“Fasin Blong Wol Ya i Stap Jenis”

“Ol brata mo sista. Hemia mining blong tok blong mi. Naoia, yumi no gat plante taem i stap.”—1 KORIN 7:29.

1, 2. ?Wanem sam jenis we yu yu luk long laef blong yu?

 ?LONG laef blong yu, wanem sam jenis we yu yu luk long wol ya? ?Yu save talem sam long olgeta? Eksampol, save blong ol man i kam antap long saed blong meresin. !From we oli faenem plante moa meresin blong kilim ol sik, oli mekem we long sam kantri tede ol man oli save laef bitim 70 yia, i no olsem long stat blong ol yia 1900 we ol man oli no bitim 50 yia blong olgeta! Mo tu, tingbaot olsem wanem radio, televisin, mobael fon, mo faks mesin oli givhan bigwan long man tede, taem oli yusum olgeta long stret fasin. Mo yumi no mas fogetem tu, se man i kam antap moa long saed blong edukesen, transpot, mo oli stanemap plante moa loa we i givhan long man blong kasem samting we oli gat raet blong kasem. Olgeta samting ya oli mekem laef blong plante milian man i kam moagud.

² Be i tru se i gat sam jenis tu we oli no mekem laef blong man i kamgud. Yumi luk klia nomo wanem nogud frut i stap kamaot from fasin blong brekem loa we i kam antap, from ol man we oli lego klin mo gud fasin, from fasin blong yusum drag we i kam antap, namba blong ol divos we i kam antap, praes blong ol samting we i stap kam antap, mo wok blong ol teroris we oli gohed blong mekem man i fraet. Yes, ating bambae yumi agri wetem ol tok ya we aposol Pol i raetem longtaem bifo se: “Fasin blong wol ya i stap jenis.”​—1 Korin 7:​31, NW.

3. ?Pol i minim wanem taem hem i raetem se “fasin blong wol ya i stap jenis”?

³ Taem Pol i talem tok ya, hem i yusum wan wod we i blong talem se wol hem i olsem wan stej we man i stanap long hem blong mekem wan plei no konset. Olgeta we oli stanap long stej ya hemia​—ol man blong politik, ol lida blong skul, mo ol narafala bigman blong wol—​we oli kam stanap, oli mekem plei blong olgeta, nao biaen oli aot mo narafala man i kam. Samting ya i gohed blong plante handred yia  finis. Bifo, wan rula wetem ol pikinini we oli kamaot biaen long hem maet oli rulum wan kantri blong plante yia​—samtaem rul blong olgeta i save gohed blong plante handred yia—​mo ol jenis oli no kamaot hareap. Be tede ol samting oli defren olgeta. !Ol samting oli save jenis naoia nomo sipos wan man i sutum wan bigman no lida blong wol i ded! Yes, yumi laef long taem we ol samting oli muvmuf plante, yumi no save samting we bambae i save hapen tumora.

4. (a) ?Wanem tingting we ol Kristin oli mas gat long saed blong ol samting we oli hapen long wol? (b) ?Naoia bambae yumi tokbaot wanem tufala pruf we i soem se en i klosap?

⁴ Sipos wol ya i olsem wan stej mo ol lida blong wol oli ol man we oli mekem plei long stej ya, i min se ol Kristin nao oli stap wajem plei ya. * Be, from we ol Kristin oli “no man blong wol ya,” oli no wari bitim mak long ol samting we i stap hapen long plei ya no hu man we i stap plei. (Jon 17:16) Oli intres moa blong luksave ol samting insaed long plei ya we i soemaot se en blong plei ya i klosap​—tru ya, en ya hem i wan samting we bambae i nogud olgeta. Be, ol Kristin oli save se wol ya i mas lus bifo we Jeova i wokem wan niufala wol we stret fasin i stap long hem. * Taswe i gud we naoia yumi lukluk tu pruf we oli soemaot se yumi stap long taem blong en mo se niufala wol i klosap. Tufala pruf ya hemia (1) ol taem mo yia we Baebol i tokbaot, mo (2) ol samting long wol ya we i stap kam nogud olgeta.​—Matiu 24:21; 2 Pita 3:13.

