‘Yu Mas Jusumaot Laef’

“?Yufala i wantem laef, no yufala i wantem ded? ?Yufala i wantem blong Hae God i blesem yufala, no blong hem i givim panis long yufala? . . . !Mi mi wantem tumas blong yufala i jusumaot laef!”​—DUTRONOME 30:19.

1, 2. ?Olsem wanem God i wokem man blong i tekem fasin blong hem?

 “I GUD yumi mekem man, mo i gud yumi mekem we hem i tekem fasin blong yumi, i olsem yumi.” Tok ya we God i talem, i stap long faswan japta blong Baebol. Jenesis 1:​26, 27 i gohed i se: “Nao hem i mekem man, mo man ya i tekem fasin blong hem, i olsem hem.” Taswe faswan man i defren long ol narafala samting we God i wokem long wol. Man i tekem fasin blong God we i wokem hem, i min se hem i save folem fasin blong God blong tingting gud mo skelem ol samting, mo blong soemaot lav, stret fasin, waes, mo paoa. God i wokem man we hem i naf blong haremsave samting we i stret mo samting we i no stret. From samting ya, man i save tekem desisen we bambae i mekem i gud long hem wan mo bambae i mekem Papa blong hem long heven i glad. (Rom 2:15) Blong talem long klia fasin, Adam i save jus. Taem Jeova i luk fasin ya we hem i putum long pikinini blong hem long wol ya, “hem i luk we [i] gud we i gud tumas.”​—Jenesis 1:31; Ol Sam 95:6.

² From we yumi pikinini blong Adam, yumi tu yumi tekem fasin blong God. ?Be yumi rili fri blong jusum wanem we yumi wantem mekem? Yes. I tru se Jeova i naf blong save fastaem samting we bambae i hapen. Be hem i no makemaot samting we wanwan long yumi bambae i mekem mo frut we bambae i kamaot from. Jeova i no wantem we ol pikinini blong hem long wol oli stap olsem we oli kalabus from we hem i makemaot evri samting long laef blong olgeta. Blong givhan long yumi blong kasem save from wanem i impoten we yumi yusumgud fasin ya blong jus, bambae yumi tokbaot wan lesen we neson blong Isrel i tijim yumi long hem.​—Rom 15:4.

 Ol Man Isrel Oli Save Jus

3. ?Wanem faswan long ol Tenkomanmen, mo olsem wanem neson blong Isrel i jusum blong obei long loa ya?

³ Jeova i talem long ol man Isrel se: “Mi mi Hae God, mi God blong yufala. Fastaem yufala i slef nomo blong ol man Ijip, be mi mi tekemaot yufala finis, mi sevem yufala.” (Dutronome 5:6) Ol man Isrel oli save se ol tok ya i tru, from we long yia 1513 B.K.T., Jeova i mekem rod blong oli kamfri long wok slef long Ijip. Long faswan long ol Tenkomanmen we Jeova i givim long olgeta tru long Moses, hem i talem se: “Bambae yufala i no mas mekem wosip long ol narafala god, yufala i mas mekem wosip long mi nomo.” (Eksodas 20:​1, 3) Long taem ya, neson blong Isrel i jusum blong obei long God. Oli glad blong mekem wosip long Jeova nomo.​—Eksodas 20:5; Namba 25:11.

4. (a) ?Wanem jus we Moses i talem long ol man Isrel blong mekem? (b) ?Wanem jus we yumi mas mekem tede?

⁴ Samwe long 40 yia afta long taem ya, Moses i tok strong long ol yangfala long neson blong Isrel long saed blong jus we olgeta oli mas mekem. Hem i se: “Naoia mi mi talem stret long yufala se yufala nomo i mas jusumaot. ?Yufala i wantem laef, no yufala i wantem ded? ?Yufala i wantem blong Hae God i blesem yufala, no blong hem i givim panis long yufala? Mi mi singaot heven mo wol, blong tufala ya nao bambae i witnes blong mi, we mi talem long yufala se yufala i mas jus. !Mi mi wantem tumas blong yufala i jusumaot laef!” (Dutronome 30:19) Sem mak tede, yumi save jus. Yes, yumi save jusum blong holemstrong long wok blong Jeova mo kasem laef we i no save finis, no yumi save jusum blong no obei long Jeova mo kasem panis. Bambae yumi tokbaot tu man we tufala i mekem defdefren jus.

5, 6. ?Josua i mekem wanem jus, mo wanem i kamaot from?

