SERA i stanap afta long wok blong stretem bak blong hem, mo i stap lukluk i go longwe. Hem i stap givim waes advaes long ol slef blong hem, nao oli glad blong wok mo oli bisi gud. Sera tu i wok had. Yu traem pijarem Sera we i stap rabem tufala han blong hem long ol ples we i soa, mo i stap tingting. Ating hem i stap somap blokem ol hol blong haos tapolen blong tufala. Kala blong ol bigfala kaliko blong haos tapolen ya we oli wokem long hea blong nani i lus, from we i stap plante yia long san mo ren. Samting ya i mekem Sera i tingbaot hamas yia we oli stap laef long haos tapolen nomo. Aftenun i pas mo kala blong san i stap go red, hem i stap lukluk i go long rod we Ebraham * i pas long hem long moning. Taem hem i luksave we man blong hem i stap kambak, wan bigfala smael i kamaot long naesfala fes blong hem.

Ten yia i pas finis taem Ebraham i lidim bigfala famle blong hem i go kros long Yufretes Reva kasem Kenan. Sera i glad nomo blong sapotem hasban blong hem long longfala trip ya, from we hem i save se Ebraham i gat wan impoten wok blong mekem stamba tingting blong Jehova i kamtru, hemia blong gat wan pikinini we bae i kam wan neson. ?Be Sera i save mekem wanem blong givhan? Hem i no save gat pikinini, mo hem i gat 75 yia finis. Maet hem i stap tingting se, ‘?olsem wanem promes blong Jehova i save kamtru, from we mi nao mi waef blong Ebraham?’ Sera i stap wet longtaem finis, taswe yumi kasemsave long filing blong hem sipos hem i wari o i no moa gat longfala tingting.

Maet samtaem yumi tu yumi gat tingting ya se, wetaem bae ol promes blong God oli kamtru. I no isi blong gat longfala tingting, speseli taem yumi stap wet blong luk wan promes we yumi wantem tumas blong i kamtru. ?Be olsem wanem bilif blong gudfala woman ya Sera, i save givhan long yumi?

Ol famle blong Ebraham oli jes aot long Ijip. (Jenesis 13:1-4) Mo oli pulum haos tapolen blong olgeta long ol hil we oli stap long Is blong Betel o long Lus, hemia nem we ol man Kenan oli putum. Long ol hil ya, Sera i save luk bighaf blong Promes Lan. I gat ol vilej blong ol man Kenan raonabaot, mo ol rod we ol man oli stap pas long hem i go long ol ples longwe. Be ol samting ya we Sera i luk oli no sem mak long taon blong hem. Hem i gruap long Uru, wan taon long Mesopotemia we i stap 1,900 kilometa longwe. !Taem hem i aot long taon ya, hem i lego ol famle blong hem, ol gudfala samting blong taon ya, ol smosmol maket we oli salem plante samting, naesfala haos blong hem we i gat strong wol mo ruf, mo maet i gat springwota insaed long hem! Be, sipos yumi ting se Sera i harem nogud taem i stap lukluk i go long Is, from we hem i wantem gobak long ol gudfala samting we hem i lego, hemia i soem se yumi no savegud Sera.

Makem wanem we tabu spirit i pulum Aposol Pol blong i raetem 2,000 yia biaen. Hem i tokbaot bilif blong Sera mo Ebraham se: “Sipos oli stap gohed blong tingbaot ples blong olgeta we oli aot long hem finis, bae oli gat janis blong gobak, be i no olsem.” (Hibrus 11:8, 11, 15) Sera mo Ebraham i no moa tingbaot ol samting we tufala i lego. From we, sipos tufala i tingbaot yet ol samting ya, maet bae tufala i mekem desisen finis blong gobak long Uru. Mo tu, sipos tufala i gobak long Uru, bae tufala i lusum nambawan blesing  we Jehova bae i givim long tufala, mo bae ol man oli no save tingbaot tufala olsem wan gudfala eksampol blong strong bilif.

