Laef Stori

Wan Gudfala Laef Nating Se Mi Kasem Sam Hadtaem

AUDREY HYDE I TALEM STORI YA

Taem mi luklukbak long ol 63 yia we mi bin wok fultaem blong Jeova​—wetem 59 yia long hedkwota blong ol Witnes blong Jeova—​mi save talem we mi haremgud long laef blong mi. I tru, mi fesem sam hadtaem we i mekem mi mi harem nogud, taem mi luk faswan hasban blong mi i ded long wan kansa, mo seken hasban blong mi i safa from nogud sik ya blong Alzheimer. Be plis, ridim haf ya blong luk olsem wanem mi holem glad blong mi, nomata long ol trabol ya.

TAEM mi mi wan pikinini yet, mi laef long wan fam klosap long smol taon ya Haxtun, long flatples long not is blong Colorado, klosap long boda blong Nebraska. Mi mi namba faef long ol sikis pikinini blong Orille mo Nina Mock. Fofala brata sista blong mi, hemia Russell, Wayne, Clara, mo Ardis, oli bon bitwin ol yia 1913 mo 1920. Mi mi bon long 1921, mo Curtis i bon long 1925.

Long 1913, Mama i kam wan Baebol Studen, hemia nem blong ol Witnes blong Jeova long taem ya. Biaen, mifala evriwan long famle i kam Baebol Studen tu.

Wan Bisi Laef Long Ol Flatples

Papa i laekem ol niufala samting. Mifala i gat lektrik long evri bilding long fam blong mifala, wan samting we smol man nomo oli gat long taem ya. Mifala i glad blong karem ol gudfala frut we i kamaot long wok blong mifala long fam ya​—mifala i gat ol eg long ol faol blong mifala, mifala i gat melek, krim, mo bata long ol kao blong mifala. Mifala i yusum ol hos blong wokem graon, mo mifala i planem ol frut olsem stroberi mo ol ligim olsem poteto, wetem wit mo kon tu.

Papa i ting se mifala ol pikinini, mifala evriwan i mas lanem blong wokgud. Bifo mi statem skul,  hem i trenem mi finis blong wok long garen. Mi rimemba se long hot taem, mi stap wok aninit long hot san mo mi stap planem ol sid long garen blong mifala. Mi askem long mi wan se: ‘?Wetaem bambae mi finisim wok ya?’ Mi swet we mi swet, mo ol sugabag oli stikim mi. Samtaem, mi sore long mi wan from we mi luk we ol narafala yangfala oli no stap wokhad olsem mifala. Be taem mi tingtingbak long taem ya, mi glad we mifala i lanem blong wokhad.

Evriwan long mifala ol pikinini, mifala i gat wan wok blong mekem. Ardis i gat gudhan moa blong melekem ol kao i bitim mi, taswe mi mi klinim ol ples blong ol hos, mi savelem ol sitsit blong olgeta. Be mifala i gat gudfala taem mo mifala i pleplei tu. Mi wetem Ardis, mitufala i plei sofbol (wan kaen kriket) long wan tim long ples blong mifala. Mi sakem bol, no mi plei long namba tri ples, mo Ardis i plei long faswan ples.

Klia skae long naet i naes tumas long ol flatples. Ol taosen sta oli pulum mi blong tingbaot God we i Wokem yumi, Jeova. Nating se mi smol yet, be mi tingbaot ol tok long Ol Sam 147:4 we i talem se: “Hem [Jeova] i makem namba blong ol sta, mo i putum nem blong olgeta wanwan.” Plante taem, long ol klia naet ya, dog blong mifala (nem blong hem Judge), i kam putum hed blong hem long leg blong mi mo i stap wetem mi. Plante taem long ol aftenun, mi sidaon long vranda blong haos blong mifala, mo mi stap lukluk plantesen blong wit. Taem san i godaon mo win i stap blu long wit ya, hem i luk olsem silva.

Gudfala Eksampol Blong Mama

Mama blong mi i onagud long God. Oltaem, Papa i stap lukaot long ol wok long haos, mo mama i tijim mifala blong soem respek long papa. Long 1939, Papa tu i kam wan Witnes blong Jeova. Mifala i save we Papa i lavem mifala, nating se hem i mekem mifala i wokhad, mo i no givim plante tumas samting long mifala. Plante taem long kolkol taem, hem i tekem mifala i go wokbaot long sno long wan smol kat we hos i pulum. !Mifala i glad tumas blong lukluk sno we i saen!

