YUMI EVRIWAN I NIDIM LAV. Sipos i no gat lav insaed long mared, famle, mo wetem ol fren, bambae yu no save harem gud. Taswe, i klia se yumi evriwan i nidim lav blong gat gudfala tingting mo glad. ?Be, wanem ya “lav”?

Lav we yumi stap tokbaot i no lav blong man wetem woman, nating se kaen lav ya tu i impoten. Be yumi stap tokbaot lav we i hae moa. Lav ya i pulum man blong mekem i gud long narafala, mo i tingbaot narafala fastaem. Lav ya i stanap long ol stret rul blong Baebol, be i gat filing tu i joen wetem.

Baebol i eksplenem gud lav ya, i se: ‘Man we i gat lav, hem i gat longfala tingting, i kaen, hem i no jalus, i no tok flas, tingting blong hem i no go antap, hem i no mekem ol samting we i no stret, i no tingbaot hem wan nomo, mo i no kros kwik. Hem i no tingbaot rong we ol narafala oli mekem long hem, i no glad long ol fasin we i no stret, be hem i glad long ol fasin we i tru. Hem i no letem wan samting i daonem tingting blong hem, . . . hem i gat hop, mo i stanap strong. Lav i no save finis samtaem.’—1 Korin 13:4-8.

Lav ya “i no save finis samtaem,” be i save kam strong moa taem ol yia oli pas. Man we i gat lav ya hem i kaen, i gat longfala tingting, mo i fogivim narafala. Taswe lav ya i “olsem wan rop we i save joenem ol man oli kam wan.” (Kolosi 3:14) Nating se yu yu sinman, be taem yu gat lav, yu save fren gud wetem ol narafala mo yu save glad tu. Traem tingbaot insaed long mared.

Jisas Kraes i tijim yumi long ol nambawan rul long saed blong mared. Wan hemia: “‘Man bambae i aot long papa mo mama blong hem, i go joen wetem waef blong hem, mo bambae tufala i kam wan bodi nomo.’ . . . Taswe, samting we God i joenem, man i no mas seraotem.” (Matiu 19:5, 6) Long vas ya, Jisas i talem tu impoten rul.

“TUFALA I KAM WAN BODI NOMO.” I no gat wan fasin joen we i moa strong i bitim mared. Lav i save mekem se hasban mo waef i stap tru, i min se tufala i no kam “wan bodi” wetem narafala. (1 Korin 6:16; Hibrus 13:4) Taem tufala i no stap tru long tufala, tufala i no moa trastem tufala nao mared i save brok. Ol pikinini tu oli harem nogud tumas, oli harem se i no gat man i lavem olgeta, oli fraet, mo oli kros.

“SAMTING WE GOD I JOENEM.” God nao i stanemap mared. Man mo woman we i tingbaot samting ya, i traehad blong mekem mared blong tufala i stap gud. Taem i gat trabol, tufala i no brekem mared. Lav blong tufala i strong mo i stap oltaem. Tufala i no “letem wan samting i daonem tingting,” be tufala i traehad blong winim ol trabol blong holemtaet pis mo joen gud.

Taem hasban mo waef i lavlavem tufala, ol pikinini oli glad. Yangfala Jesika i talem se: “Papa mo mama blong mi, tufala i lavlavem tufala mo respektem tufala. Taem mi luk we mama blong mi i respektem Papa, mi mi wantem kam olsem hem nomo.”

Lav i nambawan fasin blong God. Baebol i talem se: “God hem i lav.” (1 Jon 4:8) Taswe, yu no sapraes se Jehova i “God ya we i hapi.” (1 Timoti 1:11) Yu tu yu save hapi sipos yu traehad blong folem ol fasin blong God, antap moa lav blong hem. Efesas 5:1, 2 i talem se: “Yufala i mas folem fasin blong God, olsem ol pikinini we hem i lavem olgeta tumas. Oltaem yufala i mas lavem ol man.”