Golden Rul Hem i Wok Yet

Plante man oli ting se Golden Rul i wan tijing blong Jisas, be Jisas hem wan i talem se: “Ol tok ya we mi stap tijim ol man long hem, oli no blong mi nomo, oli kamaot long God we i sanem mi mi kam.”—Jon 7:16.

YES, stamba blong ol tijing blong Jisas, wetem ol tok blong Golden Rul, hemia Man we i Wokem olgeta samting mo we i sanem Jisas i kam, nem blong hem, Jeova God.

Long stat olgeta, God i wantem we ol man oli mekem i gud long ol narafala olsem we oli wantem narafala i mekem long olgeta. Fasin we Jeova i folem blong wokem ol man, i soemaot beswan eksampol olsem wanem blong tingbaot mo mekem i gud long ol narafala. “Nao hem i mekem man, mo man ya i tekem fasin blong hem, i olsem hem stret. Fastaem, hem i mekem tu man nomo, wan we i man mo wan we i woman.” (Jenesis 1:27) Hemia i min se God we i gat lav, i wokem ol man long wan wei we oli save soemaot smol ol nambawan fasin blong hem. Olsem nao, ol man oli save haremgud blong laef long pis, glad, mo oli save joengud wetem ol narafala—mo oli gat janis  blong gohed olsem blong olwe. Sipos oli trenem gud tingting we God i givim blong i save jajem olgeta, bambae samting ya i save lidim olgeta blong oli mekem i gud long ol narafala olsem we oli wantem ol narafala oli mekem long olgeta.

Man i Tingbaot Hem Wan

Long stat, ol man oli stretgud olgeta. ?Be wanem i hapen afta? Blong talem long wan sot tok, ol man oli stat blong soemaot rabis fasin blong tingbaot olgeta nomo. Bighaf blong ol man oli save gud stori long Jenesis japta 3, we i tokbaot wanem we faswan man mo woman, Adam mo Iv, oli mekem. Tufala i tingbaot tufala nomo taem tufala i letem Setan, we i agensem stret rul blong God, i pulum tufala. Nao tufala i sakemaot hae rul blong God, mo tufala i jusum blong stap independen mo mekem samting we tufala nomo i wantem. Taem tufala i tingbaot tufala nomo mo tufala i rebel, tufala i lusum plante samting, mo tufala i mekem se bigfala trabol i kasem ol pikinini blong tufala we oli no bon yet. Hemia wan klia eksampol blong soemaot frut we i kamaot taem yumi sakemaot tijing blong Golden Rul. Nao, “wan man nomo i statem fasin blong sin long wol ya. Mo from we hem i mekem sin, hem i ded. Be frut blong samting ya, hemia we ol man oli stap ded, from we olgeta oli mekem sin.”—Rom 5:12.

Nating se ol man oli tanem baksaed long ol rod we Jeova i soemaot wetem lav, be hem i no lego olgeta. Tingbaot, Jeova i bin givim Loa blong hem long nesen blong Isrel blong lidim olgeta. Loa ya i tijim olgeta blong mekem i gud long ol narafala olsem we oli wantem blong narafala i mekem long olgeta. Loa ya i talem wanem fasin oli mas mekem long ol slef, pikinini we i no gat papa, mo ol wido. Hem i eksplenem olsem wanem blong panisim ol man we oli faet, stil, mo we oli holem narafala man i stap olsem we i kalabus. Loa long saed blong klin fasin i soemaot we oli mas lukaotgud long helt blong narafala. I gat ol loa we oli tokbaot ol samting long saed blong seks tu. Jeova i ademap ol Loa blong hem long tok ya we hem i talem long ol man se: “Yufala i mas lavem ol man we oli stap raonabaot long yufala, mo yufala i mas mekem i gud long olgeta, olsem we yufala i stap mekem i gud long yufala nomo.” Tok ya nao we Jisas i yusum bakegen sam yia biaen. (Levitikas 19:18; Matiu 22:39, 40) Loa i tokbaot tu, wanem fasin oli  mas mekem long ol strenja we oli laef wetem ol man Isrel. Loa ya i talem se: “Bambae yufala i no mas spolem ol strenja, from we bifo, taem we yufala i stap long Ijip, yufala tu i strenja, mo yufala i haremsave fasin ya finis we strenja i stap kasem.” Blong talem long defren fasin, ol man Isrel oli mas soemaot kaen fasin long olgeta we oli trabol, from we olgeta tu oli bin kasem semfala trabol bifo.—Eksodas 23:9; Levitikas 19:34; Dutronome 10:19.

