Traem Kasem Tingting Blong God

LONG New York, Yunaeted Stet, Septemba 14, 2002, i wan dei we i hot mo san i saen. Long dei ya, 6,521 man we oli kamaot long ol defren kantri oli kam wanples long Patterson Educational Center mo long tu narafala bilding blong ol Witnes blong Jeova long eria ya. Ol man ya oli joen wanples blong luk ol studen blong namba 113 klas blong Wajtaoa Baebol Skul Blong Gilead oli kasem setifiket blong olgeta. Ol studen ya we oli kamaot long 14 defren kantri, oli kasem trening long faef manis blong oli mekem wok olsem misinari long 19 defren kantri.

Carey Barber, we hem i gat 98 yia finis mo i wan memba blong Hed Kampani blong ol Witnes blong Jeova, i jeaman blong program. Hem i tokbaot olsem wanem Gilead Skul we i gohed klosap 60 yia finis, i trenem plante taosen man blong mekem wok blong misinari. Brata Barber i talem se: “Yumi no stap tok flas taem yumi talem se nambawan frut i kamaot from trening blong olgeta. Ol misinari ya oli givhan long plante handred taosen man raonabaot long wol we oli gat tingting daon, blong oli givim laef blong olgeta i go long Jeova mo joen long trufala wosip mo tabu wok blong Hem.”

Bifo we ol studen ya oli joen long Gilead Skul, plante long olgeta oli soemaot finis we oli wantem mekem moa long minista wok blong olgeta. Wan hasban wetem waef blong hem, tufala i spenem wan yia blong lanem lanwis ya Mandarin, from we tufala i wantem prij long ol man Jaena we oli stap long eria blong olgeta long Kanada. Wan narafala man wetem waef blong hem, tufala i stadi long lanwis Albania, mo biaen tufala i muv i go long Albania blong givhan long ol plante man we oli intres long Baebol. Sam narafala long klas ya, oli kam long Hangari, Guatemala, mo Dominikan Ripablik. Oli bin muv i go long ol kantri ya, from we i nidim moa man blong tijim Tok blong God.

Ol studen ya we oli kasem setifiket blong olgeta, oli go blong mekem misinari wok long Afrika, Is Yurop, Sentrol mo Saot Amerika, mo ol kantri long Is. Be bifo we oli aot, oli kasem advaes se long olgeta samting we oli mekem oli mas traem kasem tingting blong God.

Tingbaot Samting Olsem We God i Stap Tingbaot

Afta long fastok blong hem, Brata Barber i singaot Maxwell Lloyd, wan memba blong Branj Komiti long Yunaeted Stet. Brata Lloyd i tokbaot stamba tok ya “Tingbaot Olgeta Samting Olsem We God i Stap Tingbaot.” Hem i tokbaot eksampol blong Deved mo Pikinini blong God, Jisas. (1 Samuel 24:6; 26:11; Luk 22:42) Hem i mekem ol studen oli tingbaot we ol faef manis we oli stadi long Baebol i trenem olgeta blong kasem tingting blong God. Hem i askem se: “?Taem yu stadi Baebol wetem ol man long ples we bambae yu go long hem, bambae yu halpem olgeta blong tingting gud long ol samting olsem we God i stap tingbaot ol samting ya?” Mo long saed blong fasin blong givim advaes long ol narafala, hem i talem long ol studen se: “Yu no mas talem se, ‘Long tingting blong mi, mi mi ting se . . . ’ Defren olgeta, yu mas givhan long ol man blong kasem save tingting blong God. Sipos yu mekem olsem, bambae yu  karem bigfala blesing i go long olgeta we oli wok wetem yu.”