Sera i no tingbaot ol samting we hem i lego, be i tingbaot ol samting we i stap long fored blong hem. Taswe hem i gohed blong sapotem man blong hem taem oli stap muv. Hem i givhan blong karemaot ol haos tapolen, lukaot long ol anamol long rod, mo putumap haos tapolen bakegen. Hem i go tru long plante jenis mo traem. !Long wan nara taem, Jehova i tokbaot promes blong hem bakegen wetem Ebraham, be hem i no talem eni samting long saed blong Sera!—Jenesis 13:14-17; 15:5-7.

Wan dei, Sera i mekem plan se i stret taem nao blong tokbaot wanem we i stap long tingting blong hem long Ebraham. Maet hem i soemaot long fes blong hem se hem i wari mo i harem nogud taem i talem long Ebraham se: “Kam kasem naoia, Hae God i stap blokem mi, blong mi no bonem pikinini.” Nao hem i askem long Ebraham blong i go slip wetem woman slef blong hem, Hega, blong hem i bonem wan pikinini blong Ebraham. Sera i mas harem nogud taem hem i askem samting ya long man blong hem. Tede, yumi no save mekem wan samting olsem. Be long taem blong Sera, man i save gat tu waef, blong i gat wan pikinini blong hem. * Maet Sera i ting se, long rod ya promes we God i mekem wetem Ebraham bae i kamtru. Hem i soemaot se hem i rere blong mekem eni samting, nating se i no isi. ?Be wanem tingting blong Ebraham long plan ya? Baebol i talem se: “[Ebraham] i agri long tok ya blong hem.”—Jenesis 16:1-3.

?Jehova nao i pulum Sera blong i gat tingting ya? Nogat. Tingting we hem i gat i tingting blong man nomo. Hem i ting se God i mekem hem i no save gat pikinini, taswe hem i gat wan narafala plan. Plan ya bae i mekem trabol long hem nomo, mo bae i mekem se hem i harem nogud. Be, samting we hem i askem long Ebraham i soem se, hem i no tingbaot hem wan nomo. Plante man oli save sapraes long samting we hem i mekem, from we long wol tede, ol man oli no moa tingbaot narafala be oli tingbaot olgeta nomo. Sipos yumi no tingbaot yumi nomo, be yumi putum ol samting we God wantem fasples long laef blong yumi, yumi stap folem fasin blong bilif blong Sera.

I no longtaem Hega i gat bel blong Ebraham. Taem hem i gat bel, hem i ting se hem i moa gud long Sera, nao hem i stap lukluk nogud long Misis blong hem. !Samting ya i mekem Sera i harem nogud tumas! Nao Ebraham i letem hem i givimbak nogud fasin ya we Hega i mekem, mo God tu i givhan long hem. Biaen Hega i bonem wan pikinini boe, nem blong hem Ismael. (Jenesis 16:4-9, 16) Sam yia biaen, Baebol i tokbaot wan narafala taem we Ebraham mo Sera i kasem wan mesej we i kam long Jehova. Long taem ya  Sera i gat 89 yia mo Ebraham i gat 99. !Tufala i kasem wan gudfala mesej!

Bakegen, Jehova i promes long fren blong hem, Ebraham, se bae hem i mekem ol pikinini we oli kamaot biaen long hem, oli plante we plante. Mo long semtaem ya, God i jenisim nem blong Ebram. Bifo long taem ya, ol man oli save se nem blong hem, Ebram. Be Jehova i jenisim nem blong hem i kam Ebraham, we minim “Papa blong bigfala hip man.” Mo long taem ya nao Jehova i jes tokbaot Sera. Hem i jenisim nem ya Sarae we i minim “Rao,” i kam Sera. ?Nem ya Sera i minim wanem? !Mama blong ol king! Jehova i eksplenem from wanem hem i givim nem ya long naesfala woman ya, hem i se: “From we mi mi blesem hem, bambae mi mi mekem hem i kam stamba blong ol man blong plante ples. Mo long olgeta ya, bambae i gat ol king tu oli stap.”—Jenesis 17:5, 15, 16.

