1, 2. ?Jisas i mekem wanem long naet blong 14 Nisan long yia 33? (Yu luk pija long stat blong stadi.)

LONG namba 14 Nisan long yia 33, Jisas mo ol aposol blong hem oli mekem lafet blong Pasova. Long naet ya, i gat fulmun long Jerusalem. Lafet ya i blong tingbaot samting we Jehova i mekem 1,500 yia bifo, taem hem i tekemaot ol man Isrel long Ijip. Afta we oli finisim lafet ya, Jisas i mekem wan spesel kakae wetem ol 11 gudfala aposol. Ol man blong Jisas oli mas mekem kakae ya evri yia blong tingbaot ded blong hem bakegen.—Matiu 26:1, 2.

² Jisas i prea, nao i pasem bred we i no gat is long hem i go long ol aposol blong hem. Hem i talem se: “Yufala i tekem, yufala i kakae.” Mo hem i tekem kap waen, i prea bakegen, nao i talem se: “Yufala evriwan, yufala i dring long hem.” (Matiu 26:26, 27) Bred mo waen i pija blong tu samting we tufala i impoten tumas. Jisas i gat plante samting yet blong talem long ol aposol blong hem long naet ya.

3. ?Wanem ol kwestin we bambae yumi tokbaot?

 ³ Jisas i wantem se ol disaepol blong hem oli tingbaot ded blong hem evri yia. Taswe, hem i stanemap kakae ya we biaen oli kolem “Kakae blong Masta” no Memoriol. (1 Korin 11:20) Bambae yumi tokbaot ol kwestin ya: ?Yumi tingbaot ded blong Jisas from wanem? ?Bred mo waen i pija blong wanem? ?Yumi mekem wanem blong rere from Memoriol? ?Hu i kakae bred mo dring waen? ?Ol Kristin wanwan oli tingting olsem wanem, taem oli ridim samting we Baebol i talem long saed blong fiuja blong olgeta?

4. ?Ded blong Jisas i openem wanem rod?

⁴ Adam i mekem se yumi evriwan i gat sin mo yumi ded. (Rom 5:12) Taswe, sipos wan sinman i givim laef blong hem, hem i no save pemaot hem wan no wan narafala man. (Ol Sam 49:6-9) Be Jisas i no gat sin, taswe laef blong hem i stret blong pemaot ol man. Taem hem i go antap long heven mo i givim sakrefaes blong hem i go long God, hem i openem rod blong yumi kam fri long sin mo ded, mo blong yumi kasem laef we i no save finis.—Rom 6:23; 1 Korin 15:21, 22.

5. (1) ?God mo Jisas, tufala i soemaot olsem wanem se tufala i lavem yumi? (2) ?Yumi mas go long Memoriol from wanem?

⁵ God i soemaot se hem i lavem yumi, taem hem i sanem pikinini blong hem i kamdaon long wol, mo hem i ded blong pemaot yumi. (Jon 3:16) Jisas tu i soemaot se hem i lavem yumi, taem hem i ded from yumi. Mo taem hem i no kamdaon long wol yet, hem i “hapi tumas blong luk ol man.” (Ol Proveb 8:30, 31) Yumi lavem tumas God mo Jisas from bigfala samting we tufala i mekem long yumi, taswe yumi go long Memoriol. Yumi obei long tok ya blong Jisas se: “Oltaem yufala i mas mekem samting ya blong tingbaot mi bakegen.”—1 Korin 11:23-25.

6. Long Memoriol, ?bred mo waen i pija blong wanem?

⁶ Long las kakae we Jisas i mekem wetem ol aposol blong hem, hem i tokbaot bred se: “Hemia bodi blong mi.” Mo hem i tokbaot waen se: “Hemia blad blong mi we i blong mekem promes blong God i stanap. Blad blong mi bambae i ron blong sevem plante man.” (Mak 14:22-24) Plante man oli ting se Jisas i mekem wan merikel blong jenisim bred i kam bodi blong hem mo waen i kam blad blong hem. Be ol aposol oli luk we Jisas i stap laef yet wetem bodi blong hem, mo tu, oli luk bred we bambae oli kakae, i stap long tebol long fored blong olgeta. Taswe, i klia se bred mo waen, tufala i pija no saen nomo.

