1. ?Olsem wanem samting we man i nidim i defren long samting we hem i wantem?

YUMI no nidim tumas samting blong laef. Yumi nidim kakae, klos mo ples blong slip. Be i gat plante samting we yumi wantem, mo plante man oli no luksave se oli no rili nidim ol samting ya.

2. ?Wanem sam samting we ol man oli wantem gat?

² Ol samting we wan man i wantem long wan pua kantri, oli defren olgeta long ol samting we wan man i wantem long wan rij kantri. Long sam kantri, ol man oli wantem gat wan mobaelfon, wan moto no wan graon. Be long sam narafala ples, ol man oli wantem gat ol klos we oli sas, wan bigfala haos no wan trak we i sas. Be, nomata weples we yumi stap long hem, no hamas mane we yumi gat, yumi save stat blong wantem plante samting we yumi no nidim.

3. ?Fasin ya blong wantem plante samting i minim wanem?

³ ?Fasin ya blong wantem plante samting i minim wanem?  Hem i wan fasin we man i wantem tumas ol samting blong wol ya, i bitim we hem i fren gud wetem God. Hem i no glad long ol samting we hem i gat, be hem i wantem gat moa samting. Nating se wan man i pua mo i no gat ol sas samting, be hem tu i save gat fasin ya blong wantem plante samting. Nao bambae hem i no moa putum Kingdom long fasples.​—Hibrus 13:5.

4. ?Olsem wanem Setan i pulum yumi blong ‘wantem tumas ol samting we ae blong yumi i luk’?

⁴ Setan i wantem se yumi gat tingting ya se bambae yumi save harem gud sipos yumi gat plante samting. Taswe, hem i yusum wol ya mo fasin ya blong ‘wantem tumas ol samting we ae blong yumi i luk,’ blong traem pulum yumi blong wantem gat plante samting oltaem. (1 Jon 2:15-17; Jenesis 3:6; Ol Proveb 27:20) Oltaem ol man oli stap advataesem ol samting blong traem pulum yumi blong pem ol samting ya. Maet yu bin pem wan samting we yu luk long televisin, no long wan stoa, we i pulum ae blong yu. Sipos yes, maet yu luk se biaen yu no rili nidim samting ya. Taem yumi pem plante samting we yumi no rili nidim, hemia i mekem laef blong yumi i fasfas. Ol samting ya oli save blokem yumi blong mekem wok blong Jehova. Eksampol, maet yumi no moa gat taem blong stadi Baebol, rerem ol miting, go long ol miting, mo joen oltaem long wok blong prij. I gud yumi tingbaot woning blong aposol Jon we i talem se: “Wol ya wetem ol samting we ol man blong hem oli wantem, oli stap lus.”

5. ?Wanem i save hapen long olgeta we oli wantem kasem plante samting?

⁵ Setan i wantem se yumi yusum paoa blong yumi blong winim moa mane mo kasem plante samting, i bitim we yumi yusum paoa blong yumi long wok blong Jehova. (Matiu 6:24) Be sipos yumi wantem kasem plante samting we yumi nomo i wantem, laef blong yumi bambae i no gat mining. Bambae yumi harem nogud tumas, no bambae yumi gat problem blong mane. Samting we i moa nogud se, bambae yumi no moa trastem Jehova mo Kingdom blong hem. (1 Timoti 6:9, 10; Revelesen 3:17) Jisas i talem se, fasin ya blong ‘wantem tumas ol narafala samting,’ i olsem ol ropnil we oli save mekem se wan sid i no save gru mo karem frut.​—Mak 4:14, 18, 19.

6. ?Yumi lanem wanem long stori blong Baruk?

⁶ Yu traem tingbaot Baruk, we hem i sekretari blong profet Jeremaea. Baruk i wantem gat wan “gudfala laef,” be Jehova i talem long hem bakegen se i no longtaem Jerusalem bambae i lus. Be Jehova i promes se bambae i sevem Baruk. (Jeremaea 45:1-5) Baruk i sud trastem Jehova nomo. Jehova bambae i no save sevem ol samting we ol man oli gat. (Jeremaea 20:5) Tede, en blong rabis wol blong Setan i klosap. Taswe, naoia i no taem blong yumi hivimap plante samting. Mo yumi no mas gat tingting ya se afta long bigfala trabol, bambae yumi gat yet ol sas samting we yumi gat naoia.​—Ol Proveb 11:4, Matiu 24:21, 22; Luk 12:15.

