Laef Stori

Mi Kasem ‘Samting We Mi Mi Wantem Tumas’

DOMINIQUE MORGOU I TALEM STORI YA

!Long Disemba 1998, mi stap long Afrika! Samting we mi bin wantem tumas taem mi yangfala, naoia i kamtru long mi. Oltaem mi glad tumas blong harem stori blong ol bigfala ples long Afrika we ol wael anamol oli stap long hem. !Mo naoia mi stap long ples ya! Long sem taem ya, wan narafala samting we mi wantem tumas i kamtru long mi. Mi mekem wok olsem fultaem paenia long wan narafala kantri. Long tingting blong plante man, oli ting se mi mi no naf blong mekem wok ya. Ae blong mi i nogud mo mi stap wokbaot long ol rod we oli sanbij nomo blong go long ol vilej blong Afrika wetem wan dog we oli trenem hem blong wokbaot long ol rod blong ol taon long Yurop. Bambae mi tokbaot olsem wanem mi save mekem wok long Afrika mo olsem wanem Jeova i givim ‘samting we mi wantem tumas.’​—Ol Sam 37:4.

MI MI bon long Jun 9, 1966, long saot blong Franis. Mi mi laswan blong seven pikinini​—tu boe mo faef gel. Papa mo mama blong mifala i kea gud long mifala. Be, i gat wan nogud samting i hapen long mi taem mi yang yet. Olsem olfala bubu woman blong mi, mama blong mi mo wan long ol sista blong mi, mi gat wan kaen sik we i mekem se sloslo mi stap kam blaen.

Taem mi yangfala, mi kasem trabol from ol man we oli flas from kala blong skin blong olgeta, from fasin blong no laekem narafala man mo fasin tu fes, mo ol fasin ya oli pusum mi blong rebel agensem ol man raonabaot long mi. Long ol hadtaem ya, mifala i muv i go long ples ya Hérault. Long Hérault, wan nambawan samting i hapen.

 Wan Sande moning, tu Witnes blong Jeova oli kam long haos blong mifala. Mama blong mi i save tufala ya mo i invaetem tufala i kam insaed long haos. Wan long tufala woman ya i askem long mama blong mi sipos mama i tingbaot yet taem ya we hem i bin talem se wan dei bambae hem i stadi Baebol. Mama i tingbaot ale i askem long tufala Witnes ya se, “?Wetaem bambae yumi stadi?” Oli agri blong joen evri Sande moning blong mekem stadi mo long rod ya, mama blong mi i stat blong lanem “ol trutok blong gud nius.”​—Galesia 2:14.

Kasem Save

Mama i traehad blong kasem save mo blong tingbaot wanem we hem i stap lanem. From we hem i blaen hem i mas rimemba evri samting. Ol Witnes oli soem longfala tingting long hem. Long saed blong mi, taem ol Witnes oli kam long haos, mi haed long rum blong mi nomo, mi no kamaot gogo kasem taem we oli aot. Be long wan aftenun, Eugénie, wan long tufala Witnes ya, i luk mi mo i toktok long mi. Hem i talem long mi se Kingdom blong God bambae i finisim olgeta fasin blong wol ya olsem fasin tu fes, fasin blong spolem narafala mo blong no laekem narafala man. Hem i talem se, “God nomo bambae i stretem ol fasin ya.” Witnes ya i askem mi sipos mi wantem stadi. Long nekis dei, mi stat blong stadi Baebol.

Evri samting we mi stap lanem, mi neva save bifo. Taem mi stadi, mi kasem save se God i letem ol nogud fasin oli stap long wol blong smoltaem nomo mo se God i gat wan gudfala risen blong mekem olsem. (Jenesis 3:15; Jon 3:16; Rom 9:17) Mi lanem tu se Jeova i givim wan hop long yumi. Hem i givim nambawan promes ya long yumi hemia blong laef olwe long wan paradaes long wol. (Ol Sam 37:29; 96:​11,12; Aesea 35:​1, 2; 45:18) Long paradaes ya, bambae mi mi save lukluk bakegen.​—Aesea 35:5.

Mekem Wok Blong Paenia

Long Disemba 12, 1985, mi soemaot se mi givim laef blong mi i go long Jeova taem mi tekem baptaes. Sista blong mi, Marie-Claire, i baptaes fastaem long mi. Mo tu, smoltaem biaen, brata blong mi Jean-Pierre mo mama blong mi, tufala tu i baptaes.