⁵ Long yia 1473 B.K.T., Josua i lidim ol man Isrel oli go long Promes Lan. Bifo we Josua i ded, hem i tok strong long neson ya, i se: “Sipos yufala i no wantem biaen long [Jeova], be naoia yufala i mas jusumaot wanem god we yufala i wantem. Sipos yufala i wantem biaen long ol god ya blong ol man Mesopotemia, we ol bubu blong yumi bifo oli stap mekem wosip long olgeta, i stap long yufala. No sipos yufala i wantem biaen long ol god blong ol laen blong Amoro we yumi stap long graon blong olgeta naoia, i stap long yufala.” Long saed blong famle blong hem, hem i se: “Mi, wetem ol famle blong mi, bambae mifala i biaen long Hae God [Jeova] nomo.”​—Josua 24:15.

⁶ Bifo long taem ya, Jeova i bin talem long Josua se hem i mas strong, i no mas fraet. Mo God i talem tu se Josua i no mas lego Loa blong Hem. Sipos Josua i ridim Loa ya mo i tingting gud long hem long dei mo long naet, bambae ol wok blong hem i gat frut. (Josua 1:​7, 8) Mo hemia nao samting we i hapen. Gudfala jus we Josua i mekem i karem plante blesing i kam long hem. Hem i se: “[Jeova] i holem olgeta promes ya we i mekem long ol bubu blong [mi] bifo, se bambae i mekem i gud long olgeta. I no gat wan long olgeta i foldaon, olgeta evriwan i kamtru.”​—Josua 21:45.

7. ?Long taem blong Aesea, wanem jus we sam man Isrel oli mekem, mo wanem i kamaot from?

⁷ Be, 700 yia afta long taem blong Josua, ol samting i jenis long Isrel. Plante man Isrel oli stat folem ol kastom blong ol hiten man. Wan long ol kastom ya, oli mekem long laswan dei blong yia. Ol man oli hivap raon long wan tebol we i fulap long ol gudgudfala kakae mo swit waen. Hemia i no wan kakae nomo blong evriwan long famle i joen wanples, nogat. Hem i wan kakae blong givim ona long tu giaman god. Profet Aesea i tokbaot tingting blong trufala God long saed blong fasin ya blong olgeta blong lego hem, i se: ‘Yufala ya i gowe long tabu hil ya Saeon we i ples blong mi, mo yufala i tanem baksaed long mi, nao yufala i go mekem wosip long god ya we yufala i talem se hem i masta blong fiuja, mo long god ya we yufala i talem se hem i bos long ol samting we i stap kamtru long laef blong man.’ Sam man Isrel oli no moa ting se blesing blong Jeova nao i mekem garen blong olgeta i givim plante kakae. Oli ting se oli mas mekem ‘god ya we i masta blong fiuja’ mo ‘god ya we i bos long ol samting we i stap kamtru long laef blong olgeta’ i glad, nao tufala bambae i mekem garen blong olgeta i grugud. Be taem oli mekem stronghed fasin ya mo nogud jus ya, oli stap jusumaot wan fiuja we i nogud. Jeova i talem se: “Bambae yufala i ded long faet, we ol enemi bambae oli kilim yufala, from we taem mi mi singaot yufala, be yufala i no save harem mi, mo taem mi mi tok long yufala, be yufala i no save lesin long mi. Oltaem yufala i stap brekem tok blong mi, mo yufala i stap mekem ol fasin we i nogud olgeta.” (Aesea 65:​11, 12) Oli ded from nogud jus we oli mekem, mo ‘god ya we i masta blong fiuja’ mo ‘god ya we i  bos long ol samting we i stap kamtru’ i no gat paoa blong sevem olgeta.

Jusum Stret Rod

8. ?Dutronome 30:20 i tokbaot wanem trifala samting we oli save mekem se yumi jusum stret rod?

⁸ Long semtaem we Moses i talem long ol man Isrel se oli mas jusumaot laef, hem i talem tri samting we oli mas mekem: “Yufala i mas lavem [Jeova], yufala i mas obei long hem, mo oltaem, tingting blong yufala i mas strong long hem.” (Dutronome 30:20) Bambae yumi tokbaot trifala samting ya, we oli save mekem se yumi jusum stret rod.

9. ?Olsem wanem yumi soemaot se yumi lavem Jeova?

