Kwestin Blong Olgeta We Oli Ridim Magasin Ya

?From Wanem God i Letem Ol Man Oli Safa?

God i no stamba blong fasin safa we ol man oli kasem. Baebol i talem se: “!I longwe long fasin blong tru God blong mekem nogud fasin.” (Job 34:10, NW) Sipos i olsem, ?Hu nao i stamba blong fasin safa?

Jisas i talem se Setan nao i “masta blong wol.“ (Jon 14:30) I tru se Jeova i Haefala Rula blong heven mo wol. Bambae hem i neva save lego posisen ya blong hem olsem Rula blong heven mo wol. Be hem i letem Setan i rulum ol man blong smol taem nomo.—1 Jon 5:19.

?Setan i wanem kaen rula? Stat long taem ya we hem i toktok long tufala faswan man, Setan i man blong kilim man i ded mo i man blong giaman. Setan i waesgud blong spolem ol man long wol. Jisas i tok agensem Setan i se: “Fasin blong hem we i stat bifo olgeta, hem i man blong kilim man. Neva hem i stap wetem olgeta we oli tok tru, from we i no gat trutok nating long hem. Taem we hem i stap giaman, hem i stap mekem fasin blong hem nomo, from we hem i man blong giaman, we i stamba blong ol giaman toktok.” (Jon 8:44) Mo tu, Jisas i talem se ol man we oli wantem kilim hem i ded, oli pikinini blong Setan we i faswan man blong kilim man i ded. From we fasin blong olgeta i sem mak long Setan, taswe oli olsem ol pikinini blong hem.

Setan i stap gohed yet blong pulum ol man blong kilim narafala man i ded. Eksampol, Rudolph J. Rummel, wan tija blong politik long Yunivesiti long Hawai, Yunaeted Stet, i talem se long yia 1900 go kasem 1987, ol defdefren gavman long wol oli kilim i ded 169,198,000 man. Ol man ya oli ded taem ol man oli faet blong kafsaedem gavman, oli traem kilimaot olgeta man blong wan komuniti no laen, mo from ol samting we i nogat risen blong hem nating. Be long namba ya, oli no kaontem ten milian narafala man we oli ded long wo long taem ya.

?Sipos God i no stamba blong nogud fasin, from wanem hem i letem ol man oli safa? From we longtaem bifo finis, Setan i bin stanemap wan kwestin se hu i gat raet blong rul mo i stanemap kwestin tu long saed blong wanem fasin we i gud mo wanem fasin we i nogud. Naoia bambae yumi luk wan long ol kwestin ya.

Long stat blong histri blong man, Adam mo Iv tufala i jusum blong folem Setan. Tufala i no wantem we Jeova i rul long tufala, tufala i jusum blong stap independen long God, hemia i minim se bambae tufala i stap aninit long rul blong Setan.—Jenesis 3:1-6; Revelesen 12:9.

Jeova i wan God blong stret fasin, taswe hem i letem taem i pas blong bambae i gat pruf blong soemaot se hu i gat raet blong rul. ?Wanem klia pruf ya? Rul blong man we Setan i gat paoa long hem i mekem ol man oli safa nomo. Yes, longfala taem ya we God i letem i pas, i blong givhan long ol man. ?Olsem wanem hem i givhan long man? Olgeta we oli stadi long Baebol mo we oli bilif long hem, oli gat janis blong soemaot se oli wantem we God i rulum olgeta. Olgeta we oli stadi long ol loa blong Jeova mo oli mekem ol loa ya i wok long laef blong olgeta, oli gat hop blong laef olwe.—Jon 17:3; 1 Jon 2:17.

Yes, naoia wol ya i stap long rabis paoa blong Setan. Be i no longtaem rul blong hem bambae i finis. Jeova bambae i yusum Pikinini blong hem blong “brekemdaon ol wok we Setan i mekem.” (1 Jon 3:8) Bambae God i yusum Jisas blong finisim ol rabis samting we oli stap mekem ol man i safa mo bambae i mekem laef blong ol man i gud bakegen. Bambae hem i mekem plante bilian man we oli bin safa mo oli ded, oli laef bakegen.—Jon 11:25.

Laef bakegen blong Jisas i wan saen blong soemaot se God bambae i winim ol wok blong Setan—hem i saen blong soemaot we laef bakegen ya bambae i kasem ol man we oli jusum blong stap aninit long rul blong God. (Ol Wok 17:31) Tok blong God, Baebol, i givhan long yumi blong kasem save samting we bambae i hapen long fiuja, hem i leftemap tingting blong yumi taem hem i talem se: “God bambae i kampani wetem [ol man], mo hem bambae i God blong olgeta. Hem bambae i ravemaot wota blong ae blong olgeta. Nao bambae i no moa gat man i ded, mo bambae man i no moa krae from man we i ded. Bambae i no moa gat man i krae, mo bambae man i no moa harem nogud long bodi blong hem. Ol samting ya blong bifo oli lus olgeta.”—Revelesen 21:3, 4.