Tingting Blong God Long Saed Blong Ol Dedman

YUMI harem nogud tumas, taem wan we yumi laekem hem tumas i ded. Yumi harem se filing i emti, yumi harem olsem we yumi stap yumi wan, mo soa we yumi harem from we wan i lus i bigwan tumas. Taem yumi harem nogud from wan we yumi lavem i ded, yumi harem se yumi no naf blong mekem wan samting, nating se yumi rij, yumi gat paoa, no yumi gat plante samting long laef, be i no gat wan long yumi long wol ya naoia we i naf blong mekem man we i ded i girap bakegen.

Be, Man ya we i Wokem Olgeta Samting i gat defren tingting long poen ya. God i wokem faswan man mo woman long das blong graon, taswe taem wan man i ded, hem nomo i naf blong wokem man bakegen. From samting ya, long lukluk blong God, ol man we oli ded finis i olsem we oli laef i stap. Long saed blong ol man blong God bifo we oli ded finis we oli gat strong bilif, Jisas i talem se: “From we [God] i stap tingbaot olgeta olsem we oli laef.”​—Luk 20:​38, NW.

Taem Jisas i laef long wol ya, hem i gat paoa blong mekem olgeta we oli ded oli girap bakegen. (Jon 5:21) Taswe, hem tu i gat tingting we i sem mak long Papa blong hem long ol man blong bilif we oli ded finis. Wan eksampol, taem Lasaros we i fren blong Jisas i ded, Jisas i talem long ol man blong hem se: “Be bambae mi mi go blong wekemap hem.” (Jon 11:11) Long tingting blong man, Lasaros i ded finis, be long tingting blong Jeova mo Jisas, Lasaros i olsem we i slip nomo.

Aninit long Kingdom we Jisas i rul long hem, bambae “olgeta man we oli ded oli laef bakegen, ol man we oli stret, wetem ol man we oli no stret.” (Ol Wok 24:15) Sloslo, ol man we oli girap bakegen bambae God i tijim olgeta mo oli gat hop blong kasem laef we i no save finis long wol ya.​—Jon 5:​28, 29.

Yes, taem wan we yumi laekem tumas i ded, samting ya i mekem we yumi harem nogud mo yumi sore, mo filing ya maet i save stap blong plante yia. Nating we i olsem, taem yumi gat semfala tingting olsem Jeova long saed blong ol dedman, bambae yumi harem gud mo yumi gat hop.​—2 Korin 1:​3, 4.