7. ?Bambae yumi tokbaot wanem long stadi ya, mo from wanem?

⁷ ?Olsem wanem yumi save lukaot gud  long yumi mo famle blong yumi, mo long sem taem yumi tingbaot ol samting we oli moa impoten? ?Olsem wanem yumi save blokem fasin ya blong wantem plante samting? ?Mo wanem i save givhan long yumi blong yumi no moa wari tumas long ol samting we yumi nidim? Long toktok blong Jisas antap long hil, hem i givim ol gudfala advaes we oli save givhan long yumi. (Matiu 6:19-21) Long stadi ya, bambae yumi ridim mo tokbaot Matiu 6:25-34. Hemia bambae i givhan long yumi blong gohed blong putum Kingdom fastaem, be i no ol samting blong laef.​—Luk 12:31.

8, 9. (1) ?From wanem yumi no mas wari tumas long ol samting we yumi nidim? (2) ?Jisas i save wanem long saed blong ol man mo ol samting we oli nidim?

⁸ Ridim Matiu 6:25. Jisas i save se ol disaepol blong hem oli stap wari tumas from kakae, dring mo klos blong olgeta. Taswe, hem talem long olgeta long toktok blong hem antap long hil, se: “I nogud yufala i stap tingting tumas from laef blong yufala.” Jisas i wantem givhan long olgeta blong oli kasem save from wanem oli no mas wari tumas long ol samting ya. Hem i save se sipos oli wari tumas, bambae oli no moa tingbaot ol samting we oli moa impoten blong mekem. Jisas i kea long ol man blong hem, nao hem i givim woning long olgeta fo taem from denja ya.​—Matiu 6:27, 28, 31, 34.

⁹ ?Be from wanem Jisas i talem se yumi no mas wari tumas long kakae, dring, mo klos? ?Olsem wanem? ?Yumi no nidim ol samting ya? Si. Mo sipos yumi no gat i naf mane blong pem ol samting ya, bambae yumi wari. Jisas i save samting ya. Hem i save gud ol samting we ol man oli nidim. Mo hem i save se ‘long ol las dei, laef bambae i kam strong tumas,’ mo ol man blong hem bambae oli kasem hadtaem. (2 Timoti 3:1) Tede, plante man oli faenem i had blong fanem wan wok mo praes blong ol samting oli stap kam antap. Mo long plante ples, ol man oli pua tumas mo oli gat smol kakae nomo, no samtaem oli no gat kakae nating. Be Jisas i save se laef blong man i moa impoten long kakae, mo bodi blong hem i moa impoten long klos.

10. ?Wanem impoten samting we Jisas i talem se ol man blong hem oli mas prea from?

¹⁰ Bifo we Jisas talem ol tok ya, hem i bin talem long ol disaepol blong hem blong oli prea long Papa blong olgeta blong givim ol samting we oli nidim. Bambae oli prea olsem: “Plis yu givim kakae long mifala, i naf blong tede.” (Matiu 6:11) Long wan narafala taem bakegen, hem i talem long olgeta blong prea se: “Plis, evri dei yu givim kakae long mifala i naf blong wan dei.” (Luk 11:3) Be hemia i no min se oltaem yumi mas tingting long ol samting we yumi nidim. Jisas i talem long ol man blong hem blong oli prea blong Kingdom blong God i kam. Hemia  nao samting we i moa impoten blong oli prea from, i bitim ol samting we oli nidim. (Matiu 6:10; Luk 11:2) Jisas i leftemap tingting blong ol disaepol blong hem, blong oli tingbaot bakegen olsem wanem Jehova i stap lukaot gud long ol samting we hem i wokem.

11, 12. ?Yumi lanem wanem long fasin blong Jehova blong lukaot gud long ol pijin? (Yu luk pija long stat blong stadi.)