Gerrit Lösch, we i wan memba blong Hed Kampani, i mekem nekis haf long program ya. Hem i tokbaot stamba tok ya “Mi Mi Stap Wetem Yu.” Long tok ya hem i tokbaot we plante taem Jeova i talem long ol gudfala man blong hem se, “Mi mi stap wetem yu.” (Jenesis 26:23, 24; 28:15; Josua 1:5; Jeremaea 1:7, 8) Long taem blong yumi tu, yumi save trastem Jeova sipos yumi stap tru long hem. Brata Lösch i poenemaot se: “?Yu yu wari we maet yu no save faenem ol man we oli wantem stadi long Baebol? Rimemba, Jeova i talem se, ‘mi mi stap wetem yu.’ ?Yu yu wari long ol samting we yu nidim long saed blong bodi? Jeova i talem se: “Bambae mi mi no save livim yu yu stap yu wan. Bambae mi mi no save lego yu samtaem.” (Hibrus 13:5) Long en blong tok ya, brata Lösch i mekem ol studen oli tingbaot we Jisas i promes se bambae hem i stap wetem ol trufala man blong hem long wok blong mekem disaepol.—Matiu 28:20.

Lawrence Bowen, we i wan long ol tija blong Gilead, i tokbaot stamba tok ya se “?Bambae Yu Faenem Sefples Blong Yu Long Faea?” Hem i makem se from ol kwestin we oli stanap long Iden, olgeta we oli wantem givim ona long Jeova nomo, oli fesem hadtaem mo, samtaem, oli kasem traem we i olsem faea. Hem i leftemap tingting blong ol studen blong folem eksampol  blong Jisas. Jisas i faenem trufala sefples from we hem i trastem Jeova mo i rere blong kasem ol traem we Jeova i letem oli kasem hem blong mekem se hem i lanem fulwan fasin blong obei. (Hibrus 5:8, 9) Jeova i olsem man we i yusum faea blong bonem gol blong mekem i klin. Hot blong faea i mas stretgud blong i karemaot doti long gol. I tru se, bilif we i winim traem we i olsem faea i givhan moa long man i bitim gol. ?From wanem? Brata Bowen i talem se: “From we wan strong bilif i save winim eni traem mo i mekem yumi save stanap strong gogo kasem ‘en.’ ”—Matiu 24:13, NW.

Mark Noumair, wan narafala tija blong Gilead, i askem se: “?Bambae Ol Man Oli Glad Long Yu?” Stamba tok blong hem i stanap long 1 Samuel 2:26. Vas ya i tokbaot Samuel olsem wan man we “Hae God i glad moa long hem, mo ol man tu oli glad long hem.” Brata Noumair, i mekem wok olsem misinari long Afrika bitim ten yia. Afta we hem i tokbaot eksampol blong Samuel, hem i talem se: “Yu tu, yu save kam wan man we God i glad long hem, sipos yu stap tru oltaem long wok we hem i givim long yu blong mekem. Hem i givim wan nambawan wok long yu olsem misinari.” Brata Noumair i leftemap tingting blong olgeta long klas ya blong tingbaot wok blong olgeta olsem wan tabu wok we God i trastem olgeta blong mekem, mo blong karem tingting blong God long saed blong wok we oli mekem.

Long ol manis ya we oli stap long Gilead Skul, ol studen oli gat plante janis long wiken blong storian wetem ol man long eria we skul i stap long hem. Oli talemaot “ol bigbigfala wok we God i mekem” olsem we Baebol i tokbaot. (Ol Wok 2:11) Yes, oli save tokbaot ol samting ya long ten defren lanwis. Wan narafala tija blong Gilead, hemia Wallace Liverance, i askem kwestin long wan grup blong ol studen we oli talem ol ekspiriens blong olgeta. Stamba blong tok blong hem se “ ‘Ol Bigbigfala Wok Ya We God i Mekem’ Oli Pusum Man Blong Wantem Mekem Wok.” Hem i makem se: “Long lafet blong Pentekos, spirit [blong God] i pusum olgeta we oli stap long rum antap blong oli tokbaot ‘ol bigbigfala wok ya we God i mekem.’ Tede, semfala spirit ya i wok long olgeta trufala man blong God.” Hem i pusum sam long olgeta blong wantem lanem wan niufala lanwis blong oli save prij long plante moa man.

