?Wan Woman i Save Stretem Wan Jaj?

SLADJANA i wan Witnes blong Jeova we i stap long Kroasia. Hem i mas pas long kot from sam bisnes long saed blong mane. Long dei we oli mas pas long kot, Sladjana i kam stanap fored long jaj long stret taem. Be narafala man we i mas joen long kot kes ya i let, hem i no kamtru yet. Sladjana i wantem tumas blong prij, ale, taem evriwan oli stap sidaon mo wet blong kot i stat, hem i mekem tingting blong hem i strong blong toktok long jaj.

Hem i askem long jaj se: “?Jaj, yu yu save se i no longtaem bambae i no moa gat ol jaj mo ol haos kot long wol?” Sladjana i stap tokbaot ol jaj long wol tede.

Jaj i sapraes, nao i lukluk Sladjana nomo, i no ansa nating. Long sem taem, haeman blong kot i kam insaed mo kot i stat. Taem kot i finis mo Sladjana i stanap blong saenem wan pepa, jaj i lei i go klosap long Sladjana mo i toktok smol long hem, se: “?Yu yu sua long wanem we yu jes talem long mi, se i no longtaem bambae i no moa gat ol jaj mo ol haos kot long wol?”

Sladjana i ansa se: “!Yes Jaj. Mi mi sua fulwan!”

Jaj i askem long hem se: “?I gat wan pruf blong soemaot samting ya?”

Sladjana i ansa se: “Yu save faenem pruf long Baebol.”

Jaj i talem se hem i wantem ridim pruf ya, be hem i no gat wan Baebol. Ale, Sladjana i talem long hem se bambae hem i karem wan Baebol i kam long hem. Ol Witnes oli visitim jaj ya, oli givim wan Baebol long hem, mo oli leftemap tingting blong hem blong stadi Baebol wetem olgeta evri wik. Jaj ya i glad, mo i no longtaem biaen, hem i kam wan Witnes blong Jeova.

Profet tok we i stap long Ol Sam 2:10 (NW ) i talem se: “Ol king. Yufala i mas traehad blong kasem mining blong ol tok ya. Ol jaj blong wol. Yufala i mas letem narafala i stretem yufala.” !Yumi haremgud tumas taem ol man olsem we oli gat tingting daon oli letem Jeova i lidim laef blong olgeta!

[Tok blong pija long pej 32]

Sladjana wetem jaj