?Yu Yu Stap Toktokgud Klin Lanwis?
?Yu Yu Stap Toktokgud Klin Lanwis?
“Bambae mi jenisim lanwis blong ol man i kam klin lanwis. Nao olgeta oli save singaot nem blong Jeova.”—SEF. 3:9, NW.
1. ?Wanem nambawan presen we Jeova i givim long yumi?
FASIN ya we yumi save toktok ol lanwis, i no kamaot long yumi ol man, be hem i wan presen we i kamaot long Man we i wokem yumi, Jeova God. (Eks. 4:11, 12) Jeova i mekem we faswan man ya Adam i save toktok, mo antap long hemia, i mekem hem i naf blong wokem mo joenem ol niufala wod. (Jen. 2:19, 20, 23) !Yumi luk se hemia i wan nambawan presen we God i givim! Presen ya i mekem tu we ol man oli save toktok wetem Papa blong olgeta long heven, mo presem hae nem blong hem.
2. ?From wanem olgeta man long wol oli no moa gat wan lanwis nomo?
2 Long ol 1,700 yia afta we God i wokem faswan man, olgeta man oli “gat wan lanwis nomo.” (Jen. 11:1) Gogo, long taem blong Nimrod, fasin stronghed i kamaot. Samfala we oli no wantem obei long ol tok blong Jeova, oli hivap long wan ples we biaen oli singaotem se Babilon. Olgeta ya oli wantem stap wanples nomo. Ale oli girap, oli stat blong bildim wan haos we i hae we i hae. Oli no mekem samting ya blong givim ona long Jeova, be blong ‘mekem nem blong olgeta nomo i go antap.’ Taswe Jeova i mekem lanwis blong olgeta i paspas, nao oli stat toktok long ol defdefren lanwis. Samting ya i mekem we oli seseraot oli go olbaot long ol defren ples long wol.—Ridim Jenesis 11:4-8.
3. ?Wanem i hapen taem Jeova i mekem lanwis blong ol stronghed long Babilon i paspas?
3 Tede, i gat plante taosen lanwis long wol, ating moa long 6,800 evriwan. Olgeta lanwis ya wanwan oli gat ol defdefren fasin blong tingting i joen wetem olgeta. Taswe, i luk olsem se taem Jeova God i mekem lanwis blong ol stronghed ya i paspas, hem i tekemaot evri tingting blong olgeta long saed blong faswan lanwis we oli gat. Hem i putum ol niufala wod long tingting blong olgeta, mo tu, hem i jenisim fasin blong olgeta blong tingting, mo fasin blong joejoenem ol wod. !Yumi luksave from wanem oli putum nem blong ples ya se Babilon, we i minim “Paspas”! (Jen. 11:9) Wan samting we i pulum tingting blong yumi, hemia se Baebol nomo i eksplenem gud stamba blong ol defren lanwis we yumi gat long wol tede.
Wan Niufala Lanwis We i Klin
4. ?Jeova i talemaot wanem samting we i mas hapen long taem blong yumi?
4 Stori blong Baebol long saed blong samting we God i mekem long Babilon, i pulum intres blong yumi. Be samting we i hapen long taem blong yumi i pulum intres blong yumi moa, mo i moa impoten tu. Jeova i yusum profet Sefanaea blong talemaot se: “Long taem ya, bambae mi jenisim lanwis blong ol man i kam klin lanwis. Nao olgeta oli save singaot nem blong Jeova, blong mekem wok blong hem, we solda blong wan i joen long solda blong narawan.” (Sef. 3:9, NW) ?Wanem ya “klin lanwis”? ?Mo olsem wanem yumi save lanem blong toktokgud lanwis ya?
5. ?Wanem ya klin lanwis? ?Mo ol man we oli jenisim lanwis blong olgeta i kam klin lanwis, oli mekem wanem?
