Ol Presen We Oli Mekem God i Glad

HEMIA i no wan gudfala stori. Kwin Atalia i wantem rul long Juda, nao hem i yusum trik mo i kilim ol pikinini blong king oli ded. Hem i ting se hem i kilim i ded finis evriwan we oli gat raet blong rul olsem king, ale hem i girap i mekem hem wan i kam kwin. Be hem i rong. Wan narafala woman, Jehoseba, we hem i dota blong King Jehoram, i laekem tumas Jeova mo Loa blong hem. Hem i no fraet, ale hem i girap i haedem wan long ol pikinini blong king, hemia bebi Joas. Jehoseba mo hasban blong hem, Hae Pris Jehoeada, tufala i haedem smol boe ya blong sikis yia, long haos we tufala i stap long hem, hemia long haos blong God.​—2 King 11:​1-3.

Taem Joas i gat seven yia blong hem, Hae Pris Jehoeada i rere blong mekem plan blong hem i wok, hemia blong tekemaot rabis kwin ya we i no gat raet blong sidaon long jea blong king. Hem i soemaot boe ya long evriwan mo i putumap hem olsem stret man blong rul long kingdom blong Juda. Ol soldia blong king oli karem Atalia i go afsaed long yad blong haos blong God mo oli kilim hem i ded. Ol man oli glad tumas from. Tru long aksen we Jehoeada mo Jehoseba tufala i mekem, tufala i givhan bigwan blong trufala wosip i stap bakegen long Juda. Be samting we i moa impoten, hemia se tufala i givhan long laen blong Deved blong i gohed blong rul gogo kasem we Mesaea i kamtru.​—2 King 11:​4-21.

Niufala king ya tu i mekem wan bigfala samting we God i glad long hem, blong givhan long haos blong God. I gat bigfala nid blong oli riperem haos blong Jeova. Tingting we i pusum Atalia se hem wan nomo i mas rul long Juda, i mekem se hem i no moa lukaotgud long haos blong God, mo antap long hemia, ol man oli stil long haos ya tu. Taswe Joas i gat strong tingting blong wokem gud haos blong Jeova bakegen. Kwiktaem nomo, hem i givim oda blong oli hivimap mane we oli nidim blong wokem bakegen haos blong Jeova. Hem i talem se: “Ol mane ya we ol man oli stap tekem i kam long haos blong Hae God blong givim i go long hem, yufala i mas putumgud blong wokem haos ya i gud bakegen. Hemia ol mane we olgeta man evriwan oli mas givim, wetem ol mane we ol man oli mas givim blong finisim ol promes blong olgeta, mo ol mane we ol man oli stap givim i go nomo long Hae God long gladhat blong olgeta. Taem yufala i stap mekem ol wok blong yufala, yufala i mas lukaot gud long ol mane olsem. Nao sipos i gat sam samting i kam nogud long haos blong Hae God, bambae yufala i mas yusum ol mane ya blong fiksimap.”​—2 King 12:​4, 5.

Ol man oli glad nomo blong givim presen mane. Be ol pris oli no tinghevi long wok ya blong riperem haos blong God. Taswe king i tekem desisen se hem wan bambae i lukluk long bisnes ya, mo hem i givim oda se evri presen mane i mas go stret long wan spesel bokis. Hem i putumap Jehoeada blong lukaot long samting ya. Baebol i talem se: “Nao hae pris i tekem wan bokis, i mekem hol long lid blong hem, nao i putum long yad blong haos blong Hae God, long saed blong Olta, long raetsaed blong hem. Nao ol pris we oli stap wok long doa blong haos ya oli stap tekem olgeta mane we ol man blong mekem wosip oli stap givim, oli putum insaed long bokis ya. Nao oltaem, taem we i gat plante mane long bokis ya, sekretari blong king wetem hae pris, tufala i stap kam kaontem ol mane ya, nao tufala i putumgud  i stap. Biaen, tufala i stap raetemdaon namba blong mane ya, nao tufala i stap go givim long ol man we oli stap lukaot long wok blong fiksimap haos ya. Nao ol man ya oli stap yusum mane ya blong pem ol man blong katem ol wud, mo ol kapenta, mo ol man blong katem ston blong haos, mo ol man blong wokem haos long ston. Mo oli stap yusum mane ya tu blong pem ol timba mo ol ston mo ol narafala samting we ol man oli stap yusum blong fiksimap haos ya.”​—2 King 12:​9-12.

