“Ol Man Blong Talemaot Kingdom We Oli Wok Strong”—Oli Glad Blong Joen Tugeta

OL TRABOL long saed blong gudfala fasin, ekonomi, mo politik oli stap seksekem fulwol. Nomata long ol trabol ya, ol Witnes blong Jeova oli joen tugeta blong folem wan program blong tri dei long asembli ya “Ol Man Blong Talemaot Kingdom We Oli Wok Strong.” Stat long Mei 2002, ol Witnes oli holem ol asembli ya raon long wol.

Yes, ol asembli ya oli rili mekem man i haremgud. I gud yumi tingtingbak long nambawan program ya we i stanap long Baebol.

Faswan Dei i Soemaot Fasin Blong Jisas Blong Wok Strong

Stamba tok blong faswan dei blong asembli hemia “Folem Fasin Blong Masta Jisas We i Wok Olsem Faea We i Stap Laet.” (Jon 2:17) Tok ya “Glad Tumas Blong Joen Wanples Olsem Ol Man Blong Talemaot Kingdom” i singaot ol man we oli stap blong oli haremgud, oli filim glad ya we oltaem i joenem ol man blong God long ol asembli. (Dutronome 16:15) Afta long tok ya oli askem sam kwestin long sam man we oli wok strong blong talemaot Kingdom.

Tok ya “Luk Long Jeova Blong i Mekem Yu Yu Glad” i eksplenem ol wanwan vas blong Ol Sam 37:1-11. Tok ya i pulum yumi se yumi no mas “jalus” taem yumi luk we ol man nogud oli win. Nating se ol rabis man oli tok nogud long saed blong yumi, be bambae Jeova i soemaot klia hu ya ol trufala man blong hem. Tok ya “Soemaot Fasin Tangkiu” i tokbaot fasin blong soem tangkiu long God. Olgeta Kristin oli mas mekem “wan sakrefaes long [Jeova], we i blong presem hem.” (Hibrus 13:15, NW ) Be i tru se, hamas taem we yumi spenem long wok blong Jeova i dipen long fasin tangkiu we yumi gat mo long ol samting long laef blong yumi tu.

Bigfala tok blong dei ya hemia “Ol Man Blong Talemaot Kingdom Oli Olsem Faea We i Laet.” Tok ya i poenemaot Jisas Kraes olsem beswan eksampol long fasin blong wok strong. Kingdom i stat rul long heven long 1914, mo biaen ol Kristin oli mas wok strong blong talemaot gud nius. Man we i givim tok ya i tokbaot asembli ya we oli holem long Cedar Point, Ohio, U.S.A., long 1922, mo hem i mekem yumi tingtingbak long impoten tok ya: !“Talemaot King Mo Kingdom Blong Hem”! Ol man we oli stap tru long God oli wantem tumas blong talemaot gudfala nius blong Kingdom long olgeta nesen.

Tok we oli givim long aftenun blong faswan dei se “Yumi No Mas Fraet, Yumi Save Se Jeova i Stap Wetem Yumi” i soem we Setan i traehad moa blong kasem ol man blong God. Nomata long ol traem we yumi stap fesem, be gudfala eksampol blong ol man bifo mo tede we oli holemstrong long bilif blong olgeta i leftemap tingting blong yumi blong yumi no fraet taem yumi fesem ol traem ya.—Aesea 41:10.

Long haf blong program we i kam biaen i gat wan tok we i gat tri haf blong hem, taetel blong hem se “Profet Tok Blong Maeka i Mekem Yumi Strong Blong Wokbaot Long Nem Blong Jeova.” Faswan man we i givim tok i skelem taem blong Maeka wetem taem blong yumi long saed blong ol fasin we oli go nogud olgeta, apostasi, mo fasin blong wantem tumas ol samting blong bodi. Hem i talem se: “Hop blong yumi long fiuja i save stap strong sipos yumi  rere blong obei wetem fulhat blong yumi mo sipos yumi meksua se fasin blong yumi i tabu oltaem mo laef blong yumi i fulap long ol wok we God i glad long hem—mo yumi save stap strong tu sipos yumi neva fogetem se dei blong Jeova bambae i mas kamtru.”—2 Pita 3:11, 12.

