Blokem ‘Spirit Blong Wol’

“Nao spirit ya we yumi kasem finis, hem i no wan spirit we i kamaot long wol. Hem i spirit blong God.”—1 KOR. 2:12.

1, 2. (a) ?Long taem bifo, from wanem ol man Briten oli putum ol kanari long ol maen blong olgeta? (b) ?Ol Kristin oli fesem wanem denja?

LONG 1911, ol lida blong Briten oli stanemap wan loa we i blong sevem laef blong ol man we oli wok long ol maen blong digimaot jakol. Long evri maen wanwan, oli mas holem rere tu smol pijin ya, kanari, i stap. ?From wanem? From we sipos i gat faea long maen, ol man we oli go blong sevem ol wokman, oli karem tufala smol kanari ya oli go wetem olgeta aninit long graon. Ol smol pijin ya oli save foldaon kwiktaem nomo taem i gat posen gas (carbon monoxide) long win. From samting ya, fasin blong tufala smol pijin ya, i givhan long ol man blong luksave kwiktaem se posen gas i stap insaed long maen. Woning ya i impoten tumas long ol man ya. Posen gas ya we oli kolem carbon monoxide i no gat kala mo i no gat smel. Hem i stopem ol red blad sel blong oli no moa karem oksijen * i go long ol defren haf blong bodi, ale man i ded from. Sipos ol man long maen oli no luksave se i gat denja, oli save foldaon mo biaen oli ded, from we oli no haremsave nating se oli pulum posen gas ya.

² Long saed blong wosip, yumi ol Kristin yumi fesem wan denja we i olsem denja ya we ol man long maen oli fesem. ?Olsem wanem? Taem Jisas i givim wok long ol disaepol blong hem blong oli talemaot gud nius long fulwol, hem i save se bambae i gat sam samting raonabaot long olgeta we i denja long laef blong olgeta. Hemia ol samting we Setan mo spirit blong wol ya i bos long olgeta. (Mat. 10:16; 1 Jon 5:19) Jisas i wari bigwan long saed blong ol disaepol blong hem. Taswe long naet bifo we hem i ded, hem i prea long Papa blong hem se: “Mi mi no askem long yu blong yu tekemaot olgeta long wol ya. Mi wantem blong yu blokem man nogud ya Setan, blong i no kam spolem olgeta, yu holem olgeta oli stap gud oli sef.”—Jon 17:15.

3, 4. ?Jisas i givim wanem woning long ol disaepol blong hem? ?Mo from wanem yumi intres long woning ya?

³ Jisas i givim woning long ol man blong hem se sipos oli no lukaotgud, ol samting raonabaot long olgeta i save gat paoa long olgeta mo i save mekem se oli kam slak long wosip blong olgeta nao oli no wekapgud. Ale oli save ded from. Toktok blong hem i gat spesel mining long yumi tede, from we yumi laef long ol las dei blong wol ya. Jisas i givim advaes long ol disaepol blong hem se: “Yufala i mas [“stap wekap,” NW]. . . . Sipos yufala i mekem olsem, bambae yufala i gat paoa blong ronwe long olgeta trabol ya, mo bambae yufala i save stanap long fes blong mi, mi Pikinini blong Man we yufala i no sem.” (Luk 21:34-36) Be yumi glad se Jisas i mekem wan promes tu long ol disaepol blong hem, se Papa blong hem bambae i givim tabu spirit long olgeta, blong oli save tingbaot bakegen ol tok blong hem, mo blong givhan long olgeta blong oli stap wekap mo blong oli no fraet.—Jon 14:26.

⁴ ?Olsem wanem? ?Tabu spirit ya i save givhan long yumi tede tu? Sipos yes, ?yumi mas mekem wanem blong yumi save kasem tabu spirit ya? ?Wanem ya spirit blong wol, mo hem i wok olsem wanem? ?Olsem wanem yumi save blokem spirit blong wol ya?—Ridim 1 Korin 2:12.

?Tabu Spirit No Spirit Blong Wol?

5, 6. ?Tabu spirit i save mekem wanem blong givhan long yumi? ?Mo yumi mas mekem wanem blong kasem tabu spirit ya?

