Lav Blong Wan Mama i Soemaot Lav We God i Gat

“?Olsem wanem? ?Woman i save fogetem pikinini blong hem? ?Yufala i ting se hem i save tanem baksaed long pikinini blong hem, we hem nomo i bonem? Maet i gat woman we i save mekem olsem, be mi bambae mi no save mekem olsem long yufala samtaem.”—AESEA 49:15.

WAN mama i holemtaet pikinini we hem i jes bonem, mo i klia se pikinini ya i haremgud long han blong mama blong hem. Taem yu luk samting ya, yu luksave lav mo filing we wan mama i gat long pikinini blong hem. Wan mama we nem blong hem Pam, i talem se: “Long faswan taem we mi holem pikinini blong mi long han blong mi, filing blong lav i kam fulap long mi, mo mi harem se mi mas lukaotgud long laef ya we i jes stat.”

I klia nomo se lav blong wan mama i gat bigfala paoa long fasin blong pikinini blong gruap gud, mo ol stadi we ol man oli mekem oli pruvum samting ya. Wan stadi blong Wol Helt Ogenaesesen long saed blong tingting blong man, i talem se: “Ol stadi blong mifala oli soemaot se taem mama i ronwe long pikinini blong hem no pikinini i seraot long mama blong hem, pikinini i no moa glad mo tingting blong hem i foldaon. Samtaem pikinini i save harem nogud gogo i luk olsem se i lusum hed.” Ripot ya i tokbaot wan narafala stadi tu we i soemaot se pikinini we i kasem lav mo we narafala i intres long hem stat taem hem i smol nomo, bambae i gat hed moa i winim pikinini we i no kasem lav.

Wan tija long saed blong tingting mo filing blong ol man long UCLA Skul blong Meresin long Yunaeted Stet, nem blong man ya Alan Schore, i tokbaot olsem wanem lav blong wan mama i impoten tumas, i se: “Faswan fren we pikinini i gat, hemia mama blong hem. Fasin fren ya i olsem wan eksampol long hem, nao long ful laef blong hem, bambae i folem eksampol ya long fasin fren we hem i gat wetem ol narafala.”

Sore tumas, sam mama we tingting blong olgeta i foldaon, no oli kasem wan sik, no oli gat plante narafala wari, oli no moa lukaotgud long pikinini blong olgeta, mo samfala oli ‘fogetem pikinini blong olgeta’ tu. (Aesea 49:15)  Be samting ya i no hapen plante. I luk olsem se, klosap olgeta mama oli no nidim blong lanem fasin blong lavem pikinini blong olgeta, fasin ya i stap long olgeta finis. Ol man we oli stadi long bisnes ya oli faenemaot se taem wan mama i stap bonem pikinini blong hem, wan homon * we oli kolem oxytocin i kam fulap long blad blong hem. Homon ya i mekem se basket blong pikinini i wok strong blong pusumaot pikinini ya, mo biaen homon ya i givhan long mama blong i gat plante melek long titi blong hem. Ol man we oli stadi long saed ya, oli ting se semfala homon ya we ol man mo woman tugeta oli gat, i mekem se mama i gat bigfala filing blong lav long pikinini blong hem mo i glad nomo blong tingbaot pikinini blong hem bifo we i tingbaot hem wan.

?Wanem Stamba Blong Lav?

Olgeta we oli bilif long evolusen * oli talem se lav ya we wan mama i gat, we i tingbaot pikinini blong hem fastaem long hem wan, i kamaot from laki nomo. Oli talem se, taem evolusen i gohed, man i glad blong holemtaet fasin ya blong lavem narafala from we hem i luk se i save kasem gudfala samting from. Olsem nao, wan buk we i stap long Intenet (Mothering Magazine) i talem se: “Fastaem yumi gat bren olsem ol anamol. Taem evolusen i gohed, wan narafala haf blong bren i kamaot, hemia haf we i stamba blong ol filing blong yumi. Haf ya nao we i mekem se ol mama mo ol pikinini oli frengud mo lavlavem olgeta.”