⁹ Lavem Jeova we i God blong yumi: Yumi jusum blong mekem wok blong Jeova from we yumi lavem hem. Ol samting we i hapen long ol man Isrel oli olsem woning long yumi, mo yumi lesin long olgeta. Taswe yumi blokem ol samting we i save pulum yumi blong mekem rabis fasin long saed blong seks, mo yumi no folem fasin blong laef blong ol man blong wol we i save lidim yumi blong foldaon long trap ya blong ronem ol sas samting. (1 Korin 10:11; 1 Timoti 6:​6-10) Yumi holemstrong long Jeova mo obei long ol loa blong hem. (Josua 23:8; Ol Sam 119:​5, 8) Bifo we ol man Isrel oli go long Promes Lan, Moses i talem long olgeta se: “Mi mi tijim yufala finis long olgeta loa ya, stret olsem we hem i talem long mi. Mo taem yufala i go stap long kantri ya we bambae yufala i holem i blong yufala, bambae yufala i mas obei long ol loa ya. Mo yufala i mas obei long olgeta we tingting blong yufala i no save jenis, nao fasin ya bambae i save soemaot long ol man blong ol narafala kantri we yufala i waes.” (Dutronome 4:​5, 6) Naoia i stret taem blong yumi soemaot se yumi lavem Jeova. Yumi mekem olsem taem yumi mekem samting we Jeova i wantem, fastaem long ol narafala samting long laef blong yumi. Sipos yumi jusum rod ya, bambae yumi kasem fulap blesing.​—Matiu 6:33.

10-12. ?Yumi lanem wanem lesen taem yumi tingbaot samting we i hapen bifo we bigfala wota i ron blong kavremap wol?

¹⁰ Obei long God: Noa i “wan prija we i stap talemaot stret fasin.” (2 Pita 2:5) Klosap olgeta man long taem blong Noa oli stap bisi long ol narafala samting mo oli no “lesin” long woning we Noa i givim long olgeta. ?Wanem i hapen? “Bigfala wota i ron i tekemaot olgeta, oli ded.” Jisas i givim woning se bambae i sem mak “long taem we Pikinini blong Man i stap,” hemia long taem blong yumi. Taswe, samting we i hapen long taem blong Noa i olsem wan strong woning long ol man tede we oli no jusum blong obei long tok blong God.​—Matiu 24:​39, NW.

¹¹ Ol man we oli laf long ol woning we God i givim tru long ol man blong hem tede, oli mas kasem save se sipos oli no lesin long ol woning ya, bambae oli kasem bigfala trabol. Aposol Pita i tokbaot ol man ya blong jik, i talem se: “Olgeta oli stap tok olsem be oli no wantem tingbaot we bifo longtaem, God i tok, nao skae mo graon tufala i kamaot. Hem i mekem graon ya i kamaot long medel blong ol wota, mo hem i yusum wota ya blong wokem olgeta ples long wol. Mo long sem fasin, hem i yusum wota bakegen blong spolem, long taem ya we hem i spolem wol ya we i stap bifo, long wota ya we i ron bigwan. Be skae mo graon we i stap naoia, tok blong God i blokem tufala, tufala i stap wet blong bambae faea i kasem tufala. Tok ya bambae i stap holem tufala, gogo i kasem bigfala Dei ya we God bambae i jajem ol man we oli no obei long hem, nao bambae oli lus.”​—2 Pita 3:​3-7.

¹² Traem tingbaot olsem wanem jus we ol man ya oli mekem i defren olgeta long jus we Noa mo famle blong hem i mekem. “From we Noa i stap bilif strong long God, taswe hem i obei long tok blong God long taem ya we God i talemaot ol samting ya long hem fastaem, we i no gat man i luk yet. Taswe hem i obei long God, nao i wokem wan bigfala sip.” From we hem i lesin long woning, God i sevem famle blong hem. (Hibrus 11:7) Yumi mas rere oltaem blong lesin long tok we God i talem, mo yumi mas kwik blong obei long tok ya.​—Jemes 1:​19, 22-25.

13, 14. (a) ?From wanem i impoten we ‘tingting blong yumi i strong oltaem long Jeova’? (b) ?Olsem wanem yumi save letem Jeova, “man blong wokem graonpot,” i jenisim fasin blong yumi?