Mama i tijim mifala blong lavem God mo soem respek long Baebol. Mifala i lanem se God i gat wan nem, we nem ya hem i Jeova, mo hem i Stamba blong laef. (Ol Sam 36:9; 83:​18, NW ) Mifala i lanem tu se God i givim sam rul we mifala i mas folem. Ol rul ya oli no blokem mifala long ol gudfala samting. Oli blong mekem mifala i haremgud. (Aesea 48:17) Oltaem Mama i talem long mifala se mifala i gat wan spesel wok blong mekem. Mifala i lanem se Jisas i talem long ol disaepol blong hem se: “Nao bambae ol man oli stap talemaot gud nius ya, se God i King blong olgeta man. Bambae oli talemaot long olgeta ples long wol, blong oli witnes blong hem long fes blong olgeta man. Nao biaen, bambae Lasdei i save kam.”​—Matiu 24:14.

Taem mi smol yet, sipos mi kamhom afta skul be mama i no stap long haos, mi go lukaotem  hem. Wan dei, taem mi gat sikis no seven yia blong mi, mi faenem mama i stap long haos we mifala i hivimap drae gras long hem. Biaen bigbigfala ren i stat foldaon. Mitufala i stap long seken stori blong haos ya, mo mi askem mama sipos God i mekem Bigfala Wota i foldaon bakegen. Hem i talem long mi se God i promes finis we bambae hem i neva spolem wol bakegen wetem bigfala ren. Mi rimemba tu se plante taem, mifala i mas ron i go blong haed insaed long wan rum we i stap aninit long graon, taem wan bigfala strong win i kasem mifala.

Mama i joen long wok blong prij longtaem finis bifo mi bon. Wan grup blong pablisa i joen long haos blong mifala, mo evriwan long grup ya i gat hop blong laef wetem Kraes long heven. Mama i faenem i had blong prij long ol haos wanwan, be nating se i olsem, lav we Mama i gat long God i winim fraet we hem i gat long ol man. Mama i holem bilif blong hem go kasem en blong laef blong hem, long Novemba 24, 1969. Long taem ya, mama i gat 84 yia blong hem. Long dei ya mi toktok smosmol long sora blong mama, mi talem se: “Mama, naoia bambae yu go long heven mo yu joen wetem ol man we yu save finis.” !Mi glad tumas we long taem ya mi stap wetem Mama, mo mi gat janis blong talem long hem se mi mi bilif strong tu long hop ya! Mama i ansa long mi wetem wan smol voes se, “Yu kaen tumas long mi.”

Mifala i Stat Prij

Long 1939, Russell i kam wan paenia, hemia nem we ol Witnes blong Jeova oli givim long ol pablisa we oli prij fultaem. Hem i paenia long Oklahoma mo long Nebraska go kasem yia 1944, taem oli singaotem hem blong wok long hedkwota blong ol Witnes blong Jeova (we oli kolem Betel), long Brooklyn, New York. Mi stat paenia long Septemba 20, 1941, mo mi prij long plante defren ples long Colorado, Kansas, mo Nebraska. Mi haremgud tumas long ol yia ya we mi stap paenia, from we mi gat janis blong halpem ol man blong oli save Jeova, mo tu mi lanem blong trastem Hem.

Samwe long taem we Russell i stat paenia, Wayne i stap long haeskul long is kos blong Yunaeted Stet, afta we hem i bin wok smoltaem. Biaen, oli singaot hem blong wok long Betel. Hem i wok sam taem long Kingdom Fam, klosap long Ithaca, New York. Long fam ya oli planem ol frut mo ol ligim, blong ol brata sista we oli wok long fam wetem ol 200 brata sista we oli wok long Betel blong Brooklyn. Wayne i gat gudhan mo plante ekspiriens long wok ya, mo hem i wok blong Jeova go kasem en blong laef blong hem, long 1988.

Ardis, sista blong mi, i maredem James Kern, mo tufala i gat faef pikinini. Ardis i ded long 1997. Clara, narafala sista blong mi, i stap tru long Jeova kam kasem tede, mo taem mi spel mi go stap wetem hem long Colorado. Curtis, yangfala brata blong mifala, i kam wok long Betel long Brooklyn long medel blong ol yia 1940. Hem i draevem wan trak, i gokam long Kingdom Fam, blong karem kakae mo plante narafala samting. Hem i neva mared, mo i ded long 1971.

