Wok Blong Prij We Neva Mifala i Save Fogetem

“Dei ya i hot tumas mo rod ya we i go antap long hil i longfala we i longfala. I olsem we neva bambae mifala i kasen en blong hem. Afta we mifala i winim sam problem long rod, sloslo mifala i kasem mak blong mifala: hemia vilej ya we i stap longwe olgeta. Nating se mifala i taed bigwan, mifala i glad tumas taem mifala i kilkilim faswan doa mo faenem we man blong haos i wantem lesin long mifala. Long en blong dei, mifala i seremaot finis olgeta buk we mifala i karem i kam mo mifala i statem sam Baebol stadi. Ol man oli wantem tumas blong lanem samting. Naoia mifala i rere blong lego vilej ya, be mifala i promes se bambae mifala i kambak bakegen.”

OL EKSPIRIENS olsem oli kamaot plante long ol grup blong ol man we oli mekem wok olsem fultaem paenia long Meksiko. Olgeta ya oli gat strong tingting blong joen fulwan long wok we Jisas Kraes i givim long ol disaepol blong hem se: “Yufala i mas go talemaot mi . . . gogo yufala i finisim olgeta ples long wol.” (Ol Wok 1:8) Long Meksiko, oli ogenaesem ol spesel trip blong mekem wok blong prij, we oli kolem rod paenia. Ol trip ya i blong kasem ol man we oli laef long ol ples we ol kongregesen oli no stap prij long olgeta oltaem. Ol man ya oli no stap gat janis blong harem gud nius blong Kingdom Blong God. Plante taem, hemia from we ol ples ya oli farawe mo i had blong kasem olgeta. Mo tu, ol trip ya oli givhan long ol kongregesen we oli stap longwe, mo we teritori we oli prij long hem i bigwan tumas.

Blong jusumaot ol ples long kantri ya we bambae ol paenia oli go long olgeta, hed ofis blong ol Witnes Blong Jeova i lukluk long ol nid blong teritori ya. * Biaen, oli sanem ol grup blong ol spesel paenia i go long ol ples we oli jusumaot. Ol paenia ya oli yusum ol bigfala trak we oli naf blong go long ol rod we oli nogud mo we oli no gat kolta long olgeta. Ol trak ya oli karem ol buk mo ol paenia oli save slip long olgeta tu.

Glad Blong Joen Long Wok Ya

Long manis Oktoba 1996, hed ofis i stat blong singaot ol narafala man we oli talemaot gud nius, blong olgeta tu oli joen wetem ol spesel paenia long wok ya. Sam pablisa wetem sam fultaem paenia we oli glad blong go prij long ol ples ya, oli joen long wok ya long sam haf blong wok ya. Sam oli wok wetem ol kongregesen we oli stap long hafrod, oli prij long teritori blong olgeta mo oli halpem ol man we oli intres blong oli gru moa long save blong olgeta long Baebol. Plante yangfala pablisa mo paenia oli glad blong joen long wok ya, mo ol ekspiriens we oli kasem oli rili leftemap tingting blong olgeta.

Eksampol, Abimael, wan yangfala Kristin i wok long wan kampani blong mobael fon. Hem i kasem gudfala pei long wok blong hem. Abimael i mekemap tingting blong hem blong joen long wok ya blong prij long ol ples farawe. Taem ol bos blong hem oli harem nius ya we hem i rere blong lego wok blong hem, oli wantem givim wan wok we i gud moa long hem, wetem moa mane tu. Ol man we oli wok wetem hem oli traem fosem hem blong tekem wok ya, oli talem se wok ya i wan nambawan janis mo i krangke nomo blong no agri long hem. Be, Abimael i gat strong tingting blong joen tri manis long spesel wok blong prij. Hem i harem gud tumas long wok ya, mo biaen hem i mekemap tingting blong gohed long wok ya. Hem i joen long wan kongregesen we oli nidim moa man blong talemaot Kingdom. Naoia hem i gat wan wok we hem i kasem smol pei long  hem mo hem i lan blong laef long wan fasin we i no nidim plante tumas samting.

Wan narafala eksampol, Julissa i mas wokbaot long bas 22 aoa blong kasem ples we bambae hem i prij long hem. Long las haf blong trip blong hem, hem i mestem laswan bas, mo long dei ya, i no moa gat wan narafala bas we bambae i ron. Be, wan bigfala trak i stap blong tekem ol wokman long wok. Julissa i mekem tingting blong hem i strong mo i askem sipos hem tu i save kam long trak wetem olgeta. I klia se, hem i mas fraet lelebet. Wan woman long medel blong olgeta man. !Taem hem i stat blong prij long wan yangfala man, hem i luksave se man ya i wan Witnes Blong Jeova! Julissa i tingtingbak long taem ya, i se: “!Antap long samting ya, draeva blong trak ya i wan elda long kongregesen we mi mas go long hem!”

