Plante man oli stil bilif se sipos oli gat ol gudfala fasin, bambae oli gat wan gudfala fiuja. Taswe oli traem blong gat respek, soem ol gudfala fasin, wok had long komuniti, mo gat tingting we i klin. Woman ya Linh we i stap long Vietnam, i talem se: “Mi bilif se sipos oltaem mi mekem i stret mo mi no stap giaman, bambae mi gat wan gudfala laef.”

Sam oli mekem ol gudfala fasin, from we relijen i pulum olgeta blong mekem olsem. Hsu-Yun, wan man we i laef long Taewan i talem se: “Relijen blong mi i tijim mi se sipos man i stap mekem ol gudfala samting taem hem i laef, bambae hem i kasem blesing afta we hem i ded. Mo sipos hem i stap mekem ol nogud samting, bambae hem i safa from.”

Taem yumi mekem i gud long ol narafala, i tru se bambae yumi kasem plante gudfala samting. Be plante we oli traehad blong mekem i gud long ol narafala, oli luk se ol narafala oli no mekem i gud long olgeta. Shiu Ping we i laef long Hong Kong i talem se: “Long ekspiriens blong mi, mi lanem se i no oltaem we bae yu kasem ol samting we i gud. Mi traem bes blong mi blong kea long famle blong mi mo gat ol gudfala fasin, be mared blong mi i brok, mo hasban blong mi i lego mi wetem boe blong mi.”

Plante oli faenemaot se i no evriwan we oli stap go long jos, we oli gat ol gudfala fasin. Etsuko, wan woman we i laef long Japan i talem se: “Mi joenem wan relijen mo mi kam wan daerekta blong oganaesem ol aktiviti blong ol yangfala. Mi sek taem mi luk se ol man blong jos oli mekem ol rabis fasin, oli hanggri from paoa, mo oli misyusum mane blong jos.”

Samfala we oli strong long jos blong olgeta mo oli traehad blong mekem ol gudfala samting, oli harem nogud taem nogud samting i hapen long olgeta. Van we i wan woman Vietnam i harem olsem, hem i talem se: “Evri dei mi pem ol frut, flaoa, mo ol kakae, mo mi kam putum long olta blong ona long famle we i ded, from mi bilif se hemia bambae i mekem se mi gat wan gudfala fiuja. Nating se blong plante yia mi mekem ol gudfala fasin mo mi folemgud fasin blong wosip, be stil hasban blong mi i kasem wan rabis sik, mo tu, gel blong mi i ded taem hem i stap stadi long wan narafala kantri.”

Ol gudfala fasin nomo oli no naf blong mekem se yu gat wan gudfala fiuja. ?So wanem i save givhan? Blong ansarem kwestin ya, yumi nidim wan samting we yumi save trastem blong i lidim yumi blong gat wan fiuja we i sef. ?Weples yumi save faenem wan samting olsem?