Stap Tru Mo Obei Long Olgeta We God i Putumap

“Jeova i Jaj blong yumi, Jeova i givim loa long yumi, Jeova i King blong yumi.”—AESEA 33:22, NW.

1. ?Wanem sam samting we oli mekem se Isrel bifo i defren long ol narafala nesen?

 LONG 1513 B.K.T., * nesen blong Isrel i stat. Long taem ya, nesen ya i no gat wan bigfala taon blong hem, i no gat prapa graon blong hem, mo i no gat man we i king long olgeta. Ol man blong nesen ya, fastaem oli slef. Be i gat wan narafala samting tu we i mekem se niufala nesen ya i defren. Jeova God we ol man blong nesen ya oli no save luk hem, hem nao i Jaj blong olgeta, hem i givim loa long olgeta, mo hem i King blong olgeta. (Eksodas 19:5, 6; Aesea 33:22, NW ) !I no gat wan narafala nesen we i olsem!

2. ?Wanem kwestin we yumi save askem long saed blong ol man Isrel, mo from wanem ansa blong kwestin ya i impoten long yumi?

² Jeova i no wan God we i olbaot, mo hem i wan God blong pis. From samting ya, yumi save se eni nesen we Jeova i rul long hem, bambae i wok folem wan plan, bambae i no olbaot. (1 Korin 14:33) Hemia nao fasin blong ol man Isrel. ?Be olsem wanem God i save lidim wan kampani blong man long wol ya, taem oli no save luk hem? I gud yumi tokbaot fasin blong Jeova blong rul long nesen ya bifo. Bambae yumi luk olsem wanem wok we God i mekem long medel blong ol man Isrel i makem gud se yumi mas stap tru mo obei long olgeta we Hem i putumap.

Ol Lida Blong Isrel

3. ?Jeova i makemaot hu blong lidim ol man blong hem?

³ Jeova we i stap long heven, hem i King blong ol man Isrel. Be hem i putumap sam man long wol ya we oli holemstrong long hem, blong oli lidim nesen ya. I gat ol jif, hed blong ol wanwan famle, mo ol olfala, we oli mekem wok blong givim advaes mo jajem ol man. (Eksodas 18:25, 26; Dutronome 1:15) Be olgeta nomo oli no save jajem ol man long fasin we i stret gud. Oli no gat fulwan save mo fasin luksave. Oli nidim we God i lidim olgeta. Ol man ya oli sinman, mo oli no save wanem i stap long hat blong ol narafala man blong God. Be nating se i olsem, ol jaj we oli ona gud long God oli save givim gudfala advaes long ol narafala. Hemia from we advaes blong olgeta i stanap long Loa blong Jeova.—Dutronome 19:15; Ol Sam 119:97-100.

4. ?Ol gudfala jaj long Isrel oli mas lukaot gud blong no mekem wanem fasin, mo from wanem?

⁴ Jaj i mas gat save long saed blong Loa, be i gat  plante moa samting tu we oli joen wetem wok blong hem. Ol olfala ya oli no stret gud olgeta. Taswe, oli mas lukaot gud blong stretem eni fasin we maet i mekem se oli no jajem gud ol man. Hemia ol fasin olsem, fasin blong tingbaot olgeta fastaem, fasin blong mekem i moa gud long samfala i bitim ol narafala, mo fasin blong wantem plante tumas samting. Moses i talem long olgeta se: “Bambae yufala i no mas mekem wan fasin long wan man, mo narafala fasin long narafala man, yufala i mas jajem evri man long sem fasin, from we toktok we bambae yufala i talem i no kamaot long yufala, i kamaot long God nomo.” Yes, ol jaj long Isrel oli stap wok long nem blong God. !Hemia wan nambawan blesing we oli mas tinghevi long hem!—Dutronome 1:16, 17.

5. ?Afta we Jeova i putumap ol jaj, hem i mekem wanem bakegen blong lukaot gud long ol man blong hem?