Taem ol man Isrel oli folemgud Loa ya, Jeova i blesem nesen ya. Aninit long rul blong Deved mo Solomon, nesen blong Isrel i kam rij mo ol man oli glad mo haremgud from we oli gat fulap samting. Baebol i talem se: “Ol man Isrel wetem ol man Juda, olgeta oli plante we plante, we man i no save kaontem olgeta, oli olsem sanbij long solwota. Oli gat plante kakae mo plante samting blong dring, mo oltaem nomo, oli stap glad. Oltaem ol man Juda mo ol man Isrel oli stap gud . . . mo evri famle oli save stap gud aninit long ol grep blong olgeta mo ol figtri blong olgeta”—1 King 4:20, 25.

Sore tumas, be ol man Isrel ya oli no stap longtaem long pis mo seftaem. Nating we nesen ya i gat Loa blong God, be ol man oli no folem; oli letem fasin ya we oli tingbaot olgeta wan nomo i blokem olgeta blong oli no tingbaot ol narafala. Fasin ya, wetem apostasi * i mekem se ful nesen mo olgeta wanwan oli kasem hadtaem. Biaen, long 607 B.K.T., * Jeova i letem ol man Babilon oli spolem kantri blong Juda, taon blong Jerusalem, wetem naesfala haos tempol we i stap long taon ya. ?From wanem? “Bambae mi [“Jeova,” NW ] mi sanem tok i go long ol man blong olgeta kantri long not, mo long man ya blong wok blong mi King Nebukadnesa blong Babilonia, blong oli kam faet agens long yufala long Juda, mo blong oli faet tu agens long ol man blong ol kantri we oli stap raonabaot long yufala. Bambae mi mi spolem kantri blong yufala, wetem olgeta kantri we oli stap raonabaot long yufala, nao bambae oli kam nogud olgeta. Mo olgeta we bambae oli luk samting ya, bambae oli fraet gud long hem.” (Jeremaea 25:8, 9) !Oli lego klin wosip blong Jeova nao oli kasem bigfala trabol from!

Eksampol We Yumi Mas Folem

Defren olgeta, Jisas i tijim Golden Rul mo i soemaot gudfala eksampol tu, from we hem i folem rul ya. Hem i rili tingbaot ol narafala. (Matiu 9:36; 14:14; Luk 5:12, 13) Wan taem, klosap long taon blong Naen, Jisas i luk wan wido woman we i harem nogud bitim mak, i stap go blong berem pikinini boe blong hem, wan nomo we hem i gat. Baebol i talem se: “Taem Masta blong yumi i luk woman ya, hem i sore tumas long hem.” (Luk 7:11-15) Buk ya, Vine’s Expository Dictionary of Old and New Testament Words i talem se toktok ya “sore tumas,” i karem mining se “hem i sore tumas gogo bel blong hem i soa from.” Hem i filim soa we i stap long hat blong woman ya, mo hemia i pusum hem blong mekem wan samting blong tekemaot soa ya. !Wido woman ya i kasem bigfala glad taem Jisas i mekem boe blong hem i girap bakegen long ded mo “i tekem boe ya, i givim i gobak long mama blong hem”!

Mo tu, blong mekem samting we God i wantem, Jisas i rere blong harem nogud mo givim laef blong hem olsem wan ransom, blong ol man oli save kam fri long sin mo ded. Hemia nambawan eksampol blong soem olsem wanem blong laef folem Golden Rul.—Matiu 20:28; Jon 15:13; Hibrus 4:15.

Ol Man We Oli Folem Golden Rul

?I gat sam man tede we oli rili folem Golden Rul long laef blong olgeta? Yes i gat, mo ol man ya oli no soem fasin ya nomo taem evri samting long laef blong olgeta i gohed gud. Olsem long Seken Wolwo, taem ol Nasi oli rul long Jemani, ol Witnes blong Jeova oli holemtaet bilif blong olgeta long God mo lav we oli gat long ol man raonabaot long olgeta. Oli no wantem brekem Golden Rul. Taem gavman i folem wan plan blong agensem mo spolem ol man Jiu, ol Witnes blong Jeova oli gohed nomo blong folem Golden Rul. Taem oli stap long ol rabis kalabus tu, oli gohed blong tingbaot ol narafala man. Oli no gat plante kakae, be oli serem samting we oli gat wetem ol narafala we oli hanggri tumas, nating se ol narafala ya oli man Jiu no oli kamaot long wan defren laen bakegen. Mo tu, taem gavman i givim oda long olgeta blong oli karem masket mo kilim narafala i ded, olgeta oli no wantem mekem olsem, sem mak olsem we oli no wantem blong ol narafala i kilim olgeta oli ded. ?Olgeta oli mas laekem ol narafala man olsem we oli laekem olgeta wan, taswe olsem wanem oli save kilim ol man ya i ded? From we oli no wantem mekem samting ya, oli go long rabis kalabus, be tu, plante long olgeta oli ded.—Matiu 5:43-48.

