?Hu i Rili Save Givhan Long Yumi Blong Harem Gud?
?Hu i Rili Save Givhan Long Yumi Blong Harem Gud?
“God ya we i God mo Papa blong Jisas Kraes, Masta blong yumi . . . Hem i stap givhan long mifala long olgeta trabol blong mifala, blong mekem mifala i harem gud.”—2 KORIN 1:3, 4.
1. ?Wanem trabol i save kasem man we i mekem se hem i rili nidim narafala blong givhan long hem blong harem gud bakegen?
WAN bigfala sik i save mekem man i harem se laef blong hem i no moa gud. Taem graon i seksek bigwan, no taem i gat hariken, no taem kakae i sot, man i save lusum evri samting blong hem, mo i stap trabol gud. Bigfala faet i save kilim sam famle blong yumi oli ded, spolem plante haos, no fosem ol man blong ronwe long haos mo olting blong olgeta. Kruked fasin i save mekem samfala oli harem se i no gat wan man we oli save trastem hem blong givhan long olgeta. Ol man we oli kasem ol trabol olsemia, oli rili nidim wan man blong givhan long olgeta blong oli harem gud bakegen. ?Be hu i save mekem olsemia?
2. ?From wanem i no gat narafala man olsem Jeova we i save givhan long yumi blong harem gud?
2 Sam man mo sam grup blong man oli traehad blong givhan long ol man we oli trabol. Mo ol toktok we oli talem long kaen fasin, i mekem ol man we oli trabol oli harem gud tumas. Mo tu, samfala oli givim ol samting olsem klos mo kakae long ol man we oli nidim. Hemia tu i givhan blong smoltaem. Be i gat wan Man nomo we i save stretem gud ol trabol ya mo mekem se ol bigbigfala trabol oli no moa kasem ol man. Man ya hemia trufala God, Jeova. Long saed blong Hem, Baebol i talem se: “I gud yumi stap talem tangkiu long God ya we i God mo Papa blong Jisas Kraes, Masta blong yumi. Hem i Papa blong yumi we i gat sore, hem i God we i stamba blong fasin blong givhan. Hem i stap givhan long mifala long olgeta trabol blong mifala, blong mekem mifala i harem gud. Nao taem ol narafala man oli gat trabol, mifala i save givhan long olgeta, blong mekem olgeta oli harem gud long sem fasin, from we God i givhan finis long mifala.” (2 Korin 1:3, 4) ?Olsem wanem Jeova i stap givhan long yumi blong harem gud bakegen?
Faenem Stamba Blong Ol Trabol Ya
3. ?Olsem wanem samting we God i mekem blong givhan long yumi blong harem gud, i go stret long stamba blong ol trabol ya?
3 Taem Adam i sin, hem i mekem se olgeta man we oli kamaot biaen long hem oli gat sin. Samting ya i mekem se ol man oli kasem plante trabol mo long en blong hem ded nomo. (Rom 5:12) Samting we i mekem trabol ya i moa strong, hemia se Setan i “stap rulum wol ya.” (Jon 12:31; 1 Jon 5:19) Be Jeova i no jes soem se hem i harem nogud long ol trabol we ol man oli fesem. Hem i go moa. Hem i sanem Pikinini blong hem, wan nomo we hem i gat, blong i kam wan ransom blong pemaot olgeta man. Mo Hem i talem se sipos yumi gat bilif long Pikinini ya blong Hem, yumi save kam fri long ol trabol we sin blong Adam i mekem long yumi. (Jon 3:16; 1 Jon 4:10) God i talemaot tu se Jisas Kraes, we olgeta paoa blong heven mo wol i stap long han blong hem, bambae i spolem Setan mo rabis wol blong hem fulwan.—Matiu 28:18; 1 Jon 3:8; Revelesen 6:2; 20:10.
4. (a) ?Jeova i mekem wanem blong yumi bilif moa long ol promes blong hem se ol trabol bambae i finis? (b) ?Olsem wanem Jeova i stap givhan long yumi blong luksave wetaem ol trabol bambae i finis?
