SAMWE long Ogis kasem Septemba 1929, bitim ten taosen pablisa oli go long Yunaeted Stet blong prij. Long naen dei nomo oli seremaot samwe long 250,000 buk mo buklet. Hemia i olsem wan hariken we i pas long ples ya. Long olgeta pablisa ya i gat wan taosen colporteurs (we tede yumi kolem olgeta ol paenia). !Namba blong ol paenia ya i kam antap bigwan! Wan Bulletin * i soemaot se namba blong ol paenia ya, i tri taem antap long ol yia 1927 kasem 1929.

Klosap long en blong yia 1929, i gat wan bigfala trabol long saed blong mane. Dei ya 29 Oktoba 1929 oli singaot se, Blak Tusde. Hemia from we long dei ya, ol bigfala kampani long Amerika we ol man oli putum mane long hem, oli foldaon wantaem nomo. Ale, ol man we oli putum ol mane long ol kampani ya, oli lusum mane blong olgeta. I mekem se long fulwol i gat wan bigfala trabol long saed blong mane, we oli kolem Bigfala Dipresen, mo plante taosen bang oli foldaon. Fulap man we oli gat plantesen, oli no moa save wok long ol graon blong olgeta. Ol bigfala faktri oli satem ol doa blong olgeta. Plante milian man oli lusum wok blong olgeta. Long yia 1933, namba blong ol man we oli lusum haos blong olgeta, i go antap kasem 1,000 long wan dei. Hemia from we oli no save pembak lon blong haos blong olgeta long bang.

?Ol paenia oli mekem wanem long hadtaem ya? Oli wokem haos long trak blong olgeta. Olsem nao, oli no nid blong pem ren mo takis. Hemia i givhan long olgeta blong oli gohed long wok blong paenia we oli no gat bigfala kaon blong pem. * Mo tu, long taem blong asembli, oli no nid blong ren long wan rum, from we oli go long ples blong asembli wetem trak blong olgeta we i gat haos long hem. Long yia 1934, i gat wan Bulletin i kamaot we i soemaot plan blong wan haos we insaed long hem i gat wota, oven, mo wan bed we oli save benem. Mo tu, oli soemaot olsem wanem blong wokem haos ya, blong i stap wom long taem blong kolkol.

Ol paenia raon long wol oli tingting gud, mo oli faenem sam rod we i save givhan long olgeta long hadtaem ya, ale oli wokem haos long trak blong olgeta. Victor Blackwell i talem se: “Noa i no save olsem wanem blong wokem wan bot. Mi tu, mi no save olsem wanem blong wokem wan haos long trak.” Nating se i olsem, hem i wokem wan haos long trak blong hem.

Avery mo Lovenia Bristow, tufala i gat wan trak we i gat haos biaen long hem. Avery i talem se: “Trak blong mi i olsem haos blong mi.” Avery mo Lovenia Bristows tufala i mekem wok blong paenia wetem Harvey mo Anne Conrow. Tufala i gat wan haos long trak blong tufala we oli wokem wol blong hem long pepa, mo oli kavremap ol pepa ya wetem kolta. Mo taem oli wantem muvaot blong go long defren ples, ol pepa ya oli folfoldaon. Avery i talem se: “!Haos ya i defren olgeta, neva man i luk wan haos olsem samtaem. Mo stat long taem ya kam kasem tede, i no moa gat wan haos olsem bakegen!” Avery i talem tu se, “i neva gat wan famle we i hapi” olsem Harvey mo Anne mo tufala boe blong tufala. Harvey Conrow i raetem se: “Mifala i neva sot long wan samting, mo taem mifala i stap mekem wok blong Jehova, mifala i harem se mifala i sefgud from we hem i lavem mifala, mo i lukaot gud long mifala.” Samtaem biaen, famle Conrow oli go long skul blong Gilead, mo oli sanem olgeta oli go long Peru blong mekem wok blong misinari.

Famle blong Battainos tu oli mekem wok blong paenia. Taem Giusto mo Vincenza, tufala i save se bambae tufala i gat wan pikinini, tufala i mekem wan olfala trak blong tufala i kam “olsem wan naesfala hotel.” Hemia i gud moa i bitim ol haos tapolen we oli laef long hem bifo. Nating se  tufala i gat wan smol gel, be tufala i gohed nomo blong prij long ol man Itali we oli laef long Yunaeted Stet.

Plante man we oli lesin long gud nius, oli no gat wok mo oli pua, be wanwan taem oli givim presen mane from ol buk we oli kasem. Samtaem oli givim eni samting nomo long mifala, ale mifala i givim ol buk long olgeta. Tu paenia tufala i mekem wan lis blong 64 defren samting we ol man oli givim long olgeta. Lis ya i “olsem wan lis blong ol samting we oli kasem long stoa.”

Fred Anderson i prij long wan fama nao hem i wantem wan buk we i gat plante haf blong hem. Ale, hem i givim wan glas blong rid blong mama blong hem long Fred, olsem nao hem i save karem ol buk ya. Biaen Fred i go long nekis fam, nao i prij long wan man we i laekem ol buk blong yumi, be hem i talem long Fred se: “Mi mi no gat glas blong rid.” Ale, Fred i givim glas we fama ya i givim long hem, long man ya. Taem man ya i werem glas ya, hem glad tumas from we naoia hem i save ridim gud ol buk ya, taswe hem i givim presen mane long Fred from ol buk mo glas we hem i tekem.

Herbert Abbott i putum wan haos blong faol long trak blong hem. Samtaem ol man oli givim tri no fo faol long hem from ol buk we oli tekem, nao hem i karem ol faol ya i go long maket mo i salem olgeta. Ale, hem i yusum mane ya blong pem bensin blong trak blong hem. Hem i talem se: “I gat samtaem we mifala i no moa gat mane nating. Be hemia i no blokem mifala. Sipos mifala i gat bensin long trak blong mifala, bambae mifala i gohed nomo. Mifala i bilif strong long Jehova mo mifala i trastem hem.”

Nating we ol man blong Jehova oli fesem ol hadtaem ya, be oli trastem Jehova mo oli gat strong tingting se, hem bambae i givhan long olgeta long hadtaem ya. Wan taem i gat bigfala ren, nao Maxwell mo Emmy Lewis tufala i kamaot long haos blong tufala we i stap biaen long trak, be long semtaem ya tufala i luk wan tri i foldaon antap long haos blong tufala, mo i seraotem haos ya long tu haf. Maxwell i talem se: “Hemia i no wan problem ya. Samting olsem i save hapen. Mitufala i neva tingbaot se bambae mitufala i lego wok ya. I gat plante wok i stap yet mo mitufala i wantem tumas blong mekem ol wok ya.” Maxwell mo Emmy tufala i no fraet mo ol fren blong tufala oli givhan bigwan long tufala. Ale, tufala i wokem bakegen haos blong tufala biaen long trak.

Plante Witnes blong Jehova oli gat strong tingting blong lego ol samting we olgeta nomo oli wantem, blong oli save gohed moa long wok blong Jehova. Taswe, taem yumi wanwan i kasem ol hadtaem, i gud yumi mekem olsem olgeta. Mo tu, olsem ol paenia long taem bifo, yumi tu, yumi mas gat strong tingting blong gohed blong prij kasem taem we Jehova i talem se wok ya i finis.