Taem yu stap ridim buk ya, yu stap haremgud long wan narafala samting we i soemaot se Golden Rul i wok. Ol Witnes blong Jeova oli kasem save se tede plante man oli stap harem nogud bitim mak. From  samting ya, oli girap mo oli givhan long ol narafala blong oli kasem save long ol gudfala advaes mo promes we oli stap long Baebol. Naoia, wan bigbigfala wok blong tijim ol man i stap gohed long olgeta ples blong wol. ?Wanem frut i kamaot from wok ya? Olsem profet tok blong Aesea 2:2-4 (NW ) i talem, “plante pipol,” yes i gat bitim sikis milian man long olgeta ples long wol, we Jeova ‘i tijim [olgeta] long ol fasin blong hem, mo [oli] wokbaot long rod blong hem.’ Long saed blong spirit, oli tanem “naef blong faet blong olgeta i kam aean blong brekem graon long garen, mo ol spia blong olgeta i kam sisis blong katem han blong tri.” Nating se tede i gat fulap trabol, olgeta ya oli faenem pis mo seftaem.

?Olsem Wanem Long Yu?

Traem tingbaot fasin blong harem nogud mo safa we i stap long wol tede, from we fulap man oli sakemaot Golden Rul. Samting ya i stat long garen blong Iden, taem Setan i rebel. I no longtaem nao bambae Jeova i jenisim samting ya. ?Bambae hem i mekem samting ya olsem wanem? Baebol i talem se: “From samting ya nao Pikinini blong God i kamtru, blong hem i brekemdaon ol wok we Setan i mekem.” (1 Jon 3:8) Samting ya bambae i kamtru aninit long rul blong Kingdom blong God. Jisas Kraes, man we i tijim mo i folem Golden Rul long laef blong hem, mo we i waes mo i gat paoa, hem nao bambae i King long Kingdom ya.—Ol Sam 37:9-11; Daniel 2:44.

King Deved blong Isrel bifo, i talem se: “Naoia mi mi olfala, mi stap longtaem, be neva mi luk wan gudfala man we Hae God i lego hem, no ol pikinini blong man olsem we oli stap asaskem kakae olbaot. Oltaem ol man olsem oli glad nomo blong oli stap givim olting blong olgeta i go long ol man, mo oli save letem ol man oli kam karem olting blong olgeta blong yusum fastaem. Mo ol pikinini blong olgeta oli olsem rod we God i stap yusum blong mekem i gud long olgeta mo long ol man raonabaot long olgeta.” (Ol Sam 37:25, 26) ?I no tru we tede bighaf blong ol man oli wantem tumas blong kasem samting, be oli no wantem ‘givim olting blong olgeta i go long ol man, mo letem ol man oli kam karem olting blong olgeta blong yusum fastaem’? I klia se, taem yumi folem ‘Golden Rul,’ hem i save lidim yumi blong kasem trufala pis mo seftaem, from we hem i givim janis long yumi blong kasem blesing naoia mo long fiuja, aninit long Kingdom blong God. Kingdom blong God bambae i tekemaot fulwan, fasin ya we man i tingbaot hem wan nomo, mo rabis fasin long wol, mo wan niufala fasin blong laef we i kamaot long God bambae i tekem ples blong hemia we i stap naoia. Long taem ya, olgeta man bambae oli glad blong folem Golden Rul.—Ol Sam 29:11; 2 Pita 3:13.

[Ol futnot]

[Tok blong pija long pej 5]

Jisas i no tijim Golden Rul nomo, be hem i soemaot nambawan eksampol taem hem i folem rul ya long laef blong hem

[Tok blong pija long pej 7]

Bambae yumi save kasem trufala pis mo seftaem sipos yumi folem Golden Rul long laef blong yumi