Hemia toktok we wan intenasnal tim blong ol man blong risej oli talem long en blong risej we oli mekem long saed blong klaemet jenis. Sipos yu bilif se i gat wan Krieta we i kea long ol man, maet toktok blong ol man blong risej ya i mekem yu tingbaot ol nambawan plan ya we God i putum long wol, blong i klinim hem wan.

Be from we ol man oli mekem plante samting blong spolem wol, hem i no moa save klinim hem wan. ?From wanem yumi sua se God bambae i mas mekem wan samting?

Makem ol vas we i stap long bokis, we i mekem yumi sua se wol bambae i stap mo i kam gud.

• God nao i krietem wol blong yumi. “Long stat God i mekem heven mo wol.” —Jenesis 1:1

• Wol ya i blong God. “Wol ya mo evri samting long hem, oli blong Jehova. a”—Ol Sam 24:1

• God i krietem wol blong yumi blong i stap olwe. “Hem i stanemap wol i stap strong long ol fandesen blong hem, bambae i no gat wan samting i save muvumaot hem long ples blong hem, bambae hem i stap gogo i no save finis.”—Ol Sam 104:5

• God i promes se laef long wol ya bambae i kam gud mo i stap olwe. “Tru God, hem nao i mekem wol, . . . mo i no mekem blong i stap nating nomo, be i wokem blong man i stap long hem.”—Aesea 45:18

• God i promes se ol man bambae oli laef long wol ya blong olwe. “Ol stret man bambae oli tekem wol ya i blong olgeta, mo bambae oli stap long hem blong olwe.”—Ol Sam 37:29

God i disaenem wol ya blong ol man oli save harem gud long hem, we i no gat wan samting i spolem. Baebol i talem se long stret taem, Jehova bambae i finisim ol man ya we oli tingbaot olgeta nomo we oli stap distroem wol blong yumi.—Revelesen 11:18

Baebol i promes se bambae God i mekem wol blong yumi i kam gud o helti bakegen, i kam wan naesfala paradaes, mo i openem han blong hem blong “givim samting we olgeta laef samting oli wantem tumas, nao oli harem gud.”—Ol Sam 145:16