!Wan Tok Haed We Yumi Kasem Save Long Hem!

5. ?Wanem ya “taem blong ol hiten man,” mo from wanem yumi intres long samting ya?

⁵ Fasin blong stadi long ol taem mo yia i givhan long man blong faenemaot wetaem stret ol samting oli bin hapen. Jisas i tokbaot wan longfala taem we ol lida blong wol bambae oli stap rul long hem mo Kingdom blong God i no blokem olgeta blong rul, hemia i olsem we oli kam stanap long stej blong mekem plei blong olgeta. Jisas i kolem taem ya, se ‘taem we ol hiten man oli rul.’ (Luk 21:​24, Nyutesteman wetem Ol Sam long Bislama) Long en blong ‘taem ya blong ol hiten man,’ Kingdom blong God long heven bambae i stanap, we Jisas nao i rul long hem. Fastaem, Jisas bambae i rul “long medel blong ol enemi [blong hem].”(Ol Sam 110:​2, NW ) Ale, biaen, olsem Daniel 2:44 i talem, Kingdom ya bambae i “flatemgud” olgeta gavman blong man, mo hem nomo bambae i stanap gogo i no save finis.

6. ?“Taem blong ol hiten man” i stat long wanem yia, longfala blong hem i kasem hamas yia, mo hem i finis wetaem?

⁶ ?Wetaem nao “taem blong ol hiten man” bambae i finis mo Kingdom blong God bambae i stat rul? Ansa i stap insaed long ol taem mo yia we Baebol i givim, mo ansa ya i stap ‘haed mo i lok, kam kasem taem blong en.’ (Daniel 12:​9, NW ) Klosap long “taem” ya blong en, Jeova i wokem rod blong soemaot ansa ya long wan grup blong ol Baebol studen we oli gat tingting daon. Wetem help blong spirit blong God, olgeta ya oli luksave se “taem blong ol hiten man” i stat taem oli spolem Jerusalem long yia 607 B.K.T. * mo oli faenemaot se “taem” ya i longfala olsem 2,520 yia. Wetem save ya nao oli kaontem se “taem blong ol hiten man,” i finis long 1914. Mo tu oli luksave se 1914 hem i stat blong ol las dei, bifo we wol ya i lus. ?Sipos yu yu wan we i stadi Baebol, yu save eksplenem wetem Baebol olsem wanem yumi faenem yia ya 1914? *

7. ?Wanem ol vas blong Baebol we oli halpem yumi blong faenemaot we seven yia blong buk blong Daniel i stat wetaem, i longfala olsem wanem, mo i finis wetaem?

⁷ Buk blong Daniel i givim sam save long saed ya. Jeova i yusum King Nebukadnesa blong Babilon, blong spolem Jerusalem long 607 B.K.T., we hemia i stat blong “taem blong ol hiten man.” Taswe, Jeova i soemaot tru long king ya se bambae Hem i letem ol nesen oli rulum wol gogo kasem seven yia i pas. Seven yia ya hem i wan pijatok. (Esikel 21:​26, 27; Daniel 4:​16, 23-25) ?Ol seven yia ya oli longfala olsem wanem? Folem tok blong Revelesen 11:​2, 3 mo 12:​6, 14, tri yia haf i minim 1,260 dei. Taswe seven yia i min se yumi mas dabolem ol 1,260 dei ya, nao yumi kasem 2,520 dei. ?Hemia 2,520 prapa dei? Nogat. Jeova i talem long profet Esikel, we hem i wok long sem taem wetem Daniel, se i gat wan rul blong folem  long saed blong ol dei ya, hem i se: “Wan dei i saen blong wan yia, wan dei i saen blong wan yia.” (Esikel 4:6) Taswe, longfala blong ol seven yia ya hem i rili 2,520 prapa yia. Taem yumi kaontem ol yia ya stat long 607 B.K.T., i kam kasem 2,520 yia biaen, yumi kasem 1914. Hemia i min se “taem blong ol hiten man” i mas finis long yia ya 1914.