¹³ Tingting i mas strong oltaem long Jeova: Blong “jusumaot laef,” yumi mas lavem Jeova mo yumi mas obei long ol tok blong hem. Be i gat wan moa samting we yumi mas mekem tu: ‘Oltaem, tingting blong yumi i mas strong long hem.’ Hemia i min se yumi mas gohed nomo blong mekem samting we Jeova i wantem. Jisas i talem se: “Bambae yufala i save sevem laef blong yufala, from we yufala i stap stanap strong.” (Luk 21:19) Tru ya, jus we yumi mekem long saed ya, i soemaot wanem i rili stap long hat blong yumi. Ol Proveb 28:14 i talem se: “Sipos  yu stap tinghevi long Hae God, mo yu stap ona gud long hem, bambae yu save harem gud. Be sipos yu stap mekem hed, bambae yu kasem trabol we i spolemgud yu.” Lastok blong Proveb ya i kamtru long Fero blong Ijip bifo. Taem God i mekem ten trabol i kamaot long ol man Ijip, Fero i no soemaot se hem i fraet long God, mo hem i no obei long God. Long defren fasin hem i mekem hed. Jeova i no fosem Fero blong mekem hed, be Jeova i letem haeman ya we i gat flas tingting, i jusum rod blong hem. Nating se i olsem, samting we Jeova i wantem i kamtru, olsem aposol Pol i talem taem hem i tokbaot Fero. Jeova i talem long Fero se: “Bambae mi mi yusum yu blong soemaot paoa blong mi, mo blong mekem olgeta man long wol oli save nem blong mi. From samting ya nao mi mi mekem yu yu king.”​—Rom 9:17.

¹⁴ Plante handred yia afta we ol man Isrel oli kamfri long strong rul blong Fero, profet Aesea i talem se: “Hae God, yu yu Papa blong mifala. Mifala i olsem graon, mo yu yu man blong wokem graonpot. Yu yu mekem mifala evriwan long han blong yu nomo.” (Aesea 64:8) Blong letem Jeova i wokem yumi olsem graonpot, yumi mas stadi yumi wan, mo yumi mas mekem ol Tok blong hem i wok long laef blong yumi. Ale sloslo, fasin blong yumi bambae i jenis mo bambae yumi tekem niufala fasin blong laef. Bambae yumi mekem tingting blong yumi i stap daon mo yumi rere blong jenisim fasin blong yumi. Samting ya bambae i mekem i isi moa long yumi blong stap tru long Jeova oltaem, from we i klia se yumi rili wantem mekem hem i glad.​—Efesas 4:​23, 24; Kolosi 3:​8-10.

‘Yufala i Mas Talemaot Ol Samting Ya’

15. ?Long Dutronome 4:​9, Moses i talemaot wanem tufala samting we ol man Isrel oli mas mekem?

¹⁵ Moses i toktok long neson blong Isrel we i rere blong go insaed long Promes Lan, i se: “!Yufala i mas lukaot gud! Yufala i no mas fogetem ol samting ya samtaem, we yufala i luk finis long ae blong yufala. Oltaem long laef blong yufala, bambae yufala i mas tingbaot ol samting ya. Bambae yufala i mas talemaot long ol pikinini blong yufala mo long ol smol bubu blong yufala.” (Dutronome 4:9) I gat tu samting we Jeova God i talem se ol man Isrel oli mas mekem sipos oli wantem kasem blesing blong hem mo haremgud long kantri we bambae oli go long hem. Oli no mas fogetem ol bigbigfala wok blong Jeova we oli luk finis long ae blong olgeta, mo oli mas tijim ol pikinini blong olgeta mo ol smol bubu blong olgeta long ol samting ya. Ol man blong God tede oli mas mekem sem mak sipos oli wantem “jusumaot laef.” ?Wanem wok blong Jeova blong givhan long yumi, we yumi luk finis long ae blong yumi?

16, 17. (a) ?Ol misinari we oli tren long skul blong Gilead oli bin mekem wanem long wok blong talemaot Kingdom? (b) ?Yu yu save hu we i givim gudfala eksampol blong holem strong tingting blong prij?

¹⁶ Yumi haremgud tumas blong luk olsem wanem Jeova i stap blesem wok blong yumi blong prij mo blong mekem disaepol. Wajtaoa Baebol Skul blong Gilead i stat long yia 1943, mo afta long taem ya, long plante kantri ol misinari nao oli statem wok ya blong mekem disaepol. Kam kasem tede, plante man mo woman we oli tren long ol faswan klas blong Gilead oli holem strong tingting blong gohed blong talemaot Kingdom, nating se oli olfala finis, no oli sik we oli no save mekem bigfala wok olsem fastaem. Wan nambawan eksampol long saed ya, hemia Mary Olson we i tren long skul blong Gilead long yia 1944. Hem i bin mekem wok blong misinari fastaem long Yuragwei, biaen hem i go long Kolombia, mo naoia hem i stap long Poto Riko. Nating se Mary Olson i olfala finis mo i no moa save mekem bigfala wok, be hem i gohed blong holem strong  tingting mo glad long wok blong prij. Hem i toktok lanwis blong Spen, ale hem i yusum save ya blong joen evri wik long wok blong prij wetem ol pablisa long kongregesen blong hem.

