Laef i Strong Tumas Naoia

BAEBOL i bin talemaot se ol man bambae oli pastru long wan taem we “i strong tumas.” Hem i tokbaot taem ya se “ol las dei.” (2 Timoti 3:1-5, NW; 2 Pita 3:3-7) Taem Jisas Kraes i stap ansa long kwestin we ol disaepol blong hem oli askem long hem long saed blong “lashaf blong fasin blong laef long wol ya,” hem i tokbaot taem ya tu. (Matiu 24:3, NW) ?Olsem wanem? ?Yumi laef naoia long ol las dei? Sipos yu skelem wanem we Baebol i bin talemaot wetem wanem ol ripot we oli  jes kamaot oli talem, bambae yu luksave ansa long kwestin ya.

Wanem we Baebol i bin talemaot: faet long fulwol—Luk 21:10; Revelesen 6:4.

Wanem ol ripot we oli jes kamaot oli talem: “Long ol yia 1900, namba blong ol man we oli ded long faet i tri taem antap long fulnamba blong ol man we oli ded, stat taem Kraes i bon i kam kasem ol yia 1900.”—Worldwatch Institute.

Wanem we Baebol i bin talemaot: kakae i sot mo ol sik—Luk 21:11; Revelesen 6:5-8.

Wanem ol ripot we oli jes kamaot oli talem: Long 2004, i gat samwe 863 milian man long wol we oli no gat naf kakae, hemia i 7 milian man moa antap long namba blong 2003.—United Nations Food and Agriculture Organization.

Klosap wan bilian man oli laef long ol ples we i pua; 2.6 bilian man oli no gat gudfala tolet mo ples blong sakem doti blong olgeta; 1.1 bilian man oli no gat klin wota blong dring.—Worldwatch Institute.

Faef milian man oli kasem malaria; foti milian man oli laef wetem sik ya AIDS; sik ya TB i kilim 1.6 milian man i ded long 2005.—World Health Organization.

Wanem we Baebol i bin talemaot: spolem wol ya—Revelesen 11:8.

Wanem ol ripot we oli jes kamaot oli talem: “Ol samting we man i stap mekem tede i mekem se, i no longtaem bambae plante defren kaen anamol mo ol tri oli lus.” “Long fulwol, klosap tu long tri haf blong ol wok we ol samting raonabaot long yumi oli mekem blong givhan long man, oli stap godaon.”—Millennium Ecosystem Assessment.

Klosap ol rabis gas we ol man oli stap sakem long win oli spolemgud weta long wol mo samting ya i mekem se wol i stap long bigfala denja.”—NASA, Goddard Institute for Space Studies.

Wanem we Baebol i bin talemaot: gud nius ya blong Kingdom blong God bambae i kasem olgeta ples long wol—Matiu 24:14; Revelesen 14:6, 7.

Wanem ol ripot we oli jes kamaot oli talem: Long 2007, i gat wan namba blong 6,957,854 Witnes blong Jeova we oli spenem bitim 1.4 bilian aoa blong talemaot gud nius blong Kingdom blong God long 236 kantri.—2008 Yearbook of Jehovah’s Witnesses.

Olsem yumi tokbaot finis, Baebol i bin talemaot se nating se i gat ol nogud nius, be i gat gudfala risen blong tingting se fiuja bambae i gud. Jisas i tokbaot “gud nius” blong Kingdom blong God. ?Wanem ya Kingdom blong God? ?Olsem wanem Kingdom ya i givim wan gudfala hop long ol man long saed blong fiuja? ?Mo Kingdom blong God bambae i mekem wanem long yu?

[Tok blong makem poen long pej 5]

Baebol i bin talemaot bifo finis, ol samting we yumi luk oli stap hapen long wol tede