Hemia i no minim nem mo fes blong yu nomo, be i minim tu ol samting we yu ting se oli impoten, ol bilif blong yu, mo fasin blong yu. Evri samting long saed blong yu, oli soemaot se yu yu wanem kaen man.

Sipos yu save gud se yu wanem kaen man, bambae yu no folem tingting blong ol fren blong yu, be bambae yu stanap strong long bilif blong yu.

“Plante man oli olsem ol giaman man long windo blong ol stoa, we ol narafala oli jusum klos long olgeta.”—Adrian.

“Mi mi lanem finis blong stanap strong long stret fasin, nating se samtaem i had. Mi mi luksave hu ya ol trufala fren blong mi from ol samting we oli mekem, mo tu, from ol samting we mi mi mekem taem mi stap wetem olgeta.”—Kotni.

RUL BLONG BAEBOL: “Yufala i no mas letem fasin blong yufala i kam olsem fasin blong wol ya, be yufala i mas jenisim tingting blong yufala.”—Rom 12:2.

Tingbaot se yu wanem kaen man naoia, mo yu wantem kam wanem kaen man long fiuja. Blong mekem olsem, tingbaot gud saed blong yu, nogud saed blong yu, mo ol bilif blong yu. Traem ansa long ol kwestin ya.

Gud saed blong mi: ?Mi mi gat save mo gudhan long wanem samting? ?Wanem ol gudfala fasin blong mi? (Olsem: ?no let oltaem? ?bos long tingting? ?wok had? ?glad blong givim presen?) ?Wanem ol gudfala wok we mi mekem?

TRAEM HEMIA: Sipos i had blong yu luksave ol gudfala fasin blong yu, askem long papa mo mama o wan fren we yu trastem hem, blong i talem ol gudfala fasin blong yu, mo from wanem i tingting olsem.

RUL BLONG BAEBOL: “I gud man i jekem wok we hem nomo i mekem, blong faenemaot se wok ya i olsem wanem. Olsem nao, hem i save glad from wok we hem nomo i mekem, be i no from we hem i skelem wok blong hem wetem wok blong narafala.”—Galesia 6:4.

Nogud saed blong mi: ?Wanem fasin we mi mas kam gud moa long hem? ?Wetaem i isi blong mi foldaon long fasin we i no stret? ?Mi mas bos moa long tingting blong mi, long wanem samting?

RUL BLONG BAEBOL: “Sipos yumi talem se: ‘Yumi no gat sin,’ yumi stap giaman nomo.”—1 Jon 1:8.

Ol bilif blong mi: ?Wanem ol rul we mi folem long saed blong ol fasin, mo from wanem? ?Mi mi bilif long God? ?Wanem i pruvum se hem i laef i stap? ?Wanem ol samting we i no stret blong mekem long narafala, mo from wanem? ?Wanem bilif blong mi long saed blong fiuja?

RUL BLONG BAEBOL: “Fasin ya we yu luksave ol samting mo we yu savegud ol mining blong hem, hem bambae i stap lukaot long yu.”—Ol Proveb 2:11.