4 Blong mekem bilif blong yumi long ol promes blong God i kam strong moa, Hem i raetemdaon plante samting we oli soemaot se olgeta tok blong Hem oli stap kamtru. (Josua 23:14) I gat plante stori long Baebol we oli tokbaot wok we God i mekem blong sevem ol man blong hem, taem oli fesem wan trabol we oli no naf blong winim. (Eksodas 14:4-31; 2 King 18:13–19:37) Mo Jeova i yusum Jisas Kraes blong soemaot tingting blong Hem blong mekem “olgeta we bodi blong olgeta i nogud, oli gud bakegen.” Yes, bambae hem i mekem ol dedman oli laef bakegen tu. (Matiu 9:35; 11:3-6) ?Samting ya bambae i hapen wetaem? Blong ansa long kwestin ya, Baebol i tokbaot ol samting we bambae oli hapen long ol las dei blong wol ya, jes bifo we God i mekem niufala heven mo niufala wol. Ol tok blong Jisas oli laenap gud wetem ol samting we oli stap kamaot long taem blong yumi.—Matiu 24:3-14; 2 Timoti 3:1-5.
Mekem Wan Nesen We i Trabol i Harem Gud
5. ?Blong givhan long ol man Isrel bifo blong oli harem gud, Jeova i pulum olgeta blong tingbaot wanem?
5 Taem yumi luk ol samting we Jeova i mekem long ol man Isrel bifo, yumi luksave olsem wanem hem i givhan long olgeta long taem blong trabol, blong mekem olgeta oli harem gud. Hem i talem bakegen long olgeta long saed blong ol fasin blong hem. Hemia i mekem se oli bilif moa long ol promes blong hem. Jeova i pulum ol profet blong talemaot ol tok we i skelem Hem, trufala God ya we i laef, wetem ol aedol, we oli no save mekem wan samting blong givhan long olgeta bakegen no blong givhan long ol man we oli mekem wosip long olgeta. (Aesea 41:10; 46:1; Jeremaea 10:2-15) Jeova i talem long Aesea se, ‘Yu yu go toktok gud long ol man blong mi. Yu yu leftemap tingting blong olgeta.’ Nao Jeova i pulum profet ya blong talem ol pijatok mo blong tokbaot ol samting raonabaot long yumi we God i wokem, blong makem gud we Jeova nomo i trufala God mo i hae we i hae.—Aesea 40:1-31.
6. ?Sam samtaem, Jeova i mekem wanem blong soemaot stret taem we bambae i sevem ol man blong hem?
6 Sam samtaem, Jeova i yusum wan narafala rod blong mekem ol man blong hem oli harem gud. Hem i talem stret taem we bambae hem i sevem olgeta, nating se taem ya i klosap no i longwe. Ol man Isrel oli harem nogud tumas taem oli stap wok slef long Ijip, be klosap long taem we oli kamfri, God i talem long olgeta se: “Bambae mi givim wan panis moa long king ya [Fero] wetem ol man blong hem, we hemia bambae i laswan. Nao biaen, bambae hem i letem yufala i go.” (Eksodas 11:1) Long taem blong King Jehosafat, ami blong tri kantri oli joen blong kam agensem Juda. Long taem ya, Jeova i talem long Juda se “tumora” bambae hem i faet from olgeta. (2 Kronikel 20:1-4, 14-17) Klosap 200 yia bifo we ol man blong God oli kamfri long Babilon, Aesea i talemaot stret taem we samting ya bambae i hapen. Mo klosap 100 yia bifo we oli kamfri, Jeremaea i givim moa save long saed ya. !Taem ol man blong God oli stap kam klosap long stret taem we God bambae i sevem olgeta, ol profet tok ya i rili leftemap tingting blong olgeta!—Aesea 44:26–45:3; Jeremaea 25:11-14.
7. ?Plante promes blong God blong sevem ol man oli tokbaot hu, mo olsem wanem samting ya i gat paoa long ol man Isrel we oli gat bilif?