Long kongregesen we mi joen long hem, i gat plante fultaem paenia. Fasin blong olgeta blong soemaot strong tingting long saed blong minista wok mo stap haremgud oltaem i rili leftemap tingting blong mi. Marie-Claire i joen long wok blong prij fultaem nating se hem i stap safa from problem blong ae mo from leg blong hem i nogud. Kasem tede, eksampol blong hem i stap leftemap tingting blong mi long ol wok blong mi long saed blong spirit. From we mi stap joen plante wetem ol paenia insaed long kongregesen mo insaed long famle, samting ya i pusum mi blong joen long wok blong prij fultaem. Ale, long Novemba 1990, mi stat paenia long Béziers.​—Ol Sam 94:​17-19.

Dil Wetem Tingting We i Foldaon

Ol narafala paenia oli lukaotgud long mi long wok blong prij. Nating se i olsem, plante taem tingting blong mi i foldaon from we ae blong mi i nogud mekem se mi no save mekem moa wok. Be, Jeova i givhan long mi tru long ol hadtaem ya we tingting blong mi i foldaon. Mi lukluk long buk ya Watch Tower Publications Index blong traem faenem ol laef stori blong ol paenia we oli gat sem problem olsem mi, we ae blong olgeta i nogud. !Mi mi sapraes blong luk se i gat fulap paenia we oli olsem mi! Ol toktok mo ol wok blong olgeta oli tijim mi blong tinghae long wanem we mi mi naf blong mekem mo blong luksave se i gat sam samting we bambae mi no naf blong mekem.

Blong lukaot long ol nid blong mi long saed blong bodi, mi mo sam narafala Witnes, mifala i mekem wan grup blong go klinim ol stoa. Wan dei mi faenemaot we ol fren blong mi oli stap klinim bakegen ples we mi mi jes klinim. I klia se mi no bin karemaot gud ol doti. Mi go luk Valérie, hemia paenia ya we i lukaot long grup blong mifala, mo mi talem long hem se hem i mas talem stret long mi sipos mi stap mekem sam samting we i mekem i hadwok moa long ol narafala. Valérie i talem long mi wetem kaen fasin se, i stap long mi nomo sipos mi harem se mi wantem finis long wok ya. Long Maj 1994, mi finis wok.

Bakegen, mi harem olsem se mi nating nomo. Mi prea strong long Jeova mo mi save se bambae hem i harem prea blong mi. Mo tu, fasin blong stadi Baebol mo ol Kristin buk i halpem mi  bigwan. Be nating se sloslo ae blong mi i no save lukluk klia, fasin blong mi blong laekem mekem wok blong Jeova i kam strong moa. ?Bambae mi mekem wanem?

Fastaem Mi Wet Mo Biaen Mi Tekem Wan Desisen

Mi askem blong go long wan Spesel Hospital long Nîmes we i stap givhan long ol man we oli blaen mo we oli no save lukluk klia. Ale, mi stap long hospital ya blong tri manis. Taem we mi spenem long ples ya i givhan gud long mi. Long taem ya, mi kasem save se mi handikap mo mi mas lanem blong laef olsem. Long hospital ya, mi stap wetem ol man we oli safa long plante kaen sik mo samting ya i mekem mi luksave se Kristin hop blong mi long fiuja i sas tumas. Mi mi laki se mi gat wan mak blong kasem mo mi save mekem wan wok we i gud moa. Antap long hemia, mi lan blong ridim spesel raeting long Franis lanwis we blaenman i save filim wetem fingga blong hem.

Taem mi gobak long haos blong mi, ol famle blong mi oli luksave olsem wanem trening we mi kasem i bin givhan long mi. Wan samting we mi no laekem hemia waet wokingstik we mi stap holem blong wokbaot. Mi mi no laekem nating blong yusum “wokingstik” ya. I gud blong gat wan narafala samting we i save givhan long mi i bitim wan wokingstik, olsem maet wan dog.

Mi fulumap wan pepa blong askem wan dog be oli talem long mi se mi mas wet from i gat wan longfala lis blong nem blong ol man we olgeta tu oli askem ol dog. Mo tu, grup we i lukaot long saed ya i mas faenemaot sam samting fastaem. Wan dog blong lidim ol blaen man olsem, oli no stap givimaot long eni kaen man. Wan dei, wan woman we i bos long wan dipatmen blong givhan long ol blaen man i talem long mi se wan tenis klab bambae i givim wan dog blong lidim wan blaen man mo blaen man ya i mas man we i laef long eria ya we mifala i stap blong hem. Woman ya i talem se hem i bin tingbaot mi. Mi agri blong tekem dog ya from we mi luksave se hemia wan saming we i kam long Jeova. Be, mi mas wet fastaem.