⁵ Jeova i mekem sam narafala samting tu blong lukaot long ol man blong hem long saed blong spirit. Oli no kasem Promes Lan yet, be hem i talem long olgeta blong wokem wan haos tapolen, olsem wan stamba ples blong trufala wosip. Mo tu, hem i putumap ol pris blong oli tijim ol man long saed blong Loa, mo blong oli mekem sakrefaes blong ol anamol i go long God, mo blong oli bonem insens long moning mo long sapa. God i putumap Eron we i bigfala brata blong Moses, blong i kam faswan hae pris long Isrel. Mo hem i putumap ol boe blong Eron blong oli givhan long papa blong olgeta long wok blong hem.—Eksodas 28:1; Namba 3:10; 2 Kronikel 13:10, 11.

6, 7. (a) ?Ol Livaet oli joen wetem ol pris blong mekem wanem? (b) ?Taem yumi tingbaot we wok blong ol Livaet wanwan i defdefren, yumi lanem wanem samting from? (Kolosi 3:23)

⁶ I wan bigbigfala wok blong lukaot long plante milian man long saed blong spirit. Mo ol pris oli no plante. Taswe, Jeova i mekem plan se sam narafala man long laen blong Livae bambae oli givhan long ol pris. Jeova i talem long Moses se: “Yu mas givim ol Livaet ya long Eron mo long ol pikinini blong hem.”—Namba 3:9, 39, NW.

⁷ Ol Livaet oli wok folem wan gudfala plan. I gat tri famle blong olgeta, famle blong Geson, Kohat, mo Merari. Wanwan long olgeta i gat prapa wok blong hem. (Namba 3:14-17, 23-37) Maet i luk olsem se sam wok i moa hae long ol narawan, be olgeta evriwan oli impoten. Ol Livaet long famle blong Kohat oli stap wok klosap long tabu bokis blong kontrak mo ol samting insaed long haos tapolen. Be, nomata sipos ol Livaet oli stap long famle blong Kohat no long wan narafala famle, olgeta evriwan oli kasem wok we i wan nambawan blesing long olgeta. (Namba 1:51, 53) Sore tumas, sam long olgeta oli no tinghae long nambawan wok ya. Oli no stap tru mo obei long olgeta we God i putumap. Oli stat komplen mo soemaot flas tingting, oli wantem haenem mo paoa nomo, mo oli jalus. Wan long olgeta we hem i foldaon long ol nogud fasin ya, hemia Kora.

“!Naoia Yufala i Stap Traem Tekem Wok Blong Pris Tu!”

8. (a) ?Hu ya Kora? (b) ?Ating wanem samting nao we i mekem se Kora i gat tingting blong man, i no tingting blong God, long saed blong ol pris?

⁸ Kora i no hed blong laen blong Livae, mo hem i no hed blong famle blong Kohat tu. (Namba 3:30, 32) Be, hem i wan jif we ol man Isrel oli respektem hem. Maet wok blong Kora i mekem se hem i joen plante wetem Eron mo ol boe blong hem. (Namba 4:18, 19) From we hem i stap lukluk ol slak fasin blong ol man ya, maet hem i stap tingting se: ‘!Ol pris ya oli no stret man nating! ?Weswe mi mas obei long olgeta? I no longtaem i pas, Eron i wokem pija blong wan smol buluk long gol.  Smol buluk ya i pulum ol brata blong mi blong mekem wosip long ol aedol. !Be naoia, Eron ya, brata blong Moses, i hae pris! !Moses i wantem mekem i moa gud long hem from we hem i stret brata blong hem! ?Mo olsem wanem long Nadab mo Abihu, tufala boe blong Eron? !Jeova i kilim tufala i ded finis from we tufala i no tinghae nating long wok blong tufala!’ * (Eksodas 32:1-5; Levitikas 10:1, 2) Nomata se Kora i bin talem wanem, be i klia se hem i stap gat tingting blong man, i no tingting blong God, long saed blong ol pris. Samting ya i lidim hem blong girap agensem Moses mo Eron. Long fasin ya, hem i girap agensem Jeova tu.—1 Samuel 15:23; Jemes 1:14, 15.

