?Yu Yu Rimemba?

?Yu yu bin glad blong ridim ol Wajtaoa we oli kamaot long ol manis we i jes pas? Ale, traem luk sipos yu save ansa long ol kwestin ya:

• ?Sipos yumi kasem save long famle blong Safan, olsem wanem samting ya i save givhan long yumi?

Safan i mekem ol kopi blong loa mo hem i sekretari blong King Josaea blong Juda. Safan i wan haeman blong kantri, mo hem i givhan long king blong stanemap trufala wosip bakegen. Tu boe blong Safan tufala i givhan gud long profet Jeremaea. Mo wan narafala boe blong hem wetem tu smol bubu blong hem, olgeta tu oli yusum paoa blong olgeta blong givhan long trufala wosip. Long sem fasin, yumi mas yusum olting blong yumi mo paoa blong yumi blong leftemap trufala wosip.—12/15, pej 19-22.

• ?Olsem wanem Irene Hochstenbach i stanap strong mo i gohed blong mekem wok blong Jeova, nating se hem i kasem wan strong trabol long bodi blong hem?

Taem Irene i gat seven yia blong hem, sora blong hem i fas. Nating se hem i no moa save harem wan samting, hem i lanem wan rod blong toktok wetem ol narafala man, mo naoia hem i folem man blong hem (seket elda) taem hem i goraon blong visitim ol kongregesen long Netalan.—1/1, pej 23-26.

• ?Wanem tufala buk blong stadi we tufala i jes kamaot long Distrik Asembli ya “Ol Man Blong Talemaot Kingdom We Oli Wok Strong”?

Ol Kristin long olgeta ples blong wol oli glad tumas blong kasem buk ya Worship the Only True God. Buk ya i blong mekem stadi wetem ol man afta we oli finisim buk ya Save Blong Lidim Yu Long Laef We i No Save Finis. Narafala niufala buk, hemia Draw Close to Jehovah. Hem i tokbaot ol fasin blong Jeova mo ol wok we hem i mekem long saed blong ol man. Buk ya i soem tu olsem wanem yumi save folem ol fasin blong God.—1/15, pej 23, 24.

• ?Wanem mining blong Ol Proveb 12:5 we i talem se: “Man we [“ol tingting blong hem,” NW ] i no save giaman, hem i stap mekem i stret nomo long ol man.”

Tingting blong ol gudfala man i klin mo i stap long ol samting we i stret mo i gud. From we ol stret man oli lavem God mo ol narafala man, lav nao i pusum olgeta blong tekem aksin, mo aksin ya i kamaot from wan gudfala tingting.—1/15, pej 30.

• ?Wanem i save givhan long wan man blong gat stret tingting long saed blong wok?

I gud we ol papa mama oli tijim ol pikinini, stat taem oli smol nomo, blong tinghae long wok. Baebol i talem long yumi blong gat wan gudfala tingting long saed blong wok, mo blong no les. (Ol Proveb 20:4) Mo tu, Baebol i talem long ol Kristin se oli no mas bitim mak long wok. Yumi mas luksave se wok blong God i mas gat wan impoten ples long laef blong yumi. (1 Korin 7:29-31) Mo tu, ol trufala Kristin oli bilif strong se God i no save lego olgeta.—2/1, pej 4-6.

• ?Wanem faswan olta we Baebol i tokbaot?

Hemia long Jenesis 8:20, we i tokbaot wan olta we Noa i wokem taem hem i kamaot long sip afta we Bigfala Wota i godaon. Be, ating Ken mo Ebel tu oli yusum olta blong givim presen i go long God. (Jenesis 4:3, 4)—2/15, pej 28.

• ?Olsem wanem sam Kristin oli tekem janis taem sam samting i jenis long laef blong olgeta?

Wok blong samfala i save jenis—no oli save mekem i jenis— nao oli gat moa taem blong joen long wok blong prij. Samfala oli no moa gat bigfala wok insaed long famle, from we maet ol pikinini blong olgeta oli kam bigwan mo oli mared finis, ale oli yusum moa taem long wok blong God no oli tekem moa wok insaed long ogenaesesen blong hem.—3/1, pej 19-22.

• ?Olsem wanem eksampol blong Jona mo aposol Pita i givhan long yumi blong lukluk ol narafala olsem Jeova i lukluk olgeta?

Jona mo Pita tugeta i gat sam rong tingting we yumi evriwan i save, mo tufala i foldaon long sam slak fasin taem samting i traem bilif mo fasin obei blong tufala. Be, i klia se Jeova i lukluk sam gudfala fasin long tufala, mo hem i gohed blong yusum tufala long wok blong hem. Taem narafala i mekem yumi harem nogud no i mekem tingting blong yumi i foldaon, yumi mas traem lukluk nomo long ol gudfala fasin we yumi luk finis long man ya, mo traem luk ol gudfala samting we God i stap faenem long hem.—3/15, pej 16-19.

• ?From wanem sam Baebol oli no folem ol narafala Baebol long saed blong ol namba we oli raetem long Ol Sam?

Long olfala lanwis Hibru, ol namba long Ol Sam oli defren long ol namba we oli putum taem oli tanem hanraet ya i go long lanwis Grik long Baebol ya Septuagin. Ol niufala Baebol oli defdefren long saed ya, from we samfala oli kamaot long Hibru hanraet mo samfala oli folem Septuagin.—4/1, pej 31.