Ol perens blong mi oli faenem trutok long ol yia afta long 1920, bifo we tufala i mared. Mi mi bon long stat blong 1939. Taem mi yangfala, mi go wetem perens blong mi long ol miting long Inglan, mo mi enjoem Tiokratik Ministri Skul. Kasem tede, mi tingbaot yet filing blong mi taem mi klaem antap long wan boks, blong mi save lukluk ova long podium, taem mi givim faswan tok blong mi. Long taem ya mi gat sikis yia, mo mi fraet tumas taem mi luk evri bigman oli stap lukluk mi.

Blong prij, papa blong mi i taepem wan isi fastok long wan kad, blong mi save yusum. Mi mi gat eit yia taem mi go prij mi wan blong faswan taem. !Mi glad tumas taem man blong haos i ridim kad blong mi, mo i kwik blong akseptem buk ya “Let God Be True”! Mi resis i godaon long rod, blong talemaot long papa blong mi. Wok blong prij mo ol miting oli mekem mi mi glad tumas, mo oli pulum mi blong wantem moa blong mekem wok blong Jehova fultaem.

Papa blong mi i mekem rod blong mi gat wan sabskripsen blong Wajtaoa. Afta long samting ya, mi stat blong laekem moa ol trutok blong Baebol. Evri taem we wan Wajtaoa i kamtru long mel, mi ridim kwiktaem. Hemia i mekem mi trastem Jehova moa, mo i lidim mi blong givim laef blong mi long hem.

Long 1950, mi mo perens blong mi i go long Niu Yok, blong joen long asembli ya “Theocracy’s Increase.” Long Tasde 3 Ogis, stamba tok blong dei ya se “Misinari Dei.” Long dei ya, Brata Carey Barber, we sam yia biaen i kam wan memba blong Hed Kampani, i givim tok blong baptaes. Long en blong tok blong hem, afta we i askem tufala kwestin long olgeta we oli rere blong baptaes, mi stanap mo mi talem se: “!Yes!” Mi gat 11 yia nomo, be mi kasemsave se mi tekem wan impoten  step. Be mi fraet blong go insaed long wota, from we mi no lanem yet blong swim. Ale angkel blong mi i folem mi i go insaed long pul, mo i talem se evri samting bae i oraet. I tru, leg blong mi i no tajem botom blong pul yet, be evri samting i finis finis. Wan brata i karem mi, mo i pasem mi i go long nekis brata, wan i baptaesem mi, biaen narawan i leftemap mi i go aotsaed long puI. Stat long impoten dei ya, Jehova i gohed blong mekem ol rod blong mi oli stret.

Taem mi finis skul, mi wantem kam paenia, be ol tija blong mi oli enkarejem mi plante taem blong mi kasem hae edukesen. Ale mi lesin long olgeta, mo mi go long yunivesiti. Be i no longtaem biaen, mi kasemsave se mi no save stap strong long trutok, mo long semtaem konsentret long skul blong mi. Ale mi mekem desisen blong lego skul. Mi tokbaot desisen ya long Jehova tru long prea, mo wetem respek, mi raetem wan leta blong risaen, mo se bae mi aot long en blong faswan yia ya. Mi trastem Jehova fulwan, ale mi statem wok blong paenia kwiktaem nomo.

Long Julae 1957, mi stat blong prij fultaem long taon blong Wellingborough. Mi bin askem ol brata long London Betel blong oli givim nem blong wan paenia brata we i gat ekspiriens, we mi save prij wetem. Ale Brata Bert Vaisey i tijim mi long plante samting, mo fasin blong hem blong wok strong long wok blong prij, i halpem mi blong folem wan gudfala program long wok blong prij. Long kongregesen, i gat sikis olfala sista, wetem mi mo Brata Vaisey. Taem mi stap rerem ol miting mo mi tekem pat long miting, mi gat plante janis blong mekem tras blong mi long Jehova i kam strong moa, mo talemaot bilif blong mi.