Man we i givim namba tu haf blong tok ya we i gat tri haf blong hem, i soem jajmen we Maeka i talemaot long ol lida blong Juda. Ol lida ya oli mekem i nogud tumas long ol puaman we oli no naf blong protektem olgeta wan. Be tu, Maeka i talem se bambae trufala wosip i win. (Maeka 4:1-5) Wetem paoa blong tabu spirit blong Jeova yumi gat strong tingting blong talemaot nambawan mesej ya blong hop. ?Nao olsem wanem sipos yumi harem se wan sik no sam narafala problem i blokem yumi? Namba tri man we i givim tok i talem se: “Ol samting we Jeova i askem long man i stret nomo mo evri man i naf blong mekem.” Nao hem i gohed i tokbaot ol defren poen blong Maeka 6:8, (NW ) we i talem se: “?Mo Jeova i askem wanem long yu from? Yu mas wokem stret fasin, yu mas laekem kaen fasin, mo yu mas wokbaot wetem God we tingting blong yu i stap daon. Hemia nomo hem i wantem.”

Ol fasin blong wol we oli stap go moa nogud oli save gat paoa long ol Kristin, taswe yumi evriwan i bin glad blong lesin tok ya “Lukaot Long Hat Blong Yu Blong Stap Klin Gud.” Eksampol, sipos yumi stap klin bifo mared, bambae yumi mekem we mared blong yumi i hapi. Yumi ol Kristin, yumi neva mas gat tingting ya se maet wan dei yumi save mekem nogud long saed blong seks.—1 Korin 6:18.

Tok ya “Lukaot Gud Blong No Giaman” i soem se i waes blong ronwe long toktok blong ol man blong apostasi we tok blong olgeta i olsem posen, i nogud, i no tru fulwan, mo i giaman stret. (Kolosi 2:8) Long sem fasin, yumi no mas giaman long yumi wan wetem tingting ya se sipos yumi mekem ol nogud fasin we yumi nomo i wantem, bambae yumi no save kasem trabol.

“Mekem Wosip Long Trufala God Nomo,” hemia taetel blong las tok blong faswan dei ya. !Wol i kam mowas long evri ples, taswe i gud tumas blong save se i no longtaem nao bambae Jeova i stanemap wan niufala wol we i stretgud! ?Hu bambae i save laef long wol ya? Olgeta  nomo we oli wosipim Jeova. Blong kasem mak ya, sosaeti i prentem wan niufala buk we bambae i givhan long yumi, long ol pikinini blong yumi, mo long ol man we oli stadi Baebol wetem yumi. Nem blong buk ya Worship the Only True God. !Yumi glad tumas blong kasem niufala buk ya!

Namba Tu Dei i Makem Fasin Blong Wok Strong Long Ol Gudfala Samting

Stamba tok blong namba tu dei blong asembli hemia “Wok Strong Blong Mekem Ol Gudfala Fasin.” (1 Pita 3:13) Man we i givim faswan tok i tokbaot vas blong dei. Hem i soem se sipos yumi mekem vas blong dei oltaem mo yumi tinghae long hem, bambae yumi wok strong moa.

Biaen i gat tok ya we i gat tri haf blong hem, we taetel blong hem se “Ol Man Blong Talemaot Kingdom We Oli Tinghae Long Wok Blong Prij.” Faswan haf i soem se i impoten blong tijim tok blong God long fasin we i stretgud. (2 Timoti 2:15) Taem yumi yusumgud Baebol, yumi letem hem ‘i wok’ long laef blong ol man. (Hibrus 4:12) Yumi mas lidim intres blong man i go long Baebol mo yumi mas pulum tingting blong olgeta blong oli bilif long samting we Baebol i tijim. Namba tu haf i pulum yumi blong yumi gobak bakegen mo bakegen blong visitim ol man we oli intres. (1 Korin 3:6) Yumi mas reregud fastaem mo yumi mas gat strong tingting blong gobak kwiktaem blong visitim ol man we oli intres. Namba tri haf blong tok i talem se i gud blong tingbaot evri man we yumi prij long olgeta, olsem man we oli save kam disaepol. Sipos yumi askem ol man blong stadi Baebol long faswan taem we yumi prij long olgeta, bambae yumi save kasem glad ya blong halpem olgeta blong kam disaepol.