5 Klin lanwis, hemia trutok long saed blong Jeova God mo ol plan blong hem, we yumi faenem long Tok blong hem Baebol. Man we i lanem “lanwis” ya i kasem save gud long trutok blong Kingdom blong God, mo olsem wanem Kingdom ya bambae i leftemap nem blong Jeova i go antap olgeta. Hem i lanem se Kingdom ya bambae i mekem hae rul blong God i win, mo bambae i karem ol blesing oli kam blong olwe long ol man we oli obei gud long God. ?Ol man we oli jenisim lanwis blong olgeta i kam klin lanwis, oli mekem wanem? Baebol i talem se oli “singaot nem blong Jeova” mo oli “mekem wok blong hem, we solda blong wan i joen long solda blong narawan.” Jenis ya i karem bigfala ona i kam long nem blong Jeova mo i mekem ol man blong hem oli joengud. Hem i no olsem jenis we i kamaot long Babilon.
Lanem Klin Lanwis
6, 7. (a) ?Taem wan man i wantem lanem wan niufala lanwis, hem i mas mekem wanem? ?Olsem wanem i sem mak long saed blong klin lanwis? (b) ?Bambae yumi tokbaot wanem naoia?
6 Taem wan man i wantem lanem wan niufala lanwis, hem i no lanem ol niufala wod nomo. Hem i mas lanem tu blong tingting long wan defren fasin. Long niufala lanwis ya, ating fasin blong skelem ol samting i defren, mo samting we i mekem ol man oli laf mo haremgud, i defren tu. Blong mekem ol niufala saon blong lanwis ya, man i mas yusum tang blong hem long defren fasin, mo ol narafala haf blong bodi blong hem we oli mekem ol saon ya oli mas wok defren tu. Sem samting i mas hapen taem yumi stat blong lanem klin lanwis blong trutok blong Baebol. I no naf blong lanem nomo sam stamba tijing blong Baebol. Blong lanemgud klin lanwis ya, yumi mas jenisim tingting blong yumi mo mekem i kam niuwan.—Ridim Rom 12:2; Efesas 4:23.
7 ?Wanem bambae i givhan long yumi blong kasem save long klin lanwis mo blong toktokgud lanwis ya? Olsem ol narafala lanwis, i gat sam stamba rod we yumi save yusum blong givhan long yumi blong toktokgud lanwis ya blong trutok blong Baebol. Bambae yumi tokbaot sam stamba rod we ol man oli yusum blong lanem ol narafala lanwis, mo bambae yumi luk olsem wanem ol rod ya oli save halpem yumi blong lanem klin lanwis.
Toktokgud Klin Lanwis Ya
8, 9. ?Blong lanem klin lanwis, yumi mas mekem wanem? ?From wanem samting ya i impoten?
8 Lesingud. Faswan taem we wan man i harem wan niufala lanwis, ating hem i ting se neva bambae i kasem save long lanwis ya. (Aes. 33:19) Be taem hem i lanem blong lesingud long samting we hem i stap harem, sloslo bambae hem i stat blong haremsave wanwan wod, mo bambae hem i makem sam toktok we oli stap kamaot bakegen mo bakegen. Yumi kasem sem advaes long saed blong klin lanwis, se: “Yumi mas strong moa blong [“lesin long,” NW] ol trutok ya we yumi harem . . . , blong bambae yumi no lusum rod blong yumi.” (Hib. 2:1) Plante taem Jisas i talem long ol man blong hem se: “Man we i gat sora, hem i mas lesin gud long tok ya.” (Mat. 11:15; 13:43; Mak 4:23; Luk 14:35) Yes, yumi mas ‘lesin gud mo haremsave’ ol tok, blong bambae yumi save kasem save moa long klin lanwis.—Mat. 15:10; Mak 7:14.
9 Blong lesingud, yumi mas putum tingting blong yumi i stap strong long tok we yumi harem. Hemia i hadwok lelebet, be frut we yumi kasem i gud tumas. (Luk 8:18) ?Olsem wanem long taem blong ol Kristin miting? ?Yumi putum tingting blong yumi i stap strong long ol tok we yumi stap harem, no yumi letem ol narafala samting oli pulum tingting blong yumi? I impoten tumas we yumi traehad blong putum tingting blong yumi i stap strong long ol tok we i stap kamaot. Sipos no, bambae yumi slo tumas blong haremsave.—Hib. 5:11.
10, 11. (a) ?Antap long fasin ya blong lesingud, yumi mas mekem wanem moa? (b) ?Blong toktok klin lanwis, yumi mas mekem wanem bakegen?