Ol Olfala Tu Oli Joen Long Wok Ya

Be, wok ya i no jes blong ol yangfala nomo. Adela, wan olfala sista, i wantem tumas blong spenem moa taem long wok blong prij. Hem i kasem janis ya taem oli singaot hem blong joen long spesel wok ya. Hem i talem se: “Mi glad tumas long wok we oli givim long mi blong mekem. Taswe mi askem long ol elda long kongregesen blong letem mi mi stap longtaem moa. Nating se mi olfala, mi hapi we mi save mekem wok blong Jeova yet.”

Bigfala tangkiu long Jeova mo lav long ol narafala man, i pusum Martha we i gat 60 yia finis, blong joen long wok ya. Hem i luk we grup blong ol paenia we hem i wok wetem olgeta i no save kasem olgeta man. Hemia from we ol rod oli nogud mo ol man oli stap longwe. Taswe hem i pem wan trak we ol paenia oli save yusum. Samting we sista ya i mekem i givhan bigwan blong prij long moa teritori mo serem trutok blong Baebol wetem moa man.

Plante Man Oli Lesin

Olgeta we oli joen long spesel wok blong prij, oli wantem kasem mak ya blong ‘pulum ol man oli kam man blong Jisas.’ Long saed ya, wok blong olgeta i karem nambawan frut. Ol man we oli stap farawe oli lanem trutok blong Baebol we i save sevem laef blong olgeta. (Matiu 28:19, 20) Plante man oli stat blong stadi long Baebol. Ol pablisa we oli manples wetem sam narafala we oli gohed blong stap long ol ples ya oli lukaot long ol Baebol stadi ya. Long sam ples, i gat ol smol grup blong pablisa, mo long sam narafala ples oli stanemap sam smol kongregesen.

Blong kasem ples we oli mas prij long hem, Magdaleno mo ol fren blong hem oli yusum wan taksi. Taem oli stap wokbaot long taksi, oli tekem janis blong prij long draeva blong taksi. “Man ya i talem long mifala we las wik nomo, taem hem i  no stap long haos, sam Witnes Blong Jeova oli kam long haos blong hem. Taem hem i kambak, famle blong hem i talem long hem olgeta samting we oli bin harem. Mifala i talem long hem we mifala i no blong ples ya. Mifala i kamaot long ol defren stet blong kantri, blong mekem spesel wok blong prij mo mifala wanwan i pem rod blong mifala. Draeva ya i sapraes tumas, mo i talem se long wik ya nao bambae hem wetem famle blong hem i stat blong stadi Baebol. Mo tu, hem i givhan long wok ya taem hem i no wantem se mifala i pem hem.”

Mo tu, Magdaleno i sapraes tumas we fulap man Chiapas, we oli laef antap long ol hil, oli glad blong lesin. “Mi wetem waef blong mi, mitufala i serem mesej blong Kingdom wetem wan grup blong 26 yangfala we oli blong Presbiterian Jos. Olgeta evriwan oli lesingud blong 30 menet. Oli karem Baebol blong olgeta, mo mifala i storiangud wetem olgeta long saed blong ol stamba tingting blong Jeova. Bighaf blong ol man ya oli gat Baebol long lanwis blong Tzeltal.” Oli statem sam Baebol stadi we oli stap gohed gud yet.

Fasin Agens i Godaon

Long wan komuniti long Chiapas i gat sam man we oli agensem tok blong Baebol. Taswe, bitim tu yia i no gat man we i prij long olgeta. Teresa, wan woman we i prij fultaem, i makem we sam Witnes oli fraet lelebet blong prij long vilej ya. “Be mifala i sapraes tumas, taem ol man oli glad blong lesin. Taem mifala i finisim teritori ya, i stat blong ren bigwan. Mifala i lukaotem ples blong haed, nao mifala i kam long haos blong wan man we nem blong hem Sebastián. Man ya i glad blong tekem mifala i kam long haos blong hem blong mifala i save haed long ren. Taem mifala i stap insaed, mi askem long hem sipos wan long mifala i visitim hem finis. Taem hem i ansa se nogat, mi mi stat blong prij long hem. Mi statem wan Baebol stadi long buk ya Save Blong Lidim Yu Long Laef We i No Save Finis. * Taem mifala i rere blong go, Sebastián i askem strong long mifala we wota i ron long ae blong hem se mifala i mas kambak blong stadi wetem hem.”

Wan narafala grup blong ol paenia we oli prij long Chiapas oli talem se: “Bigfala tangkiu i go long Jeova from we wok blong mifala i karem gudfala frut. Long faswan wik, mifala i statem 27 [Baebol] stadi; long seken wik, mifala i invaetem ol man blong lukluk video kaset ya The Bible—Its Power in Your Life. Sikisti man oli kam long miting ya. Evri man i laekem tumas video kaset ya. Long en blong hem, mifala i askem ol man sipos oli glad blong joen olsem wan grup blong mekem Baebol stadi. Mifala i sapraes tumas, taem mifala i statem tu grup blong stadi Baebol long vilej ya.