¹¹ Ridim Matiu 6:26. I gud yumi “tingbaot ol pijin ya we oli stap flae olbaot.” Nating se ol pijin oli smol nomo, be oli kakae bigwan. Sipos ol pijin oli bigwan olsem ol man, bambae oli kakae moa i bitim ol man. Ol pijin oli kakae ol frut, ol sid, ol bebet mo ol wom. Be oli no nid blong planem ol kakae blong olgeta. Jehova i givim evri samting we oli nidim. (Ol Sam 147:9) I tru, Jehova i no putum kakae long maot blong ol pijin ya. Oli mas go lukaotem kakae blong olgeta, mo oltaem oli faenem samting blong kakae.

¹² Jisas i save se Papa blong hem i save lukaot gud long yumi from we hem i stap lukaot gud long ol pijin. ^[1] (Yu luk ol not, pej 9.) (1 Pita 5:6, 7) Yumi mas wok strong olsem ol pijin, blong kasem kakae blong yumi. Taem yumi traehad olsem, bambae Jehova i blesem yumi. Mo taem we yumi sot long mane, no yumi no gat kakae, Jehova i save givim ol samting we yumi nidim. Eksampol, ol narafala oli save serem ol samting we oli gat wetem yumi. Jehova i givim wan ples blong ol pijin oli save slip long hem. Hem i givim save long ol pijin blong oli mekem nes blong olgeta, mo hem nao i wokem ol samting we ol pijin oli yusum blong mekem nes blong olgeta. Jehova i save givhan long yumi tu, blong yumi gat wan gudfala ples we famle blong yumi i save stap long hem.

13. ?Wanem i soemaot se yumi gud moa long ol pijin?

¹³ Afta we Jisas i tokbaot fasin blong Jehova blong lukaot gud long ol pijin, hem i talem long ol disaepol blong hem se: “Long fes blong [Jehova], yufala i gud moa i winim ol pijin.” (Skelem wetem Luk 12:6, 7.) Taem Jisas i talem ol tok ya, maet hem i stap tingbaot samting we bambae hem i mekem i no longtaem blong sevem laef blong olgeta man. I tru, Jisas i no givim laef blong hem blong sevem ol pijin mo ol narafala anamol. Hem i ded from yumi, nao yumi save kasem laef ya we i no save finis.​—Matiu 20:28.

14. ?Wanem i save hapen sipos wan man i stap wari tumas?

¹⁴ Ridim Matiu 6:27. Jisas i talem se sipos yumi stap wari tumas long ol samting we yumi nidim, bambae yumi no save gat wan longfala laef. Mo sipos yumi wari tumas, bambae yumi sik mo yumi save ded from.

15, 16. (1) ?Yumi lanem wanem long fasin blong Jehova blong lukaot gud long ol flaoa? (Yu luk pija long stat blong stadi.) (2) ?Wanem ol kwestin we i gud yumi askem, mo from wanem?

¹⁵ Ridim Matiu 6:28-30. Yumi glad taem yumi gat ol gudfala klos we yumi save werem taem yumi go prij, yumi go long ol miting mo ol asembli. Be ?olsem wanem? ?Yumi save wari tu from ol klos blong yumi? Jisas i pulum ol disaepol blong hem blong oli tingbaot bakegen, olsem wanem Jehova i lukaot gud long ol samting we hem i wokem. Jisas i tokbaot “ol flaoa ya we oli stap gru olbaot.” Maet ol flaoa ya hemia ol lili, (gladiolus, hyacinths, irises mo tulips). Ol flaoa ya oli no somap klos blong olgeta. Be oli naes tumas,  taswe Jisas i talem se: “King Solomon ya bifo we hem i rij we i rij, be klos blong hem i no flas olsem ol flaoa ya.”

¹⁶ Yu traem tingbaot narafala samting we Jisas i talem. Hem i se: “God i stap flasem gud [ol floa ya]. ?Yufala i ting se bambae hem i no save givim klos long yufala? !Man, bilif blong yufala i smol tumas!” God i save givim klos long olgeta. Be ol disaepol blong Jisas oli mas gat strong bilif. (Matiu 8:26; 14:31; 16:8; 17:20) Oli mas trastem Jehova se hem i wantem lukaot gud long olgeta. ?Olsem wanem long yumi? ?Yumi bilif strong se Jehova bambae i lukaot gud long yumi?

17. ?Wanem i save spolem fasin blong yumi blong fren gud wetem Jehova?

