God i givim wan spesel presen long ol man, hemia se oli save toktok long hem mo talemaot filing blong olgeta tru long prea. Profet Deved i prea se: “O Man blong harem ol prea, bambae olgeta kaen man oli kam long yu.” (Ol Sam 65:2, NW) ?Be yu save prea olsem wanem blong God i harem yu mo i blesem yu?

Prea we yu nomo yu mekem, i wan rod blong yu talemaot hat blong yu long hem, mo yu talemaot ol filing blong yu. (Ol Sam 62:8, NW) God Ya We i Gat Olgeta Paoa i laekem ol prea we oli kamaot long hat.

Nating se God i gat plante taetol, be hem i gat wan prapa nem nomo. “Mi mi Jehova. Hemia nem blong mi.” (Aesea 42:8, NW) Nem ya Jehova i kamaot samwe 7,000 taem long Baebol. Plante profet oli yusum prapa nem blong God taem oli prea long hem. Ebraham i se: “Plis Jehova, . . . yu letem mi mi toktok [wetem yu].” (Jenesis 18:30, NW) Yumi tu, yumi mas yusum nem blong God, Jehova taem yumi prea.

Nomata se yumi prea long wanem lanwis, be God i kasem save long filing mo tingting blong yumi. Tok blong hem i talem long yumi se: “God i stap mekem i sem mak nomo long olgeta man. Sipos wan man i fraet gud long God mo i mekem samting we i stret, God i glad long hem nating se hem i blong defren nesen.”—Ol Wok 10:34, 35.

Be blong God i blesem yumi, yumi mas mekem moa i bitim we yumi prea nomo. Long nekis haf, bambae yumi tokbaot samting we yumi mas mekem.