From we mi no wantem joen long ami, mi go long prisen blong smoltaem, be afta long hemia, mi mitim Barbara, wan sista we i spesel paenia. Mitufala i mared long 1959, mo mitufala i rere nomo blong go long eniples we oli asaenem mitufala long hem. Fastaem, hemia long Lancashire, long notwes blong Inglan. Biaen, long Jenuware 1961, mi kasem invetesen blong joen long wan manis kos blong Kingdom Ministri Skul long London Betel. Mi mi sapraes tumas we long en blong kos ya, mi kasem asaenmen blong mekem wok blong eria elda. Ale blong tu wik, wan eria elda i trenem mi long taon blong Birmingham, mo oli letem Barbara i kam joenem mi. Biaen, mitufala i go long asaenmen blong mitufala, hemia long Lancashire mo Cheshire.

Long Ogis 1962, taem mitufala i stap spel, mitufala i kasem wan leta we i kam long branj ofis. !Insaed long leta ya, i gat ol fom blong Gilead Skul! Mi mo Barbara i prea from samting ya, afta mitufala i fulumap fom ya, mo mitufala i sanem kwiktaem i go long branj ofis, olsem we oli askem. Faef manis afta, mitufala i go long Brooklyn, Niu Yok, blong joen long namba 38 klas blong Gilead, hemia wan tiokratik edukesen we i tekem ten manis.

Long Gilead Skul, mifala i lanem plante samting long saed blong Baebol, oganaesesen blong God, mo ol brata sista raon long wol. Mitufala i gat bitim 20 yia, mo mitufala i lanem plante  samting long ol nara studen long klas blong mitufala. Evri dei mi gat privilej blong wok wetem Brata Fred Rusk, we i wan tija blong mifala. Wan nambawan lesen we hem i makem strong, hemia se yumi mas givim advaes long stret fasin oltaem, i min se meksua oltaem se advaes we yumi givim i stanap long Baebol. Long kos ya, ol brata we oli gat ekspiriens oli stap kam givim tok, olsem Nathan Knorr, Frederick Franz, mo Karl Klein. !Mo mifala i lanem plante gudfala samting long eksampol blong Brata A. H. Macmillan we i gat tingting daon! !Tok blong hem i mekem mifala i kasemsave olsem wanem Jehova i lidim ol man blong hem long ol hadtaem, stat long 1914 kasem eli 1919!

Klosap long en blong kos, Brata Knorr i talem long mi mo Barbara se oli asaenem mitufala blong go long Burundi, long Afrika. Mitufala i spid i go long laebri blong Betel blong luk long Yearbook, se hamas pablisa oli stap long Burundi long taem ya. !Be mitufala i sapraes tumas blong luk se i no gat namba long kantri ya! Yes, mitufala i stap go long wan teritori we oli neva prij long hem yet, mo teritori ya i stap long wan kantri we mitufala i no save plante samting long hem. !Oh, mitufala i fraet tumas! Be afta long plante prea, tingting blong mitufala i kam kwaet.

Long niufala asaenmen blong mitufala, evri samting i defren long wanem we mitufala i lan long hem—weta, kalja, mo lanwis. Naoia mitufala i mas lanem blong toktok Franis. Mo tu, mitufala i mas faenem wan haos. Tu dei afta we mitufala i kamtru, wan Gilead klasmet blong mitufala, hemia Harry Arnott, i kam visitim mitufala taem i stap gobak long asaenmen blong hem long Sambia. Hem i halpem mitufala blong faenem wan apatmen, we i kam faswan misinari hom blong mifala. Be i no longtaem afta, ol haeman blong gavman oli stat blong agensem mifala, from we oli no save wan samting nating long ol Witnes Blong Jehova. Taem mitufala i stat blong enjoem asaenmen blong mitufala, ol otoriti oli talem se mitufala i no save stap from we mitufala i no gat pemit blong wok. Sore tumas, mitufala i mas aot mo lan blong laef long wan niu kantri bakegen, hemia Uganda.