9, 10. ?Kora mo ol stronghed we oli joen wetem hem oli talem wanem tok agensem Moses, mo from wanem oli mas save se i no stret blong mekem olsem?

⁹ From we Kora i wan bigman long Isrel, i no had blong hem i pulum sam narafala oli kam long saed blong hem. Ale, hem wetem Datan mo Abiram, trifala i pulum 250 man we oli gat sem tingting olsem trifala ya. Ol man ya evriwan oli ol jif blong Isrel. Grup ya i go luk Moses mo Eron, nao oli talem se: “Yumi evriwan long kampani ya i blong Hae God, mo hem i stap wetem yumi evriwan. ?From wanem yutufala i putumap yutufala bakegen, se yutufala i hae moa long mifala?”—Namba 16:1-3.

¹⁰ Ol stronghed ya oli mas save se i no stret blong girap agensem Moses we i stap lidim olgeta. I no longtaem bifo long hemia, Eron mo Meriam i bin mekem samting ya. !Yes, tufala ya i bin talem sem toktok olsem Kora! Namba 12:1, 2 i talemaot tok blong tufala se: “Hae God i no stap toktok wetem Moses nomo. Hem i stap toktok wetem mitufala tu.” Be Jeova i stap lesin. Nao hem i talem long Moses, Eron, mo Meriam blong trifala i kam long doa blong haos miting, ale hem bambae i soemaot man we hem i jusum olsem lida. Nao, long klia fasin, Jeova i talem se: “Sipos i gat wan man we i profet nomo i stap wetem yufala, bambae mi mi stap kamtru long hem long ol vison blong hem, mo bambae mi stap toktok long hem long ol drim blong hem. Be Moses ya, hem i hae moa long profet. Hem i spesel man blong wok blong mi, mo mi stap toktok wetem hem long narafala rod olgeta. Yufala i laen blong Isrel, yufala i man blong mi, mo mi mi putum hem blong i lukaot long yufala evriwan.” Nao, Jeova i mekem sik ya leprosi i kasem Meriam blong smoltaem.—Namba 12:4-7, 10.

11. ?Moses i mekem wanem taem Kora i tok agensem hem?

¹¹ Kora mo olgeta we oli kam long saed blong hem oli mas save long samting ya we i bin hapen long Meriam. Taswe, i no gat wan eskius we oli save talem from stronghed fasin blong olgeta. Be Moses i gat longfala tingting, mo hem i traem pulum olgeta blong tingting gud. Hem i talem long olgeta blong traem tinghae long ol nambawan wok we oli gat. Hem i se: “God blong yumi, hem i bin makemaot yufala long ol narafala laen ya blong yumi, blong yufala i save kam klosap long hem. . . . ?Yufala i ting se hemia i wan smol samting ya?” !Tru ya, hemia i no “wan smol samting”! Ol Livaet oli kasem fulap blesing finis. ?Oli stap lukaot wanem bakegen? Nekis tok blong Moses i soemaot samting we i stap long hat blong olgeta. Hem i se: “!Naoia yufala i stap traem tekem wok blong pris tu!” * (Namba 12:3; 16:9, 10) ?Ale, Jeova i mekem wanem, taem oli girap agensem ol man we hem i putumap?

Jaj Blong Isrel i Mekem Wan Samting

12. ?Ol man Isrel oli mas mekem wanem blong gohed blong frengud wetem God?

¹² Taem Jeova i givim Loa long Isrel, hem i talem se sipos oli obei long hem, bambae oli kam ‘ol tabu man blong hem.’ Hem i talem tu se oli save stap olsem ol tabu man sipos oli stap folem plan we Hem i putumap. (Eksodas 19:5, 6) !Be naoia, oli stap rebel! !Taswe, naoia i stret taem blong Jaj ya mo Man ya we i givim loa long Isrel, i mekem wan samting! Ale, Moses i talem long Kora se: “Tumora, yu wetem olgeta ya we oli biaen long yu, mo hae pris tu, bambae yufala evriwan i mas kam stanap long fes blong Haos Tapolen blong Hae God. Yufala evriwan i mas tekem ol sensa blong yufala i kam, nao bambae yufala i bonem insens long olgeta, blong givim i go long Hae  God blong mekem wosip long hem.”—Namba 16:16, 17.