 Nekis tok hemia “?From Wanem Yumi Mas ‘Prea Oltaem?’ ” Baebol i pulum ol Kristin blong oli lukluk i go long God blong hem i lidim laef blong olgeta. Yumi mas pemaot taem blong prea yumi wan long God. Antap long samting ya, yumi mas gohed blong prea, from we maet bambae Jeova i letem sam taem i pas bifo we hem i ansa long prea blong yumi.—Jemes 4:8.

Tok ya “Ol Storian Long Saed Blong Spirit Oli Leftemap Tingting” i pulum yumi blong yusum toktok blong yumi blong leftemap tingting blong yumi wan mo narafala tu. (Filipae 4:8) Ol hasban mo waef mo ol pikinini oli mas storian tugeta long saed blong spirit evri dei. Blong kasem mak ya, i gud sipos ol famle oli traehad blong kakae tugeta wan taem evri dei, olsem nao bambae oli gat janis blong storiangud tugeta.

Program blong moning i finis wetem tok ya “Givim Laef Long Jeova Mo Baptaes Blong Kasem Laef.” Olgeta we oli tekem baptaes oli kasem stret save fastaem, oli bin soemaot bilif, oli tanem tingting blong olgeta, oli lego ol rabis fasin, mo oli givim laef blong olgeta i go long God tru long prea. Man we i givim tok i talem se, afta we olgeta ya oli baptaes, oli mas gohed blong kam bigman long saed blong spirit mo oli mas holem fasin ya blong wok strong mo naesfala fasin blong olgeta.—Filipae 2:15, 16.

Long aftenun, tok ya “Mekem Tingting Blong Yu i Stap Daon Mo Ae Blong Yu i Klia Gud” i soem tu impoten samting. Sipos yumi gat tingting daon i min se yumi luksave ol samting we yumi no naf blong mekem, mo yumi luksave wanem posisen blong yumi long fored blong God. Tingting daon i halpem yumi blong gat wan ae we i “gud”—i lukluk i go long Kingdom blong God nomo, i no stap lukluk ol samting blong bodi. Sipos yumi folem advaes ya yumi no mas wari, from we Jeova bambae i givim ol samting we yumi nidim.—Matiu 6:22-24, 33, 34.

Nekis man we i givim tok i soem from wanem yumi mas “Trastem Jeova Fulwan Long Taem Blong Trabol.” ?Olsem wanem yumi save win nating se yumi mas faet agensem ol slak fasin blong yumi, no ol trabol long saed blong mane no blong helt? Yumi mas askem long Jeova waes blong hem we i wokgud mo yumi mas askem help blong ol narafala tu. Yumi no mas letem fraet i winim yumi no letem tingting blong yumi i foldaon, be yumi mas ridim Baebol blong mekem tras blong yumi long God i kam strong moa.—Rom 8:35-39.

Stamba tok blong laswan tok we i gat tri haf long hem long asembli ya, hemia “Ol Traem Oli Soemaot Sipos Bilif Blong Yumi i Strong Gud Mo i Tru.” Faswan haf i talem bakegen long yumi se olgeta trufala Kristin oli mas fesem hadtaem. Ol hadtaem ya oli givim witnes long fes blong ol man, oli mekem bilif blong yumi i kam strong moa, mo oli givim wan janis long yumi blong soemaot se yumi stap tru long God. I tru se, yumi no wantem putum laef blong  yumi wan long denja blong nating nomo, be bambae yumi no wantem yusum sam rod we oli go agensem Baebol jes blong traem ronwe long ol hadtaem.—1 Pita 3:16.