7. ?Bred we i no gat is long hem i minim wanem?

⁷ Long impoten naet ya, Jisas i yusum haf bred blong Pasova we i no gat is long hem. (Eksodas 12:8) Long sam vas blong Baebol, is i minim sin. (Matiu 16:6, 11, 12;  Luk 12:1) Taswe bred we i no gat is long hem we Jisas i yusum, i minim bodi blong hem we i no gat sin. (Hibrus 7:26) Long sem fasin, yumi yusum bred we i no gat is long hem long Memoriol.

8. ?Waen we Jisas i yusum i minim wanem?

⁸ Waen we Jisas i yusum i minim blad blong hem. Waen we yumi yusum long Memoriol i gat sem mining. Long Golgota, klosap long Jerusalem, Jisas i ded ‘blong tekemaot sin blong plante man.’ (Matiu 26:28; 27:33) Sipos yumi wanwan i tinghevi long nambawan presen ya we yumi kasem, bambae yumi rere gud from Memoriol. ?Yumi mekem wanem blong rere?

9. (1) ?From wanem yumi mas folem program blong Baebol riding blong Memoriol? (2) ?Wanem tingting blong yu long sakrefaes blong Jisas we i pemaot yumi?

⁹ I gud yumi folem program blong Baebol riding blong Memoriol, we i stap long buk ya Ridimgud Ol Tok Blong Baebol Evri Dei. Hemia i save givhan long yumi, blong yumi tingting dip long ol samting we Jisas i mekem jes bifo we hem i ded. * Wan sista i talem se: “Evri yia, yumi stap wet long taem blong Memoriol. Long mi, lafet ya i spesel tumas. Mi tingting bak long taem ya we mi stap krae from papa blong mi long haos blong ol dedman. . . . Taem mi stap lukluk gudfala papa blong mi we i ded finis, mi jes kasem save fulwan long mining blong sakrefaes blong Jisas. . . . !Mi save finis ol vas we oli tokbaot sakrefaes ya mo mi save eksplenem olgeta! Be taem papa blong mi ded, mi kasem save gud long samting we nambawan sakrefaes ya bambae i mekem long yumi. Nao hat blong mi i fulap long glad.” Taswe, wan impoten samting blong rere gud from Memoriol, hemia blong tingting dip long sakrefaes blong Jisas mo olsem wanem bambae i givhan long yumi wanwan.

10. ?Yumi save mekem wanem bakegen blong rere from Memoriol?

 ¹⁰ Mo tu, yumi save prij moa blong singaot plante man oli kam long Memoriol. Maet yumi save mekem haftaem paenia. Taem yumi tokbaot God, mo Pikinini blong hem, mo promes blong laef we i no save finis, yumi harem gud from we yumi mekem samting we God i wantem.—Ol Sam 148:12, 13.

11. ?Sam Kristin long Korin oli stap mekem wanem long taem blong Memoriol?

¹¹ Taem yumi stap mekem rere from Memoriol, i gud yumi tingting dip long tok we Pol i raetem long ol Kristin long Korin. (Ridim 1 Korin 11:27-34.) Hem i talem se sipos wan man i kakae bred mo i dring waen long fasin we i no stret, hem i stap mekem i no stret long “bodi blong Masta blong yumi, mo long blad blong hem.” Taswe, sipos wan tabu man i stap mekem wan nogud fasin nao i kakae bred mo i dring waen long Memoriol, “hem nomo i stap pulum panis i kam long hem.” Long taem blong Pol, plante Kristin long Korin oli stap mekem fasin we i no stret. Maet sam long olgeta oli stap kakae tumas no dring tumas bifo long Memoriol no long taem blong Memoriol, nao oli wantem slip. Oli no gat respek, taswe taem oli kakae bred mo dring waen, God i no glad long olgeta.

