?Yu Yu Wantem Gat Ol Trufala Fren?

PANTE man oli wantem gat ol trufala fren. Taem yu tokbaot ol samting we i hapen long laef blong yu wetem wan gudfala fren blong yu, samting ya i mekem yu yu haremgud. ?Be, olsem wanem blong faenem wan trufala fren? Klosap 2,000 yia bifo finis, Jisas i soemaot se blong gat ol fren, i impoten blong gat trufala lav. Hem i tijim se: “Yufala i mas mekem i gud long ol narafala man, olsem we yufala i wantem blong olgeta oli mekem long yufala.” (Luk 6:31) Plante taem ol man oli singaot ol tok blong vas ya se Golden Rul. Ol tok ya oli soemaot se sipos yu wantem gat ol fren, yu no mas tingbaot yu wan nomo be yu mas glad blong givim samting long narafala. Hemia i min se, blong narafala i fren wetem yu, yu tu yu mas fren wetem olgeta. ?Olsem wanem blong mekem samting ya?

I nidim taem blong gat wan trufala mo gudfala fren. Yes, ol fren oli no jes ol man we yu talem halo nomo long olgeta. Defren olgeta, oli ol man we yu save talemaot ol filing blong yu long olgeta. I nidim fasin traehad blong mekem fasin fren ya i gru mo i stap strong oltaem. Fasin fren olsem i minim se yu putum ol nid blong fren blong yu fastaem long ol nid blong yu. Ol fren oli haremgud tugeta, taem wan i hapi, narawan tu i hapi, be tu, taem wan i no glad, narawan tu i harem nogud.

Yu soemaot se yu wan trufala fren taem yu mekem fren blong yu i haremgud long filing blong hem mo yu givim samting we hem i nidim. Ol Proveb 17:17 i talem se: “Fren blong yu [“wan trufala fren,” NW ], oltaem hem i stap soemaot we hem i lavem yu, mo ol brata blong yumi oli stap, blong yumi save givgivhan long yumi long taem blong trabol.” I tru se, fasin blong frengud wetem narafala i save kam strong moa i bitim fasin fren we i stap bitwin ol memba blong wan famle. Ol Proveb 18:24 i talem se: “Sam man oli save fren long yu blong smoltaem nomo, be samfala oli save mekem i gud moa long yu, i winim ol brata blong yu.” ?Yu yu laekem blong save moa olsem wanem blong gat wan trufala fren olsem? ?Yu yu laekem blong joen wetem ol man we oli soemaot lav bitwin olgeta? (Jon 13:35) Sipos yes, ol Witnes blong Jeova long komuniti blong yu oli glad blong soem long yu olsem wanem blong faenem ol trufala fren.