!Promes blong Jehova se wan pikinini bae i kamaot long Ebraham we bae i blesem olgeta neson, bae i kamtru long boe blong Sera! God i givim nem ya, Aesak, long boe ya, we i min se “laf.” Taem Ebraham i harem se Jehova bae i blesem Sera i mekem hem i gat wan pikinini, hem i bendaon mo “i stap laf.” (Jenesis 17:17) Hem i sapraes mo i glad tumas. (Rom 4:19, 20) ?Be olsem wanem long Sera?

Samtaem i pas, tri man i kam luk Ebraham long wan medel dei we san i strong tumas, be tufala olfala ya i kwik blong mekem sam samting blong welkamem trifala man ya. Ebraham i talem long Sera se: “Yu go tekem wan smol bag flaoa we i beswan, yu hareap, yu kukum sam bred we i no gat is long hem.” Long taem ya, fasin blong tekem ol man i kam long haos, i wan bigfala wok. Be Ebraham i no lego woman blong hem nomo i mekem ol wok ya; hem i hareap blong go kilim wan yangfala buluk mo i rerem plante kakae mo dring. (Jenesis 18:1-8) !Ol “man” ya oli ol enjel blong Jehova! Aposol Pol i tingbaot taem ya mo i se: “Yufala i no mas fogetem fasin ya blong tekem ol man oli kam long haos blong yufala, from we sam man oli bin mekem fasin ya nao oli tekem ol enjel oli kam long haos blong olgeta, be oli no save.” (Hibrus 13:2) ?Yu yu save folem fasin blong Ebraham mo Sera blong tekem ol man i kam long haos?

Nao wan long ol enjel ya i tokbaot bakegen long Ebraham promes blong God long saed blong Sera se, bae hem i bonem wan pikinini boe. Sera stap insaed long haos tapolen mo i stap lesin. Be taem hem i harem samting ya, hem i stap tingbaot se hem i olfala finis. Mo hem i harem se samting ya i narakaen, nao hem i no moa save holemtaet hem mo i stap laf smosmol, i se: “Mi mi olfala finis, mi no moa save harem gud blong slip wetem man. Mo man blong mi tu i olfala finis.” Be wan enjel askem wan kwestin blong stretem Sera, i se: “?Yu ting se i gat wan samting i stap we i strong tumas blong Jehova i no save mekem?” Sera i fraet mo i traem blong haedem hem wan, i se: “!No, mi mi no laf!” Be enjel ya i talem se: “Si, yu laf ya.”—Jenesis 18:9-15, NW.

Taem Sera i laf, ?hemia i soem se hem i no gat bilif? Nogat. Baebol i talem se: “Sera tu i bilif, taswe nating se hem i olfala tumas, be hem i gat bel from we hem i trastem Man we i mekem promes long hem.” (Hibrus 11:11) Sera i save Jehova; hem i savegud se Jehova i save mekem eni promes we hem i talem i kamtru. Ating yumi evriwan i nidim blong gat strong bilif olsem. Sipos yumi savegud Jehova, we hem i givim Baebol long yumi, yumi save gat strong bilif olsem Sera. Mo bae yumi luksave se Sera i rili gat strong bilif. !Oltaem Jehova i holem promes blong hem mo i mekem evri promes blong hem i kamtru. Samtaem, hem i save mekem promes blong hem i kamtru long wan fasin we yumi neva tingbaot, mo yumi sapraes long hem o yumi sek long hem!

Taem Sera i gat 90 yia, hem i glad tumas blong kasem samting we hem i stap wet long hem longtaem finis i kam. !Hem i bonem wan boe blong gudfala hasban blong hem taem hem i gat 100 yia! Ebraham i mekem olsem we God i talem, i putum nem blong boe ya se Aesak, o “Laf.” Yu traem pijarem Sera, nating se hem i taet, be hem i smael taem i se: “God i mekem mi mi glad, i mekem mi mi laf. Sipos ol man oli harem nius blong samting ya, olgeta evriwan bae oli glad wetem mi, oli laf.” (Jenesis 21:6) Presen ya we Jehova i givim long hem i mas mekem hem i glad tumas. Nating se i olsem, hem i gat bigfala wok tu blong mekem.