7 I gud blong makem se plante promes we oli mekem ol man blong God oli harem gud, oli tokbaot Mesaea. (Aesea 53:1-12) Ol tok ya oli mekem tingting blong ol man blong bilif i strong taem oli fesem ol defdefren traem. Mo biaen, tok ya i gohed blong givhan long ol pikinini blong ol man ya wetem ol smosmol bubu blong olgeta tu. Long Luk 2:25, yumi ridim se: “I gat wan man i stap long Jerusalem, nem blong hem Simeon. Hem i wan stret man, i wan man blong prea, mo hem i stap wet blong luk Mesaea i kam blong sevem ol laen blong Isrel [“wan samting we bambae i leftemap tingting blong ol man Isrel,” NW]. Tabu Spirit i stap long hem.” Simeon i save ol tok blong Baebol se Mesaea bambae i kamtru, mo taem hem i stap wet long promes ya, ol tok ya i gat paoa long laef blong hem. Hem i no savegud olsem wanem samting ya bambae i kamtru, mo hem wan i no laef kasem taem we Mesaea i mekem wok blong hem blong sevem ol man. Be hem i glad tumas taem hem i luksave se Jisas i olsem ‘rod blong God blong sevem man.’—Luk 2:30.
Kraes i Mekem Ol Man Oli Harem Gud
8. ?Olsem wanem samting we Jisas i givim long ol man i defren long samting we olgeta oli ting se oli nidim?
8 Taem Jisas Kraes i mekem wok blong God long wol ya, hem i no givim ol samting we ol man nomo oli ting se oli nidim. Samfala oli no laekem nating strong rul blong gavman blong Rom, mo oli wantem tumas wan Mesaea we bambae i mekem olgeta oli fri long rul ya. Be Jisas i no lidim wan rebelian. Long defren fasin, hem i talem long ol man ya se: “Samting we i blong Sisa, yufala i givimbak long Sisa.” (Matiu 22:21) Plan blong God i bigwan moa i bitim we bambae i mekem sam man oli fri long strong rul blong wan gavman. Mo tu, ol man oli wantem putumap Jisas i kam king blong olgeta. Be hem i talem long olgeta se hem i kam blong ‘givim laef blong hem blong pem rod blong plante man oli go fri.’ (Matiu 20:28; Jon 6:15) Long taem ya, i no stret taem yet blong hem i kam king. Mo Jeova nomo bambae i givim paoa blong king long hem, i no ol man we oli no glad long gavman blong olgeta.
9. (a) ?Jisas i talemaot wanem gud nius we i mekem ol man oli harem gud? (b) ?Olsem wanem Jisas i soemaot se gud nius ya i joen wetem ol trabol we ol man oli stap fesem long laef blong olgeta? (c) ?Wok we Jisas i mekem taem hem i stap long wol i givhan long hu biaen?
9 “Gud nius blong kingdom blong God” we Jisas i talemaot, hem i mekem ol man oli harem gud. Jisas i talemaot gud nius ya long evri ples we hem i go long hem. (Luk 4:43, NW) Hem i mekem plante merikel blong soemaot wanem we Mesaea bambae i mekem taem hem i rul olsem King. Long rod ya, hem i soemaot se gud nius ya i joen wetem laef blong ol man. Ol man we oli harem nogud from we oli no save lukluk no oli no save toktok (Matiu 12:22; Mak 10:51, 52), haf bodi blong olgeta i ded (Mak 2:3-12), oli gat rabis sik blong skin (Luk 5:12, 13), mo sam narafala strong sik (Mak 5:25-29), Jisas i mekem bodi blong olgeta i kamgud. Samting ya i mekem olgeta oli harem gud, nao oli wantem gohed blong laef. Samfala we oli krae from we pikinini blong olgeta i ded, hem i givim bigfala glad long olgeta taem i mekem pikinini i laef bakegen. (Luk 7:11-15; 8:49-56) Hem i soemaot se hem i gat paoa blong mekem bigfala win i kam kwaet, mo blong givim kakae long plante man wantaem. (Mak 4:37-41; 8:2-9) Mo tu, Jisas i tijim ol man long ol rul we oli mas folem blong winim ol trabol we oli stap fesem evri dei. Ol save ya i mekem se oli wantem tumas long hat blong olgeta blong stap aninit long rul blong Mesaea ya we bambae i mekem stret fasin i stanap. Taswe, taem Jisas i stap prij, hem i no jes mekem ol man we oli lesin long hem mo bilif long hem oli harem gud. Be hem i talem mo mekem ol samting we oli leftemap tingting blong ol man long ol taosen yia biaen tu.