Mi Wantem Wok Long Betel

Ol bigfala brata blong mi oli wok finis long Betel, mo mi tu mi wantem wok long Betel. Mi sua we gudfala eksampol blong olgeta nao i pulum ol brata long Betel blong singaot mi blong mi wok long Betel tu. Taem mi lesin long mama blong  mi i tokbaot histri blong ogenaesesen blong God, mo taem mi luk we ol profet tok blong Baebol long saed blong ol lasdei oli kamtru, samting ya i pulum mi blong wantem wok long Betel. Mi prea long Jeova mo mi mekem wan strong promes long hem se, sipos hem i letem mi mi wok long Betel, bambae mi neva lego wok ya, sipos i no gat wan narafala Kristin wok we mi mas mekem afsaed.

Mi kam long Betel long Jun 20, 1945, mo mi wok olsem haosgel. Mi mas klinim 13 rum mo mi mas mekem 26 bed evri dei, mo tu mi mas klinim ol korido, ol stea, mo ol windo. Mi wokhad blong mekem samting ya. Evri dei taem mi wok, mi stap talem long mi wan se, ‘!I tru mi taed, be mi wok long Betel, long haos blong God!’

Mi Maredem Nathan Knorr

Stat long ol yia 1920, ol man we oli wok long Betel mo oli wantem mared oli mas aot long Betel, nao oli save joen long sam narafala wok blong Kingdom. Be long stat blong ol yia 1950, sam brata sista we oli bin wok long Betel blong plante yia finis, oli save mared tugeta mo stap wok long Betel. Taswe, taem Nathan H. Knorr, we long taem ya hem i lukaot long wok blong prij long fulwol, i intres long mi, mi ting se, ‘!Mi sua we man ya bambae i stap long Betel!’

Nathan i bisigud from we hem i lukaot long wok blong prij blong ol Witnes blong Jeova long fulwol. Taswe taem hem i askem mi sipos mi wantem maredem hem, hem i tok tru long mi mo i tokbaot plante samting we mi mas tingting gud long olgeta fastaem, bifo we mi tekem wan disisen. Long taem ya, hem i stap go long plante branj ofis blong ol Witnes blong Jeova raon long wol, mo plante taem hem i mas stap longwe blong plante wik. Taswe hem i eksplenem long mi se sipos mi agri blong mared wetem hem, mi mas rere blong stap mi wan nomo plante taem.

Taem mi mi wan yangfala gel, mi drim se bambae mi mared long taem we ol tri oli putum flaoa, mo se jes afta long mared, mi wetem man blong mi bambae mitufala i go spel long Hawai. Be, defren lelebet, mitufala i mared long kolkol taem, long Jenuware 31, 1953, mo jes afta long mared, mitufala i stap long New Jersey long Sarede aftenun mo long Sande. Nao long Mande, mitufala i gobak long wok. Nating se i olsem, wan wik biaen mitufala i go spel tugeta blong wan wik.

Wan Hasban We i Wokhad

Nathan i gat 18 yia taem hem i kam long Betel long 1923. Hem i gat wan nambawan trening wetem ol olfala olsem Joseph F. Rutherford, we i lukaot long wok blong ol Witnes blong Jeova, mo wetem Robert J. Martin, we i lukaot long wok blong prentem buk. Taem Brata Martin i ded long Septemba 1932, Nathan i lukaot long wok blong prentem buk. Long 1933, Brata Rutherford i tekem Nathan wetem hem blong tufala i go visitim ol branj ofis blong ol Witnes blong Jeova long Yurop. Long Jenuware 1942, taem Brata Rutherford i ded, oli putumap Nathan blong hem i lukaot long wok blong prij blong ol Witnes blong Jeova long fulwol.

 Nathan i laekem wok wetem ol niufala samting, mo oltaem, hem i luk i go long fiuja mo i plan blong mekem sam moa wok. Sam brata oli ting se fasin ya i no stret, from we long taem ya ol brata oli ting se en blong wol i klosap nomo. Wan dei, wan brata we i luk ol plan blong Nathan long saed blong wok blong prentem buk, i askem long hem se: “?Wanem ya Brata Knorr? ? Yu yu no gat bilif?” Nathan i ansa se: “Si, mi mi gat bilif, be sipos en i no kam kwik olsem yumi wantem, yumi mas rere blong wok.”