Ol man oli folem oda ya wetem ful hat blong olgeta. Oli riperem haos blong Jeova nao ol man oli gohed blong mekem wosip long hem wetem respek. Yes, oli yusum gud ol presen mane we ol man oli givim. !King Joas i meksua long samting ya!

Tede, ogenaesesen blong Jeova long wol, i lukaot blong yusum gud ol presen mane blong mekem se wosip blong Jeova i gohed moa, mo ol trufala Kristin oli givim presen long sem fasin we ol man Isrel bifo oli mekem​—wetem ful hat blong olgeta. Maet yu tu yu bin givim presen mane blong mekem se wok blong Kingdom i gohed gud long seves yia we i jes pas. Bambae yumi tokbaot sam rod we oli yusum presen mane blong yu long hem.

WOKEM OL BUK

Long olgeta ples long wol, oli wokem ol buk ya mo ol vidio kaset ya blong ol man oli save stadi long olgeta mo givimaot long ol narafala:

• Ol Buk: 47,490,247

• Ol Smol Buk: 6,834,740

• Ol Buklet: 167,854,462

• Ol Kalenda: 5,405,955

• Ol Magasin: 1,179,266,348

• Ol Traket: 440,995,740

• Ol Vidio Kaset: 3,168,611

Oli mekem wok blong printim ol buk long Afrika, Not Amerika, Sentrol Amerika, Saot Amerika, Esia, Yurop, mo sam aelan long Pasifik​—i gat 19 kantri evriwan.

“Nem blong mi Katelyn May. Mi mi gat eit yia. Mi gat 2,800 vatu, mo mi wantem givim mane ya i go long yufala blong givhan blong pem mesin blong printim ol buk. Smol sista blong yufala, Katelyn.”

“Mi mo waef blong mi, mitufala i mekem wan miting wetem tufala pikinini blong mitufala, blong tokbaot ol niufala mesin blong printim ol buk. Tufala pikinini ya we tufala i gat 11 mo 9 yia, tufala i jusum blong tekem prapa mane blong tufala we tufala i stap sevem, mo givim olsem presen mane. Mifala i glad blong sanem presen mane blong tufala wetem hemia blong mitufala.”

 WOK BLONG BILDIM HAOS

Hemia namba blong ol haos we oli wokem blong sapotem wok blong ol Witnes blong Jeova:

• Ol Haos Kingdom long ol kantri we oli pua: 2,180

• Ol Haos Asembli: 15

• Ol Branj Ofis: 10

• Ol volontia we oli wok fultaem blong bildim ol Haos Kingdom mo Haos Asembli long olgeta ples long wol: 2,342

“Long wiken ya, mifala i mekem faswan miting long niufala Haos Kingdom blong mifala. Mifala i glad tumas blong gat wan stret ples blong presem Papa blong mifala, Jeova God. Mifala i talem tangkiu long Jeova mo long yufala from ol Haos Kingdom we yufala i bildim blong lukaot long nid blong mifala. Yes, Haos Kingdom blong mifala bambae i rili givhan long ol man long ples blong mifala.”​—Jili.

“Ol brata mo sista oli gat bigfala tangkiu long help we ogenaesesen blong Jeova i givim long olgeta. Kam kasem tede, mifala i stap tokbaot nambawan taem we mifala i bin gat wetem ol volontia we oli kam blong bildim Haos Kingdom blong mifala.”​—Moldova.

