Hem i Holemstrong Oltaem Mo i Kasem Blesing

Plante man we hat blong olgeta i stret oli wantem tumas we ol famle no fren blong olgeta oli lanem ol samting we God i wantem nao oli save kasem wan laef we i hapi. Taem wan man i givim laef blong hem i go long God, plante taem, ol narafala oli bin halpem hem. Ol yangfala mo ol olfala we oli soem gudfala fasin, oli halpem man ya blong tekem wan gudfala disisen olsem. Samting ya i hapen long Jearim, wan yangfala gel long Meksiko. Long taem blong wan spesel dei asembli blong ol Witnes blong Jeova, Jearim i givim wan pepa i go long ol brata. Pepa ya i rid olsem:

“Mi wantem serem glad blong mi wetem yufala. Bambae mi talem long yufala from wanem mi mi glad. Eitin yia bifo, taem mi no bon yet, papa mama blong mi, tufala i lanem trutok. Mama blong mi i gohedgud, mo biaen mi wetem brata blong mi tu, mifala i gohedgud long trutok. Mitrifala i stap prea long Jeova tugeta se bambae, papa blong mi tu i kam long rod blong laef. Eitin yia i pas finis, mo tede i wan spesel dei blong mifala. Tede papa blong mi i tekem baptaes. Mi tangkiu long Jeova from we en blong wol i no kam yet, mo papa blong mi i save tekem baptaes. !Tangkiu Jeova!”

Taem ol yia oli pas, ating famle blong yangfala gel ya i bin tingbaot stamba rul we i stap long vas blong 1 Pita 3:1, 2, we i talem se: “Yufala ol woman we i mared, yufala i mas obei long ol man blong yufala. Nao sipos ol man blong yufala oli no bilif long tok blong God, be bambae fasin nomo blong yufala i save pulum olgeta blong oli bilif. Taem ol man blong yufala oli luk we fasin blong yufala i klin gud, mo yufala i gat ona, hemia i naf blong pulum olgeta. Bambae i no nid blong yufala i talem wan samting long olgeta.” Mo ating yangfala Jearim i mekem vas ya blong Dutronome 5:16 i wok long laef blong hem, i se: “Oltaem bambae yufala i mas ona long papa mo mama blong yufala, olsem we mi [Jeova] mi talem finis long yufala.” From we Jearim mo famle blong hem oli mekem ol advaes olsem i wok long laef blong olgeta, mo oli stap wet long Jeova wetem longfala tingting, oli kasem blesing.