 Mi Gohed Blong Tingbaot Afrika

Taem mi stap wet, mi tingbaot wan narafala samting bakegen. Olsem mi bin talem long stat blong haf ya se taem mi pikinini nomo mi bin intres tumas long Afrika. Nating se mi no moa save lukluk gud, be mi intres moa blong go long Afrika from we mi lanem se plante man long Afrika oli intres long Baebol mo wok blong Jeova. Sam taem afta, mi talemaot long Valérie se mi wantem go wokbaot long Afrika. Valérie i agri mo mitufala i raet i go long ol defdefren branj ofis blong ol Witnes blong Jeova long Afrika we oli toktok Franis.

Mitufala i kasem wan ansa we i kam long Togo. Mi mi glad tumas mo mi askem Valérie blong i ridim leta ya long mi. Leta ya i leftemap tingting blong mi mo Valérie i talem long mi se: “!Ale, sipos i olsem, yumitu go!” Afta we mi raet i gobak long ol brata long branj ofis, ol brata ya oli askem wan paenia sista, nem blong hem Sandra, blong hem i raet long mi mo mitufala i save gohed blong stap raet long mitufala. Sandra i stap long Lomé, hemia kaptel blong kantri ya. Mi mo Valérie i mekem plan blong go long Disemba 1, 1998.

!Hemia wan bigfala jenis be i gud tumas! Afta we mitufala i kasem Lomé, mitufala i kamaot long plen mo mitufala i harem hot blong Afrika we i kavremap mitufala olsem wan blangket. Sandra i kam mitim mitufala. Mifala i neva save mifala bifo be long taem ya mifala i harem olsem se mifala i fren longtaem finis. Smoltaem bifo we mifala i kasem ples ya, Sandra mo fren blong hem Christine, tufala i kam ol spesel paenia long smol taon ya Tabligbo. Ale mifala i gat janis blong joen wetem tufala long niufala wok ya we tufala i mekem. Mitufala i stap long ples ya blong tu manis mo taem mitufala i gobak long ples blong mitufala, mi save se bambae mi mi kambak bakegen.

Glad Blong Gobak

Long Franis, mi stat blong rere kwiktaem blong gobak bakegen long Togo. Mi naf blong stap sikis manis long Togo from famle blong mi i halpem mi long saed ya. Ale long Septemba 1999, mi tekem plen i go long Togo. Be long taem ya, mi wan nomo i go. !Traem tingbaot filing blong famle blong mi taem oli luk se mi go mi wan nomo, nating se mi handikap! Be i no gat risen nating blong wari. Mi talem long papa mo mama blong mi se ol fren blong mi oli olsem famle blong mi finis mo bambae oli wet long mi long Lomé.

!I gud tumas blong gobak long wan ples we plante man oli soem intres long Baebol! I narakaen blong luk ol man oli ridim Baebol long rod. Long Tabligbo, ol man oli singaot yu jes blong yufala i storian long Baebol. !Mo i wan nambawan janis we mi gat blong serem rum wetem tu spesel paenia sista! Mi lanem wan narafala fasin blong laef mo fasin blong tingbaot ol samting. Faswan samting we mi luksave hemia se ol Kristin brata sista long Afrika oli putum ol samting long saed blong spirit long fasples long laef blong olgeta. Eksampol, nating se oli mas wokbaot plante kilometa blong go long Haos Kingdom be samting ya i no blokem olgeta blong kam long ol miting. Mo tu, mi lanem plante lesen long fasin blong olgeta blong soemaot kaen fasin mo tekem ol man i kam long haos.

Wan dei, afta wok blong prij, mi talem long Sandra se mi fraet blong gobak long Franis. Ae blong mi i kam moa nogud. Mi tingbaot ol bisi rod blong Béziers we i gat tumas noes long hem,  ol bigfala haos we i gat ol step long olgeta mo plante narafala samting bakegen we i mekem laef blong wan man we ae blong hem i nogud, i had tumas. Defren olgeta, ol rod long Tabligbo, oli no fasfas tumas, oli kwaet, i no gat tumas man mo trak tu. ?Olsem wanem mi save gobak long Franis naoia we mi lan finis blong stap long Tabligbo?