Sam Advaes We Oli Wokgud

Afta long ol faswan tok ya, tu memba blong branj ofis long Yunaeted Stet, Gary Breaux mo William Young, tufala i askem kwestin long sam memba blong ol branj komiti blong ol defren kantri we ol misinari oli stap mekem wok blong olgeta. Mo tu, tufala i askem kwestin long wan hasban mo waef blong hem, we tufala i mekem wok olsem misinari 41 yia finis. Wan long olgeta i talem se: “Olgeta [misinari] we oli no wantem plante samting, oli stap longtaem moa long wok ya. Oltaem oli tingbaot risen from wanem oli kam long kantri ya. Oli save se oli kam blong talemaot gud nius mo halpem ol man blong kasem save long Jeova.”

David Splane, wan narafala memba blong Hed Kampani, i finisim program ya wetem stamba tok ya “Bambae Yu No Go Farawe Tumas.” ?From we 46 studen oli rere blong go long ol defren kantri raonabaot long wol, tok ya i minim wanem? Brata ya i eksplenem se: “Nomata weples yu yu stap long hem long wol ya, be sipos yu gohed blong stap tru long God, bambae yu stap oltaem long haos blong Hem.” Yes, olgeta Kristin we oli stap tru long God, nomata weples oli laef long hem, oli stap wok long bigfala tempol no haos blong God long saed blong spirit, we i stanap taem Jisas i tekem baptaes long faswan handred yia. (Hibrus 9:9) !Olgeta we oli stap long miting ya oli harem gud long save ya se Jeova i stap klosap long ol trufala man blong hem long wol! Jeova i intres long Jisas taem hem i stap long wol. Long sem fasin, Hem i intres long yumi evriwan mo wok we yumi mekem nomata weples yumi stap long hem. Taswe, long olgeta samting we yumi mekem long wosip blong yumi, yumi neva stap farawe long yumi mo long Jeova mo Jisas.

Long lashaf blong program ya oli ridimaot ol mesej we oli kam long ol brata sista raonabaot long wol, oli talemaot wok we ol studen bambae oli mekem mo oli lesin long leta we klas ya i raetem blong talem tangkiu from trening we oli kasem long Gilead skul. Nao jeaman i finisim program ya we i kasem nambawan en blong hem. Hem i leftemap tingting blong ol niufala misinari ya blong oli gohed long gudfala wok blong olgeta mo stap glad oltaem long wok blong Jeova.—Filipae 3:1.

[Tok blong pija long pej 23]

KAONTEM KLAS YA

Oli kamaot long hamas kantri: 14

Oli go wok long hamas kantri: 19

Hamas studen: 46

Oli gat hamas yia: 35.0

Hamas yia long trutok: 17.2

Hamas yia finis oli prij fultaem: 13.7

[Tok blong pija long pej 24]

Klas Namba 113 Blong Wajtaoa Baebol Skul Blong Gilead

Long ol nem aninit, yumi kaontem ol laen i stat long fored i gobak biaen, mo stat long lefsaed i go raetsaed.

(1) Ligthart, M.; Hosoi, S.; Berktold, A.; Liem, C.; Aoki, J. (2) Baglyas, J.; Bouqué, S.; Bossi, A.; Alton, J.; Escobar, I.; Escobar, F. (3) Stoica, A.; Stoica, D.; Freimuth, S.; Karlsson, M.; LeBlanc, R. (4) Bianchi, R.; Bianchi, S.; Kaminski, L.; Joseph, L.; Paris, S.; LeBlanc, L. (5) Paris, M.; Skidmore, B.; Horton, J.; Horton, L.; Skidmore, G. (6) Liem, B.; Alton, G.; Quirici, E.; Langlois, M.; Steininger, S.; Aoki, H. (7) Langlois, J.; Steininger, M.; Bossi, F.; Kaminski, J.; Bouqué, J.; Ligthart, E.; Hosoi, K. (8) Baglyas, J.; Quirici, M.; Karlsson, L.; Freimuth, C.; Berktold, W.; Joseph, R.