10. ?Sakrefaes blong Jisas i mekem wanem gudfala samting long yumi?
10 Bitim 60 yia afta we Jisas i letem laef blong hem olsem wan sakrefaes, mo i laef bakegen i go antap long heven, tabu spirit i pulum aposol Jon blong raetem se: “Ol pikinini blong mi. Mi mi stap raetem ol tok ya i kam long yufala blong blokem yufala, blong yufala i no mekem sin. Be sipos wan long yumi i mekem sin, i gat Jisas Kraes i stap, we fasin blong hem i stret gud, mo hem i man blong givhan long yumi, blong toktok long Papa blong yumi long saed blong yumi. Kraes ya, hem i man we i ded blong mekem rod blong God i tekemaot ol sin blong yumi. Mo i no blong yumi nomo, i blong olgeta man long wol.” (1 Jon 2:1, 2) Taem Jisas i letem stret laef blong hem olsem wan sakrefaes, hem i givhan long yumi bigwan, mo yumi harem gud tumas long samting ya. Yumi save se from samting ya, yumi save kasem fogif blong ol sin blong yumi, yumi save gat wan klin tingting we i no stikim yumi, yumi save frengud wetem God, mo yumi gat janis blong kasem laef we i no save finis.—Jon 14:6; Rom 6:23; Hibrus 9:24-28; 1 Pita 3:21.
Tabu Spirit i Givhan Long Yumi Blong Harem Gud
11. ?Bifo we Jisas i ded, wanem narafala samting we hem i promes blong mekem blong givhan long ol man blong hem?
11 Long laswan naet bifo we Jisas i ded, hem i stap wetem ol man blong hem. Long naet ya, hem i tokbaot wan narafala samting we Papa blong hem long heven bambae i mekem blong givhan long olgeta blong harem gud. Jisas i se: “Bambae mi mi askem long Papa blong mi, mo hem bambae i givim wan narafala Man blong Givhan [long Grik lanwis, pa·raʹkle·tos] long yufala, blong hem i save stap oltaem wetem yufala. Narafala Man ya hemia Spirit ya we i stamba blong Trutok.” Jisas i promes long olgeta se: “Mo Spirit ya blong Givhan, we hem i Tabu Spirit, . . . hem bambae i save tijim yufala long olgeta samting. Bambae hem i save mekem yufala i tingbaot olgeta samting ya bakegen, we mi mi stap talem long yufala.” (Jon 14:16, 17, 26) ?Olsem wanem tabu spirit i givhan long olgeta blong oli harem gud?
12. ?Olsem wanem tabu spirit i givhan long plante man blong oli harem gud, taem i mekem ol disaepol blong Jisas oli rimemba plante samting?
12 Jisas i bin tijim ol aposol blong hem plante. Oli no save fogetem samting ya. ?Be yu ting se oli save rimemba olgeta tok we Jisas i bin talem? Tingting blong olgeta i no stretgud. Taswe, oli save fogetem sam impoten tijing we Jisas i bin givim long olgeta. Be Jisas i promes se tabu spirit bambae i ‘mekem olgeta oli tingbaot bakegen olgeta samting we hem i talem long olgeta.’ Taswe, klosap eit yia afta we Jisas i ded, Matiu i raetem faswan Gospel. Long buk ya, hem i raetemdaon ol nambawan tok we Jisas i bin talem antap long Hil, wetem plante parabol we hem i bin talem long saed blong Kingdom, mo bigfala storian blong hem long saed blong ol saen we oli soem se hem i kambak finis. Bitim 50 yia biaen, aposol Jon tu i naf yet blong raetemdaon ol samting we oli bin hapen long ol laswan dei blong laef blong Jisas long wol, mo stori ya i stretgud. !Ol tok ya we tabu spirit i givim long ol man ya, i stap leftemap tingting blong yumi kam kasem tede!
13. ?Olsem wanem tabu spirit i olsem tija blong ol faswan Kristin?