“I no longtaem i pas, mi mo waef blong mi mitufala i selebretem namba 35 yia blong mared blong mitufala. Mitufala i stap traem tingbaot wanem presen we mitufala i save givim long mitufala. Nao mitufala i jusum blong givimbak wan samting i go long Jeova mo ogenaesesen blong hem, from we tufala nao i givhan blong mekem se mitufala i gat wan gudfala mared. Mitufala i wantem se yufala i yusum mane we i stap wetem leta ya, blong givhan blong bildim Haos Kingdom long wan kantri we i pua.”

“I no longtaem i pas, wan famle blong mi i givim mane long mi bifo we hem i ded. I no gat plante samting we mi mi wantem, mo mi mi nidim smol samting nomo. Taswe mi wantem se yufala i yusum mane we i stap wetem leta ya, blong givhan blong bildim ol Haos Kingdom we plante kantri oli nidim tumas.”

 GIVHAN LONG TAEM BLONG DISASTA

Long ol las dei ya, plante taem disasta i kamaot we i no givim woning nating. Plante Witnes blong Jeova oli givim bigfala presen mane blong givhan long ol Kristin brata sista blong olgeta we disasta i spolem ples blong olgeta. Yumi mas tingbaot se, yumi mas joenem presen mane we yumi givim blong givhan long olgeta we oli kasem trabol from wan disasta, wetem mane we yumi givim blong sapotem wok we i stap gohed long fulwol. Hemia sam ples we ol Witnes blong Jeova oli bin givhan long olgeta we oli kasem trabol from ol disasta:

• Afrika

• Esia

• Ol aelan blong Karibin

• Ol aelan long Pasifik

“Mi mo man blong mi, mitufala i wantem talem bigfala tangkiu from ol samting we yufala i sanem blong givhan long mifala afta we hariken i spolem mifala. Mitufala i putum niufala ruf long haos blong mitufala. Mifala i rili glad we yufala i givhan kwiktaem.”

“Nem blong mi Connor, mo mi mi gat 11 yia. Taem mi luk samting we taedal wev i mekem, mi wantem givhan. Mi hop se hemia i save givhan long ol brata mo sista blong mi.”

SPESEL FULTAEM WOK

Plante Kristin oli wok fultaem long wok blong prij no long ol haos Betel. Ol presen mane i givhan long plante volontia we oli wok fultaem. Long olgeta ya, i gat:

• Ol misinari: 2,635

• Ol elda we oli goraon: 5,325

• Olgeta we oli wok long ol haos Betel: 20,092

“From we mi mi no naf yet blong wok long Betel [wan boe we i gat faef yia], mi wantem sanem presen mane ya wetem bigfala lav. Taem mi mi kam bigwan, bambae mi go long Betel blong wok strong.”

Tijim Ol Man Long Saed Blong Baebol

Jisas Kraes i talem long ol man blong hem se  oli mas ‘go long ol man long olgeta ples long wol, blong pulum olgeta oli kam man blong hem.’ (Matiu 28:19) Ol Witnes blong Jeova oli obei long tok blong hem, nao oli bisi long wok blong prij mo tijim ol man long ol tok blong Baebol long 235 kantri mo aelan. Oli printim ol buk we oli tokbaot Baebol long 413 lanwis.

Tru ya, presen we i bigwan moa we wan Kristin i save givim blong halpem ol man blong oli kasem save long God mo stamba tingting blong hem, hemia taem blong hem. Ol Witnes blong Jeova oli givim bigfala taem mo paoa blong olgeta blong givhan long ol man we oli stap raonabaot long olgeta. Mo oli glad tu blong givim presen mane. Ol defren presen ya we oli givim, i givhan long wok ya blong mekem ol man long olgeta ples long wol oli save long nem mo stamba tingting blong Jeova. Bambae Jeova i gohed blong blesem ol traehad blong olgeta blong givhan long ol narafala blong oli kasem moa save long saed blong hem. (Ol Proveb 19:17) !Jeova i glad tumas taem hem i luk ol man blong hem we oli glad blong givhan long wok ya!​—Hibrus 13:​15, 16.