13. (a) ?From wanem ol stronghed ya oli soem flas fasin taem oli bonem insens i go long Jeova? (b) ?Jeova i mekem wanem long ol stronghed man ya?

¹³ Loa blong God i talem se ol pris nomo oli gat raet blong bonem insens. !Taswe, ol Livaet ya we oli no pris oli no mas wantem nating blong bonem insens long fored blong Jeova, mo tok ya blong Moses i mas wekemap tingting blong ol stronghed ya! (Eksodas 30:7; Namba 4:16) !Be, no gat! !Kora mo ol man blong hem oli no tingting dip long tok ya! Long nekis dei, hem i “singaot olgeta man [we oli agensem Moses mo Eron] oli kam stanap long ples ya, oli stap fesem Moses mo hae pris long doa blong Haos Tapolen ya.” Baebol i talem se: “Nao Hae God i talem long Moses mo hae pris se, ‘Yutufala i muv i gobak. Bambae mi mi kilim olgeta ya naoia nomo.’ ” Be Moses mo Eron i bodaon long fes blong God mo askem strong long hem blong i no kilim olgeta man ya oli ded. Ale, Jeova i lesin long tufala. Be, long saed blong Kora mo kampani blong hem, “Hae God i sanem wan faea i kam we i laet bigwan, nao i bonem ol tu handred fifti man ya we oli tekem insens i kam, blong givim i go long hem.”—Namba 16:19-22, 35. *

14. ?From wanem Jeova i tekem strong aksin agensem ol man Isrel?

¹⁴ Samting we i narakaen, hemia se ol man Isrel we oli luk olsem wanem Jeova i kilim i ded ol stronghed ya, oli no lanem wan lesen from. “Long nekis dei, olgeta man oli kam wanples blong luk Moses mo Hae Pris Eron, blong tok agens long tufala, mo taem oli luk tufala, oli talem se, ‘!Ei! !Yutufala i kilim ol man blong Hae God ya!’ ” !Ol man Isrel oli tekem saed blong ol rebel ya! Naoia oli go bitim mak, ale Jeova i no moa gat longfala tingting long olgeta. I no moa gat wan man i save blokem hem, Moses mo Eron tu oli no save jenisim tingting blong hem. Ale, hem i girap i mekem wan rabis sik i kasem olgeta ya we oli no obei. “Namba blong olgeta we oli ded long taem ya i kasem fotin taosen seven handred, be oli no kaontem olgeta ya we oli ded long trabol blong Kora.”—Namba 16:41-49.

15. (a) ?From wanem ol man Isrel oli mas glad nomo we Moses mo Eron i lidim olgeta? (b) ?Stori ya i lanem yu long wanem samting long saed blong Jeova?

¹⁵ Sipos ol man ya oli bin tingting gud fastaem, i no nid blong oli ded. Sipos oli bin tingting long ol kwestin olsem: ‘?Hu tufala we i bin go luk Fero, nating se Fero i gat paoa blong kilim tufala i ded? ?Hu i bin talem long Fero blong letem ol man Isrel oli go fri? ?Hu nao we God i singaot hem afta we ol man Isrel oli gofri, blong hem i go toktok stret wetem enjel blong God antap long Hil ya Horeb?’ Tru ya, ol wok we Moses mo Eron i mekem finis, i pruvum gud se tufala i stap tru long Jeova mo tufala i lavem ol man Isrel. (Eksodas 10:28; 19:24; 24:12-15) Jeova i no glad we hem i mas kilim ol stronghed ya oli ded. Be taem hem i luk we ol man ya oli gohed nomo blong rebel, hem i no wet. (Esikel 33:11) Ol samting ya i impoten tumas long yumi tede. ?From wanem?