12. (1) ?Pol i talem se Memoriol i olsem wanem samting, mo hem i givim wanem woning? (2) Sipos man we i stap kakae bred mo dring waen i mekem wan bigfala sin, ?hem i mas mekem wanem?

¹² Pol i talem se Memoriol i olsem wan kakae we man i serem wetem narafala. Mo hem i givim woning ya se: “Yufala i no save dring long kap blong Masta blong yumi, mo bakegen long kap blong ol devel. Mo yufala i no save sidaon blong kakae long tebol blong Masta blong yumi, mo bakegen long tebol blong ol devel.” (1 Korin 10:16-21) Sipos wan man we i stap kakae bred mo dring waen long Memoriol i mekem wan bigfala sin, hem i mas go luk ol elda blong oli givhan long hem. (Ridim Jemes 5:14, 16.) Sipos i gat pruf se hem i tanem tingting blong hem finis, hem i save kakae bred mo dring waen long Memoriol. Olsem nao, hem i no sakem doti long sakrefaes blong Jisas.—Luk 3:8.

13. ?I gud yu prea mo tingting dip long wanem? ?From wanem?

¹³ Blong rere from Memoriol, i gud yu prea mo tingting dip long nambawan fiuja we God bambae i givim long yu. !Yumi no wantem sakem doti long sakrefaes blong Jisas! Taswe, sipos yumi no suagud se tabu spirit i makemaot yumi blong go long heven, bambae yumi no kakae bred mo dring waen. Ale, ?hu i gat raet blong kakae bred mo dring waen?

14. Ol tabu Kristin we oli joen long niufala kontrak, ?oli mekem wanem long Memoriol?

¹⁴ Olgeta we oli kakae bred mo dring waen long Memoriol, oli save gud se oli joen long niufala kontrak. Jisas i tokbaot kap waen ya, i se: “Kap ya i olsem niufala  promes blong God, we blad blong mi bambae i ron blong mekem i stanap.” (1 Korin 11:25) Jehova i mekem kontrak blong Loa wetem ol man Isrel. Be afta we taem i pas, hem i talem se bambae i gat wan niufala kontrak. (Ridim Jeremaea 31:31-34.) God i mekem niufala kontrak, no promes, wetem ol man we tabu spirit i makemaot olgeta. (Galesia 6:15, 16) Blad blong Jisas i mekem kontrak ya i stanap. (Luk 22:20) Jisas i tekem niufala kontrak ya i kamtru. Ol tabu man we oli joen long kontrak ya mo oli holemstrong long God, bambae oli stap wetem Jisas long heven.—Hibrus 8:6; 9:15.

15. ?Hu i joen long kontrak blong Kingdom? Sipos oli holemstrong long God, ?bambae oli kasem wanem blesing?

¹⁵ Ol tabu Kristin oli save se oli joen long kontrak blong Kingdom. (Ridim Luk 22:29.) Jisas i mekem kontrak ya wetem ol gudfala man blong hem we tabu spirit i makemaot, mo we oli ‘harem nogud long bodi blong olgeta,’ olsem hem. (Filipae 3:10) Ol tabu Kristin tede we oli holemstrong long God, olgeta tu oli joen long kontrak ya. Bambae oli rul wetem Kraes long heven, gogo i no save finis. (Revelesen 22:5) Olgeta ya oli gat raet blong kakae bred mo dring waen long Kakae blong Masta.

16. Yu traem eksplenem Rom 8:15-17.

¹⁶ Ol tabu Kristin oli save gud se oli pikinini blong God mo oli gat raet blong kakae bred mo dring waen long Memoriol. (Ridim Rom 8:15-17.) Pol i talem se oli singaot God se “Papa.” Tok ya long lanwis Arameik i soemaot lav mo respek. Hemia i min se taem ‘tabu spirit i mekem olgeta oli pikinini blong God,’ oli spesel fren blong hem. Tabu spirit i ‘kam joen long tingting blong olgeta,’ nao oli suagud se oli pikinini blong God. Hemia i no min se oli no moa glad blong laef long wol ya. Be oli save se sipos oli holemstrong long God gogo kasem ded, bambae oli rul olsem ol king wetem Jisas long heven. Tede, sam nomo blong ol 144,000 ya we spirit blong Tabu God ya Jehova i makemaot olgeta, oli stap yet long wol. (1 Jon 2:20, NW; Revelesen 14:1) Oli harem se oli stap klosap nomo long Jehova, taswe oli singaot hem se “Papa.”

