“Oltaem Yufala Evriwan i Stap Lavlavem Yufala Moa”

LONG 2004, i gat sam defdefren disasta i spolem Japan. Sam long olgeta ya, hemia ol strong hariken, wota i ron bigwan, mo etkwek. Ol samting ya i mekem bigfala hadtaem long plante man wetem ol Witnes blong Jeova tu. (Prija 9:11) Ol trabol olsem i givim janis long ol Witnes blong Jeova blong soemaot lav we oli gat long ol Kristin brata sista blong olgeta.​—1 Pita 1:22.

Wan eksampol: From ol bigfala ren long manis Julae, wan bigfala reva long sentrol Japan i ron bitim mak. Wota i kam antap gogo i spolem bitim 20 haos blong ol Witnes blong Jeova. Wota i ron i go insaed long wan Haos Kingdom, we wota ya i dip olsem wan meta. Kwiktaem nomo, ol Witnes long ol kongregesen raonabaot oli joen tugeta blong givhan. Plante handred man oli kam blong givhan blong klinim ol haos we oli fulap long sofmad. Bifo we tu wik i pas, oli finisim wok blong klinim mo fiksimap Haos Kingdom.

Long Oktoba 23, wan etkwek we oli makem paoa blong hem se 6.8, i spolem semfala ples ya long sentrol Japan. Bitim 40 man oli ded, mo bitim 100,000 man oli mas ronwe long haos blong olgeta. I no moa gat wota, gas blong kuk, mo lektrik. Nating se ples we etkwek ya i strong moa hem i 50 kilometa nomo longwe, be Haos Kingdom we oli jes fiksimap i stap oraet nomo. Haos Kingdom ya i kam wan ples we oli yusum smol taem blong givimaot ol samting we ol Witnes oli nidim. Kwiktaem nomo, ol Kristin elda oli go jekem ol brata mo sista, blong luk sipos oli oraet, mo oli glad blong luk se i no gat wan i kasem kil no i ded. Long nekis moning, sikis Witnes we bigfala ren i bin spolem ples blong olgeta long Julae, oli glad blong givimaot kakae mo wota long ol brata sista we etkwek i spolem ples blong olgeta. Sam aoa nomo biaen long etkwek ya, olting we oli nidim i stap finis.

Wan elda i talem se: “Olgeta we bigfala ren i spolem haos blong olgeta, oli tingbaot se wok we oli mekem blong givhan long olgeta we etkwek i spolem haos blong olgeta i wan janis blong soem tangkiu from help we ol brata oli bin givim long olgeta. Oli wokhad blong fuldei, stat long eli moning go kasem let long naet. !Mo yu luk long fes blong olgeta se oli glad we oli glad!”

Yes, bigfala ren mo etkwek i no save spolem lav we i joenem ol Kristin brata sista we oli Witnes blong Jeova. Be taem i gat ol disasta, ol Kristin oli kasem save long tok we aposol Pol i talem long ol brata sista long Tesalonaeka se: “Oltaem yufala evriwan i stap lavlavem yufala moa.”​—2 Tesalonaeka 1:3.