I gat wan samting we Nathan i wantem tumas blong mekem: hem i wantem stanemap wan skul blong ol misinari. Taswe, long Februari 1, 1943, oli statem wan misinari skul long Kingdom Fam. Long taem ya, brata blong mi, Wayne, i stap wok long fam ya. Blong samwe faef manis, ol studen oli mas stadi dip long Baebol, be nating se i olsem, Nathan i meksua se oli save spel tu samtaem. Long ol faswan skul, Nathan i plei sofbol wetem ol studen. Be biaen hem i stop from we hem i no wantem karekil, we i save blokem hem blong go long ol distrik asembli long hot taem. Hem i stap olsem rafri nomo blong olgeta. Ol studen oli glad tumas taem Nathan i jenisim ol rul blong gem blong letem ol studen blong ol narafala kantri oli win.

Ol Trip Wetem Nathan

Biaen mi stat mekem ol trip wetem Nathan i go long ol narafala kantri. Mi glad blong joen wetem ol volontia we oli wok long ol branj ofis mo wetem ol misinari. Mi luk wetem prapa ae blong mi olsem wanem ol volontia ya oli lavem God mo oli ona long Hem, mo mi lanem plante samting long saed blong laef blong olgeta long ol kantri we oli stap prij long hem. Biaen, blong plante yia, ol volontia ya oli bin raetem ol leta long mitufala blong talem tangkiu from ol visit ya.

Taem mi luklukbak long ol trip ya, mi rimemba sam ekspiriens. Eksampol, taem mitufala i go long Polan, tu sista i stap toktok smosmol tugeta, be mi mi stap wetem tufala. Mi askem long tufala se: “?From wanem yutufala i stap toktok smosmol?” Oli talem sore, mo oli eksplenem long mi se taem gavman i putum tabu long wok blong ol Witnes blong Jeova long Polan, oli haedem ol maekrofon long haos blong ol Witnes blong lesin long ol toktok blong olgeta. Taswe, stat long taem ya, ol brata sista oli gat fasin ya blong toktok smosmol.

Sista Adach i stap prij long Polan taem gavman i putum tabu long wok blong ol Witnes longwe. Oltaem, hem i putum hea blong hem long fored blong fes blong hem. Wan dei, hem i leftemap ol hea blong hem, nao mi luk wan bigfala kil long fes blong hem. Hem i talem long mi se wan man we i agensem strong ol Witnes i bin kilim hem. Mi sek blong luk wetem prapa ae blong mi ol rabis samting we sam man oli bin mekem long ol brata sista blong yumi.

Afta long Betel, Hawai hem i seken ples we mi laekem moa. Mi rimemba wan asembli we mifala i holem long ples ya long taon blong Hilo long 1957. Hem i wan bigfala samting, mo i gat plante moa man i kam long asembli i bitim namba blong ol Witnes blong ples ya. Mea blong taon i mekem wan spesel welkam long Nathan long taem ya, olsem i mekem long ol impoten man. Plante man oli kam welkamem mifala wetem ol nekles we oli wokem long flaoa.

Mifala i holem wan narafala nambawan asembli long Nuremberg, Jemani, long 1955, stret long ples we Hitler i yusum bifo blong mekem ol bigfala maj blong ami blong hem. Ol man oli savegud we Hitler i wantem finisim ol man blong Jeova long Jemani. !Be naoia oli luk we bigfala ples ya i fulap long ol Witnes blong Jeova! Mi no save holembak wota blong ae blong mi, nao mi krae. I gat wan bigfala platfom, mo i gat 144 pos oli stanap long wan stret laen biaen long platfom ya. Mi stap antap long platfom ya, mo mi save luk bigfala hip blong ol man we oli kam long asembli ya, namba blong olgeta i bitim 107,000 man. Laswan laen blong olgeta i stap longwe tumas long mi, taswe mi no save lukluk fes blong olgeta.

Mifala i harem save se ol brata blong Jemani oli  man we oli holem strong long Jeova, mo mifala i filim paoa we Jeova i givim long olgeta taem oli fesem ol hadtaem aninit long rul blong ol Nasi. Nambawan eksampol blong olgeta i pulum mifala blong kam strong moa long disisen blong mifala blong stap tru mo holemstrong long Jeova. Nathan i givim laswan tok blong asembli, mo long en blong tok ya, hem i sakem han blong hem blong talem tata long ol brata sista we oli stap long ples ya. Wantaem nomo ol brata sista oli wevem ol angkejif blong olgeta blong talem tata long mifala. Oli luk olsem wan naesfala garen blong ol flaoa.

