KOKIAS i protektem smol anamol we i stap insaed long hem, blong i save laef long botom blong solwota long ples we i dip mo i no isi blong stap laef. Fasin ya blong protektem smol anamol ya i pulum ol enjinia blong oli stadi long ol kokias, mo blong oli traem wokem ol trak mo ol haos long sem fasin, blong oli protektem gud ol man insaed.

Tingbaot: Ol enjinia oli stadi long tu kaen kokias, wan i olsem natalae, mo narawan i olsem sel blong snel.

Oli faenemaot se, ples we tufala sel blong natalae i joen mo en blong tufala sel ya, oli strong moa i bitim ol narafala ples long sel. Mo kokias we i olsem sel blong snel, i strong moa long maot blong hem mo insaed long hem long medel. Hemia i min se, taem wan samting i kilim sel we i olsem natalae, ol laen long hem oli mekem se wet blong samting ya i go long ol ples ya we i strong. Mo taem wan samting i kilim kokias we i olsem sel blong snel, sel blong hem we i tanem i mekem se wet i go long ol ples blong hem tu we i strong. Taswe, smol anamol insaed i no kasem kil nating.

Ol man blong stadi oli skelem ol trufala kokias wetem olgeta we man nomo i wokem long kompiuta. Oli faenemaot se trufala kokias i tu taem moa strong, i bitim hemia we oli wokem long kompiuta.

Buk ya Scientific American i talem se: “Sipos wan dei yu ron long wan trak we i luk olsem wan kokias, bambae i luk naes, mo tu bambae i protektem gud ol man insaed.”

?Wanem tingting blong yu? ?Ol kokias oli kamaot olsem nomo, no i gat wan Man we i wokem olgeta?