Man i Traehad Blong Faenem Ol Ansa

“Naoia we yumi save ‘olsem wanem’ blong kasem naf mane blong lukaot long yumi, yumi haremgud long ol samting we neva yumi ting se bambae yumi save gat. Yumi gat ol mesin blong mekem rum i kolkol, ol nambawan stereo, mo ol gudfala frut blong kakae long ful yia, be yumi stap askem yet ‘from wanem’ yumi laef. ?From wanem yumi traehad long laef ya be yumi no save se i blong mekem wanem?” —David G. Myers, wan tija long Hope College, Holland, Michigan, U.S.A. we i stadi long tingting blong man.

?BAMBAE yu yu ansa olsem wanem long kwestin we tija ya i stanemap? Sam man oli ting se maet oli stap westem taem nomo blong lukaotem ansa blong kwestin ya. Be, man we i no faenem ansa blong kwestin ya, hem i olsem man we i no wantem karemaot ston we i stap insaed long sus blong hem—hem i save gohed blong wokbaot, be bambae hem i harem nogud long wokbaot blong hem.

Olsem plante narafala man, maet samtaem yu tu yu bin tingbaot sipos i gat wan bigfala risen from wanem yumi laef. World Values Survey i wan stadi long saed blong samting we i impoten long tingting blong ol man raonabaot long wol. Stadi ya i bigwan moa i bitim ol narafala semfala stadi olsem we ol man oli mekem bifo. Samting we oli faenemaot long stadi ya hemia se long plante kantri, plante moa man oli stap tingbaot “risen from wanem oli laef.”

Sipos yu wantem gat trufala pis long tingting blong yu, yu nidim blong faenem ansa blong tri impoten kwestin.

?Yumi kam wea?

?From wanem yumi laef?

?Wanem bambae i hapen long fiuja?

?Weples yu save faenem stret ansa blong ol impoten kwestin ya? Ol haf we oli kam biaen oli givim ol ansa we i kamaot long Baebol, i no long tingting mo waes blong man. I gud we yu openem Baebol blong yu mo jekem ol vas, blong yu save luk wanem we Baebol i talem.