13 Tabu spirit i no jes mekem ol disaepol oli tingbaot ol tok blong Jisas. Be hem i tijim olgeta tu mo i lidim olgeta blong oli kasem save moa long ol tingting we God bambae i mekem i kamtru. Taem Jisas i stap yet wetem ol disaepol blong hem, hem i tokbaot plante samting we oli no klia long olgeta. Be biaen, tabu spirit i pulum sam long ol disaepol ya olsem Jon, Pita, Jemes, Jud, mo Pol, blong oli raetemdaon plante moa save long saed blong ol tingting blong God we bambae oli kamtru. Taswe, tabu spirit i olsem wan tija blong ol disaepol ya. Mo taem hem i tijim olgeta, hem i mekem olgeta oli sua se God i stap lidim olgeta.
14. ?Olsem wanem tabu spirit i givhan long ol man blong Jeova?
14 Ol spesel paoa we tabu spirit i givim olsem merikel, olgeta tu oli soemaot klia se God i putum blesing blong hem long Kristin kongregesen, i no moa long prapa laen blong Isrel. (Hibrus 2:4) Ol frut blong tabu spirit ya we oli kamaot long laef blong ol man, olgeta tu oli soemaot hu nao ol trufala disaepol blong Jisas. (Jon 13:35; Galesia 5:22-24) Mo tu, tabu spirit ya i mekem olgeta long kongregesen oli gohed blong prij wetem strong tingting we oli no fraet.—Ol Wok 4:31.
Hem i Givhan Long Man We i Kasem Bigfala Traem
15. (a) ?Wanem ol traem we sam Kristin bifo mo naoia oli fesem? (b) ?From wanem samfala we oli leftemap tingting blong ol narafala maet oli nidim we narafala i leftemap tingting blong olgeta tu?
15 Olgeta man we oli onagud long Jeova mo stap tru long hem, oli mas kasem trabol mo traem. (2 Timoti 3:12) Be, plante Kristin oli bin kasem ol traem we oli strong bitim mak. Long taem blong yumi, i gat sam raf grup blong man we oli bin mekem i nogud tumas long ol Kristin. Mo tu, long sam ples, oli sakem ol Kristin oli go long ol rabis kalabus we oli naf blong anamol nomo i stap long olgeta, mo oli fosem samfala blong wok slef long sam narafala kalabus. Sam gavman oli bin ronem ol Kristin, no oli letem ol stronghed grup oli mekem olsem oli wantem we oli no panisim olgeta nating. Antap long hemia, sam Kristin oli stap kasem ol bigfala sik no bigfala trabol insaed long famle. Mo ol Kristin we oli traehad blong givhan long ol narafala Kristin blong winim ol hadtaem blong olgeta, olgeta tu oli save kam taed mo harem nogud. Yes, maet olgeta we oli stap leftemap tingting blong ol narafala, oli nidim we narafala i leftemap tingting blong olgeta tu.
16. ?Taem Deved i kasem bigfala traem, olsem wanem Jeova i givhan long hem?
16 Taem King Sol i ronem Deved blong kilim hem i ded, Deved i prea long Man Blong Givhan long hem, i se: “[God] plis yu harem prea blong mi.” Nao hem i talem se: “Mi mi kam blong haed long yu, blong yu blokem mi mi stap gud olsem we pikinini blong faol i stap gud aninit long wing blong mama blong hem.” (Ol Sam 54:2, 4; 57:1) ?God i givhan long Deved? Yes, hem i givhan. Long taem ya, Jeova i yusum profet Gad mo pris Abiata blong talem long Deved wanem we hem i mas mekem. Mo God i yusum Jonatan we i pikinini blong Sol, blong i talem ol tok long Deved blong mekem tingting blong hem i strong. (1 Samuel 22:1, 5; 23:9-13, 16-18) Mo tu, Jeova i letem ol man Filistia oli kam insaed long kantri blong mekem faet. Nao Sol i no moa ronem Deved, hem i tanemraon i go faet agensem ol man Filistia ya.—1 Samuel 23:27, 28.
17. ?Taem Jisas i kasem bigfala traem, hem i askem long hu blong halpem hem?