Mitufala i fraet from bae mitufala i go long Uganda we mitufala i no gat visa, be mitufala i trastem Jehova. Wan brata blong Kanada we i stap prij long ples we i gat nid long Uganda, i eksplenem situesen blong mitufala long imigresen  ofisa, ale oli givim sam manis blong mitufala i save aplae, blong mekem se ol pepa blong mitufala i stret. Samting ya i soem se Jehova i stap halpem mitufala.

Situesen long niu asaenmen ya i defren olgeta long hemia blong Burundi. Wok blong talemaot Kingdom i stap gohed longtaem finis long ples ya, nating se i gat 28 Witnes nomo long ful kantri ya. Long teritori, mitufala i faenem plante man we oli toktok Inglis. Be i no longtaem afta, mifala i faenemaot se blong halpem olgeta we oli intres blong oli gohed gud, mitufala i mas lanem wan long ol lanwis blong ol manples. Mitufala i stap prij long eria blong Kampala, we bighaf blong ol man oli toktok lanwis Luganda, ale mitufala i jusum blong lanem lanwis ya. I tekem plante yia blong mitufala i toktok gud lanwis ya, !be man, i halpem mitufala blong mekemgud wok blong mitufala! Mitufala i stat blong kasemsave moa long nid long saed blong spirit blong ol Baebol studen blong mitufala. Mo olgeta tu, oli openem hat blong olgeta long mitufala, mo oli talemaot filing blong olgeta long ol save we oli lanem.

Mitufala i glad tumas blong faenem ol man we oli gat tingting daon, mo oli akseptem trutok. Mo mitufala i glad moa taem mitufala i kasem wan privilej we mitufala i no tingbaot nating, hemia blong visitim ol kongregesen long ful kantri ya. Aninit long daereksen blong Kenia branj, mitufala i travel i go long olgeta ples long kantri ya blong faenem ol ples we i nidim moa spesel paenia. Plante taem mitufala i mitim ol man we oli neva mitim ol Witnes, be oli welkamem gud mifala, mo oli rerem kakae blong mifala tu.

Biaen, mitufala i mekem wan defren kaen trip bakegen. Stat long Kampala, mi travel tu dei long tren blong go long Kenia, biaen mi klaem long sip long Port of Mombasa, mo mi go long Seisel, hemia wan grup blong ol aelan we i stap aotsaed long Solwota blong India. Biaen, stat long 1965 kasem 1972, Barbara i joenem mi mo mitufala i go visitim Seisel plante taem. Long taem ya, i gat tu pablisa nomo longwe, be biaen oli kam wan grup, mo biaen bakegen, wan kongregesen. Sam narafala trip olsem i mekem mi visitim ol brata long Eritrea, Itiopia, mo Sudan.

Long Uganda, situesen blong politik i jenis afta we wan grup blong ol ami oli tekova long gavman. Ol man oli fraet tumas long ol yia we i kam biaen, mo hemia i tijim mi se i waes blong obei long instraksen ya we i se: “Ol samting we oli blong Sisa, yufala i givimbak long Sisa, mo ol samting we oli blong God, yufala i givimbak long God.” (Mak 12:17) Wan taem, olgeta man blong narafala kantri we oli laef long ples ya, oli mas go rejista long polis stesen we i stap klosap long hom blong olgeta. Mitufala i obei kwiktaem nomo. Sam dei afta, taem mi mo wan nara misinari brata i stap ron i gotru long Kampala, ol sikret polis oli kam klosap long mitufala. !Naoia hat blong mitufala i stap pam! Oli talem se mitufala i spae, ale oli tekem mitufala i go long men polis stesen, mo long ples ya, mitufala i eksplenem se mitufala i misinari we i wantem gat pis nomo. Mitufala i talem long olgeta se mitufala i rejista finis long polis stesen, be oli no wantem lesin. Ale ol gad we oli holem masket, oli draevem mitufala i go long polis stesen we i stap klosap long misinari hom. Ofisa long ples ya i save se mitufala i rejista finis, mo i luksave mitufala. !Mitufala i glad tumas taem hem i talem long ol gad blong oli lego mitufala i fri!