Wan narafala taem we bambae mi no save fogetem, hemia taem mifala i go long Potugal long Disemba 1974. Mifala i stap long faswan miting we ol Witnes blong Jeova oli holem long Lisbon, afta we gavman i karemaot tabu long wok blong mifala. !Oli bin putum tabu long wok blong ol Witnes blong 50 yia! Long taem ya, i gat 14,000 man nomo we i talemaot Kingdom long kantri ya, be nating se i olsem, i gat bitim 46,000 man i stap long tufala miting ya. Mi krae taem ol brata oli talem se: “Mifala i no moa nid blong haed. Naoia mifala i fri.”

Stat long taem ya we mi mekem ol trip wetem Nathan kam kasem tede, mi laekem blong tekem janis blong prij long ol plen, no long ol restoron, mo mi laekem blong prij long rod. Oltaem mi tekem sam buk wetem mi, olsemia mi rere blong prij. Wan dei we mifala i stap wet long wan plen we i let, wan woman i askem long mi se mi mekem wanem wok. Ale, mi tekem janis blong storian wetem woman ya mo sam narafala man we oli stap lesin. Wok long Betel mo wok blong prij i mekem mi mi bisi oltaem, mo i givim glad long mi.

Sik Blong Nathan Mo Lastok Blong Hem We i Leftemap Tingting Blong Mi

Long 1976, Nathan i kasem wan kansa, nao mi wetem ol memba blong Betel, mifala i halpem hem blong fesem sik ya. Nating se helt blong hem i stap godaon moa, be taem sam memba blong ol defdefren branj ofis oli kam long Brooklyn blong kasem wan trening, mitufala i stap singaotem olgeta oli kam long rum blong mitufala. Mi rimemba plante man we oli kam luk mitufala, olsem Don mo Earlene Steele, Lloyd mo Melba Barry, Douglas mo Mary Guest, Martin mo Gertrud Poetzinger, Pryce Hughes, mo plante narafala bakegen. Plante taem, oli tokbaot sam ekspiriens blong ol kantri blong olgeta. Mi laekem tumas ol ekspiriens blong ol brata we oli stanap strong, long ol kantri we gavman i bin putum tabu long wok blong ol Witnes.

Taem Nathan i luksave se klosap bambae hem i ded, hem i givim sam gudfala advaes long mi long saed blong laef blong mi taem mi kam wan wido. Hem i talem se: “Yumitu haremgud long mared blong yumitu. Smol man nomo i gat janis blong gat wan mared olsem.” Wan samting we i mekem se mitufala i glad long mared blong mitufala, hemia se Nathan i tingbaot mi. Eksampol, taem mitufala i mitim plante defren man long ol trip blong mitufala, Nathan i talem long mi se: “Audrey, sipos samtaem mi no talem yu long ol brata sista, i min se mi fogetem nem blong olgeta.” Mi glad tumas we hem i talem samting ya long mi fastaem.

Nathan i talem long mi se: “Nating se yumi ded, be yumi gat strong bilif se bambae yumi laef bakegen, mo yumi neva safa bakegen.” Biaen hem i leftemap tingting blong mi se: “Yu mas lukluk i go long fiuja, from we bambae yu kasem pei blong yu long fiuja. Yu no mas stap tingbaot ol samting blong bifo​—nating se bambae memori blong yu i stap yet. Taem we i pas bambae i halpem yu blong haremgud bakegen. Yu no mas kros no harem sore long yu wan. Yu mas glad long ol gudfala taem mo ol blesing we yu bin kasem. Smol taem i mas pas, nao bambae yu glad blong rimemba ol samting blong bifo. Memori i wan presen we God i givim long yumi.” Hem i ademap se: “Stap bisi oltaem​—traem yusum laef blong yu blong givhan long ol narafala. Olsemia bambae yu haremgud long laef blong yu.” Nathan i finisim wok blong hem long wol ya long Jun 8, 1977.

Mi Maredem Glenn Hyde

Nathan i talem long mi se i gat tu fasin blong laef we mi save jusum. Faswan, mi save laef wetem tingting we i stap yet long laef blong bifo, no  seken wan, mi save statem wan niufala laef. Taswe long 1978, afta we mi muv i go long Wajtaoa Fam long Walkill, New York, mi maredem Glenn Hyde, wan naesfala kwaet man. Bifo we Glenn i kam wan Witnes, hem i wok long ol sip blong faet blong Yunaeted Stet, taem oli stap faet agensem Japan.