10 Folem fasin blong olgeta we oli toktokgud. Olgeta we oli stap lanem wan niufala lanwis, oli lesingud long ol narafala we oli toktokgud lanwis ya. Be i no hemia nomo. Oli traem blong folem fasin blong olgeta blong toktok, mo tiun blong voes blong olgeta tu. Olsem nao, olgeta we oli stap lanem niufala lanwis ya, bambae oli talem klia ol wod, mo samting ya i save mekem i moa isi blong oli storian wetem ol narafala. Long sem fasin, yumi mas lanem plante samting from olgeta we oli gat gudhan finis blong “tijimgud” ol narafala long klin lanwis. (2 Tim. 4:2) Yu mas askem olgeta blong givhan long yu. Mo yu mas letem olgeta oli stretem yu taem yu mestem.—Ridim Hibrus 12:5, 6, 11.
11 Blong toktok klin lanwis, yumi mas bilif long trutok mo tijim ol narafala long trutok ya, be yumi mas mekem sam samting moa yet. Yumi mas mekem ol fasin blong yumi oli laenap wetem ol loa blong God mo ol tingting blong hem. Blong givhan long yumi blong mekem olsem, yumi mas folem ol gudfala fasin blong ol narafala. Hemia i min se yumi folem fasin blong bilif blong olgeta mo strong tingting we oli gat. Mo i minim tu se yumi folem evri samting we Jisas i mekem long laef blong hem. (1 Kor. 11:1; Hib 12:2; 13:7) Sipos yumi traehad oltaem blong mekem samting ya, bambae kampani blong ol man blong God i joengud. Bambae i olsem we olgeta evriwan oli gat sem tiun long voes blong olgeta taem oli toktok.—1 Kor. 4:16, 17.
12. ?Olsem wanem fasin blong rimemba i joen wetem wan niufala lanwis?
12 Rimemba. Ol man we oli wantem lanem wan narafala lanwis, oli mas rimemba plante niufala samting. Oli mas rimemba ol niufala wod mo sam spesel tok long lanwis ya. Long saed blong ol Kristin, fasin blong rimemba i wan nambawan tul blong givhan long olgeta blong lanemgud klin lanwis. I gud tumas sipos yumi save rimemba nem blong olgeta buk long Baebol long stret oda blong olgeta. Samfala oli traem kasem mak ya we oli save rimemba plante vas blong Baebol. Sam narafala oli luk se i gud blong rimemba ol singsing blong Kingdom, nem blong ol laen blong Isrel mo nem blong ol 12 aposol, mo ol fasin we oli frut blong tabu spirit. Long taem bifo, plante man Isrel oli lanem baehat ol Sam. Long taem blong yumi, wan smol boe i lanem baehat bitim 80 vas blong Baebol, mo i mekem samting ya bifo we hem i gat 6 yia blong hem. ?Olsem wanem? ?Yu yu save traehad moa blong yusum nambawan fasin ya blong rimemba?
13. ?From wanem i impoten blong harem semfala tok bakegen mo bakegen?
13 Blong rimemba, yumi nidim blong harem semfala toktok bakegen mo bakegen. Samting ya i haf blong tijing we yumi kasem olsem wan Kristin. Aposol Pita i talem se: “Nating we yufala i save finis ol samting ya, mo yufala i stap stanap strong long ol trutok we yufala i kasem finis, be oltaem mi mi mas talemaotgud ol trutok ya bakegen long yufala.” (2 Pita 1:12) ?From wanem yumi nidim blong harem ol semfala tok bakegen mo bakegen? From we, long rod ya, save blong yumi bambae i kam dip moa, bambae tingting blong yumi i open moa, mo bambae yumi kam strong moa blong obei long Jeova. (Sam 119:129) Sipos yumi tingbaot bakegen mo bakegen ol rul mo tingting blong God, samting ya bambae i givhan long yumi blong jekemgud yumi, mo blong blokem fasin blong ‘fogetem ol samting we loa blong God i talem.’ (Jem. 1:22-25) Sipos yumi no stap tingbaot trutok bakegen mo bakegen, ol narafala samting bambae oli gat paoa long hat blong yumi, nao maet yumi no moa save toktokgud klin lanwis.
14. ?Wanem bambae i givhan long yumi taem yumi stadi long klin lanwis?