¹⁷ Nancy Porter we i tren long Gilead long yia 1947, hem i gohed yet blong mekem wok blong misinari long ol aelan blong Bahama, nating se hem i lusum man blong hem finis. Hem i wan narafala misinari bakegen we i stap bisi oltaem long wok blong prij. Sister Porter i raetem stori blong laef blong hem, * mo hem i talem se: “Wok ya blong tijim ol narafala long trutok blong Baebol i givim spesel glad long mi. Hem i givhan long mi blong gat wan gudfala program blong ol samting long saed blong spirit, mo i mekem se laef blong mi i gat oda, i no olbaot.” Taem Sister Porter mo ol narafala man mo woman we oli bin holemstrong long wok blong Jeova oli tingtingbak long laef blong olgeta, oli no fogetem ol samting we Jeova i bin mekem blong givhan long olgeta. ?Olsem wanem long yu? ?Yu yu gat tangkiu from blesing blong Jeova long wok blong Kingdom long ples blong yu, we yu yu luk finis long ae blong yu?​—Ol Sam 68:11.

18. ?Yumi save lanem wanem taem yumi ridim stori blong laef blong ol misinari?

¹⁸ Yumi tinghae long wok we ol olfala ya oli mekem mo we oli stap mekem yet. Taem yumi ridim stori blong laef blong olgeta, ol tok ya i leftemap tingting blong yumi from we yumi luksave ol samting we Jeova i mekem blong givhan long olgeta we oli gat strong bilif, mo samting ya i mekem tingting blong yumi i strong moa long wok blong Hem. ?Olsem wanem? ?Yu yu ridim ol gudfala laef stori ya long Wajtaoa mo tingting dip long olgeta?

19. ?Olsem wanem ol Kristin papa mama oli save yusumgud ol laef stori long Wajtaoa?

¹⁹ Moses i talem long ol man Isrel se oli no mas fogetem olgeta samting we Jeova i bin mekem blong givhan long olgeta, mo se oli mas holemtaet ol samting ya long hat blong olgeta long olgeta yia blong laef blong olgeta. Nao hem i talem se oli mas mekem wan samting moa i se: “Bambae yufala i mas talemaot [ol samting ya] long ol pikinini blong yufala mo long ol smol bubu blong yufala.” (Dutronome 4:9) Ol trufala stori blong laef blong ol man oli spesel. Ol yangfala oli nidim ol gudfala eksampol blong folem. Ol sista we oli no mared oli save lanem plante samting long eksampol blong ol olfala sista we stori blong laef blong olgeta i stap long Wajtaoa. Ol brata mo sista oli save mekem moa long wok blong talemaot gud nius long kantri blong olgeta, sipos oli tekem janis blong wok wetem sam grup we oli toktok narafala lanwis. Ol Kristin papa mama, i gud yufala i yusum ol stori blong ol misinari we oli tren long skul blong Gilead, blong leftemap tingting blong ol pikinini blong yufala blong oli jusum wok blong prij fultaem olsem rod we bambae oli folem long laef blong olgeta.

20. ?Yumi mas mekem wanem blong “jusumaot laef”?

²⁰ ?Ale olsem wanem yumi wanwan i save “jusumaot laef”? Yumi mas yusum nambawan presen ya, hemia fasin blong jus, blong soem long Jeova se yumi lavem hem. Mo yumi mas gohed blong mekem bes blong yumi long wok blong hem long olgeta taem we hem i givim spesel janis ya long yumi. Olsem Moses i talem: “Sipos yufala i mekem olsem,” bambae Jeova i mekem se ‘yufala i laef, mo bambae yufala i save stap longtaem.’​—Dutronome 30:​19, 20.

[Futnot]

?Yu Yu Tingbaot?

• ?Yu yu lanem wanem long olgeta we yumi tokbaot we oli mekem defdefren jus?

• ?Wanem ol samting we yumi mas mekem blong “jusumaot laef”?

• ?Wanem tufala samting we Jeova i wantem se yumi mas mekem?

[Kwestin]

[Tok blong pija long pej 22]

“?Yufala i wantem laef, no yufala i wantem ded?”

[Tok blong pija long pej 25]

God i sevem Noa mo famle blong hem from we oli obei long Hem

[Tok blong pija long pej 26]

Mary Olson

[Tok blong pija long pej 26]

Nancy Porter