Oli Kasem Gud Mining Blong “Taem Blong En”

8. ?Wanem sam pruf we yu yu save soem blong pruvum se laef long wol ya i kam nogud olgeta stat long 1914?

⁸ Ol samting we oli hapen long wol stat long 1914 i kam, oli pruvum fulwan se ol toktok ya we yumi eksplenem finis long saed blong ol taem mo yia long Baebol, hem i stret. Jisas i talem se ol samting olsem wo, kakae i sot, mo ol sik, bambae oli olsem saen se klosap nao ‘wol ya bambae i finis.’ (Matiu 24:​3-8; Revelesen 6:​2-8) Samting ya i kamtru fulwan stat long 1914. Aposol Pol i talem sam moa samting we bambae yumi save makem, taem hem i talem se fasin we ol man oli mekem long ol narafala, hemia tu bambae i jenis bigwan. Olgeta samting we hem i tokbaot oli kamtru stret long fes blong yumi.​—2 Timoti 3:​1-5.

9. ?Ol man we oli wajem ol samting we oli stap hapen long wol ya oli talem wanem long saed blong wol ya stat long 1914?

⁹ ?I tru se ‘wol ya i jenis’ bigwan olsem, stat long 1914? Long wan buk (The Generation of 1914) Profesa Robert Wohl i talem se: “Ol man we oli laef tru long wo oli neva fogetem samting we oli luksave klia nomo, hemia se fasin blong laef long wol ya bifo, i finis long Ogis 1914 mo wan niufala fasin blong laef i stat.” Profesa Jorge A. Costa e Silva, hem i agri fulwan wetem ol tok ya. Man ya i wok blong Wol Helt Ogenaesesen, mo hem i daerekta blong olgeta we oli stap lukluk long ol sik we man i kasem long tingting, mo hem i raetem se: “Yumi laef long wan taem we ol samting oli jenis kwiktaem nomo, mo ol jenis ya oli stap karem wari we neva man i luk samting olsemia long wol ya bifo.” ?Yu tu yu luksave samting ya?

10. ?Olsem wanem Baebol i givhan long yumi blong kasem save from wanem laef long wol ya i stat kam nogud long 1914?

¹⁰ ?Hu man nogud we i stap mekem se laef long wol ya i stap kam nogud olgeta? Revelesen 12:​7-9 i soemaot man ya we i gat fol from ol trabol ya, i se: “I gat bigfala faet i stat long heven. Mikael [Jisas Kraes] wetem ol enjel blong hem oli stap faet agens long bigfala algita ya [Devel Setan]. Nao bigfala algita ya wetem ol enjel blong hem oli traem faet agens long Mikael olgeta, be oli lus, mo i no moa gat ples blong olgeta long heven. Bigfala algita ya, hem i . . . stap giaman long olgeta man long wol, i lidim olgeta oli go krangke. Nao olgeta long heven oli sakemaot hem wetem olgeta enjel blong hem oli aot long heven, oli kamdaon long wol.” Yes, Devel Setan nao hem i man ya blong mekem trabol, mo taem olgeta long heven oli sakemaot hem long 1914, yumi luk we tok ya blong Baebol i kamtru se “sore tumas long yu, graon, mo long yu, solwota, from we Setan i kamdaon finis long yufala. Mo hem i kros tumas, from we hem i save se i gat smol taem nomo blong hem i stap yet.”​—Revelesen 12:​10, 12.

Plei Long Stej Ya Bambae i Finis Olsem Wanem

11. (a) ?Wanem rod we Setan i yusum blong lidim ‘olgeta man long wol oli go krangke’? (b) ?Aposol Pol i pulum tingting blong yumi i go long wanem bigfala wok we Setan bambae i mekem i no longtaem?