Glenn i bin wok long sip ya PT (patrol torpedo) mo hem i stap wok long rum blong ol enjin. Mo from we enjin ya i mekem tumas noes, sora blong Glenn i fas lelebet. Afta long wo, hem i kam wan faeaman. Blong plante yia, hem i mekem ol nogud drim long naet from we hem i stap tingbaot ol rabis samting we hem i bin luk long taem blong wo. Hem i lanem ol trutok blong Baebol taem sekretari blong hem i tekem janis blong prij long hem.

Biaen, long 1968, oli singaot Glenn i kam wok long Betel olsem faeaman. Afta, taem Wajtaoa Fam i gat wan trak blong faea, oli sanem hem i go wok long Fam ya long 1975. Biaen, Glenn i safa from nogud sik ya Alzheimer. Mi bin mared wetem Glenn blong ten yia taem hem i ded.

?Olsem wanem long mi olsem wan wido? Ol waes tok we Nathan i givim long mi bifo we hem i ded oli leftemap tingting blong mi bakegen. Mi stap ridim bakegen mo bakegen ol samting we hem i bin raetem long mi, blong mi save laef olsem wan wido. Kam kasem tede, mi stap ridim yet ol gudfala advaes ya wetem sam narafala wido, mo olgeta tu oli haremgud taem oli harem ol advaes blong Nathan. Yes, i gud tumas blong lukluk i go long fiuja, olsem Nathan i talem.

Nambawan Help Blong Ol Brata Sista

Wan samting we i mekem mi mi haremgud long laef blong mi, hemia ol gudfala fren blong mi long Betel. Wan spesel fren blong mi, nem blong hem Esther Lopez, i kasem setifiket blong hem long 1944, long namba tri skul blong Wajtaoa Baebol Skul blong Gilead. Hem i kambak long Brooklyn long Februari 1950 blong tanem sam buk i go long lanwis Spen. Plante taem, taem Nathan i mekem ol trip blong hem, Esther i stap wetem mi olsem wan gudfala fren. Hem i laef long Wajtaoa Fam tu. Naoia Esther i gat bitim 90 yia blong hem, helt blong hem i stap kam nogud mo ol brata sista oli lukaotgud long hem long smol hospital blong mifala.

Long famle blong mi, i gat Russell mo Clara nomo we i stap laef yet. Russell i gat bitim 90 yia mo i stap wok long Betel. Hem i wan long ol faswan brata we i gat janis blong stap long Betel afta we hem i mared. Long 1952, hem i maredem wan sista we i wok long Betel tu, nem blong hem Jean Larson. Brata blong Jean, nem blong hem Max, i kam long Betel long 1939, mo long 1942 hem i tekem ples blong Nathan olsem brata we i lukaot long wok blong prentem ol buk. Max i stap mekem plante wok yet long Betel, mo hem i kea long gudfala waef blong hem, Helen, we i gat sik ya multiple sclerosis.

Taem mi luklukbak long ol 63 yia we mi bin wok fultaem blong Jeova, mi save talem we mi gat wan nambawan laef. Betel i kam olsem hom blong mi, mo mi haremgud yet long wok blong mi long ples ya. Mi presem papa mama blong mifala we oli tijim mifala olsem wanem blong wokgud, mo oli pulum mifala blong wantem mekem wok blong Jeova. Be samting we i rili mekem mi mi haremgud long laef blong mi, hemia ol gudfala brata sista, mo hop ya we mi gat blong laef blong olwe wetem olgeta long paradaes long wol. Long ples ya, bambae yumi wok blong Bigman we i Wokem yumi, trufala God ya, Jeova, blong olwe.

[Tok blong pija long pej 24]

Papa mama blong mi taem tufala i mared long Jun 1912

[Tok blong pija long pej 24]

Stat long lefsaed i go long raetsaed: Russell, Wayne, Clara, Ardis, mi, mo Curtis long 1927

[Tok blong pija long pej 25]

Mi stanap bitwin Frances mo Barbara McNaught, taem mifala i paenia long 1944

[Tok blong pija long pej 25]

Long Betel long 1951. Stat long lefsaed i go long raetsaed: Mi, Esther Lopez, mo waef blong brata blong mi, Jean

[Tok blong pija long pej 26]

Wetem Nathan mo papa mama blong hem

[Tok blong pija long pej 26]

Wetem Nathan long 1955

[Tok blong pija long pej 27]

Wetem Nathan long Hawaii

[Tok blong pija long pej 29]

Wetem seken hasban blong mi, Glenn