LONG smol aelan ya Sangir Besar long Indonesia, i gat tri sista. Sam yia i pas, oli stap wok tugeta long solwota. Ol man long aelan ya oli savegud trifala from oli stap prij mo halpem ol man blong kasemsave long Baebol. Be long taem ya, oli mekem wan wok we i defren lelebet.

Fastaem, oli wokbaot i go long solwota, oli lukaotem ol hevi ston mo taem oli faenem, oli karem i kam antap long sanbij. Sam long ol ston ya oli bigwan olsem balong blong futbol. Biaen, oli sidaon long ol smol stul mo oli yusum hama blong hamarem ol ston ya i go smosmol i bitim saes blong eg blong faol. Afta, oli putum ol smol ston ya long ol plastik baket, mo oli tekem i go antap long ples we oli laef long hem. Biaen, oli fulumap long ol bigfala bag we bambae oli putum long ol trak, mo tekem i go blong yusum blong wokem rod.

Wan long ol sista ya, hemia Hulda. Situesen blong hem i mekem se hem i spenem moa taem long wok ya i bitim ol narafala. Plante taem, hem i stap yusum mane we hem i winim, blong pem ol samting we famle blong hem i nidim. Be naoia, hem i gat wan defren mak long tingting blong hem. Hem i wantem sevem sam mane blong pem wan tablet blong hem i save go long JW Library^® app. Hulda i save se ol video mo ol narafala samting long app ya, bambae oli givhan bigwan long hem long wok blong prij mo blong hem i kasemsave moa long Baebol.

Blong wan manis haf, Hulda i wok tu aoa evri moning blong smasem ston we i naf blong fulumap kat blong wan smol trak. Hemia i mekem se hem i gat naf mane blong pem wan tablet.

Hulda i talem se: “Nating se mi taed mo bodi blong mi i soa from mi stap smasem ol ston, be kwiktaem nomo mi fogetem ol soa ya taem mi yusum niufala tablet ya we i halpem mi blong kam gud moa long wok blong prij, mo rerem ol miting blong mi.” Hem i talem tu se long taem blong pandemik, tablet ya i halpem hem blong konek mo joen wetem kongregesen long taem blong ol miting, mo wok blong prij. Hulda i glad tumas, mo yumi tu yumi glad se hem i kasem mak blong hem.