⁵ God i no givim tabu spirit long ol Kristin long faswan handred yia nomo. Yumi tu yumi save kasem tabu spirit. Spirit ya i save givim paoa long yumi blong mekem samting we i stret mo blong wokhad long wok blong Jeova. (Rom 12:11; Fil. 4:13) Hem i save givhan long yumi blong wokem ol naesfala fasin tu, olsem lav, kaen fasin, mo gud fasin. Ol fasin ya oli haf blong “frut blong spirit”  blong God. (Gal. 5:22, 23, NW) Be Jeova i no givim tabu spirit blong hem long ol man we oli no wantem.

⁶ Taswe i gud we yumi askem se, ‘?Mi mi mas mekem wanem blong kasem tabu spirit?’ Baebol i tokbaot sam defdefren samting we yumi save mekem. Wan samting we i impoten mo i isi blong mekem, hemia blong askem God blong givim tabu spirit long yumi. (Ridim Luk 11:13.) Wan narafala gudfala rod blong kasem tabu spirit hemia blong stadi long Tok blong God mo blong mekem ol advaes blong hem i wok long laef blong yumi, from we tabu spirit nao i bin pusum ol man blong oli raetemdaon Tok blong Hem. (2 Tim. 3:16) I tru se sipos man i ridim Baebol nomo maet hem i no kasem spirit blong God. Be taem wan trufala Kristin i stadi long Tok blong God, hem i save kasem save long ol filing mo tingting blong God we oli stap long Baebol. Wan narafala samting we i impoten blong mekem, hemia blong luksave se Jeova i putumap Jisas olsem man we i mekem wok long nem blong Hem, mo hem i man we God i yusum blong givim spirit blong Hem long ol man. (Kol. 2:6) From we yumi luksave samting ya, yumi wantem folem eksampol blong Jisas mo ol tijing blong hem long laef blong yumi. (1 Pita 2:21) Moa we yumi traehad blong kam olsem Jisas Kraes, moa we bambae yumi kasem tabu spirit.

7. ?Olsem wanem spirit blong wol i pulum ol man?

⁷ Spirit blong wol i defren olgeta long spirit blong God. Spirit blong wol i pulum ol man blong folem ol fasin blong Setan. (Ridim Efesas 2:1-3. *) Spirit blong wol i wok long sam defdefren rod. Olsem yumi luk long ol man raonabaot long yumi tede, spirit ya i pulum olgeta blong oli agensem ol rul blong God. Hem i pulum ol man blong ‘wantem tumas ol rabis samting we tingting blong olgeta i wantem, mo . . . ol samting we ae blong olgeta i luk, mo blong oli flas tumas from ol samting we oli gat.’ (1 Jon 2:16) Spirit blong wol i wokem ol rabis fasin long ol man, olsem fasin blong mekem nogud wetem woman, blong wosip long ol narafala god, mekem bisnes blong posen mo kleva, jalus, kros, mo dring we oli lusum hed. (Gal. 5:19-21) Mo spirit blong wol i leftemap toktok blong ol man blong apostasi, we i blong tok nogud long ol samting we oli tabu. (2 Tim. 2:14-18) Taswe, moa we wan man i letem spirit blong wol i pulum hem, moa we hem i kam olsem Setan.

8. ?Wanem jus we yumi evriwan i mas mekem?

⁸ Yumi no save ronwe long paoa blong wol ya. Yumi wanwan yumi mas jusum wanem bambae i lidim laef blong yumi, tabu spirit no spirit blong wol. Olgeta we spirit blong wol i gat paoa long olgeta, oli save kamaot long paoa ya, mo oli save letem tabu spirit i lidim laef blong olgeta. Be narafala samting i save hapen tu. Olgeta we tabu spirit i lidim laef blong olgeta blong sam yia finis, spirit blong wol i save pulum olgeta blong oli kam aninit long paoa blong hem. (Fil. 3:18, 19) Bambae yumi tokbaot olsem wanem yumi save blokem spirit blong wol.

 Luksave Kwiktaem Ol Saen We Oli Givim Woning

9-11. ?Wanem sam saen we oli givim woning long yumi se maet spirit blong wol i stap pulum yumi?

