?Yu Yu Rimemba?

?Yu yu bin glad blong ridim ol Wajtaoa we oli kamaot long ol manis we i jes pas? Ale, traem luk sipos yu save ansa long ol kwestin ya:

• ?Olsem wanem Rut i soem wan gudfala eksampol?

Rut i gat bigfala lav long Jeova, hem i lavem Nomi long fasin we i tru oltaem, hem i wan woman blong wok strong, mo hem i gat tingting daon. Yumi no sapraes we ol man oli stap talem se hem i wan “gudfala woman.” (Rut 3:11)​—4/15, pej 23-26.

• ?Olsem wanem yumi save we Jeova i lukaotgud long ol man olbaot?

Jeova i talem long ol man Isrel we oli bin harem nogud tumas long Ijip se oli no mas spolem ol strenja. (Eksodas 22:​21-24) Jisas i folem eksampol blong Papa blong hem nao hem tu i soem intres long ol man olbaot, mo ol man we hem i jusum blong oli kam aposol blong hem ‘oli no gat nem mo oli no skul gud.’ (Ol Wok 4:13; Matiu 9:36) Yumi save folem eksampol blong God taem yumi soem se yumi kea long ol narafala, olsem ol yangfala.​—4/15, pej 28-31.

• ?From wanem yumi sua we Jeova i lukluk mo i intres long ol samting we yumi stap mekem?

Ol stori long Baebol oli soem we Jeova i lukluk mo i intres long ol wok blong ol man. Jeova i luk sakrefaes we Ebel i bin mekem, mo hem i lukluk mo i intres long yumi taem ‘yumi mekem wan sakrefaes blong presem hem, we sakrefaes ya i olsem frut blong maot blong yumi.’ (Hibrus 13:​15, NW ) Jeova i luk traehad blong Inok we i wantem se God i stap glad long hem, mo we i stap traehad blong mekem laef blong hem i klin mo i stret. Mo God i luk taem wan wido woman blong Jarefat we hem i no wan woman Isrel, i serem smol kakae blong hem wetem profet Elaeja. Yes, Jeova i lukluk mo i intres long ol samting we bilif blong yumi i pusum yumi blong mekem.​—5/1, pej 28-31.

• ?From wanem yumi save talem se afta long Pentekos 33 K.T., ol man Jiu we oli kam Kristin oli mas givim laef blong olgeta i go long God?

Long 1513 B.K.T., ol man Isrel blong bifo oli statem wan spesel fasin fren wetem Jeova. (Eksodas 19:​3-8) Stat long taem ya, olgeta man Jiu oli bon long wan nesen we i givim laef blong hem finis i go long Jeova, wan nesen we i stap folem kontrak blong Loa. Be Jeova i tekemaot kontrak blong Loa taem Kraes i ded long 33 K.T. (Kolosi 2:​14, NW ) Afta long samting ya, ol man Jiu we oli wantem mekem wok blong God olsem we Hem i wantem, oli nid blong givim laef blong olgeta i go long God mo baptaes long nem blong Jisas Kraes.​—5/15, pej 30-31.

• ?Fasin blong bonem insens i wan fasin blong trufala wosip tede?

Fasin blong bonem insens i wan fasin blong trufala wosip long Isrel bifo. (Eksodas 30:​37, 38; Levitikas 16:​12, 13) Be kontrak blong Loa, wetem fasin blong bonem insens tu, hem i finis taem Kraes i ded. Ol Kristin oli fri blong jusum blong bonem insens, sipos fasin ya i no laenap wetem wan giaman wosip, be fasin blong bonem insens i no wan fasin blong trufala wosip tede. Mo tu, i gud sipos wan Kristin i tingbaot filing blong narafala bifo we hem i bonem insens, blong no mekem narafala i foldaon.​—6/1, pej 28-30.

• ?Wanem samting we ol niuspepa oli bin tokbaot hem i no longtaem, we i pulum plante man blong ting se Jisas i rili bin laef long wol ya?

Ol niuspepa oli tokbaot plante long saed blong wan bokis, we oli putum ol bun blong ol dedman insaed long hem. Oli faenem bokis ya long Isrel. I luk olsem se oli wokem bokis ya long ol faswan handred yia, mo i gat tok ya i stap long hem se: “Jemes, pikinini blong Josef, brata blong Jisas.” Sam man oli ting se bokis ya i olfala moa long olgeta samting we oli faenem blong pruvum se Jisas i rili bin laef long wol ya, be pruf ya i no kamaot long Baebol.​—6/15, pej 3-4.

• ?Olsem wanem man i save lan blong lavem narafala?

Ol man oli lanem lav fastaem long eksampol mo trening blong papa mama. Taem hasban mo waef tugeta i soem lav mo respek, ol pikinini oli save lan blong lavem narafala. (Efesas 5:28; Taetas 2:4) Wan man we i gruap long wan famle we i no soem lav, hem tu i save lan blong wokem lav sipos hem i folem ol advaes we Jeova i stap givim long hem olsem wan papa, i letem tabu spirit i givhan long hem, mo i haremgud from lav blong ol Kristin brata sista we oli sapotem hem.​—7/1, pej 4-7.

• ?Eusebius hem i hu, mo laef blong hem i tijim yumi long wanem samting?

Eusebius i wan man blong raetem histri, mo long 324 K.T., hem i finisim ol ten buk blong hem we taetel blong ol buk ya hemia History of the Christian Church. Eusebius i bilif se Papa God i laef fastaem long Pikinini blong hem, be nating se i olsem, Eusebius i agri wetem sam man we oli gat wan defren tingting long Miting blong Nicaea. I luk olsem se Eusebius i no obei long oda blong Jisas we i talem se olgeta we oli stap folem Hem “oli no man blong wol ya.” (Jon 17:16)​—7/15, pej 29-31.

• ?Jeova i jenisim tingting blong hem long fasin ya blong maredem plante woman?

No, Jeova i no jenisim tingting blong hem long fasin blong maredem plante woman. (Maeka 3:6) Plan blong God long saed blong faswan man se hem i mas “joen wetem woman blong hem” mo tufala i mas kam olsem wan bodi nomo. (Jenesis 2:24) Jisas i talem se sipos wan man i divos mo i mared bakegen, be waef blong hem i no bin slip wetem wan narafala man, man ya nao i kam olsem wan man we i slip olbaot. (Matiu 19:​4-6, 9) Jeova i bin letem ol man oli maredem plante woman, be fasin ya i stop taem Kristin kongregesen i stanap.​—8/1, pej 28.