Luksave Rod We Jeova i Stap Yusum Tede

16. (a) ?Wanem samting i mas pruvum long ol man Isrel long faswan handred yia se Jisas nao hem i man we Jeova i putumap? (b) ?From wanem Jeova i sakemaot ol pris long laen blong Livae, mo hu i tekem ples blong olgeta ya?

¹⁶ Tede, i gat wan niufala “nesen” we Jeova i Jaj blong hem mo i Man blong givim loa long hem, mo i King blong hem. (Matiu 21:43, NW ) “Nesen” ya i stat long faswan handred yia K.T. * Long taem ya, i no moa gat haos tapolen blong Moses, be i gat wan naesfala tempol long Jerusalem. I gat ol Livaet tu we oli stap wok long haos ya. (Luk 1:5, 8, 9) Be, long yia 29 K.T., wan narafala tempol i stanap. Hemia wan tempol long saed blong spirit, we Jisas Kraes i hae pris blong hem. (Hibrus 9:9, 11) Bakegen, kwestin i stap se God bambae i putumap hu. ?Bambae hem i yusum hu blong lidim niufala “nesen” ya? Jisas i stap tru long God long olgeta bigfala traem we hem i kasem. Hem i lavem ol man. Mo tu, hem i wokem plante bigbigfala samting blong sapraes. Be bighaf blong ol Livaet long taem ya oli no wantem bilif long Jisas. Oli stronghed olsem ol olfala bubu blong olgeta bifo.  (Matiu 26:63-68; Ol Wok 4:5, 6, 18; 5:17) Ale, Jeova i sakemaot ol pris long laen blong Livae mo hem i putumap wan narafala kampani—wan grup blong pris we oli king semtaem. Kampani ya i stap kasem tede.

17. (a) ?Wanem kampani tede we i olsem ol pris mo King? (b) ?Jeova i stap yusum ol pris mo king ya blong mekem wanem wok?

¹⁷ ?Hu ya ol pris we oli king tu tede? Aposol Pita i ansa long kwestin ya long faswan leta we tabu spirit i pusum hem blong raetem. Pita i talem long ol tabu man blong Kraes se: “Yufala i ‘wan laen we God i jusumaot, wan kampani blong pris mo king, wan tabu nesen, ol man we oli blong God nomo, blong yufala i save talemaot ol gudfala fasin’ blong hemia we i singaot yufala i aot long tudak, i kam long nambawan laet blong hem.” (1 Pita 2:9, NW ) Ol tok ya oli soemaot klia se kampani blong ol tabu man blong Jisas, olgeta nao oli ol “pris mo king” ya we Pita i talem se oli “wan tabu nesen.” Kampani ya nao we Jeova i stap yusum blong tijim ol man blong hem mo lidim olgeta long saed blong spirit.—Matiu 24:45-47.

18. ?Olsem wanem ol elda oli joen wetem kampani blong grup ya we oli pris mo king?

¹⁸ Ol elda oli wok long nem blong grup ya we oli pris mo king. Long olgeta ples blong wol, ol elda oli mekem bigfala wok long ol kongregesen blong ol man blong Jeova. I stret we yumi sapotem olgeta fulwan mo respektem olgeta, nating se oli tabu man no nogat. ?From wanem i stret blong mekem olsem? From we, Jeova i yusum tabu spirit blong putumap ol elda ya long wok blong olgeta. (Hibrus 13:7, 17) ?Hem i mekem samting ya olsem wanem?

19. ?Olsem wanem yumi save talem se tabu spirit i putumap ol elda?