⁹ Ol man ya we yumi bin tokbaot se oli wok long ol maen blong digimaot jakol long Briten, oli yusum ol kanari blong kasem woning kwiktaem se i gat posen gas insaed long maen. Sipos wan man we i wok long maen i luk wan long ol pijin ya i foldaon, hem i save se hem i mas kwik blong tekem aksen blong hem i sevem laef blong hem. ?Long saed blong laef blong yumi ol Kristin, wanem sam saen we oli givim woning long yumi kwiktaem se spirit blong wol i stap pulum yumi?

¹⁰ Taem yumi jes lanem ol trutok blong Baebol mo yumi givim laef blong yumi long Jeova, ating yumi bin glad tumas blong ridim Baebol oltaem. Ating yumi bin prea plante mo yumi talemaot long God ol samting we i stap long hat blong yumi. Mo yumi glad blong go long ol miting blong kongregesen. Yumi tingbaot se ol wanwan miting oli leftemap tingting blong yumi, oli mekem yumi haremgud tumas, olsem we wan man long draeples i haremgud long wan wota. Ol samting ya nao oli bin givhan long yumi blong kam fri long spirit blong wol mo blong gohed blong stap fri long hem.

¹¹ ?Olsem wanem? ?Yumi stap traehad yet blong ridim Baebol evri dei? (Sam 1:2) ?Yumi stap gohed blong prea oltaem mo blong prea wetem fulhat blong yumi? ?Yumi laekem tumas ol miting blong kongregesen? ?Mo evri wik yumi stap traehad blong go long olgeta miting? (Sam 84:10) ?No yumi lego sam long ol gudfala fasin ya? I tru se maet yumi gat plante wok blong mekem we i kakae taem mo paoa blong yumi, mo samting ya i save mekem se i had blong holem wan gudfala program long saed blong wosip blong yumi. Be sipos sloslo sam long ol gudfala fasin blong yumi oli lus, ?yumi sua se i no from we spirit blong wol i stap pulum yumi? ?Bambae yumi traehad bigwan naoia blong mekem ol gudfala fasin ya bakegen?

“Yufala i No Mas Westem Taem Blong Yufala”

12. ?Jisas i talem long ol disaepol blong hem se hu i mas “lukaot gud,” mo from wanem?

¹² ?Wanem narafala samting we yumi save mekem blong blokem spirit blong wol? Taem Jisas i givim advaes long ol disaepol blong hem blong oli “stap wekap,” hem i jes givim sam woning long olgeta long saed blong sam denja. Hem i se: “Yufala i mas lukaot gud. Yufala i no mas westem taem blong yufala long fasin ya we yufala i stap ronem lafet, mo yufala i stap drong, mo yufala i stap tingting tumas  long laef blong wol ya. I nogud Dei ya blong mi i kam kasem yufala wantaem nomo, we yufala i no tingbaot nating, olsem we yufala i fas long wan trap.”—Luk 21:34, 35.

13, 14. ?Wanem ol kwestin long saed blong kakae mo dring we i gud yumi tingting long olgeta?

¹³ Tingbaot woning ya. ?Jisas i stap talem se i nogud blong man i haremgud long kakae mo dring? !Nogat! Jisas i save gud toktok blong Solomon, we i talem se: “Mi mi luksave se wan rod nomo i stap, we oltaem long laef ya blong yumi, yumi mas traehad blong stap long gudfala laef, mo blong mekem ol gudfala fasin. I gud yumi evriwan i gohed, yumi stap kakae, mo yumi stap dring, mo yumi stap glad long ol samting ya we yumi stap hadwok long hem, from we ol samting ya oli kam long God nomo.” (Pri. 3:12, 13) Be Jisas i save se spirit blong wol i pulum ol man blong oli no bos long tingting blong olgeta long saed blong kakae mo dring.

¹⁴ ?Olsem wanem blong sua se spirit blong wol i no stap spolem yumi olsem wan posen gas? ?Olsem wanem blong save se i no stap blaenem yumi nao yumi no luksave ol denja long fasin ya blong kakae mo dring bitim mak? Yumi save tingting long ol kwestin olsem: ‘?Mi mi mekem wanem taem mi ridim ol advaes long saed blong fasin blong kakae mo dring bitim mak, we i stap long Baebol mo ol buk blong yumi? ?Mi mi tinghevi long ol advaes ya, no mi ting se advaes ya i no blong mi no se advaes ya i go tumas? ?Mi mi traem faenem eskius from ol fasin blong mi? * ?Wanem tingting blong mi long advaes long saed blong alkol we i talem se sipos yumi dring, i mas smol nomo, yumi no mas dring we yumi “lusum hed”? ?Mi mi ting nating long ol advaes olsemia? ?Mi harem se i no stret long laef blong mi? Sipos narafala i talem se oli wari long mi from we mi mi stap dring plante, ?mi mi tokbak no mi kam kros? ?Mi mi pulum ol narafala blong olgeta tu oli ting nating long ol advaes ya we i kam long Baebol?’ Yes, tingting we man i gat long saed blong wan samting i olsem wan saen blong soemaot sipos spirit blong wol i stap pulum hem.—Skelem wetem Rom 13:11-14.