14 Ridimaot Tok blong God. (Rev. 1:3) Samfala we oli wantem lanem wan niufala lanwis oli ridim ol buk, be oli no ridim long bigfala voes. Hemia i no beswan rod. Taem yumi stadi long klin lanwis, samting we i save halpem yumi blong putum tingting blong yumi i stap strong long ol tok we yumi ridim, hemia se yumi mas “ridim long smol voes.” (Ridim Ol Sam 1:1, 2. *) Fasin ya blong ridim long smol voes i makemgud long tingting blong yumi samting we yumi stap ridim. Long Hibru lanwis, tok ya “ridim long smol voes” i klosap sem mak long tingting dip. Olsem we bel blong yumi i mas tantanem kakae blong givim paoa long bodi blong yumi, long sem fasin, yumi mas tingting dip sipos yumi wantem kasem klia ol samting we yumi ridim. ?Olsem wanem? ?Yu yu tekem naf taem blong tingting dip long ol save we yu stadi long hem? Afta we yumi ridim wan haf blong Baebol, yumi mas tektaem blong tingting dip long hem.
15. ?Olsem wanem yumi save stadi long ol rul blong klin lanwis?
15 Luklukgud long fasin blong joejoenem ol wod. Taem yumi stap lanem wan narafala lanwis, i gud we yumi stadi long stret fasin blong joejoenem ol wod, wetem ol rul blong lanwis ya. Olsem nao, bambae yumi kasem save long wei we oli talem ol tok long lanwis ya, nao bambae yumi lanem blong toktokgud. Evri lanwis i gat ol stret toktok blong hem we oli olsem ol stamba pos blong lanwis ya, mo long sem fasin, trutok blong Baebol i gat ‘ol stret toktok blong hem we oli olsem ol stamba pos blong trutok.’ (2 Tim. 1:13, NW) I gud we oltaem yumi folem “ol stret toktok ya.”
16. ?Wanem problem we yumi mas winim, mo olsem wanem yumi save winim?
16 Gohed blong kamgud moa. Maet wan man i lanem sam smol samting long saed blong wan narafala lanwis. Maet hem i naf nomo blong storian smol wetem ol narafala, be hem i no moa traehad blong kamgud moa long lanwis ya. Wan problem we i klosap sem mak i save kasem olgeta we oli toktok klin lanwis. (Ridim Hibrus 5:11-14) ?Wanem i save givhan long yumi blong winim problem ya? Yumi mas traehad oltaem blong kamgud moa long klin lanwis. “I gud yumi go stret long ol tok we i blong mekem yumi i kam bigman long Kraes, yumi no gobak bakegen long ol tok ya blong stamba tijing blong gud nius blong Kraes we yumi lanem fastaem. Yumi no save gohed oltaem blong putum fandesen blong haos. Mo long sem fasin, yumi no save tokbaot fasin ya oltaem we yumi tanem tingting blong yumi from ol fasin blong yumi we i blong ded nomo, blong yumi bilif long God. Yumi no save stap oltaem long ol tok blong fasin blong baptaes, mo fasin blong putum han long hed blong man. Yumi no save stap oltaem long ol tok ya se bambae ol man oli laef bakegen long ded olsem wanem, mo . . . bambae God i jajem olgeta man olsem wanem.”—Hib. 6:1, 2.
17. ?From wanem i impoten blong stadi oltaem? Talem wan pijatok.
17 Makemaot ol stret taem blong stadi. I moa gud we yumi stadi blong smoltaem mo yumi mekem samting ya plante, i bitim we yumi spenem plante aoa blong stadi be wanwan taem nomo. Yu mas stadi long taem we tingting blong yu i klia, i wekapgud, mo i no gat narafala samting i stap pulum tingting blong yu. Taem yumi lanem wan niufala lanwis, hemia i olsem we yumi stap katem wan rod long bus. Moa we yumi wokbaot long smol rod ya, moa we bambae i isi blong wokbaot long hem. Sipos yumi no yusum rod ya blong longtaem lelebet, bambae i kam bus bakegen. !Taswe, i impoten blong gohed oltaem blong stadi strong, wetem olgeta tingting blong yu! (Dan. 6:16, 20) Blong toktokgud klin lanwis blong trutok blong Baebol, yu mas prea ‘we yu no kam slak, mo we tingting blong yu i klia gud.’—Efes. 6:18.
18. ?From wanem yumi mas tekem evri janis blong toktok klin lanwis?