I tru, ol saentis oli pruvum finis se haf ya blong bren we buk ya i tokbaot i joen wetem ol filing blong yumi. ?Be yu ting se i stret blong talem wan haf blong bren blong mama we i kamaot long wan anamol from laki nomo, i mekem se hem i lavem pikinini blong hem?

Tingbaot wanem we Baebol i talem long saed blong stamba blong lav. Baebol i talem se God i wokem ol man oli olsem stret pija blong hem, i min se oli naf blong tekem fasin blong hem. (Jenesis 1:27) Bigfala stamba fasin blong God, hemia lav. Aposol Jon i raetem se: “Man we i no save lavem narafala man, hem i no save God.” ?From wanem? “From we God i stamba blong fasin ya blong lavem man.” (1 Jon 4:8) Makemgud we vas ya i no talem se God i gat lav nomo. Hem i talem se God i stamba blong lav, i min se, fasin blong lavem narafala i kamaot long hem.

Baebol i eksplenem fasin lav olsem: “Man we i stap lavem man, tingting blong hem i longfala, mo hem i gat sore long man. Man olsem, hem i no save jalus, mo i no save mekem tingting blong hem i go antap, mo i no save flas. Hem i no save jikim man, mo i no save tingbaot hem nomo. Hem i no save kros kwik, mo i no save stap kros longtaem. Sipos hem i luk we wan narafala man i mekem i no stret, be hem i no save glad from, hem i save glad long ol trutok nomo. Hem i no save letem wan samting i daonem tingting blong hem, oltaem hem i stap bilif strong long God, mo i stap putum tingting blong hem i strong long hem. Maet bigfala trabol i save kasem hem, be tingting blong hem i no save foldaon. Fasin ya we oltaem man i lavem man, bambae i no save finis samtaem.” (1 Korin 13:4-8) ?Olsem wanem? ?I stret blong ting se nambawan fasin ya i kamaot from laki nomo?

?Save Ya i Mekem Wanem Long Yu?

?Taem yu ridim ol tok antap we i eksplenem lav, yu harem se yu wantem tumas we wan man i lavem yu olsemia? I stret nomo we yu harem olsem, yumi evriwan i wantem samting ya. ?From wanem? From we “yumi pikinini blong God.” (Ol Wok 17:29) God i wokem yumi wetem fasin ya we yumi mas kasem mo givim lav. Mo yumi save sua se God i lavem yumi tumas. (Jon 3:16; 1 Pita 5:6, 7) !Vas we i stap long stat blong stori ya, i talem se God i lavem yumi moa i winim we wan mama i lavem pikinini blong hem, mo se lav we God i gat i stap olwe!

Be maet yu stap tingting se: ‘?Sipos God i waes, i gat paoa, mo i lavem yumi, from wanem hem i no finisim ol trabol we oli mekem man i safa? ?From wanem hem i letem se plante pikinini oli ded, sam man oli rul strong long ol narafala, mo ol man oli spolem wol from we oli griri mo oli no save rul gud?’ Hemia ol gudfala kwestin, mo i stret we yu kasem ansa blong olgeta.

Nomata wanem toktok blong sam man we oli ting se i no gat rod blong save sipos God i stap no i no stap, be i gat rod blong faenem ol stret ansa long ol kwestin ya. Plante milian man long plante handred kantri oli faenem ol ansa ya taem oli stadi Baebol wetem ol Witnes blong Jeova. Olgeta we oli wokem magasin ya oli singaot yu tu blong yu stadi Baebol. Taem yu stadi mo lukluk gud ol samting we God i wokem, bambae yu kasem save moa long saed blong God, nao bambae yu luksave se hem i no wan man we i mekem i strong tumas long yumi mo we yumi no save kam klosap long hem. Defren olgeta, ating bilif blong yu bambae i kam strong moa se God “i no stap longwe long yumi nating.”—Ol Wok 17:27.

[Ol futnot]

[Tok blong makem poen long pej 8]

God i lavem yumi moa i bitim we wan mama i lavem pikinini blong hem