No Tingting Tumas From Laef Long Wol Ya

15. ?Jisas i givim woning long saed blong wanem fasin we ol man oli gat?

¹⁵ Wan narafala impoten samting blong blokem spirit blong wol, hemia fasin blong no tingting tumas long samting we i mekem yumi wari. Jisas i save se yumi ol sinman i gat fasin ya blong tingting tumas long saed blong ol samting we yumi nidim blong laef evri dei. Wetem lav, hem i talem long ol disaepol blong hem se: “I nogud yufala i stap tingting tumas.” (Mat. 6:25) I stret we yumi stap tingting long ol samting we oli impoten, olsem samting we yumi mas mekem blong God i glad long yumi, blong lukaot long ol wok we yumi ol Kristin man i gat, mo blong givim wanem we famle i nidim blong laef. (1 Kor. 7:32-34) ?Be sipos i olsem, woning ya blong Jisas i tijim yumi long wanem?

16. ?Spirit blong wol i gat paoa olsem wanem long plante man?

¹⁶ Spirit blong wol i pulum plante man blong oli flas from olting we oli gat, nao oli wari tumas long ol samting blong olgeta, mo i spolem helt blong olgeta. Ol man long wol ya oli wantem we yumi gat tingting se mane nao i save givim gudfala fiuja long yumi, mo wanem we i pulum narafala blong tinghae long yumi i no ol gudfala Kristin fasin, hem i olting we yumi gat. Sipos yumi gat plante samting we oli sas mo oli gudgudfala, hemia nao samting we ol man long wol ya oli tinghae long hem. Olgeta we oli bilivim giaman tingting ya oli kam slef blong mane mo oltaem oli stap wari blong kasem samting we i niuwan, i bigwan moa, i beswan. (Prov. 18:11) Tingting ya long saed blong ol samting blong bodi i no stret from i mekem se man i tingting tumas, nao i blokem hem blong gohed olsem wan Kristin.—Ridim Matiu 13:18, 22.

17. ?Olsem wanem yumi save blokem fasin blong tingting tumas?

¹⁷ Yumi save blokem fasin ya blong tingting tumas sipos yumi obei long tok blong Jisas, we i se: “Fastaem yufala i mas lukaot gud blong obei long [“kingdom,” NW], mo blong folem ol stret fasin blong [God].” Jisas i promes se sipos yumi mekem samting ya, bambae God i givim ol samting tu we  yumi rili nidim blong laef. (Mat. 6:33) ?Olsem wanem yumi save soemaot se yumi bilif long promes ya? Wan rod hemia blong lukaot stret fasin blong God fastaem, i min se bambae yumi mekem samting we i stret folem ol rul blong God long saed blong mane. Yumi no giaman long saed blong ol takis we yumi mas pem mo nating se yumi ting se wan samting long saed blong wok blong yumi i “smol” nomo, yumi no giaman long hem. Yumi mekem bes blong yumi blong holem ol promes we yumi mekem long saed blong mane. Taem yumi mas pemaot ol kaon blong yumi, ‘Yes we yumi talem i mas Yes nomo.’ (Mat. 5:37; Sam 37:21) Ating bambae yumi no kasem plante mane from fasin olsem, be yumi mekem God i glad long yumi, yumi holem wan tingting we i klin, mo i mekem se wari blong yumi i godaon bigwan.

18. ?Jisas i givim wanem eksampol long yumi, mo yumi kasem wanem blesing taem yumi folem eksampol ya?

