TRI blong smol beri ya Pollia condensata, oli faenem long Afrika. Kala blong beri ya i blu we i blu, mo i neva gat blu kala olsem long ol narafala tri. Be beri ya i no gat wan samting we i wokem blu kala ya. ?Wanem i mekem se hem i gat wan blu kala olsem?

Traem tingbaot: Insaed long skin blong beri ya i gat ol smosmol tret we oli laen olsem ol stik blong mases we man i laenemap. I gat defdefren grup blong ol tret ya. Wan grup i stap antap long ol narawan, mo i stanap long wan posisen we i defren long ol narawan. Long rod ya, oli mekemap wan sep we nem blong hem spiral. Kala blong ol tret ya i no blu. Be blu kala ya i kamaot from fasin blong ol tret ya blong stap antap long narawan. Taswe, i no gat wan samting we i wokem kala ya, be i kamaot from ol tret blong beri ya. Mo ol tret ya oli mekem se beri ya i smut mo i saen olsem aean. Bighaf blong beri ya i blu. Be i gat sam defren smosmol kala olsem grin, pink, o yelo. Hemia from we sam long ol grup blong ol tret ya oli tik mo sam oli tintin. Be sipos yu lukluk gud, bambae yu luk se ol kala blong hem oli no smut be oli rafraf, olsem ol rafraf kala blong skrin blong kompiuta.

I no gat wan samting we i wokem kala blong Pollia beri, taswe kala blong olgeta i no lus taem oli foldaon i go long graon. !I gat sam Pollia beri we oli pikimap wan handred yia bifo finis, be kala blong olgeta i sem mak nomo olsem wan fres Pollia beri! Sam man blong risej oli faenem se, kala blong beri ya i stap sanem wan strong signal we i pulum ol pijin we oli stap klosap, nating se beri ya i no gat mit, be i gat ol sid nomo.

Ol saentis oli bilif se kala blong Pollia beri i save givhan long olgeta blong wokem sam strong pepa we kala blong olgeta i no save lus.

?Wanem tingting blong yu? ?Spesel blu kala ya blong Pollia beri i kamaot olsem nomo, no i gat wan man we i wokem?