¹⁷ Ridim Matiu 6:31, 32. Plante man we oli no save Jehova, oli tingbaot nomo blong kasem plante mane mo gat plante samting. Be sipos yumi mekem olsem olgeta, bambae yumi no save fren gud wetem Jehova. Yumi save se Jehova i Papa blong yumi mo hem i lavem yumi. Mo yumi save se, sipos yumi obei long hem mo yumi putum Kingdom fastaem, bambae hem i givim evri samting we yumi nidim. Mo tu, yumi kasemsave se taem yumi fren gud wetem Jehova hemia i mekem yumi glad, mo yumi harem gud long ol samting we yumi gat olsem “kakae blong yumi mo klos blong yumi.”​—1 Timoti 6:6-8.

18. ?Jehova i save wanem long saed blong yumi wanwan, mo bambae hem i mekem wanem?

¹⁸ Ridim Matiu 6:33. Sipos yumi putum Kingdom fastaem, Jehova bambae i givim ol samting we yumi nidim. Jisas i eksplenem from wanem yumi save bilif strong long promes ya. Hem i talem se: “Papa blong yufala long heven, hem i save we yufala i mas gat olgeta samting ya.” Hemia i min se bifo we yu luksave se yu nidim wan samting, Jehova i save finis samting ya we yu nidim. (Filipae 4:19) Hem i save weswan klos we bambae yumi nidim. Hem i save weswan kakae we bambae yu nidim, mo hem i save se yu mo famle blong yu i nidim wan haos. Jehova bambae i meksua se yu gat samting we yu rili nidim.

19. ?From wanem i nogud we yumi wari long samting we maet i save hapen long fiuja?

¹⁹ Ridim Matiu 6:34. Jisas i talem bakegen long ol disaepol blong hem se: “I nogud yufala i stap tingting tumas.” Jehova bambae i givim ol samting we yumi nidim evri dei. Taswe, yumi no mas wari tumas long ol samting we maet oli save hapen long fiuja. Sipos yumi wari, bambae yumi trastem yumi wan nomo, nao bambae yumi no moa fren gud wetem Jehova. Be yumi mas trastem Jehova fulwan.​—Ol Proveb 3:5, 6; Filipae 4:6, 7.

20. (1) ?Wanem wan mak we yu wantem kasem long wok blong Jehova? (2) ?Yu save mekem wanem blong mekem se laef blong yu i no fasfas?

²⁰ Sipos yumi yusum paoa blong yumi blong kasem plante samting, bambae  yumi harem nogud from we yumi no moa mekem wok blong Jehova. Be i moa gud we yu putum sam mak blong mekem bes blong yu long wok blong Jehova. Traem tingbaot: ?Yu yu save muv i go long wan narafala kongregesen we i nidim moa pablisa? ?Yu yu save mekem wok blong paenia? Sipos yu paenia finis, ?yu stap tingbaot blong fulumap fom blong Skul Blong Ol Man Blong Talemaot Kingdom? ?Yu yu save go givhan long Betel no long translesen ofis, long sam dei long wik? No maet yu save wok olsem wan volontia blong givhan long LDC (Local Design/Construction), blong bildim ol Haos Kingdom. I gud yu tingbaot samting we yu save mekem blong laef blong yu i no fasfas, nao yu save yusum moa taem mo paoa blong yu long wok blong Kingdom. Bokis ya “ ?Olsem Wanem Blong No Mekem Laef i Fasfas?,” i tokbaot sam rod blong givhan long yu. I gud yu prea long Jehova blong i givhan long yu, mo yu mekem ol jenis long laef blong yu.

21. ?Wanem bambae i givhan long yu blong kam klosap long Jehova?

 ²¹ Jisas i talem se yumi mas putum Kingdom fastaem. Taem yumi mekem olsem, bambae yumi no moa wari tumas long ol samting we yumi nidim. Yumi kam klosap moa long Jehova from we yumi trastem se hem bambae i lukaot gud long yumi. Yumi mas bos long fasin blong yumi blong pem ol samting we yumi wantem, no ol samting we wol ya i traem pulum yumi blong gat. Sipos yumi lego sam samting long laef yumi blong mekem moa long wok blong Jehova, hemia bambae i givhan long yumi blong holemstrong long hem. Mo bambae yumi “kasem laef ya we i prapa wan.”​—1 Timoti 6:19.