¹¹ Setan i save se klosap nao bambae hem i lus. Taswe, stat long 1914, hem i stap hareap moa blong lidim ‘olgeta man long wol oli go krangke.’ Oltaem nomo, Setan hem i bigfala man blong trikim man. Hem i olsem man ya we i wok biaen long stej, we  wok blong hem i blong jusum hu nao ol lida blong wol we bambae oli plei long stej ya, mo hu nao ol man we bambae oli mekem ol jenis mo pulum ol man blong folem ol niufala tingting. (2 Timoti 3:13; 1 Jon 5:19) Setan i wantem tumas blong trikim olgeta man blong mekem oli ting se rul blong hem nomo bambae i karem trufala pis i kam long wol. Ol toktok mo tingting we oli kamaot long hem oli winim plante man finis, taswe plante man oli ting se bambae wol i kam gud yet, nating sipos oli luk klia se ol samting raonabaot long olgeta oli stap go nogud we i nogud olgeta. Aposol Pol i talemaot se jes bifo we wol ya i lus, bambae ol toktok mo tingting ya blong Setan oli kam antap bigwan. Hem i raetem se: “Taem bambae ol man oli talem se: ‘!Pis mo seftaem!’ long taem ya nao, bambae trabol i kam blong spolem ol man ya olgeta. Bambae trabol ya i kam long olgeta wantaem nomo, olsem woman we i gat bel, taem hem i harem nogud blong bonem pikinini.”​—1 Tesalonaeka 5:​3, NW; Revelesen 16:13.

12. ?Long taem blong yumi, wanem traehad we ol man oli bin mekem blong putum pis?

¹² Long ol yia we oli pas, yumi harem plante taem we ol man blong politik oli yusum tok ya “pis mo seftaem” blong tokbaot sam plan we oli stap traem blong wokem. Oli bin makemaot yia 1986 se Intenasnal Yia blong Pis, be sore tumas, yia ya i no karem pis ya we oli bin talemaot. ?Yumi save talem se ol traehad ya blong ol lida blong wol oli mekem tok blong 1 Tesalonaeka 5:3 i kamtru fulwan finis? ?Yu ting se Pol i stap tokbaot wan narafala taem yet we ol tok ya i mas kamaot bigwan moa blong pulum tingting blong ful wol wantaem?

13. ?Pol i talem se bigfala trabol we i kamaot afta we ol man oli singaot “Pis mo seftaem” hem i sem mak long wanem, mo yumi lanem wanem from pijatok ya?

¹³ Plante taem yumi kasem save fulwan long wan profet tok blong Baebol afta we profet tok ya i kamtru nomo, no taem we hem i stap kamtru. From samting ya, yumi mas wet nomo blong luk wanem bambae i hapen. Be yumi intres long tok blong Pol se, bigfala trabol we bambae i kamaot stret afta we ol man oli singaot “Pis mo seftaem” i sem mak long soa we woman i harem blong bonem pikinini. Taem wan mama i gat bel hem i harem save se i gat wan bebi i stap gru insaed long bel blong hem, mo hem i harem save samting ya moa taem hem i kam klosap long namba naen manis blong hem. Samtaem hem i save harem hat blong bebi blong hem i pam no i save harem se bebi ya i stap muf long bel blong hem. Maet bebi ya i stap kik tu. Ol samting ya oli stap kam plante moa, gogo wan dei hem i harem we wantaem nomo, bak blong hem i soa bigwan. Hemia wan saen se taem ya we hem i stap wet long hem, i kam nao​—bambae hem i bonem pikinini blong hem. Taswe, nomata se profet tok ya “Pis mo seftaem” i kamtru olsem wanem, yumi sua se wantaem nomo afta long tok ya bambae bigfala trabol i kamaot, mo samting ya bambae i karem bigfala blesing i kam​—yes, ol rabis man bambae oli lus mo niufala wol bambae i kamtru.

14. ?Ol samting bambae oli hapen folem wanem oda long fiuja, mo en blong hem bambae i olsem wanem?

