded, hem i soemaot se Setan i wan man blong giaman mo se ol tok blong hem oli no tru.—Rev. 12:10.

12. ?Wanwan man blong wok blong God i gat wanem janis mo bigfala wok?

¹² Nating se i olsem, Setan i gohed yet blong traem ol man blong Jeova. Wanwan long yumi i gat janis mo i gat bigfala wok ya blong soemaot long prapa laef blong yumi, se yumi holemstrong long God mo yumi mekem wok blong God from we yumi lavem Hem, i no from we yumi wantem kasem samting blong yumi nomo. ?Wanem tingting blong yumi long bigfala wok ya? Yumi luk wok ya olsem wan spesel ona blong stap tru long Jeova. Yumi haremgud tu blong save se Jeova i givim paoa long yumi blong stanap strong. Mo yumi glad tumas blong save se Hem i no save letem wan samting i traem yumi we i strong tumas long yumi, olsem stori blong Job i soemaot.—1 Kor. 10:13.

Setan, Bigfala Enemi Mo Man Blong Apostasi

13. ?Wanem ol smosmol save we buk blong Job i soemaot long saed blong Setan?

¹³ Hibru haf blong Baebol i givim sam smosmol save long saed blong rabis wok ya blong Setan blong agensem Jeova mo blong lidim ol man long wol oli gorong. Long Grik haf blong Baebol, yumi faenem sam moa save long saed blong fasin agens ya, olsem long buk blong Revelesen we i soemaot se klosap nao Jeova bambae i leftemap hae rul blong hem mo i spolem Setan. Buk blong Job i ademap sam moa save long saed blong fasin stronghed ya blong Setan. Taem Setan i stap wetem ol enjel long taem ya we oli hivap long fored blong Jeova, hem i no gat tingting blong presem Jeova. Fasin blong Devel Setan ya i soemaot se hem i wantem nomo blong spolem narafala, mo ol plan blong hem oli rabis. Afta we Setan i tok agensem Job, mo Jeova i letem hem blong i traem Job, “Setan i  aot long fes blong hem, i gowe.”—Job 1:12; 2:7.

14. ?Wanem tingting we Setan i gat long saed blong Job?

¹⁴ Taswe, buk blong Job i soemaot Setan se hem i enemi ya we i stap agensem ol man mo hem i no gat sore nating. Afta we ol enjel oli hivap wanples long heven, we Job 1:6 i tokbaot, yumi no save stret se hamas taem i pas bifo we oli hivap bakegen olsem Job 2:1 i tokbaot. Be bitwin long tufala taem ya, Job i kasem bigfala traem we i mekem hem i harem nogud bigwan. Fasin blong Job blong stap tru i givim janis long Jeova blong talem long Setan se: “Oltaem, hem i stap mekem wosip long mi, mo i stap lukaot gud blong i no mekem wan samting we i nogud. Yu yu pusum mi blong mi letem yu yu spolem hem be blong nating nomo. Tingting blong hem i stap strong long mi yet olsem fastaem.” Be Setan i no wantem talemaot se ol tok we hem i bin talem agensem Job, oli no tru. Defren olgeta, hem i askem blong mekem wan narafala strong traem long Job bakegen. Long rod ya, Setan i traem Job taem Job i gat plante sas samting, mo taem Job i pua. I klia se Setan i no sore nating long ol man we oli gat nid, mo olgeta we oli kasem trabol. Hem i no laekem nating ol man we oli holemstrong long God. (Job 2:3-5) Nating se i olsem, Job i stap tru long God mo i soemaot se Setan i wan man blong giaman.

15. ?Wanem tingting blong ol man blong apostasi tede we i sem mak long tingting blong Setan?