18 !Toktok plante! Samfala we oli lanem wan narafala lanwis, oli fraet blong toktok from we oli sem no from we oli ting se bambae oli mestem. Sipos oli no toktok, bambae oli no save kamgud moa long lanwis ya. I tru tumas se yumi mas yusum lanwis ya oltaem blong yumi save kamgud long hem. Moa we yumi toktok long lanwis ya, moa we fraet bambae i godaon mo bambae i isi moa blong yumi toktok. Sem mak long saed blong klin lanwis, yumi mas tekem evri janis blong toktok lanwis ya. “Taem yumi bilif . . . long hat blong yumi, God i mekem yumi kam stret man long fes blong hem, mo taem yumi talemaot tok ya, God i sevem yumi.” (Rom 10:10) Yumi “talemaot tok ya” taem yumi tekem baptaes mo taem yumi tekem evri janis blong tokbaot Jeova, hemia long wok blong prij tu. (Mat. 28:19, 20; Hib. 13:15) Long ol Kristin miting blong yumi, yumi save talemaot ol klia tok long klin lanwis, we i isi long ol narafala blong kasem save long hem.—Ridim Hibrus 10:23-25.
Joengud Blong Yusum Klin Lanwis Blong Presem Jeova
19, 20. (a) ?Wanem bigfala samting we ol Witnes blong Jeova oli stap mekem tede? (b) ?Yu yu gat strong tingting blong mekem wanem?
19 !Tingbaot olsem wanem ol man oli mas glad blong stap long Jerusalem long Sande, namba 6 dei blong manis Sivan long yia 33 K.T.! * Jes bifo naen klok moning, God i mekem wan narakaen samting i hapen. Ol man we oli hivap long wan rum antap long wan haos oli “stat toktok long ol lanwis blong ol narafala man.” (Wok 2:4) Tede, God i no moa givim presen ya long ol man blong hem se oli save toktok long ol naranarafala lanwis. (1 Kor. 13:8, NW) Nating se i olsem, ol Witnes blong Jeova oli stap talemaot gud nius blong Kingdom long bitim 430 lanwis.
20 !Nating se prapa lanwis blong yumi i olsem wanem, be yumi talem tangkiu tumas we yumi stap joengud blong toktok long klin lanwis blong trutok blong Baebol! I olsem se samting we i hapen long Babilon i jenis i kambak olsem fastaem. Ol man blong Jeova oli presem nem blong hem long wan lanwis, hemia klin lanwis. (1 Kor. 1:10) Yumi mas gat strong tingting blong gohed blong mekem wok blong God wetem ol Kristin brata sista blong yumi long olgeta ples blong wol, “we solda blong wan i joen long solda blong narawan.” Long semtaem, bambae yumi kamgud moa blong toktok long klin lanwis, we i givim ona long Papa blong yumi long heven, Jeova.—Ridim Ol Sam 150:1-6.
[Ol futnot]
^ par. 14 Ol Sam 1:1, 2, (NW): “Man we i no wokbaot folem advaes blong ol rabis man, mo i no stanap blong folem fasin blong ol man blong mekem sin, mo i no sidaon wetem olgeta we oli gat fasin blong jikim man, hem i hapi. Hem i glad tumas long loa blong Jeova, mo long dei mo naet, hem i stap ridim ol tok blong loa ya long smol voes.”
^ par. 19 K.T. i minim Kristin Taem.
?Bambae Yu Yu Ansa Olsem Wanem?
• ?Wanem ya klin lanwis?
• ?Olsem wanem blong toktok klin lanwis?
• ?Wanem bambae i givhan long yumi blong kamgud moa blong toktok klin lanwis?
[Kwestin]
[Bokis blong pija long pej 27]
Blong Kamgud Moa Blong Toktok Klin Lanwis, Yu Mas
◆ lesingud.
◆ folem fasin blong olgeta we oli toktokgud.
◆ rimemba mo talem semfala toktok bakegen mo bakegen.
◆ ridimaot tok blong God.
Sam 1:1, 2, NW; Rev. 1:3
◆ luklukgud long fasin blong “joejoenem ol wod.”
2 Tim. 1:13, NW
◆ gohed blong kamgud moa.
◆ makemaot ol stret taem blong stadi.
◆ toktok plante.