“Afta we mifala i finisim olgeta teritori we mifala i mas wokem, mifala i gobak long vilej ya. Mifala i wantem leftemap tingting blong olgeta we oli  intres mo mifala i wantem luk olsem wanem long tufala Baebol stadi grup. Mifala i invaetem olgeta blong kam long wan pablik tok mo Wajtaoa stadi. Be, i no gat ples we i naf blong holem miting ya. Man we i letem mifala i yusum haos blong hem blong mekem stadi long hem i poenem fingga blong hem i go long yad biaen long haos mo i talem se: ‘Yu save mekem miting ya long yad blong mi biaen long haos.’ ”

Long wiken ya, tufala paenia we i visitim vilej ya wetem olgeta man we oli intres oli glad blong joen long wok blong rerem yad ya blong mekem miting long hem. I gat 103 man we oli kam long faswan miting. Naoia oli stap mekem 40 Baebol stadi long vilej ya.

“Wan Nambawan Ekspiriens”

Olgeta we oli joen long spesel wok ya oli karem nambawan frut long wok blong prij. Be, antap long samting ya, wok ya i givhan long olgeta tu. María, wan yangfala paenia we i joen long spesel wok ya i tokbaot filing blong hem i se: “Wok ya i wan nambawan ekspiriens from tu risen. Mi faenem moa glad long wok blong prij, mo fasin fren blong mi wetem Jeova i kam strong moa. Wan dei, mifala i stap klaem i go antap long wan bigfala hil, mo mifala i taed we i taed. Afta we mifala i askem Jeova blong givhan long mifala, mifala i luk we tok blong Aesea 40:29-31 i tru se: ‘Olgeta we oli stap luk long Hae God blong hem i givhan long olgeta, bambae oli luk we oltaem hem i stap givim paoa long olgeta i stap mekem olgeta oli strong bakegen.’ Ale mifala i kasem teritori ya mo mekem ol Baebol stadi wetem ol man we oli welkamem gud mifala.”

Wan narafala paenia, Claudia, i gat 17 yia nomo, mo i talem se: “Mi kasem bigfala blesing from wok ya. Mi lan blong gat gudhan long wok blong prij, mo samting ya i givim bigfala glad long mi. Mi putum sam mak long saed blong spirit we bambae mi wantem kasem. Mo tu, mi kam bigwan moa long saed blong spirit. Taem mi stap yet wetem papa mama, mama i mekem evri samting blong mi. Naoia, mi gat moa save, mo mi lan blong mekem wok blong mi. Eksampol, bifo mi no laekem blong kakae evri samting. Be naoia we mi lan blong laef long narafala ples, mi no moa komplen from kakae. Spesel wok ya i givhan long mi blong frengud wetem ol narafala. Mifala i serem evri samting we mifala i gat mo mifala i givgivhan long mifala.”

Kasem Glad From Spesel Wok

?Wanem frut i kamaot from spesel wok ya? Long stat blong 2002, samwe long 28,300 paenia oli joen long wok ya. Oli mekem bitim 140,000 Baebol stadi, spenem bitim tu milian aoa long wok blong prij. Blong halpem ol man blong lanem trutok blong Baebol, oli seremaot klosap 121,000 buk mo klosap 730,000 magasin. Sam paenia oli mekem 20 Baebol stadi mo samfala oli mekem moa.

Ol man we oli haremgud from kaen fasin ya blong ol Witnes ya, oli gat bigfala tangkiu from traehad blong ol man ya we oli karem tok blong Baebol long olgeta. Nating se oli pua tumas, plante oli wantem we ol pablisa oli tekem presen mane blong olgeta. Wan woman we i pua mo i gat 70 yia finis, oltaem i wantem givim smol samting long ol paenia we oli visitim hem. Sipos oli traem blokem hem, hem i krae. Wan famle we i pua tumas i talem long ol paenia se faol blong olgeta i putum plante eg we oli blong ol paenia ya, mo oli pusum olgeta blong tekem ol eg ya.

Samting we i impoten moa, hemia we ol gudfala man ya oli soem fasin tangkiu from ol samting long saed blong spirit. Eksampol, wan yangfala woman i stap wokbaot tri aoa haf blong go long ol Kristin miting, mo hem i neva mestem wan miting. Mo wan olfala woman we i intres, nating se leg blong hem i nogud, hem i wokbaot tu aoa blong kasem ol tijing blong Baebol long visit blong seket elda. Blong kasem moa frut from ol tijing blong Baebol, sam man we neva oli skul oli wantem lanem blong rid mo raet. Ol man ya oli kasem bigfala blesing from traehad blong olgeta.

Long buk blong Ol Wok, Luk i tokbaot wan vison we aposol Pol i luk, hem i se: “Wan man Masedonia i stap stanap, i stap askem strong long hem se: ‘Plis yu kamkros long Masedonia, yu givhan long mifala.’ ” Pol i glad tumas blong mekem samting ya. Tede, plante man oli soem sem tingting olsem Pol, oli rere blong go long ol ples long Meksiko we oli stap farawe long ol narafala ples, blong talemaot gud nius ‘gogo oli finisim olgeta ples long wol.’—Ol Wok 1:8; 16:9, 10.

[Ol Futnot]

[Tok blong pija long pej 9]

Plante Witnes blong Meksiko oli joen long spesel wok blong prij