“Mi Faenem Ol Fren, Lav, Mo Kaengud Fasin”

“NAO from we yufala i stap lavlavem yufala, bambae olgeta man oli luksave se yufala i man blong mi.” (Jon 13:35) Olsem Jisas i talem, lav i wan mak blong ol faswan Kristin brata. Wan handred yia afta we Jisas i ded, man ya Tertullian, i raetem tok ya we hem i harem ol man oli stap talem long saed blong ol Kristin se: ‘Yufala i traem luk olsem wanem we olgeta ya oli lavlavem olgeta mo olsem wanem we oli rere blong givim laef blong olgeta from narafala.’

?Lav olsemia yumi save faenem long wol tede? Yes. Tingbaot wan eksampol. Ofis blong ol Witnes blong Jeova long Brasil i kasem wan leta long wan woman we nem blong hem Marília, mo hem i se:

“Taem mi mi laef long Villa Mercedes, hemia long kantri ya Ajentina, mama blong mi, we i wan Witnes blong Jeova, i kasem sik ya osteoarthritis (ol bun we oli stap long ol joen long bodi oli stap brobrok). Sik ya i mekem se haf bodi blong hem i ded, stat long bel i godaon long leg. Long ol faswan eit manis we hem i sik, ol Witnes brata mo sista long Villa Mercedes oli soem kaen fasin mo oli lukaotgud long hem. Oli mekem evri samting, oli klinap long haos mo oli kukum ol kakae blong hem. Nating we mama i stap long hospital, be oltaem, long dei mo long naet, ol brata no sista oli stap lukaot long hem.

“Naoia mi mo Mama i gobak long Brasil, mo sloslo hem i stap kamgud long sik blong hem. Ol Witnes long ples ya we mitufala i stap long hem naoia, oli mekem evri samting blong givhan long Mama blong kam gud bakegen.”

Marília i finisim leta blong hem i se: “Mi mas talemaot se mi mi no wan Witnes, be mi faenem ol fren, lav, mo kaengud fasin wetem ol Witnes blong Jeova.”

I tru, i gat sam man yet we oli soemaot trufala Kristin lav. Taem oli stap mekem olsem, oli soemaot paoa we ol tijing blong Jisas i save gat long laef blong yumi.