¹⁴ Taem bigfala trabol ya i kamaot, bambae ol Kristin we oli stap lukluk, oli save fraetgud. Fastaem, ol king blong wol ya (ol politik ogenaesesen blong Setan) bambae oli girap agensem ol man blong Bigfala Babilon (hemia ol giaman skul we oli wan narafala haf blong ogenaesesen blong Setan) mo bambae oli spolem olgeta. (Revelesen 17:​1, 15-18) Tru ya, ol man bambae oli sek blong luk we plei long stej ya bambae i jenis wantaem nomo. Yes, ogenaesesen blong Setan bambae i seraot long tu haf, we wan haf i agensem nara haf, mo bambae Setan i no gat paoa blong blokem samting ya. (Matiu 12:​25, 26) Bambae Jeova i putum long tingting blong ol king blong wol ya blong oli “mekem olsem we hem i wantem,” hemia blong finisim ol skul blong wol ya we oli no stap mekem wok blong Hem. Afta we ol giaman skul oli lus, Jisas Kraes bambae i lidim ol ami blong hem long heven blong oli mekem laswan wok blong finisim ol narafala haf blong ogenaesesen blong Setan, hemia ol bigfala bisnes blong mane mo ol politik paoa. Biaen, Setan hem wan bambae i go kalabus. Afta long olgeta samting ya, plei ya we i bin gohed longtaem, bambae i finis, i olsem we oli pulum kaliko blong blokem stej ya we ol man oli stanap long hem blong mekem plei.​—Revelesen 16:​14-16; 19:​11-21; 20:​1-3.

15, 16. ?Tok ya se “yumi no gat plante taem i stap” i mas gat paoa long yumi olsem wanem?

¹⁵ ?Olgeta samting ya bambae oli hapen wetaem? Yumi no save dei mo taem blong samting ya. (Matiu 24:36) Be samting we yumi save hemia se “naoia, yumi no gat plante taem i stap.” (1 Korin 7:29) Taswe, i impoten we naoia yumi yusum taem we i stap long fasin we i waes gud. ?Olsem wanem blong mekem samting ya? Aposol Pol i eksplenem se, yumi mas ‘yusum evri janis we yumi kasem’ blong mekem ol samting we oli impoten moa, i bitim we yumi  westem taem long ol samting we oli nating nomo. Yumi mas yusum gud evri dei blong laef blong yumi. ?From wanem? “From we naoia, ol fasin nogud oli gat paoa.” Sipos yumi ‘traem save olgeta samting we Jeova i wantem blong yumi mekem,’ bambae yumi luksave se smol taem ya we i stap hem i sas tumas ale bambae yumi no westem taem ya.​—Efesas 5:​15-17; 1 Pita 4:​1-4.

¹⁶ ?Naoia we yu save se fasin blong wol ya bambae i lus i no longtaem, samting ya i mas mekem wanem long yu? Aposol Pita i raetem tok ya blong givhan long yumi i se: “From we olgeta samting ya bambae oli lus olsem, yufala i mas luklukgud long laef blong yufala. Taem yufala i stap wet long Dei ya blong God blong i kamtru, yufala i mas tabu, yufala i man blong God, mo yufala i mas mekem ol fasin we hem i wantem.” (2 Pita 3:11) !Yes yumi mas ol man olsemia nao! Folem waes advaes ya blong Pita, yumi mas (1) luklukgud long ol fasin blong yumi blong meksua se yumi tabu, mo (2) yumi mas meksua se olgeta wok ya we yumi mekem blong Jeova oli kamaot from we yumi lavem hem.

17. ?Ol Kristin oli mas lukaotgud long wanem trap blong Setan?