¹⁹ Baebol i kamaot from tabu spirit blong God. Mo fasin blong ol elda i laenap gud wetem ol fasin we Baebol i talem se oli mas gat. (1 Timoti 3:1-7; Taetas 1:5-9) Taswe, yumi save talem se tabu spirit nao i stap putumap ol elda ya. (Ol Wok 20:28) Oli mas save gud Tok blong God. Mo tu, oli mas gat fasin olsem Jaj ya we i Antap Olgeta, we Hem i putumap olgeta. Oli mas no laekem nating fasin blong mekem i moa gud long wan man i winim narafala man. Fasin ya i save mekem se oli no jajem gud ol man.—Dutronome 10:17, 18.

20. ?Wanem sam samting we i mekem se yu yu tinghae long ol elda we oli wok strong?

²⁰ !Yumi tinghae long ol elda blong yumi we oli wok strong! !Yumi no girap mo talem se oli no gat raet blong lidim yumi! Yumi trastem gud olgeta from we oli bin holemstrong long Jeova plante yia, samfala oli stat mekem wok blong hem longtaem finis. Olgeta ya oli strong oltaem blong rerem mo lidim ol miting blong kongregesen. Oli wok wetem yumi blong talemaot “gud nius blong Kingdom.” Mo oli givim advaes we i stanap long Baebol taem yumi nidim. (Matiu 24:14, NW; Hibrus 10:23, 25; 1 Pita 5:2) Taem yumi sik, oli kam luk yumi, mo taem yumi krae, oli mekem yumi harem gud bakegen. Oli no tingbaot olgeta fastaem, be oli stap tru long God mo sapotem wok  blong Kingdom oltaem. Jeova i stap givim tabu spirit long olgeta, mo hem i glad long olgeta.—Galesia 5:22, 23.

21. ?Oltaem ol elda oli mas tingbaot wanem samting, mo from wanem?

²¹ I tru, ol elda oli no stret gud olgeta. Oli save se oli sinman, taswe oli no traem blong kam bigfala masta blong ol sipsip ‘we God i putum long han blong olgeta.’ Oli gat defren fasin. Oli “wantem wok” wanples wetem ol Kristin brata blong olgeta, ‘blong mekem oli harem gud moa.’ (1 Pita 5:3; 2 Korin 1:24) Ol elda we oli wok strong mo oli gat tingting daon, oli lavem Jeova. Oli save se sipos oli traem folem ol fasin blong Hem moa, bambae oli givhan moa long kongregesen. From samting ya, oli traehad oltaem blong kam gud moa long ol fasin blong God, olsem lav, sore, mo longfala tingting.

22. ?Olsem wanem stori blong Kora we yumi bin stadi long hem i mekem yu yu trastem moa kampani blong ol man blong Jeova long wol ya?

²² !Yumi glad tumas we Jeova i stap rul long yumi, we Jisas Kraes i Hae Pris blong yumi, we kampani blong ol tabu pris blong King oli stap tijim yumi, mo we ol gudfala Kristin elda oli stap givim advaes long yumi! I tru se wan grup we ol man nomo oli stap lukaot long hem, i no save stret gud olgeta. Be yumi harem gud tumas blong joen long kampani blong ol gudfala Kristin brata sista blong yumi blong mekem wok blong God. !Olgeta ya oli glad blong obei long ol man we God i putumap!

[Ol Futnot]

?Yu Yu Bin Lanem Wanem?

• ?Wanem ol rod we Jeova i yusum blong lukaot gud long ol man Isrel?

• ?From wanem yumi no save talem wan eskius from fasin blong Kora blong girap agensem Moses mo Eron?

• ?Samting we Jeova i mekem long ol stronghed ya i lanem yumi long wanem samting?

• ?Olsem wanem yumi save soemaot se yumi gat tangkiu from ol plan we Jeova i putumap tede?

[Kwestin]

[Tok blong pija long pej 9]

?Yu yu stap tingbaot enikaen wok we Jeova i givim long yu olsem wan sas blesing?

[Tok blong pija long pej 10]

“?From wanem yutufala i putumap yutufala bakegen, se yutufala i hae moa long mifala?”

[Tok blong pija long pej 13]

Ol elda oli wok long nem blong grup we i olsem pris mo king