Man we i mekem namba tu haf blong tok ya i tokbaot fasin blong no tekem saed blong faet mo politik. Ol Kristin blong faswan handred yia oli no mekem sam spesel kampen agensem ol faet blong wol, be oli luksave se faswan man we oli mas stap tru long hem, hemia God. Long sem fasin tede, ol Witnes blong Jeova oli holem rul ya se: “Yufala i no man blong wol ya.” (Jon 15:19) Enitaem nomo yumi save fesem sam traem we bambae oli pusum yumi blong tekem saed blong faet mo politik. Taswe, i gud we ol famle oli lukluk bakegen wanem tingting blong Baebol long saed blong samting ya. Namba tri haf blong tok i soem klia se mak blong Setan i no blong kilim yumi evriwan i ded, be hem i wantem pulum yumi blong yumi no moa stap tru long God. Sipos yumi stanap strong taem yumi fesem ol traem olsem ol tok jik, ol man we oli pusum yumi blong mekem fasin nogud, ol trabol we oli mekem yumi harem nogud bigwan long filing blong yumi, mo ol sik, bambae yumi presem Jeova.

Nambawan tok ya “Kam Klosap Long Jeova” hem i taetel blong laswan tok blong dei. Taem yumi save ol fofala stamba fasin blong Jeova, ol fasin ya oli pulum yumi blong kam klosap long God. Hem i gat olgeta paoa, mo i yusum paoa ya blong protektem ol man blong hem, speseli long saed blong spirit. Stret fasin blong Jeova i no mekem i strong tumas long ol man, be i pulum Jeova blong givim hop blong laef we i no save finis long evri man we i stret long fes blong hem. Waes fasin blong Jeova i klia nomo taem yumi luk olsem wanem hem i yusum ol man blong raetem Baebol. Be beswan fasin blong Jeova we i pulum yumi, hemia lav blong hem, we i pusum hem blong sanem Jisas Kraes blong sevem laef blong ol man. (Jon 3:16) Man we i givim tok ya i finisim tok blong hem taem hem i talemaot se wan nambawan niufala buk i kamaot, hemia Draw Close to Jehovah.

 Namba Tri Dei: Wok Strong Blong Mekem Ol Gudfala Wok

Stamba tok blong namba tri dei blong asembli hemia “Ol Man We Oli Strong Blong Mekem Ol Gudfala Wok.” (Taetas 2:14) Program blong moning i stat wetem wan famle we i storebaot vas blong dei. Biaen i gat tok ya “?Yu Yu Stap Trastem Gud Jeova?” Ol nesen oli mestem taem oli putum tras blong olgeta i go long prapa waes mo paoa blong olgeta. Defren olgeta, ol man blong Jeova oli no fraet mo oli glad blong putum tras blong olgeta i go long Jeova, nating se i gat plante trabol.—Ol Sam 46:1-3, 7-11.

Tok ya “Ol Yangfala—Wokem Wan Gudfala Fiuja Long Ogenaesesen Blong Jeova” i ansarem kwestin ya se: ?Olsem wanem wan yangfala i save haremgud long laef blong hem? Bambae hem i no save haremgud sipos i stap ronem mane, ol samting blong bodi, mo haefala posisen. Bigman we i Wokem yumi i singaot yumi blong tingbaot hem taem yumi yang yet. Man we i givim tok i askem kwestin long sam man we oli wok strong blong Jeova taem oli yang yet, mo yumi filim glad blong olgeta taem oli ansa. !Biaen yumi haremgud tumas taem yumi kasem niufala traket ya, Youths—What Will You Do With Your Life? Traket ya i blong givhan long ol yangfala Witnes blong oli wokem fandesen naoia blong stap olwe long ogenaesesen blong Jeova!

Biaen i gat nambawan drama ya “Stanap Strong Long Taem Blong Trabol.” Hem i storebaot wok blong Jeremaea, stat long taem we hem i yang yet go kasem taem we Jerusalem i lus, wan samting we hem i bin talemaot finis bifo. Jeremaea i harem se hem i no naf blong mekem wok ya, be hem i finisim wok blong hem nating se hem i kasem ol traem, mo Jeova i sevem hem.—Jeremaea 1:8, 18, 19.