Tu dei biaen, mama blong mi i ring blong talem long mi se bambae mi go long skul we i lanem ol blaen man olsem wanem blong wokbaot wetem ol dog we i lidim olgeta. Wan dog we nem blong hem Océane i rere blong kam olsem “ae” blong mi. Bakegen ol famle blong mi oli sapotem mi long ol nid mo trabol blong mi. Afta sikis manis we mi spenem long gudfala wok ya long Tabligbo, mi gobak long Franis blong mitim Océane.

Afta plante manis blong trening, Océane i naf blong lidim mi. Fastaem, i no isi nating. Mitufala i mas lanem blong kasem save long mitufala. Biaen, mi luksave se mi nidim Océane. Océane i kam wan haf blong laef blong mi. ?Wanem tingting blong ol man long Béziers taem oli luk mi mi kam long haos blong olgeta wetem wan dog? Oli soem bigfala respek mo kaen fasin long mi. Ol man raonabaot long mi oli luk Océane olsem wan “nambawan dog.” Long taem ya plante man oli wari lelebet taem oli luk mi wetem wan dog we i givhan long mi blong go toktok long olgeta. Ol man oli glad blong lesin long mi. Yes, Océane i kam nambawan rod blong statem storian wetem ol man.

Long Afrika Wetem Océane

Mi no fogetem Afrika, ale mi stat blong rere from namba tri trip blong mi i go long Afrika. Long taem ya Océane i kam wetem mi. Mo tu, wan man mo woman blong hem, Anthony mo Aurore, mo fren blong mi Caroline​—olgeta ya oli paenia, olgeta tu oli kam wetem mi. Long Septemba 10, 2000, mifala i kasem Lomé.

Fastaem, plante man oli fraet long Océane. Sam man long Lomé oli neva luk wan bigfala dog olsem from we bighaf blong ol dog long Togo oli smol dog nomo. Taem oli luk rop we oli fasem long nek blong dog ya, samfala oli ting se hem i wan rabis dog mo man i mas lukaot long hem. Be Océane i rere blong protektem mi agensem eni samting we hem i luksave se i save spolem mitufala. Nating se i olsem, Océane i haremgud long niufala ples. Taem mi putum rop long nek blong Océane, Océane i save se hem i mas mekem wok blong hem nao​—hemia blong stap long saed blong mi mo lidim mi. Taem mi tekemaot rop long hem, hem i pleplei mo samtaem hem i stonghed tumas. Plante taem mitufala i pleplei tugeta.

Sandra mo Christine, tufala i askem long mifala mo Océane blong go stap wetem tufala. Blong mekem se ol brata mo sista oli lan long Océane, mi askem olgeta blong oli kam visitim mitufala mo mi eksplenem long olgeta wanem nao wok blong wan dog olsem Océane. Mi eksplenem long olgeta, from wanem mi mi nidim wan dog olsem mo wanem fasin ol brata mo sista ya oli mas gat taem oli stap klosap long Océane. Ol elda oli agri se Océane i mas kam wetem mi long Haos Kingdom. Be from we i neva gat wan samting olsem i hapen long kongregesen blong Togo taswe i gat wan tok i kamaot long kongregesen we i eksplenem long saed blong mi mo Océane. Long saed blong wok blong prij, Océane i kam wetem mi nomo taem mi mekem ol visit mo ol Baebol stadi​—hemia ol taem we ol man oli kasem save moa from wanem Océane i stap wetem mi.

Wok blong prij long niufala teritori ya i mekem mi mi haremgud. Oltaem mi harem mi glad from fasin blong ol man long ples ya blong tingbaot mi mo oli gat strong tingting blong soemaot fasin ya taem oli tekem wan jea i kam long mi blong mi save sidaon long hem. Long Oktoba 2001, mama blong mi i folem mi long namba fo trip blong mi i go long Togo. Afta tri wik we mama i stap long Togo, hem i gobak long Franis mo hem i talem se mi mi stap gud mo mi hapi.

Mi tangkiu tumas long Jeova from we mi save mekem wok blong hem long Togo. Mi sua se Jeova bambae i gohed blong givim long mi ‘samting we mi wantem tumas’ taem mi gohed blong yusum ol samting we mi gat blong mekem wok blong hem. *

[Futnot]

[Tok blong pija long pej 10]

Oltaem mi glad tumas blong harem stori blong ol bigfala ples long Afrika we ol wael anamol oli stap long hem

[Tok blong pija long pej 10]

Océane i folem mi taem mi mekem ol visit

[Tok blong pija long pej 11]

Ol elda oli agri blong mi mas tekem Océane i kam wetem mi long ol miting