[Bokis blong pija long pej 28-30]

Ol Rod We Samfala Oli Folem Blong Givim Presen Mane

BLONG SAPOTEM WOK LONG OLGETA PLES LONG WOL

Plante man oli makemaot, no mekem plan, blong hamas mane we bambae oli putum long bokis blong presen mane, we oli raetem long hem se “Presen Mane Blong Sapotem Wok Blong Prij Long Ful Wol​—Matiu 24:14.”

Evri manis, ol kongregesen oli sanem mane ya i go long ofis blong ol Witnes blong Jeova we i lukaot long wok long kantri blong olgeta. Yu yu save sanem presen mane i go long branj ofis we i lukaot long kantri blong yu. Sipos yu sanem wan jek, yu mas raetem i go long “Les Témoins de Jéhovah.” Ol gol jen, sas ston mo ol narafala sas samting yu save givim tu olsem presen. Yu mas sanem wan sotfala leta i go wetem ol presen ya blong talemaot se yu givim samting ya olsem wan presen nomo.

PRESEN MANE WE MAN I SAVE KASEMBAK SIPOS I NIDIM

Man i save givim presen mane folem wan spesel rod, mekem se sipos man ya i wantem kasembak mane ya, bambae Sosaeti i givimbak long hem. Blong kasem moa save long saed ya, plis raet i go long branj ofis we i lukaot long kantri blong yu.

PLAN WE MAN I FOLEM BLONG GIVIM PRESEN MANE

Antap long ol presen mane we man i save givim stret, mo mane we hem i save kasembak sipos i nidim, i gat sam narafala rod blong givim presen we oli save givhan long wok blong Kingdom long olgeta ples long wol. Sam long olgeta ya hemia:

Insurens: Man i save mekem se Watch Tower Sosaeti i kasem mane blong wan laef insurens, no mane blong pem yia blong hem taem i ritae long wok, no mane we sam kampani oli givim long ol olfala.

Ol Bank Kaon: Folem ol rul blong bang long ples blong wanwan man, man i save mekem we mane we bang i holem long kaon blong hem, mane we hem i putum long wan spesel kaon go kasem wan stret taem, no mane we hem i kasem taem hem i ritae, i go long han blong Watch Tower Sosaeti no i givim long olgeta taem hem i ded.

Ol Stok Mo Bon: Man i save givim stok mo bon oli go fulwan long Watch Tower Sosaeti olsem presen nomo.

Graon Mo Haos: Man i save givim graon no haos blong hem i go long Watch Tower Sosaeti, blong oli salem biaen. Sipos no, man i save folem plan se Sosaeti i kasem haos no graon ya taem hem i ded, be man ya i save gohed blong stap long haos ya long fulwan laef blong hem. Yu mas toktok wetem branj ofis we i lukaot long kantri blong yu bifo we yu givim graon no haos long Sosaeti.

Lastok Blong Man Bifo We Hem i Ded Mo Plan Blong Holem Mane i Stap Kasem Ded: Man i save givim graon no haos no mane blong hem long Watch Tower Sosaeti taem hem i raetem wan pepa folem loa, we i olsem lastok blong hem bifo we hem i ded. Sipos no, bang i save holem mane blong man ya i stap, blong i go long Watch Tower Sosaeti taem man ya i ded. Mane we bang i holem blong givhan long wan skul, maet man i no nidim blong pem takis long hem.

Ol man we oli intres long eniwan long olgeta plan ya blong givim presen, oli mas raetem leta i go long ofis blong ol Witnes blong Jeova we i lukaot long kantri blong olgeta.

[Foto Credit Line blong pija long pej 27]

Faithful video: Stalin: U.S. Army photo