Tok we i biaenem drama hemia “Folem Fasin Blong Jeremaea—No Fraet Blong Talemaot Tok Blong God.” Tede, ol man oli giaman mo oli tok agensem ol man we oli talemaot Kingdom. (Ol Sam 109:1-3) Be olsem Jeremaea, yumi save holem wan strong tingting sipos yumi glad long Tok blong Jeova. Mo yumi sua fulwan we olgeta man we oli stap agensem yumi bambae oli no save win.

Pablik tok i kam long stret taem blong hem, taetel blong hem se “Fasin Blong Wol Ya i Stap Jenis.” Ol bigbigfala samting blong sapraes oli hapen long taem blong yumi. Baebol i talem finis se bambae ol samting olsem oli mas kamaot, wetem tok ya “pis mo seftaem,” mo bambae samting ya i lidim yumi long dei blong jajmen blong God we i mekem ol man oli fraet. (1 Tesalonaeka 5:3, NW ) Dei ya bambae i karem ol nambawan jenis—i finisim ol faet, fasin blong brekem loa, raf fasin, mo sik tu. Yumi no mas trastem wol blong tede, i moa gud yumi fasgud long God mo yumi holem klin fasin.

Biaen yumi luk ol bigfala poen blong Wajtaoa stadi mo yumi folem laswan tok blong asembli ya se, “Mekem Plante Gudfala Wok Olsem Ol Man Blong Talemaot Kingdom We Oli Wok Strong.” Man we i givim tok ya i soem olsem wanem program blong asembli ya i givim paoa long yumi long saed blong spirit mo i pusum yumi blong trastem Jeova. Lastok blong hem i pulum yumi blong stap klin, soem lav, mo wok strong blong talemaot Kingdom blong God.—1 Pita 2:12.

Olsem ol man blong Jeova long taem blong Nehemaea, ating taem yumi bin gohom yumi glad tumas from ol nambawan blesing long saed blong spirit we yumi kasem long distrik asembli ya “Ol Man Blong Talemaot Kingdom We Oli Wok Strong.” (Nehemaea 8:12) ?Olsem wanem? ?Asembli ya i mekem yu yu haremgud mo i givim strong tingting long yu se yu mas gohed blong wok strong blong talemaot Kingdom? Ating yes.

[Bokis/Foto blong pija long pej 23]

!Wan Niufala Buk Blong Stadi!

Long en blong faswan dei blong asembli, olgeta man we oli stap, oli glad tumas blong kasem niufala buk ya Worship the Only True God. Buk ya, oli wokem hem blong stadi wetem ol man we oli flatem finis buk ya Save Blong Lidim Yu Long Laef We i No Save Finis. Yes, bambae niufala buk ya i mekem bilif blong “olgeta we oli stret blong kasem laef blong olwe” i kam strong moa.—Ol Wok 13:48, NW.

[Credit Line]

Image on book cover: U.S. Navy photo

[Bokis/Foto blong pija long pej 24]

I Givhan Blong Kam Klosap Moa Long God

Man we i givim laswan tok long namba tu dei blong asembli i talem se wan niufala buk i kamaot, hemia Draw Close to Jehovah. Buk ya i gat fo stamba haf blong hem, mo evri haf i laenap wetem wan long ol bigfala fasin blong Jeova—paoa, stret fasin, waes, mo lav. Long fofala haf blong buk ya, i gat wan japta we i soem olsem wanem Jisas Kraes i givim wan nambawan eksampol taem hem i folem ol fasin ya blong God. Mak blong buk ya i blong givhan long yumi mo long ol man we oli stadi Baebol wetem yumi, blong yumi kam klosap moa long Jeova God.

[Bokis/Foto blong pija long pej 26]

Hem i Lidim Ol Yangfala Long Saed Blong Spirit

Long namba tri dei blong asembli yumi kasem wan spesel traket, nem blong hem, Youths—What Will You Do With Your Life? Traket ya i blong givhan long ol yangfala Witnes blong Jeova blong oli tekem ol gudfala disisen long saed blong fiuja blong olgeta. Niufala traket ya i givim ol advaes we oli stanap long Baebol, blong pulum ol yangfala blong mekem wok blong Jeova blong olwe.