Baebol—Buk Blong Trutok
Longtaem finis i kam, ol man long ol defdefren ples long wol, oli bilif se Baebol i talemaot trutok. Tede, plante milian man oli folem ol tijing blong hem. Be samfala oli ting se Baebol i no stret long yumi tede mo tok blong hem i no tru. ?Wanem tingting blong yu? ?Yu ting se ol tok blong Baebol i tru?
?FROM WANEM YU SAVE TRASTEM BAEBOL?
?Olsem wanem blong faenemaot sipos yu save trastem Baebol? Traem tingbaot pijatok ya: Sipos yu gat wan fren we oltaem hem i tok tru long yu, ating bambae yu trastem hem. ?Yu ting se Baebol i tok tru oltaem, olsem gudfala fren ya? Hemia sam eksampol.
Ol Man We Oli Raetem Oli Tok Tru
Ol man we oli raetem Baebol oli tok tru, mo oltaem oli raetemdaon ol mastik blong olgeta. Profet Jona i raetem se hem i no obei long God. (Jona 1:1-3) Mo long en blong buk blong hem, hem i talem se God i tok strong long hem blong stretem hem, be hem i no tokbaot olsem wanem hem i jenisim fasin blong hem, from we hem i no wantem leftemap hem wan. (Jona 4:1, 4, 10, 11) Ol man blong raetem Baebol oli tok tru from we oli tinghae long trutok.
Ol Advaes Blong Hem i Stret
?Olsem wanem? ?Oltaem Baebol i givim ol gudfala advaes long yumi? Yes. Makem advaes we hem i givim blong yumi save frengud wetem ol narafala, i se: “Fasin we yufala i wantem blong ol narafala oli mekem long yufala, yufala i mas mekem long olgeta.” (Matiu 7:12) “Sipos yu toktok gud long man we i kros, bambae yu save mekem tingting blong hem i kam kwaet, be sipos yu tok strong long hem, bambae yu mekem hem i kros moa.” (Ol Proveb 15:1) Yes, ol advaes blong Baebol oli stret yet long yumi, sem mak olsem long taem we oli raetem.
Hem i Tru Long Saed Blong Histri
Long ol yia we i pas, plante man blong digim graon oli faenemaot se ol defdefren man we Baebol i tokbaot, ol ples, mo ol samting we i talem se i hapen, oli tru. Traem tingbaot wan smol samting we hem i talem. Long taem blong Nehemaea, ol man Taea we oli kamaot long Fonisia be oli laef long Jerusalem, “oli stap tekem ol fis mo ol naranarafala samting i kam.”—Nehemaea 13:16.
?I gat wan pruf blong soemaot se ol tok long vas ya i tru? Yes, i gat. Ol man blong digim graon oli faenem sam samting long Isrel, we oli soemaot se ol man Fonisia oli salem olting blong olgeta long Isrel. Mo tu, long Jerusalem, oli digimaot sam bun blong ol fis blong Mediteranian Si. Oli ting se ol man oli karem ol fis i kam long wan ples we i stap klosap long solwota blong salem. Wan man blong stadi i talem se: “Ol tok blong Neh[emaea] 13:16 we i talem se ol man Taea oli salem fis long Jerusalem, oli tru tumas.”
Hem i Tru Long Saed Blong Sayens
Baebol i no wan buk blong sayens. Hem i wan buk we ol jos oli yusum blong mekem wosip, mo i wan buk blong histri. Be taem hem i tokbaot sayens, hem i tru nomo. Traem luk wan eksampol.
Samwe long 3,500 yia bifo, Baebol i talem se wol ya i “hang long open ples nomo.” (Job 26:7) Hemia i defren long tingting we ol man oli gat long taem ya. Oli ting se wol ya i flot antap long wota, o i stap antap long baksaed blong wan bigfala mama blong totel. Samwe long 1,100 yia afta we oli raetem buk blong Job, ol man oli bilif yet se wol ya i no save hang long open ples nomo, be i mas sidaon antap long wan samting. Long yia 1687 nomo, Isaac Newton i raetem buk blong hem long graviti, mo hem i eksplenem se i no gat wan samting we i holem wol ya. !Save ya i pruvum se samting we Baebol i talem 3,000 yia bifo i tru!
Ol Profet Tok Oli Tru
?Olsem wanem? ?Ol profet tok blong Baebol oli tru? Bambae yumi tokbaot wan eksampol: Hemia profet tok blong Aesea se Babilon bambae i lus.
Profet Tok Ya: Long ol yia 700 bifo Kraes, Aesea i talemaot se Babilon, we biaen i rul long olgeta ples long wol, bambae i lus, mo sloslo bambae i no moa gat man long hem. (Aesea 13:17-20) Aesea i talemaot nem blong man ya we bambae i spolem Babilon, hemia Sirus. Hem i tokbaot tu samting we Sirus bambae i mekem: Bambae hem i mekem reva i “drae,” mo i pas long ol get blong taon ya we oli open i stap.—Aesea 44:27–45:1.
I kamtru: Samwe long 200 yia afta, wan king blong Pesia i kam spolem Babilon. ?Wanem nem blong hem? Sirus. From we i no isi blong go insaed long Babilon, Sirus i mekem plan blong krosem Yufretes Reva, we i pastru long taon ya. Ol man blong hem oli digim wan narafala rod blong mekem se reva ya i ron i go long wan swam. Hemia i mekem se reva we i ron klosap long stonwol blong taon ya, i godaon, nao Sirus mo ol man blong hem oli save wokbaot i gokros. !Ol man Babilon oli no sarem ol get we oli stap long saed blong reva ya! Ale, ol ami blong Sirus oli pas long ol get ya we oli open i stap, mo oli spolem Babilon.
Be, i gat wan narafala samting bakegen: ?I tru se i no moa gat man we i laef long Babilon? Ol man oli gohed blong laef long ples ya blong plante yia. Be tede, ol ston nomo i stap klosap long Bagdad, Irak, hemia ples we Babilon i stap long hem bifo. Hemia i soemaot se profet tok ya i tru. Yes, Baebol i tru nomo taem i tokbaot ol samting we bambae oli hapen long fiuja.