17. ?Ol tabu Kristin oli putum tingting blong olgeta i stap strong long wanem laef? ?Oli save olsem wanem se bambae oli go long heven?

¹⁷ Sipos yu yu wan tabu Kristin, oltaem long prea blong yu bambae yu tokbaot laef long heven we tingting blong yu i stap strong long hem. Mo ol tok blong Baebol bambae i gat moa paoa long yu. Olsem nao, taem yu ridim long Baebol se Jisas bambae i mared long “woman” blong hem long heven, yu save se i stap tokbaot yu, mo yu wantem tumas we taem ya i kam. (Jon 3:27-29; 2 Korin 11:2; Revelesen 21:2, 9-14) Mo taem Baebol i talem se God i lavem ol tabu Kristin, yu save se i stap toktok long yu. Mo taem yu ridim ol tok long Baebol we i go long ol tabu Kristin nomo, tabu spirit bambae i givhan long yu blong yu obei. Tabu spirit i ‘kam joen long tingting blong yu’ blong talemaot se bambae yu go long heven.

18. ?“Ol narafala sipsip” oli putum tingting blong olgeta i stap strong long wanem laef? ?Wanem tingting blong yu long gudfala promes ya?

 ¹⁸ Sipos yu blong “bigfala kampani” blong “ol narafala sipsip,” God i givim janis long yu blong yu kasem laef we i no save finis long Paradaes long wol. (Revelesen 7:9, NW; Jon 10:16) ?Wanem tingting blong yu long gudfala promes ya? Taem yu tingting dip long ol tok blong Baebol long Paradaes ya, yu glad we yu glad. Yu wantem tumas blong laef wetem ol famle mo ol fren blong yu, long wol ya we i gat pis oltaem. Yu wantem tumas blong luk taem ya we i no moa gat man we i hanggri mo i pua, man i no moa harem nogud long bodi blong hem, mo sik wetem ded i finis. (Ol Sam 37:10, 11, 29; 67:6; 72:7, 16; Aesea 33:24) Yu wantem tumas blong luk olgeta we yu lavem olgeta tumas, oli laef bakegen. (Jon 5:28, 29) !Tru ya, yu yu glad tumas long nambawan fiuja ya we Jehova i wantem givim long yu! Nating se yu no kakae bred mo dring waen, be yu kam long Memoriol from we yu tinghevi long sakrefaes blong Jisas we i pemaot yu.

19, 20. (1) ?Yu mas mekem wanem blong laef olwe? (2) ?Bambae yu go long Memoriol from wanem?

¹⁹ Nating se bambae yu laef long wol no long heven, be blong laef olwe, yu mas bilif long Jehova God, mo Jisas Kraes, mo sakrefaes blong Kraes we i pemaot yumi. Taem yu go long Memoriol, yu mas tingting dip long laef we yu save kasem long fiuja mo bigfala mining blong ded blong Jisas. Long Fraede, namba 3 Eprel 2015, afta we san i godaon, plante milian man long olgeta ples long wol bambae oli joen long ol Haos Kingdom no long ol narafala ples, blong mekem Memoriol.

²⁰ Taem yu rere gud from Memoriol mo yumi gat stret tingting, bambae yu wantem talem bigfala tangkiu from sakrefaes blong Jisas we i pemaot yumi. Sipos yu lesin gud long tok blong Memoriol, hemia bambae i pusum yu blong yu soemaot lav long ol man. Bambae yu wantem talemaot long olgeta se Jehova i lavem olgeta mo i gat wan plan we bambae i kamtru long yumi evriwan. (Matiu 22:34-40) !Yu mas gat strong tingting blong stap long Memoriol, yu no mas mestem!