¹⁷ Sipos yumi lavem God, bambae yumi no save fas long wol ya from ol samting blong hem we oli pulum ae. Yumi save se wol ya bambae i lus i no longtaem, taswe i denja blong laekem tumas ol naesfala samting blong hem wetem fasin blong laef blong hem we i fulap long gudtaem mo pleplei nomo. Nating se yumi laef mo yumi wok long wol ya, be yumi mas lesin long advaes ya we i waes tumas se, yumi mas stap olsem we wol ya i nating nomo long yumi. (1 Korin 7:31) Yes, yumi mas wokhad blong blokem ol toktok mo save blong wol ya blong oli no pulum yumi i gorong. Ol man blong wol ya oli no save faenem rod blong winim ol trabol. Bambae oli no save gohed olwe wetem ol fasin ya blong olgeta. ?From wanem yumi sua long samting ya? From we Tok blong God i talem se: “Mo wol ya wetem ol samting we ol man blong hem oli wantem, oli stap lus. Be man we i stap mekem ol samting we God i wantem, hem bambae i no save lus samtaem.”​—1 Jon 2:17.

!Ol Beswan Samting Bambae Oli Kam Yet!

18, 19. ?Wanem jenis we yu wantem tumas blong luk long niufala wol, mo from wanem bambae yumi no wet blong nating nomo?

¹⁸ I no longtaem bambae Jeova i finisim ol wok blong Setan mo ol man blong hem, olsem we hem i pulum kaliko long stej blong blokem ples we ol man we oli mekem plei. Ale, God bambae i blesem ol man blong bilif we oli laef yet afta we rabis wol ya i lus. Nao olgeta ya bambae oli stat wok blong klinim mo jenisim ol samting long wol ya blong olwe, olsem we ol man blong plei long stej oli jenisim ol samting blong mekem wan niufala plei. Bambae i no moa gat faet long wol. God bambae i “mekem ol faet i finis long olgeta ples long wol.” (Ol Sam 46:9) Tede plante man oli sot long kakae, be long niufala wol “bambae i gat plante kakae long [wol] ya, we bambae ol hil oli fulap gud long hem.” (Ol Sam 72:16) Bambae i no moa gat ol kalabus, polis stesen, ol sik we oli kamaot from doti fasin long saed blong seks, ol bigman blong salem drag, ol kot blong mekem divos, ol kruked fasin long saed blong mane, mo ol teroris tu.​—Ol Sam 37:29; Aesea 33:24; Revelesen 21:​3-5.

¹⁹ Ol beregraon bambae oli emti, taem plante bilian man bambae oli laef bakegen blong fulumap wol ya​—hemia olsem ol niufala man blong plei long stej ya. !Hemia bambae i wan taem blong bigfala glad ya! Tingbaot we bambae yumi joen bakegen wetem ol olfala bubu blong yumi, mo bambae yumi holem mo kisim ol famle blong yumi bakegen we yumi laekem olgeta tumas. Sloslo, olgeta man we oli laef long wol ya bambae oli wosipim Jeova. (Revelesen 5:13) Taem ol jenis ya oli kamtru fulwan, ale wol ya bambae i stap olsem wan paradaes, i olsem we i gat wan niufala plei i kamaot long stej ya. ?Bambae yu harem olsem wanem taem yu stap wajem olgeta haf blong plei ya? Ating bambae yu harem gud tumas, yu se: ‘!Mi mi wet longtaem finis blong luk samting ya, be mi no wet blong nating nomo!’

[Ol Futnot]

?Bambae Yu Yu Ansa Olsem Wanem?

• ?Olsem wanem tok blong aposol Pol se “fasin blong wol ya i stap jenis” i kamtru long taem blong yumi?

• ?Olsem wanem ol taem mo yia we Baebol i tokbaot oli givhan long yumi blong faenemaot en blong “taem blong ol hiten man”?

• ?Olsem wanem ol samting we oli stap hapen long wol oli pruvum se 1914 hem i yia we “taem blong en” i stat?

• ?Tok ya se “yumi no gat plante taem i stap” i mas gat paoa long yumi olsem wanem?

[Kwestin]

[Tok blong pija long pej 20]

!Saye! !Yumi kasem save long tokhaed ya!