Mary mo hasban blong hem John, a tufala i laef long wan kantri we plante man Filipin oli stap kam long hem blong laef mo wok. Mo tufala i glad blong prij long olgeta. Long taem blong COVID-19 pandemik, Mary i statem plante Baebol stadi long kantri ya we tufala i laef long hem, be long ol narafala kantri tu. ?Hem i mekem samting ya olsem wanem?

Mary i stap askem long ol Baebol stadi blong hem se, “?Yu yu save wan man we bambae i glad blong stadi Baebol?” Sipos oli talem yes, ale hem i askem blong oli tokbaot hem long olgeta. Plante taem, wan isi kwestin olsem i save karem gudfala frut. ?From wanem yumi talem olsem? From ol man we oli laekem Tok blong God, oltaem oli wantem serem samting we oli lanem wetem ol famle mo ol fren blong olgeta. ?Wanem i kamaot from kwestin ya we Mary i askem?

Jasmin we i wan Baebol stadi blong Mary, i tokbaot hem long fo man we oli wantem stadi Baebol. Wan long olgeta, hemia Kristine. Hem i glad tumas blong stadi long Baebol, taswe hem i askem Mary blong tufala i stadi tu taem long wan wik. Taem Mary i askem long hem sipos hem i save wan narafala man we i wantem stadi Baebol tu, Kristine i se: “Yes, bambae mi tokbaot yu long ol fren blong mi.” Long sam wik nomo, Kristine i tokbaot Mary long fo fren blong hem from we oli wantem stadi Baebol. Sam taem biaen, Kristine i tokbaot Mary long ol narafala fren blong hem, mo sam long olgeta tu oli tokbaot Mary long ol narafala fren blong olgeta.

Kristine i wantem tu se ol famle blong hem long Filipin oli stadi Baebol. Taswe, hem i toktok wetem gel blong hem, Andrea. Fastaem, Andrea i gat tingting ya se, ‘Ol Witnes oli wan cult, oli no bilif long Jisas, mo oli yusum nomo Olfala Testeman.’ Be afta long faswan stadi blong hem, hem i luksave se tingting blong hem i rong. Evri taem we hem i lanem wan niufala samting, hem i stap talem se: “!Sipos Baebol i talem olsem, i min se i tru!”

Sam taem biaen, Andrea i tokbaot Mary long tu fren blong hem mo long wan fren blong hem long wok, mo olgeta tu oli stat blong stadi. Mo tu, Mary i no save se Angela, hemia anti blong Andrea we i blaen, hem tu i stap lesin taem oli stap stadi. Wan dei, Angela i talem long Andrea blong i tokbaot hem long Mary mo askem sipos hem i save stadi Baebol tu wetem hem. Angela i laekem  samting we hem i stap lanem. !Long wan manis nomo, hem i lanem baehat plante vas mo i wantem stadi fo taem long wan wik! Mo wetem help blong Andrea, Angela i stat blong joen oltaem long ol miting tru long intenet.

Taem Mary i harem se oltaem hasban blong Kristine i stap lesin taem tufala i stap stadi, hem i askem long hem sipos hem i wantem joen long stadi. Ale, Joshua i talem se: “Bambae mi lesin nomo, be yu no askem eni kwestin long mi, sipos no, bambae mi ronwe.” Be long faet minit nomo, hem i askem plante moa kwestin i bitim Kristine, mo hem tu i wantem stadi Baebol.

Smol kwestin ya we Mary i askem, i pulum plante man blong stadi Baebol. Sam long olgeta, hem i mekem plan blong oli stadi wetem sam narafala Witnes. Yes, Mary i statem 28 Baebol stadi long fo defren kantri.

Jasmin, we hem i faswan Baebol stadi we yumi bin tokbaot, i baptaes long Eprel 2021. Kristine i baptaes long Mei 2022 mo i gobak long Filipin blong stap wetem famle blong hem. Tufala Baebol stadi we Kristine i tokbaot Mary long tufala, tufala tu i baptaes. Sam manis afta, Angela i baptaes mo naoia hem i kam wan fultaem paenia. Joshua, hemia hasban blong Kristine mo gel blong tufala, Andrea, wetem sam narafala Baebol stadi, olgeta tu oli stap gohed gud.

Long faswan handred yia, gud nius i kasem ol memba blong famle mo ol fren kwiktaem. (Jon 1:​41, 42a; Wok 10:​24, 27, 48; 16:​25-33) I gud yu traem askem long ol Baebol stadi blong yu mo ol narafala we oli intres, se: “?Yu yu save wan man we bambae i glad blong stadi Baebol?” Sipos yu askem isi kwestin olsem, maet yu tu yu save faenem plante moa man we bambae oli glad blong stadi Baebol.