¹⁵ Long olgeta laef samting we God i wokem, Setan nao i faswan we i kam wan man blong apostasi. * Ol man blong apostasi long taem blong yumi oli gat sem fasin olsem Setan. Tingting blong olgeta i nogud mo oltaem oli faenem poen agensem ol man long kongregesen, ol Kristin elda, mo Hed Kampani. Sam man blong apostasi oli agensem fasin ya blong yusum nem blong God, Jeova. Oli no intres blong kasem save long saed blong Jeova mo blong mekem wok blong hem. Ol man blong apostasi oli mekem sem mak olsem papa blong olgeta, Setan. Oli traem blong spolem bilif blong ol man we oli holemstrong long God. (Jon 8:44) !Yumi no sapraes se ol man blong Jeova oli no joen nating wetem olgeta ya!—2 Jon 10, 11.

Job i Leftemap Nem Blong Jeova

16. ?Wanem tingting we Job i gat long saed blong Jeova?

¹⁶ Job i yusum mo i presem nem blong Jeova. Taem hem i harem nius ya se ol pikinini blong hem oli ded, hem i no talem wan tok nating agensem God. I tru se Job i mestem taem hem i talem se God nao i mekem se hem i lusum olgeta samting blong hem, be Job i leftemap nem blong Jeova i go antap oltaem. Biaen, Job i talem se: “Fraet long Jeova—hemia nao waes, mo dip save i fasin ya blong tanem tingting from fasin nogud.”—Job 28:28, NW.

17. ?Wanem i givhan long Job blong holemstrong long Jeova?

¹⁷ ?Wanem i givhan long Job blong holemstrong long God? Bifo we ol trabol ya oli kamaot, i klia se Job i gat wan gudfala fasin fren finis wetem Jeova. Yumi no sua sipos hem i bin save we Setan i tok agens long Jeova, be Job i gat strong tingting blong stap fasgud long Jeova. Hem i talem se: “!Go kasem taem we mi mi ded, bambae mi no save lego fasin blong mi blong holemstrong long God!” (Job 27:5, NW) ?Olsem wanem Job i wokem fasin frengud ya? Job i famle wetem Ebraham, Aesak, mo Jekob, mo hem i harem nius blong ol samting we Jeova i mekem long saed blong olgeta. I sua se hem i tinghae long ol samting ya. Mo  taem hem i wajem gud ol samting raonabaot long hem we Jeova i wokem, hem i naf blong luksave plante long ol nambawan fasin blong Jeova.—Ridim Job 12:7-9, 13, 16.

18. (a) ?Olsem wanem Job i soemaot se hem i fasgud long Jeova? (b) ?Olsem wanem yumi save folem gudfala eksampol blong Job?

¹⁸ Ol samting we Job i lanem oli pulum hem blong mekem Jeova i glad. Job i fraet se wan long famle blong hem i mekem wan samting we God i no glad long hem, no i “mekem sin long tingting blong hem we i spolem God,” taswe, oltaem nomo hem i stap mekem sakrefaes i go long Jeova. (Job 1:5) Nating se Job i kasem strong traem, be hem i gohed yet blong talem ol gudfala tok long saed blong Jeova. (Job 10:12) !Hem i soem wan nambawan eksampol! Yumi tu yumi mas gohed oltaem blong kasem ol stret save long saed blong Jeova mo ol stamba tingting blong hem. Yumi gohed oltaem blong mekem ol gudfala samting olsem stadi, joen long ol miting, prea, mo talemaot gud nius. Mo tu, yumi traehad long evri rod blong mekem ol man oli save long nem blong Jeova. Jeova i glad taem Job i holemstrong long hem. Long sem fasin, taem ol man blong Jeova tede oli holemstrong long Hem, oli mekem Hem i glad. Bambae yumi tokbaot samting ya long nekis stadi.

[Futnot]

?Yu Yu Tingbaot?

• ?From wanem Devel Setan i jusum blong traem Job?

• ?Job i kasem wanem traem? ?Hem i mekem wanem?

• ?Wanem samting bambae i givhan long yumi blong holemstrong long God olsem we Job i bin mekem?

• ?Buk blong Job i givhan long yumi blong lanem wanem samting long saed blong Setan?

[Kwestin]

[Tok blong pija long pej 10]

Stori blong Job i mekem yumi save long bigfala kwestin we Setan i talem long saed blong hae rul blong God long heven mo wol

[Tok blong pija long pej 12]

?Wetaem Setan i save traem fasin blong yu blong holemstrong long Jeova?