 Taem Aesak i gat faef yia, ol famle oli mekem wan lafet blong makem dei we hem i livim titi. Be i no evriwan we oli harem gud. Baebol i talem se Sera i stap “luk” wan fasin we i no stret long taem ya. Ismael, boe blong Hega we i gat 19 yia, i stap jikim smol Aesak. Hem i no mekem blong pleplei nomo. Biaen, tabu spirit i pulum aposol Pol blong raetem se, Ismael i stap agensem Aesak. Sera i luksave se Ismael i stap agensem Aesak from ol samting we bae Aesak i kasem. Hem i save se Aesak i no jes pikinini blong hem nomo; be hem i gat wan impoten wok blong mekem stamba tingting blong Jehova i kamtru. Taswe, hem i gat strong tingting blong go toktok stret long Ebraham. Hem i askem Ebraham blong i sanemaot Hega mo Ismael i gowe. —Jenesis 21:8-10; Galesia 4:22, 23, 29.

?Ebraham i harem olsem wanem? Baebol i se: “Tok ya i mekem Ebraham i harem nogud tumas, from we Ismael ya tu i stret pikinini blong hem.” Hem i papa blong Ismael mo hem i lavem Ismael, taswe hem i harem se hem i no save mekem olsem. Be Jehova i save samting we i stret blong mekem, so hem i kam insaed long bisnes ya. Hem i talem long Ebraham se: “Ebraham. Yu no harem nogud from pikinini ya blong yu wetem woman slef ya. Yu mekem olsem we woman blong yu i talem, from we promes ya blong mi we mi talem se, ‘Bambae yu yu gat plante pikinini we bambae oli kamaot biaen long yu, hem bambae i kamtru long pikinini ya blong yu Aesak.’” Jehova i talem long Ebraham se bae hem i lukaot long Hega mo boe blong hem. Ale, Ebraham i mekem olsem we hem i talem. —Jenesis 21:11-14.

Sera i wan gudfala waef mo i wan gudfala fren blong Ebraham. Hem i no stap talem ol gudfala samting nomo long hasban blong hem. Taem hem i luk wan problem, wan we i save spolem famle mo fiuja blong olgeta, hem i talemaot stret long hasban blong hem. Fasin blong hem blong tok stret, i no min se hem i nogat respek. From we Aposol Pita we hem i wan mared man, i tokbaot gudfala eksampol Sera olsem wan nambawan eksampol blong ol waef blong soem bigfala respek long ol hasban blong olgeta. (1 Korin 9:5; 1 Pita 3:5, 6) Blong talem tru, sipos Sera i no toktok long Ebraham long taem ya, hem i soem se hem i no respektem Ebraham, from we bae hem i mekem bigfala trabol i kasem Ebraham mo ful famle blong hem. Be from we Sera i gat lav, hem i talemaot samting we i nid blong talem.

Plante waef oli laekem eksampol blong Sera. Eksampol blong hem i tijim olgeta blong respektem mo tok tru long ol hasban blong olgeta. Sam waef maet oli wantem se Jehova i tekem saed blong olgeta tu olsem we hem i mekem long Sera. Nating se i no hapen olsem, oli lanem sam nambawan fasin long Sera, olsem strong bilif, lav, mo longfala tingting.

Nating se Jehova i givim wan haenem long gudfala woman ya se, ‘Mama Blong Ol King,’ hem i no gat tingting ya se ol man oli mas tinghae long hem olsem wan woman blong king. Maet hemia nao from wanem Ebraham i “stap krae bigwan long hem” taem hem i ded. Sera i gat 127 yia long taem we hem i ded.” * (Jenesis 23:1, 2) Ebraham i harem nogud tumas from we i lusum waef blong hem we i lavem tumas. Jehova tu i mas harem nogud blong lusum gudfala woman ya blong bilif, taswe hem i plan blong mekem hem i laef bakegen long paradaes long wol ya. Sera mo olgeta tu we oli folem fasin blong bilif blong hem oli stap wet long gudfala laef ya long fiuja, we i blong olwe.—Jon 5:28, 29.