Long ol dei ya, plante taem mifala i fraet taem mifala i kamtru long wan rod blok blong ol ami, speseli taem ol soldia oli drong bitim mak ale  oli stopem mifala. Be evri taem, mifala i prea nao mifala i filim se tingting blong mifala i gat pis taem oli letem mifala i go sef nomo. Sore tumas be long 1973, oli givim oda se evri misinari blong narafala kantri oli mas aot long Uganda.

Asaenmen blong mitufala i jenis wan moa taem, be naoia mitufala i mas go long Aevori Kos, long Wes Afrika. Hemia i wan narafala bigfala jenis long mitufala: !Mitufala i mas lanem wan niu kalja bakegen! !Mo toktok Franis bakegen evri dei! !Mo lan blong laef wetem ol misinari we oli kamaot long defdefren bakgraon! Be yet, mitufala i luk daereksen blong Jehova bakegen, taem ol man we hat blong olgeta i stret mo oli gat tingting daon, oli akseptem gud nius. Mitufala i luk se taem mitufala i trastem Jehova, hem i mekem ol rod blong mitufala i stret.

Nao wantaem nomo dokta i faenemaot se Barbara i gat kansa. Nating se mitufala i gokam plante taem long Yurop blong hem i kasem tritmen, long 1983, mitufala i kasemsave se mitufala i no moa save mekem asaenmen blong mitufala long Afrika. !Mitufala tugeta i harem nogud tumas from samting ya!

Kansa blong Barbara i stap kam bigwan moa taem mitufala i stap wok long London Betel, nao biaen, hem i ded. Famle blong Betel oli givhan bigwan long mi. Wan kapol i halpem mi blong lan long niufala jenis ya, mo blong gohed blong trastem Jehova. Sam taem biaen, mi mitim wan sista we i wan komiuta long Betel mo we i lavem Jehova tumas. Bifo hem i wan spesel paenia. Mi mo Ann i mared long 1989, mo kam kasem tede, mitufala i wok long London Betel.

Stat long 1995 kasem 2018, mi haremgud long blesing ya blong wok olsem representetif blong hedkwota (fastaem oli kolem son ovasia), mo mi go visitim klosap 60 defren kantri. Long wanwan kantri ya, mi luk pruf we i soem olsem wanem Jehova i blesem ol man blong hem long ol defdefren situesen.

Long 2017, wan long ol ples we mi go visitim, hemia Afrika. !Mi glad tumas blong soem Burundi long Ann! !Mo mitufala i sapraes tumas blong luk olsem wanem wok long ples ya i kam antap bigwan! Long sem rod ya we mi bin prij long hem long 1964, naoia i gat wan naesfala Betel hom we i mekem ol wok blong givhan long bitim 15,500 pablisa.

Mi mi glad tumas taem mi kasem lis blong ol kantri we bae mi visitim long 2018. Aevori Kos tu i stap long lis ya. Taem mifala i kasem Abidjan we i kapital blong ples ya, mi filim olsem se mi kamhom. Taem mi stap lukluk lis blong telefon blong ol brata long Betel, mi luksave nem blong brata we i stap nekis doa long mitufala, hemia Sossou. Mi rimemba se hem i wok olsem taon ovasia taem mi bin stap long Abidjan bifo. Be mi mi rong. Hemia i wan defren Sossou, yes hem i boe blong hem.

Jehova i kipim promes blong hem. Ol hadtaem we mi gotru long olgeta, oli tijim mi se taem yumi trastem Jehova, hem i rili mekem ol rod blong yumi oli stret. Naoia mitufala i wantem tumas blong gohed long rod ya we i no gat en blong hem, mo we bambae i saen moa taem yumi laef long niufala wol.—Prov. 4:18.