Profet Moses i talem se sipos yumi obei long ol komanmen blong God, bambae Hem i blesem yumi. (Dutronome 10:13; 11:27) Be yumi no obei long God jes from we yumi fraet long ol panis blong hem. Ol gudfala fasin blong God i pulum yumi blong obei, from we yumi lavem hem mo yumi no wantem mekem hem i harem nogud. “Taem yumi lavem God, hemia i min se yumi stap obei long ol loa blong hem, mo ol loa blong hem oli no had tumas blong folem.”—1 Jon 5:3.

Be taem yumi obei long God, ?olsem wanem hemia i save karem blesing long yumi? Tingbaot tu rod.

‘Mi [Jehova], mi God blong yufala. Mi stap tijim yufala blong givhan long yufala, mi lidim yufala long rod we i stret blong yufala i folem.’—AESEA 48:17.

Jehova God we i Krieta blong yumi, hem i save yumi mo i lidim yumi long rod we yumi mas folem. Blong tijing blong hem i halpem yumi blong mekem ol waes desisen, yumi mas stadi Baebol blong lanem samting we God i wantem se yumi mekem, mo folem ol tijing ya.

‘!Ol man we oli harem tok blong God mo oli obei long hem, olgeta ya nao oli glad!’—LUK 11:28.

Tede, plante milian man we oli obei long tok blong God, oli kasem tru glad. Eksampol, tingbaot wan man Spen we i stap kros kwik, mo i stap tritim nogud ol narafala mo waef blong hem. Wan dei hem i ridim long buk blong profet Moses, stori blong kwaet fasin blong Josef we i boe blong Jekob. Ol brata blong Josef oli mekem hem i kam wan slef, mo hem i go kalabus blong nating nomo, be yet, Josef i stap kwaet, i gat pis, mo i fogivim olgeta. (Jenesis, japta 37-45) Man ya i talem se: “Taem mi tingting long stori blong Josef, hemia i halpem mi blong mi gat kwaet fasin, mi kaen, mo mi bos long mi. Taswe naoia mi gat wan hapi laef.”

Baebol i givim moa save long fasin blong tritim ol narafala. Nekis haf bambae i tokbaot moa long saed ya.