?Yu Yu Rimemba?

?Yu yu bin glad blong ridim ol Wajtaoa we oli kamaot long ol manis we i jes pas? Ale, traem luk sipos yu save ansa long ol kwestin ya:

• ?Olsem wanem ‘paoa blong tingting’ i save lukaot long yu? (Ol Proveb 1:4)

Paoa blong tingting i wonem yumi long ol denja long saed blong spirit mo i pulum yumi blong mekem plan blong folem gudfala rod. Eksampol, long ples blong wok bambae yumi blokem ol man we oli pulum yumi blong slip olbaot. Paoa blong tingting i givhan long yumi blong luksave se ol Kristin brata sista blong yumi oli sinman, ale bambae yumi no hareap tumas blong talem no mekem wan samting sipos oli mekem yumi harem nogud. Mo tu, paoa blong tingting i halpem yumi blong no laekem tumas ol samting blong bodi we i save pulum yumi blong gowe long rod long saed blong spirit.—8/15, pej 21-24.

• ?Olsem wanem blong kam wan gudfala man we i kea long ol man raonabaot long hem?

I gat tu rod blong folem: yumi mas givim long gladhat blong yumi, mo yumi mas soem tangkiu taem narafala i mekem no givim samting long yumi. Long taem blong trabol, i gud tumas blong gat ol man we oli kea raonabaot long yumi. Ol Witnes blong Jeova oli traehad blong kea long ol man raonabaot long olgeta taem oli givim woning long ol narafala se taem ya we God bambae i finisim ol rabis fasin, i klosap nao.—9/1, pej 4-7.

• ?Folem tijing blong Baebol, hu ya ol trufala tabu man, mo olsem wanem bambae oli halpem ol man?

Olgeta Kristin blong faswan handred yia, oli ol trufala tabu man we God nao i jusum olgeta. I no ol man no sam spesel ogenaesesen we oli naf blong talem se ol man ya oli tabu. (Rom 1:7) Taem ol tabu man oli kasem laef bakegen long heven, oli wok wetem Kraes blong blesem ol man blong bilif we oli stap long wol. (Efesas 1:18-21)—9/15, pej 5-7.

• ?Save long saed blong ol resis long Gris blong bifo i save halpem ol Kristin olsem wanem?

Tufala aposol ya Pita mo Pol, tufala i yusum ol pijatok long saed blong ol resis blong bifo. (1 Korin 9:26; 1 Timoti 4:7; 2 Timoti 2:5; 1 Pita 5:10) Ol man blong resis blong bifo oli mas gat wan gudfala man blong trenem olgeta, oli mas bos long olgeta samting, mo oli mas traehad blong kasem mak. Ol samting ya oli tru nomo long ol Kristin we oli traehad long saed blong spirit tede.—10/1, pej 28-31.

• ?Taem famle i muv i go long narafala kantri, wanem nao ol traem mo ol blesing we oli kasem?

Plante pikinini oli kwik moa blong lanem wan niufala lanwis, nao papa mama blong olgeta i save faenem i had blong kasemgud tingting mo fasin blong ol pikinini blong olgeta. Mo maet ol pikinini oli no kasem save klia ol tijing blong Baebol long lanwis blong papa mama blong olgeta. Nating se i olsem, famle i save joengud sipos papa mama i tijim lanwis blong tufala long ol pikinini blong tufala. Samting ya bambae i mekem we ol pikinini oli gat save long tu lanwis mo tu defren kalja.—10/15, pej 22-26.

• ?From wanem i impoten blong lan blong talem sore?

Taem man i talem sore we i kamaot long hat, fasin ya i wan gudfala rod blong mekem fasin fren we i brok i kamgud bakegen. Baebol i givim ol eksampol we i soem paoa blong fasin ya blong talem sore. (1 Samuel 25:2-35; Ol Wok 23:1-5) Plante taem, taem tu man i rao, i gat fol long tufala saed. Taswe, tufala i mas agri se tufala tugeta i gat fol, mo tufala i mas talem sore.—11/1, pej 4-7.

• ?From wanem i rong blong plei blong winim mane, nating se yumi plei wetem smol mane nomo?

Plelaki i save pusum man blong tingbaot hem wan nomo, gat tingting blong kompetisin, mo wantem tumas blong win, mo Baebol i agensem ol fasin ya. (1 Korin 6:9, 10) Plante man we oli slef blong fasin ya blong plelaki oli stat taem oli yangfala yet mo oli plei wetem smol mane nomo.—11/1, pej 31.

• ?Oli raetem plante buk blong Baebol long lanwis Grik, taswe from wanem i nidim blong tanem Baebol i go long Grik lanwis, mo wanem frut i kamaot from?

Grik lanwis blong tede i defren long Grik lanwis we oli yusum blong raetem Septuagin, mo i defren tu long lanwis we oli yusum blong raetem Kristin Grik Haf blong Baebol. Long ol handred yia we oli pas, plante man oli traehad blong tanem sam haf no ful Baebol i go long lanwis Grik we ol man oli kasem save long hem. Naoia, i gat samwe 30 defdefren Baebol we ol man oli save ridim long lanwis Grik. Sam long ol Baebol ya oli haf nomo, sam oli fulwan. Wan long olgeta we i nambawan, hemia New World Translation of the Holy Scriptures, we oli wokem long 1997.—11/15, pej 26-29.

• ?From wanem ol Kristin oli no nid blong givim taet?

Fasin blong givim taet i kamaot long Loa we God i givim long ol man Isrel, mo fasin ya i blong givhan long laen blong Livae mo ol puaman. (Levitikas 27:30; Dutronome 14:28, 29) Sakrefaes blong Jisas i tekemaot Loa blong Moses mo hemia i minim tu loa blong givim taet. (Efesas 2:13-15) Long faswan handred yia, olgeta Kristin wanwan oli givim samting we oli naf blong givim, mo olsem we olgeta wanwan i jusumaot. (2 Korin 9:5, 7)—12/1, pej 4-6.

• ?Revelesen 20:8 i talem se bambae i gat wan bigbigfala namba blong man we oli folem Setan long laswan traem?

Vas ya i talem se olgeta we bambae oli folem Setan “oli plante tumas, olsem sanbij klosap long solwota.” Long Baebol, plante taem oli yusum toktok ya blong minim wan samting we yumi no save kaontem be i no blong minim se namba ya i bigbigwan olgeta. Baebol i talem se olgeta we oli mas kamaot biaen long Ebraham bambae “oli olsem sanbij daon long solwota,” be namba blong olgeta we i no kaontem Jisas Kraes i kasem 144,000 man nomo. (Jenesis 22:17; Revelesen 14:1-4)—12/1, pej 29.