17 Klosap long en blong laef blong Jisas long wol ya, hem tu i kasem bigfala traem. Hem i savegud se samting we hem bambae i mekem i save leftemap nem blong Papa blong hem no i save daonem. Mo hem i savegud tu se fasin blong hem i save mekem i gud long fiuja blong olgeta man no i save mekem i nogud. Ale, Jisas i prea strong, we “tingting blong hem i trabol tumas.” God i meksua se Jisas i kasem help we hem i nidim long hadtaem ya.—Luk 22:41-44.
18. ?Olsem wanem God i givhan long ol faswan Kristin we ol man oli ronem olgeta mo mekem i nogud tumas long olgeta?
18 Long faswan handred yia, taem Kristin kongregesen i jes stanap, ol man oli mekem i nogud tumas long ol Kristin. Ale, ol Kristin oli aot long Jerusalem, ol aposol nomo oli stap. Ol man ya blong mekem trabol, oli go long haos blong ol Kristin, mo oli pulumaot ol man mo woman long prapa haos blong olgeta. ?God i mekem wanem blong givhan long ol Kristin ya? Promes blong hem i givhan long olgeta, from we Tok blong hem i talem se ‘i gat ol narafala samting blong olgeta i stap, we oli moa gud, mo ol samting ya bambae oli no save lus samtaem.’ Hemia i minim gudfala laef we oli sua blong kasem long heven wetem Kraes. (Hibrus 10:34; Efesas 1:18-20) Taem ol Kristin ya oli gohed blong prij, oli luk we tabu spirit blong God i stap wetem olgeta, mo ol samting we i hapen i givhan moa long olgeta blong glad tumas.—Matiu 5:11, 12; Ol Wok 8:1-40.
19. ?Nating se ol man oli stap mekem i nogud tumas long Pol, wanem tingting blong hem long saed blong help we God i givim?
19 Fastaem, Sol (Pol) i bin mekem ol raf fasin bitim mak long ol Kristin. Biaen, hem tu i kam wan Kristin, nao ol narafala man oli mekem ol semfala raf fasin long hem. Long aelan ya Saepras, i gat wan kleva we i traem blokem Pol taem hem i stap prij. Blong mekem olsem, kleva ya i yusum ol nogud fasin, mo i tanem ol trutok blong God i kam ol giaman tok. Long Galesia, sam man oli stonem Pol, oli livim hem i stap, oli ting se hem i ded finis. (Ol Wok 13:8-10; 14:19) Long Masedonia, ol man oli wipim Pol long stik. (Ol Wok 16:22, 23) Long Efesas, bigfala hip blong man i girap agensem Pol, nao biaen hem i raetem se: “Mifala i harem we ol trabol ya i bigfala tumas, i hevi tumas, nao mifala i no moa tingbaot se bambae mifala i laef. Mifala i harem olsem we oli jajem mifala finis, se bambae mifala i mas ded.” (2 Korin 1:8, 9) Be long semfala leta nomo, Pol i raetem ol gudfala tok blong leftemap tingting, olsem i stap long haf 2 blong stadi ya.—2 Korin 1:3, 4.
20. ?Bambae yumi tokbaot wanem long nekis stadi?
20 ?Olsem wanem yu tu yu save givhan long narafala blong i harem gud? I gat fulap man long taem blong yumi we oli nidim help ya. Maet oli harem nogud from wan bigfala trabol we i kasem plante taosen man wantaem, no from wan trabol long laef blong olgeta nomo. Long nekis stadi, bambae yumi tokbaot olsem wanem yumi save givhan long narafala blong i harem gud bakegen.
?Yu Yu Tingbaot?
• ?From wanem givhan blong God i moa gud i bitim givhan blong olgeta narafala man?
• ?Olsem wanem Kraes i givhan long ol man blong oli harem gud?
• ?Olsem wanem tabu spirit i givhan long ol man blong oli harem gud?
• Talem stori blong sam man we God i givhan long olgeta blong harem gud taem oli kasem bigfala traem.
[Kwestin]
[Tok blong pija long pej 15]
Baebol i soemaot se Jeova i givhan long ol man blong hem blong harem gud, taem hem i mekem olgeta oli fri
[Tok blong pija long pej 16]
Jisas i mekem ol man oli harem gud taem i tijim olgeta, i tekemaot sik blong olgeta, mo i mekem dedman i laef bakegen
[Tok blong pija long pej 18]
Papa blong Jisas long heven i givhan long hem