¹⁸ Blong putum Kingdom i stap fastaem, yumi mas save wanem samting i moa impoten blong mekem long laef blong yumi. Tingbaot eksampol blong Jisas. Samtaem hem i werem ol naesfala klos. (Jon 19:23) Hem i haremgud blong kakae mo dring waen wetem sam gudfala fren blong hem. (Mat. 11:18, 19) Be olting we hem i gat mo taem we hem i spenem blong haremgud, i olsem sol long kakae blong hem, oli no stamba samting long laef blong hem. Kakae blong Jisas i blong mekem ol samting we Jeova i wantem hem blong mekem. (Jon 4:34-36) !Sipos yumi folem eksampol blong Jisas, bambae yumi gat wan nambawan laef! Yumi kasem glad long wok ya blong halpem ol man we narafala i mekem i nogud long olgeta, blong oli save haremgud long ol promes blong Baebol. Yumi kasem lav mo sapot blong kongregesen. Mo yumi mekem Jeova i glad bigwan. Taem yumi putum ol samting we oli impoten fastaem long laef blong yumi, olting mo ol pleplei oli no bos long yumi. Defren olgeta, oli ol samting blong wok, ol tul we oli halpem yumi blong wosipim Jeova. Moa we yumi bisi long wok we i sapotem Kingdom blong God, moa we bambae spirit blong wol ya i no save winim yumi.

Oltaem Mekem ‘Tingting i Fas Gud Long Ol Fasin We Tabu Spirit i Wantem’

19-21. ?Olsem wanem yumi save mekem ‘tingting i fas gud long ol fasin we tabu spirit i wantem’? ?Mo from wanem yumi mas mekem olsem?

¹⁹ Tingting blong man i pusum hem blong mekem samting. Plante taem, ol aksen we yumi no tingting gud long olgeta, oli ol rabis fasin we yumi mekem from samting we yumi nomo i wantem. Taswe Pol i pulum yumi blong tingbaot bakegen se yumi nidim blong lukaot gud long tingting blong yumi. Hem i raetem se: “Olgeta ya we oli stap mekem ol fasin we tingting blong olgeta nomo i wantem, tingting blong olgeta i fas gud long ol rabis fasin ya. Be olgeta ya we oli stap mekem ol gudfala fasin we tabu spirit i wantem, tingting blong olgeta ya i fas gud long ol gudfala fasin ya.”—Rom 8:5.

²⁰ ?Olsem wanem yumi save blokem spirit blong wol ya blong i no gat paoa long tingting mo aksen blong yumi? Blong protektem tingting blong yumi, yumi mas bos long samting we yumi tingbaot. Yumi mas traehad blong blokem ol giaman tingting blong wol. Olsem taem yumi jusum wan pleplei, yumi mas gat strong tingting blong no mekem tingting blong yumi i doti wetem ol program we oli leftemap ol rabis fasin long saed blong seks mo raf fasin. Yumi kasem save se tabu spirit blong God we i klin gud, i no save stap long tingting blong yumi sipos hem i doti. (Sam 11:5; 2 Kor. 6:15-18) Antap long samting ya, blong putum tingting blong yumi i stap long ol gudfala fasin blong tabu spirit, oltaem yumi mas mekem Baebol riding, prea, tingting dip, mo go long ol miting. Mo yumi wok wetem tabu spirit taem yumi joen oltaem long wok blong prij.

²¹ Yes, yumi mas blokem spirit blong wol mo ol nogud tingting we wol ya i pulum ol man blong gat. Bigfala traehad blong yumi blong mekem samting ya i no blong nating nomo, from we Pol i talem se: “Sipos tingting blong man i fas gud long ol rabis fasin ya we tingting blong hem nomo i wantem, bambae hem i ded from. Be sipos tingting blong man i fas gud long ol gudfala fasin ya we tabu spirit i wantem, bambae hem i gat laef mo pis from.”—Rom 8:6.

[Ol futnot]

?Yu Yu Tingbaot?

• ?Yumi mas mekem wanem blong kasem tabu spirit?

• ?Wanem sam defren rod we spirit blong wol i save gat paoa long yumi?

• ?Olsem wanem yumi save blokem spirit blong wol?

[Kwestin]

[Tok blong pija long pej 25]

Bifo we yu go long wok no skul, prea from tabu spirit

[Tok blong pija long pej 26]

Oltaem yumi mas gat tingting we i klin, gat fasin we i tru long wok blong yumi, mo yumi no mas kakae mo dring bitim mak